Ov, Antu Awonsu Awamp Ayiling Mwiur?

KUPWA kwa Yesu kudia yakudia ya nsudiel ni atwimbuy end urel kurutu kwa kumujip, Yesu wayikana kuyifut kusutil ku kuyinkish ndond mwiur. Walonda anch: “Mu chikumbu cha Tatukwam mudi jindond jivud ja kushakam; anch kichidiap mwamu ing nakulejilany kal; mulong niyil ni kukurijekinany jindond.” (Yohan 14:2) Mulong wak Yesu wayinkisha ndond mwiur? Yom ik yikezau kasalamu?

Yesu wading wij mudimu wa pakampwil ukusalau in kwilej end. Pa urel wawiy umwing walonda anch: “En udiany in kudandamen nam mu yoziu yam; chawiy am nakutondidilany kal en want, mudi mwantondilau am kudi Tatuku” (Luka 22:28, 29) Nzamb wamukana Yesu anch ukwikal Mwant ukeza kuwanyish maswir Mapandakena Kujimb ma antu—winyikel uwamp. Yesu ukez kuyikol antu amena mar ni kuyishesh awiy ayimeshina mar. Ap anch antu akuyikelay Yesu akwikal ndond yawonsu ni “kwisudiel kwa ngand,” ditang diend dikwikal mwiur.—Kuseng 72:4, 8; Daniel 7:13, 14.

Pakwez, Yesu kakuyikelap amwinend. Chawiy lel, chayikanay atwimbuy end ndond mwiur. Awiy antu atondau akusambish mulong wa ‘kuyikel pa mangand mud ant.’—Kuburik 5:10.

Antu inch ayila mwiur? Mudi muchidinga mu winyikel win wawonsu, anyikel mu Want wa mwiur wa Nzamb adi akemp mu kwisikej nich antu awonsu akushakama mwinshin mwa wintakel wau. Piur pa antu akeza kayikel nend, Yesu ulondin anch: “Kangal wovany wom, en kachisak ka amikoku, mulong chinech chimusangarishil Tatukwen kukwinkishany en want.” (Luka 12:32) “Kachisak ka amikoku” kinak kakwet uvud wa amikoku 144 000. (Kuburik 14:1) Uvud winou udi ukemp mu kwisikej nich uvud wa tutikit twa antu akeza kashakam chikupu pa divu mudi antu ashinshamena akuyikelau kudi Want.—Kuburik 21:4.

Chawiy lel, kadiap antu awamp awonsu ayilinga mwiur. Piur pa David Mwant muwamp, kambuy Pita walonda patok anch: “David kamukandjikap mwiur.” (Midimu 2:34) Yohan Mubabatish wading muntu muwamp. Pakwez Yesu walejana anch kakutambulap katumb ka kuyikel mud mwant mwiur. Yesu walonda anch: “Pakach pau avalau kudi amband, kikwadingap mukwau umupandaken Yohan Mubabatish kujimb; ching kikepishidila mu want wa mwiur kawiy kamupandakenamu ndiy kujimb.”—Mateu 11:11.

Ov, Ukutambul Difut dia Antu Awamp?

Chakwel kutambul difut dia kushakam pa divu chikupu, ov, chom ik chifanyidinay muntu kusal? Yesu walonda anch: “Nzamb wakata ngand, ndiy wapana Mwanend wa kuval kwend umwing, chakwel mwawonsu ukwitiya kudiay ndiy kakujiyip, pakwez ukwet kal mwom wa chikupu.” (Yohan 3:16) Ijik anch rukat ra Nzamb mulong wa ngand ramubachika kutwishish mwom wa chikupu kud antu awonsu, pakwez ching kusu antu ‘akwitiyija’ awiy chakin kamu akutambula difut dined.

Ritiy rifanyidin kwimen pa uyakin wakin. (Yohan 17:3) Ukutwish kumekesh anch udi muntu muwamp kusutil ku kwilej yivud piur pa rutong ra Yehova mulong wa antu. Twishish ritiy rey mu yom wilejina rikubachika ku kuyisadil. Ni ikal nich kashinsh anch mutapu wa kushakam chikupu awanzuril chakin kamu kud ey.

[Kamushet kadia pa paj wa 7]

Yom ik Yilondilay Bibil?

Chipul:

Yom ik yikata kuyishikenang antu awamp pafilingau?

Chakul:

“Antu afu kijap chom.”—MULEJ 9:5, MN.

Chipul:

Ov, richingej ik rikwetau antu awamp mulong wa machuku ma kurutu?

Chakul:

“Muten ukat kwez ukeza kateshau awonsu adia mwi nzay chidjimin cha dizu didiend [Yesu] ni kubudik.”—YOHAN 5:28, 29.

Chipul:

Ov, antu awamp avud akushakam kwisu?

Chakul:

“Mwin kutentam ukez kaswan ngand, ukez kashakamimu chikupu.”—KUSENG 37:29.