Ov, Chom Ik Chisadinay Nzamb?

“A! [Yehova, NW] mulong wak ey chiudia kulemp? Ov, mulong wak chiujingamina pa chisu cha mar?”a​—KUSENG 10:1.

K UTESH kwa manans majim ma jinsangu kumekeshin patok anch tudi pa “chisu cha mar.” Pakata kushiken mar ku chikumbu​—pakata kutushiken ayinetu chisum, chom chiyimp, ap rufu ra mukatish netu—tukutwish twiyipul anch, ov, Nzamb umening? Ov, ukat kubangin? Ov, Kadinga—kwap?

Pakwez, watonginap kal anch mutapu wetu wa kumuchingejin Nzamb ukutwish kwimen pa chitongijok chiyimp? Chilakej: Tongin bil piur pa mwanikanch wovila ushon mulong tatukwend uyil ku mudimu. Mwan winou umuburedin tatukwend ni usotin achirika ku chikumbu. Mwan utongin anch wamulik kal. Muten wakabuj, udandamedin kwipul anch, “Tatuku udi Kwisu?”

Tukutwish kujingunin kapamp kamwing anch mwan winou widimbin mu yitongijok yend. Pakwez, pa chisu chinench chawonsu, tatukwend usadin mulong wa kuwanyish maswir ma dijuku diawonsu. Ov, tukutwish kwidimb chilik chimwing mu yitongijok yetu pitudidila anch: “Ov, Nzamb udi kwisu?”

Chilakej, antu amwing akutwish kusot anch Nzamb ikala mwin kujipan ukweta mudimu wa kusambish wa kuyipup antu asadila yom yiyimp. Antu akwau amumen Nzamb kwikal mukemp nakash kumupandakanamu mukish utazukinau anch Santa Claus wa mwiur ukweta mudimu wa kulet yipan mudi—mudimu, mbay wa uruw, ap kuwinish ku masengan ma nfalang.

Yitongijok yiney yawonsu yaad yimekeshin anch ang Nzamb katenchikinap yom kapamp kamwing ap anch katwinkishinap dilau tumwitina, kabanginakwap piur pa mar metu ni kijap maswir metu. Pakwez, kwikil chom ap chimwing chikutwishau kuwejin ku uyakin! Chom chakin chidi anch, pa chisu chawonsu Yehova Nzamb usadining mulong wa kuwanyish maswir ma dijuku diawonsu dia antu, ap anch chidiap mu mutapu witinau antu avud.

Ov, Chom ik chisadinay Nzamb, katat? Chakwel kwakul ku chipul chinech, tufanyidin kuchirik kwinsambishil kwa rusangu ra antu pasheshika urund wa antu ni Nzamb​—pakwez nich ruchingej ra kuuchirish.

Yibudikin Yiyimp ya Chitil

Tongin bil chikumbu chalikau kal mu mivu yivud. Malat mabuzokin kal, yis yawil kal kwau, ni rumbumbu ra pol rasheshikin kal nakash. Pakusambish, chikumbu chinech chading chiwamp nakash​—pakwez kichalabap. Anch washinshikin pa mutapu uchiyipina nakash, kuchirijek ukwikalap mudimu uswapela; ukusadikap kapamp kamwing.

Katat tongin bil piur pa kusheshik kwayishikena antu mu mivu 6000 yasutina kudiosh payibachikau Adam ni Eve kudi Satan spiritu wakad kumekan ku mes kumubwambwil Nzamb. Kurutu kwa milong yiney, Ambay a uruw a kusambish ading ni ukash wa mujimbu uwanyidina ni ruchingej ra kushakam chikupu pamwing ni anau elau kuval mu machuku ma kurutu. (Disambishil 1:28) Pakwez pasalau chitil, Adam ni Eve ayipisha dijuku dia antu dikeza kuvadik.

Kangal walik kukwat nich usey yibudikin yiyimp ya kubwambwil kwinoku. Bibil ulondin anch: “Yitil yandamina mu mangand ku muntu umwing ndiy kamu Adam, chad yitil yend yaleta rufu.” (Rom 5:12) Kupwa kwa kulet rufu, chitil chashesha urund wetu ni Sakatang wetu ni chashesha mujimbu, manangu ni yovil yetu. Mudi chibudikin, mwikadil wetu udi chilik chimwing ni chikumbu chasheshika kal. Job muntu utentamina wisambina chakin kamu mu wiswimp piur pa mwikadil wetu palejanay anch muntu ukwet “mwom wa mivu yikemp pakwez yizwil sens nich mar.”​—Job 14:1.

Ov, Nzamb wayilika antu pasalau Adam ni Ev chitil? Bwat kwau! Pakwez, kudiosh pinipa ni katat, Tatukwetu wa mwiur usadining mudimu mulong wa kukwash dijuku dia antu. Chakwel tusangera uwamp utusadidilay, shinshikinany pa yom yisatu ya usey mulong wa kurijek chikumbu ni mutapu yikwatijadina chimwing ni chimwing ni yom yasalay Nzamb mulong wa kuyirijek antu.

1 Kupwa kwa kushinshikin nawamp chikumbu chasheshika kal, mwin chikumbu ufanyidin kukwat chiyul cha kuchirijek ap kuchiumbul.

Kapamp kamwing kupwa kwa kubwambwil mu Eden, Yehova Nzamb walejana rusot rend ra kuyirijek antu. Ndiy wamuleja spiritu wakad kumekan ni mes wayibachika kubwambwil anch: “Am nikez katek rukuny pakach pey ni mband ni pakach pa mbut yey ni mbut ya mband. Ndiy ukez kakuchany ku mutu wey ni yey ukez kamusum ku kapolantundu.”​—Disambishil 3:15.

Mu mazu minam, Yehova washilamu anch ukez kamujip wasambisha kubwambwil mu Eden. (Rom 16:20; Kujingunik 12:9) Chikwau kand, Yehova watakela kulejan anch “mbut” ya machuku ma kurutu yikez kayikol antu ku chitil.b (1 Yohan 3:8) Kushilamu kwinoku kumekeshin uyakin umwing wa usey anch: Nzamb ukez karijek, kakezap kushesh yatangay. Pakwez kuyirijek antu kuswiridin chisu.

2 Mwin kutung utenchikin yom yimekeshina patok mutapu ukusadika mudimu wa kurijek.

Yehova Nzamb wayinkisha in Isarel mukand wa yijil ni wasadisha tempel mwadingau ni kumwifukwil ndiy. Bibil ulondin anch: “Yijil yiney yidi kusu mwizuzwimb wa yom yikweza kurutu.” (Kolosay 2:17) Mudi yatenchikau, ading chifanikesh cha chom chimwing chijim.

Chilakej, in Isarel apan ya kupesh ya anam mulong wa kwit dilikishin ku yitil yau. (In Levi 17:11) Chisal chinech chafanikesha chakupesh chijim chikezau kupan mu yitot ya mivu kurutu​—chakupesh chikeza kuyinkish antu kukolik kwakin.c Kutung kwa tabernacle ni tempel mwadingau ni kwifukwil in Isarel kwafanikesha jinzau jelay kulondul Mesia ukweza, kudiokal ku rufu rend ra chakupesh kushik ni pakezay kuya mwiur.—​Tal pa paj wa 7.

3 Mwin kutung ukutond muntu ukeza kulondul yatenchikinau kal ni ukeza kurijek.

Yesu wading Mesia washilaumu ukeza kulondul jinzau jatenchikau kudi yakupesh ya in Isarel ni ukeza kupan mwom wend chakwel kuyikol antu. Chawiy lel, chamutazukau Yesu kudi Yohan Mubatish anch: “Mwan a mukoku wa Nzamb ukata kudiosh yitil ya antu.” (Yohan 1:29) Yesu witiya kwa kwisotil mudimu winou. Ndiy walonda anch: “Am kinadiokalap mwiur kusal rusot ram amwinam, pakwez neza mukusal rusot rendendiy wantuma am.”—​Yohan 6:38.

Kudi Yesu kusal rusot ra Nzamb kwadingap ching kusu “kupan mwom wend mulong wa kuyikwol antu avud” pakwez, kwadinga kand kuyitond antu adinga ni kumulondul mulong wa Want. (Mateu 20:28; Luka 22:29, 30) Want winou wawiy ukusadilay Nzamb mulong wa kuwanyish rutong rend mulong wa antu. Uruu ulejena piur pa Want wa Nzamb autazukin anch “rusangu ruwamp” mulong ulejen anch Nzamb watenchikin kal winyikel mwiur ukeza kutakel milong ya divu!​—Mateu 24:14; Daniel 2:44.d

Mudimu wa Kurijek Udandamedin

Kurutu kwa kuya mwiur, Yesu wayileja in kwilej end anch: “Yangany ku antu a michid yawonsu, yikarumunany kwikal in kwilejan. Yibatishany mu dijin dia Tatuku, ni dia Mwan ni dia mwiku utumbila . . . Chawiy, am nikwikal ni yenen machuku mawonsu, djat ni kwisudiel kwa mangand.”​—Mateu 28:19, 20, MN.

Chawiy lel, kuyirijek antu kwapwap nich rufu ra Yesu bwat. Kukez kudandamen djat ni ku “disudiel dia mangand”​—pa chisu chikusambisha Want wa Nzamb kutakel pa divu dietu. Chisu chinech chidi piswimp. Twij mwamu, mulong chijingidij chatakelau kulejan kudi Yesu piur pa “disudiel dia mangand” chimeken nlel unou.e​—Mateu 24:3-14; Luka 21:7-11; 2 Timote 3:1-5.

Nlel unou, mu jingand 236, Atuman a Yehova aziyidil kwimbil ya Yesu ya kulejan rusangu ruwamp ra Want wa Nzamb. Chawiy lel, gazet utangina amuchapin mulong wa kukukwash wileja yom yivud piur pa Want ni pa yom yiukeza kusal. Pa paj wa 2 wa nimero ni nimero wa Chinong cha Kalam, ukez katan mazu minam: “Chinong cha Kalam . . . Chiyongojin antu nich rusangu ruwamp rilondila anch Want wa Nzamb, udi winyikel wakin uyikedila mwiur, ukupwish tuyimp twawonsu ni ukukarumun divu diawonsu dikal paradis. Chikasikeshidin ritiy mudiay Yesu Kristu, wafa chakwel etu tutwisha kutambul mwom wa chikupu ni uyikedil katat mudi Mwant wa Want wa Nzamb.”

Nlel unou tukutwish kudandamen kutesh jinjit ja in kwakamishan ni kujipan (terrorisme) ap kusheshik kudiokila kuyitangil, ap yom yiyimp yikutwish kutushiken. Pakwez dilejan dia Bibil dikez ku kwinkish kashinsh anch Nzamb katulikinap. Pakwez, “Nzamb kadiap kulemp ni muntu mwawonsu.” (Midimu 17:27) Ni kushilamu kwend kwa kurijek yom yashadishau amvaj etu akusambish kukez kuwanyin.​—Isay 55:11.

[Mazu madia kwishin kwa paj]

[Tabulo/​Chipich chidia pa paj wa 7]

(Chakwel kutan mazu mawonsu, tal mu mukand)

“Mwizwizwimb wa yom Yakin”​—Chafanikeshina Dizang

CHINTAMBU

Rusot ra Nzamb ra kwitiy yakupesh ya Yesu.— HEBEREU 13:10-12.

MWIN KUPESH MUJIM

Yesu.​—HEBEREU 9:11.

1 Pa Dichuku dia Kuchakwish, mwin kupesh mujim wadinga ni kupan ya kupesh mulong wa yitil ya antu.—IN LEVI 16:15, 29-31.

1 Mu Nisan 14, wa mu 33 C.C., Yesu wapana mwom wend mulong wetwetu.​—HEBEREU 10:5-10; 1 YOHAN 2:1, 2.

NDOND YITUMBILA

Mwikadil wa Yesu wa kuvadik muspiritu mud mwan wa Nzamb.​—MATEU 3:16, 17; ROM 8:14-17; HEBEREU 5:4-6.

DISWIN

Mujimbu wa Yesu, mupak wading waurila mwom wa pa divu ni wa mwiur.​—1 KORINT 15:44, 50; HEBEREU 6:19, 20; 10:19, 20.

2 Mwin kupesh mujim wadinga ni kusut mutambu ukwau wa diswin diadinga diaurila Ndond Yitumbila ni Ndond Yitumbila Nakash.

2 kupwa kwa kuvumbuk kwend, Yesu ‘wasuta kumutambu ukwau wa diswin’ pakandamay mwiur “ushich mwinimwa kurutu kwa Nzamb mulong wetwetu.”​—HEBEREU 9:24-28.

NDOND YITUMBILA NAKASH

Mwiur.—HEBEREU 9:24.

3 Padiay mwin Ndond Yitumbila Nakash, win kupesh mujim wadinga ni kuzizil mash mamwing ma chakupesh kurutu kwa mushet wa uman.​—IN LEVI 16:12-14.

3 Kusutil ku kupan usey wa mash mend, Yesu watwinkisha kuchakwish kwakin mulong wa yitil yetu.​—HEBEREU 9:12, 24; 1 PITA 3:21, 22.