Tanany Diking Pakach Pa Antu A Nzamb

“Nikukushiman mukach mwa antu avud.”—KUS. 35:18.

1-3. (a) Ov, chom ik chikutwisha kuyitwal in Kristu amwing ku kushesh urund wau ni Yehova? (b) Kwisu kukutwishau antu a Nzamb kutan diking?

PADINGAU mu machuku ma konje, Joe ni mukajend adinga akat kwisay mu mem mwadinga ansh a ulombu wawonsu ni kujimb kwa mitapu yawonsu. Adinga ni kwisay piur piur ni kutalijol uwamp wa yidia mu mem. Pasambishau kwandam kanjimu mu mem mukajend a Joe wasambisha kulond anch, “Nitongin anch twasambish kal kuya kulemp.” Pakwez, Joe wamwakula anch, “Lik kwakam, nij yinisadina.” Pasuta chisu chikemp Joe wakashimuka anch, ‘Ov, ansh awonsu aya kal kwisu?’ Nich wom wamana mulong wak kayimenap. Wamana insh mujim utazukiningau anch reken ukat kwez kurutu. Wading wezin chakwel amudia. Pashikay piswimp nend, insh winou wakarumuka waya kwindjing.

² Mwin Kristu ukutwish kuwil mu mupit wa maku ma ditechik dia yom dia Satan—kwipuwangesh, mudimu, yom tukweta—pakwez kakutwishap kuman anch wandamin kanjimu mu mwikadil wa ubaj. Joe udia mukurump mwin Kristu ulondin anch: “Yom yanshikena yambachika nitongina piur pa arund tukata kutond, tufanyidin kwisayin mwin ndond ya diking ni muwapila​—mu chikumangen!” Kangal kwandam kanjimu mu mem malepina, mu ukutwisha kwitek amwiney kulemp ni chikumangen ni kusheshik. Piujingunina anch wasambish kal kuya kulemp ni chikumangen, chirik kapamp kamwing, ‘mu mem ma diking.’ Anch bwat, ukutwish washesh urund wey ni Yehova.

³ Nlel unou, mangand madi ndond ya ubaj kudi in Kristu. (2 Tim. 3:1-5) Satan wij anch kwamushadin kal machuku makemp, ni udi tayad chakwel ayida antu akad kubabal. (1 Pita 5:8; Kuj. 12:12, 17) Pakwez, tuburedinap diking. Yehova wayinkishin kal antwend diking dia muspiritu​—chikumangen cha in Kristu.

4, 5. Ov, mutapu ik ukatau antu avud kwov piur pa machuku mau ma kurutu, ni mulong wak?

⁴ Antu aletining kwau diking dikweta mipak​—dikutwish kwikal dia kumujimbu ap dia yovil. Antu avud amening anch diking diau dia kumujimbu aditekin mu ubaj kudi yisal yiyimp, chisum, mashakamin makasikena nakash, ni ap milong yisadikina mwindond mudiau. Antu awonsu arishin nich milong ya upal ni mayej. Ni antu akweta midimu, yikumbu, nfalang jivud, ni ukash kanang wa mujimbu akutwish kwiyakamish pa uvud wa mivu yikwikalau nich yom yiney.

⁵ Antu avud katwishap kutan diking dia yovil. Cha ushon, antu achingejina kutan chisambu ni kutwish mu uruw ni mu dijuku amana anch kuchingejin kwau kwading kwa makasu. Pa mulong wa kutan diking dia muspiritu, antu avud andamininga mu ma egliz ayishadishin kal kwau, pakatau kwipul piur pa usey wa umutakel watambulau. Asotining kwijik pakampwil piur pa yisal yiyimp ni malejan ma makasu ma antakel a marelijo mau. Chawiy lel, antu avud amen anch chiyiwapidil kwau kuchingejin mu siyans ap mu rusot ruwamp ni mu muchim uwamp wa ambay nau. Chawiy lel, chishimokishinap, anch antu avud kakwetap ruchingej ap kasotinap kwau kutongijokin nakash pa yikeza kuyishiken mu machuku ma kurutu.

6, 7. (a) Ov, chidi nchik piur pa kushalijan pakach pa yitongijok ya antu amusadidila Nzamb ni akad kumusadil? (b) Ov, chom ik tukeza kushinshikin?

⁶ Kudi kushalijan mudi ik pakach pa yitongijok ya antu adia mu chikumangen cha in Kristu ni akad kwikalamu! Ap anch etu, antu a Yehova, tufanyidin kurish ni milong yivud ya chilik chimwing ni milong yirishinau nich amutej netu, mutapu wetu wa kurish nich ushalijadin nakash. (Tang Isay 65:13, 14; Malaki 3:18.) Ov, mulong wak? Mulong tutanin mu Bibil kurumburil kusangareshina piur pa mwikadil wa antu, ni tudi awanyishinau chakwel kurish nich yikokujol ni milong ya mwom. Mudi chibudikin, twakaminap nakash piur pa machuku ma kurutu. Kwikal in kumwifukwil Yehova kutwinkishin diking dia kwipuk yitongijok ya chamwamu ni yakad kudiokal mu Bibil, yisal ya masandj, ni yibudikin yiyimp ya yisal yiney. Yid ya chikumangen cha in Kristu yimen chisambu chakad kwikal kudi antu akwau.​—Isa. 48:17, 18; Fil. 4:6, 7.

⁷ Yilakej yimwing yikutwish kutukwash kutongijokin pa kushalijan kwa diking dikwetau antu amusadidila Yehova ni antu akad kumusadil. Yilakej yiney yikutwish kutubachik kushinshikin pa yitongijok ni yisal yetu ayinetu ni kushinshikin anch tukutwish pamwing ap kusadil chiyul cha Nzamb chawonsu, chiletinau mulong wa kutuking.​—Isa. 30:21.

“Ritiy Ram Radinga Piswimp ni Kupwa”

8. Ov, chom ik chifanyidinau kusal atushalapol a Yehova chisu chawonsu?

⁸ Kudiosh kwinsambishil kwa rusangu ra antu, antu atonda kumusadil ni kumuziyil Yehova asota kwipuk urund wa piswimp ni antu akad kumusadil. Chikwau kand, Yehova walejana anch kukez kwikal rukuny pakach pa in kumwifukwil ni antu amulondwila Satan. (Gen. 3:15) Mulong wa kujijaman kwau mu yany ya Nzamb, antu a Nzamb asala yom yishalijadina ni antu ayinyingumukina. (Yoh. 17:15, 16; 1 Yoh. 2:15-17) Kujijaman kwa mutapu winou kwadingap kuswapela. Chakin kamu, antu amwing pakach pa atushalapol a Yehova adinga ni chisu cha kusadil manangu ma kulondul njil ya mwom wa kwipan.

9. Lejan milong yarishay nich nfund a Kuseng 73.

⁹ Kashalapol umwing wa Yehova wasambisha kwiyakamish amwinend anch wakwata chiyul cha manangu wadinga nfund a Kuseng 73, pamwing ap umwing wa anenday Asaf. Nfund a Kuseng wipula mulong wak antu ayimp ayil kurutu, avudishin mapit, pa chisu chinicha antu amusadidila Nzamb amen mar ma yoziu ni yikokujol yikash.​—Tang Kuseng 73:1-13.

10. Mulong wak yipul yalangwishay nfund a kuseng yidi ya usey kudi ey?

¹⁰ Ov, wiyipulap kal amwiney yipul mudi yiney mudi mwiyipulay nfund a Kuseng? Anch chidi mwamu, kwikil kuswir kwa kwifish nich nakash ap kutong anch washadish kal ritiy rey. Chawiy lel, atushalapol avud a Yehova, kuwejinaku ni amwing afunda Bibil, ading niyawiy ni yitongijok ya chilik chimwing. (Job 21:7-13; Kus. 37:1; Jer. 12:1; Hab. 1:1-4, 13) Chakin kamu, antu awonsu asotina kumusadil Yehova afanyidin kutesh ni kwitiyij chakul ku chipul chinech: Ov, kumusadil ni kumuziyil Nzamb chawiy chom chiwamp nakash chitufanyidina kusal? Chipul chinech chimekeshin mulong walangwishay Satan mu chir cha Eden. Chimedin pa mulong utadila mangand mawonsu wa ukaleng wa Nzamb. (Dis. 3:4, 5) Chawiy lel, etwawonsu tufanyidin kushinshikin yipul yalangwishay nfund a Kuseng. Ov, tukutwish kuyovil antu ayimp ris mulong mwom wau umeken kwikal wakad milong? Ov, tukutwish ‘kulik’ kumusadil Yehova ni kuyimburij? Mwawiy chakin kamu musotinay Satan anch etu tusala.

11, 12. (a) Ov, mutapu ik wapandakana nfund a kuseng kwidjidjek kwend, ni chinech chitufundishin ik? (b) Chom ik chakukwasha chakwel ushikena ku chitongijok cha chilik chimwing ni nfund a Kuseng?

¹¹ Ov, chom ik chamukwasha nfund a Kuseng kupandakan kwidjidjek kwend? Ap anch wadinga piswimp ni kudiokal mwinjil yitentamina, chitongijok chend chakarumuka pandamay “mu chikumbu cha [Nzamb]”—pibombay ni antu amuziyidila Nzamb mu dizang ap mu tempel ni kutongijokin pa rutong ra Nzamb. Chamekana patok kudi nfund a Kuseng anch ndiy kasotap anch yibudikin ya chilik chimwing ni ya antu ayimp yimushikena ni ndiy. Ndiy wamana anch njil yilondwilau ni yitondinau mu mwom yiyitekin “mu jindond jisidila.” Antu awonsu ayimp amulikina Yehova, amanau kudi nfund a Kuseng, akez kushiken chakin kamu ku “kufa swa rufu ruyimp,” pakwez antu amusadidila Yehova ndiy ukez kayilam. (Tang Kuseng 73:16-19, 27, 28.) Waman kal pakad ntad uyakin wa mazu minam. Kwikal ni want ipau ni kulik kuziyil ku chijil cha Nzamb kukutwish kuyisangaresh antu avud, pakwez yibudikin yiyimp ya njil yiney yishikijining chakin kamu ku rufu.​—Gal. 6:7-9.

¹² Ov, chom ik chikwau twilejina kusutil ku yom yamushikena nfund a kuseng? Ndiy watana diking ni manangu pakach pa antu a Nzamb. Ndiy wadandamena kutongijokin patok ni mu mutapu ufanyidina payay kwindond kwadingau ni kumwifukwil Yehova. Chilik chimwing nlel unou, tukutwish twatan in kulet yiyul akweta manangu ni kusanger yakudia yiwamp ya muspiritu mu yikumangan ya chikumangen. Chawiy lel, Yehova uyilejin atushalapol end anch afanyidin kuya ku yikumangan ya in Kristu. Kwawiy kukezau kutan dikasikesh ni kukezau kuyibachik kusal yom ni manangu.—Isa. 32:1, 2; Heb. 10:24, 25.

Tond Nich Manangu Arund Ney

13-15. (a) Ov, yom ik yamushikena Dina, rumburil? (b) Mulong wak kuta urund ni ambay in Kristu didi diking?

¹³ Dina, changandin wavalay Yakobu wadinga chilakej cha antu amana mar nakash mulong wa kuta urund ni antu a mangand. Rusangu ra Disambishil risambina piur pendend ritulejen anch ndiy wadinga ni chaku cha kuta urund ni ayangadim a mu kanan adinga piswimp ni kwindond kwashakama dijuku diend. In kanan kadingap ni kuziyil ku yijil ya piur ya mwikadil mudi in kumwifukwil Yehova. Pakwez, uman wa pa chirungu cha pasak umekeshin anch in kanan mwingand yau mwading mwizwil nich kwifukwil kwa akish, yisal yiyimp, difukwil dijondila dia masandj, ni chisum. (Kub. 23:23; In Lev. 18:2-25; Kuv. 18:9-12) Vurik yibudikin ya kuta urund kwa Dina ni antu inay.

¹⁴ Muntu umwing, Sikem, amulejen mudi muntu wadingau “amulimishin kupandakan mu dijuku diend,” ndiy wamumana Dina “wamukwat ku usu walal nend chad ndiy wamuyipisha.” (Dis. 34:1, 2, 19) Chom chiyimp mudi ik! Ov, utongin anch Dina katongap anch chom mudi chinech chikutwish kumushiken? Pamwingap, wading kusu ni kusot kuta urund ni ansand adinga piswimp ni kwol kwau, ansand amanay anch kakutwishap kumusal nayimp. Pakwez, Dina widimba nakash.

¹⁵ Ov, rusangu riner ritufundishin chom ik? Anch tukutwishap kuta urund ni antu akad ritiy ni kuchingejin anch tukez kwipuk yibudikin yiyimp. Bibil ulejen anch “arund ayimp akat kuyipish yaku yiwamp.” (1 Kor. 15:33) Ku mutambu ukwau, kuta urund ni antu akweta yitiyij yey, yijil yey, ni rukat rey ra Yehova didi diking. Urund mudi winou uwamp ukez kakukasikesh chakwel usala yom ni manangu.​—Jinsw. 13:20.

“En Akoyishilany Kal ku Yitil”

16. Mutapu ik walejanay kambuy Paul piur pa antu amwing adinga mu chikumangen cha Korint?

¹⁶ Chikumangen cha win Kristu chayikwashin kal antu avud kwiyowish ayinau ku yisal ya kwijond. Pafunday kambuy Paul mukand wend wa kusambish ku chikumangen cha Korint, ndiy warumbirila mutapu wakarumuna in Kristu mwom wau ni kuwambatanish nich yijil ya Nzamb. Antu amwing adinga in kusotijan, in kwifukwil akish, in usund wa amakundj ni amakundj ap amband ni amband, ij, atunway, ni yikwau. Paul wayileja anch: “Pakwez en akoyishilany kal ku yitil.”​—Tang 1 Korint 6:9-11.

17. Ov, mutapu ik wakarumuna kuziyil ku yany ya Bibil mwom wa antu avud?

¹⁷ Antu akad ritiy aburedin yany ya kuyitakel. Itekidil ayinau jinjil ja kulondul, ap akutwish kusu kwiyandjik mu mwikadil uyimp wa antu akwau mudi mwadingau in Korint pasak kurutu kwa kwikal in ritiy. (Ef. 4:14) Pakwez ronganyin rakin ra Dizu dia Nzamb ni rutong rend, yikwet usu wa kukarumun nawamp mwom wa antu awonsu adisadidila. (Kol. 3:5-10; Heb. 4:12) Nlel unou antu avud adia yid ya chikumangen cha in Kristu akutwish akulej anch kurutu kwa kwilej ni kuziyil ku yijil yitentamina ya Yehova, adinga mu mwikadil uyimp. Chikwau lel, adinga aburedina chom kanang ni kadingap ni musangar. Ikala nich chisambu pa chisu chinungau ni antu a Nzamb ni kushakam kulondulijan ni yijil ya Bibil.

18. Ov, chom ik chamushikena changadim umwing, ni chimekeshin chom ik?

¹⁸ Pakwez, antu amwing adiokala ‘mu mem ma diking’ ma chikumangen cha in Kristu pasak anenganen nakash katat mulong wa mupak wakwatau. Nambaz umwing dijin diend Tanya, urumburil anch ndiy “amulila mu uyakin,” pakwez pawanyishay mivu 16, ndiy walika chikumangen ni “kulondul maku ma mangand.” Pakach pa yibudikin yimwing yamushikena, wikala ni madikaj makad kuchingejin ni wamadiosha. Katat ulejen anch: “Mu mivu yisatu yinasutisha kulemp ni chikumangen nikala ni yovil ya ushon wakad kupwang. Chom chinakad kutwish kuvuramen chidi anch najipa mwanam kurutu kwa kuvadik kwend. . . . Chawiy nisotila kuyilej ayangadim awonsu asotila ‘kupak’ ku mangand ap kusu pakemp anch: ‘Likany!’ chikutwish kwovakan chiwapila kwinsambishil, pakwez nsudiel yiding yiyimp nakash. Mangand makwetap chom cha kupan pakwez makat kulet ching mar. Nij. Namana mar minam. Shal mu dirijek dia Yehova! Yawiy kusu njil yimwing ya mwom yiletina musangar.”

19, 20. Ov, chikumangen cha in Kristu chipanin diking ik, ni mutapu ik?

¹⁹ Tonginap bil pa mutapu ukwikala anch wadiokal mu mwikadil wa diking wa chikumangen cha in Kristu. Antu avud avurikining mwikadil wau uyimp wa mwom wadingau nich kurutu kwa kwitiy uyakin, kangal wasot ap kutongin pa yom yiniya. (Yoh. 6:68, 69) Ukutwish kudandamen kutan diking ku yakamish ni mar mamenau mu mangand ma Satan kusutil ku kuta urund wa piswimp ni akadivar ney ni anambaz ney in Kristu. Kuta urund nau ni kukumangan pakad kujing ku yikumangan ya chikumangen kukez kudandamen kukuvurish piur pa manangu ma yijil ya Yehova yitentamina ni kukez kukukasikesh kuyilondul mu mwom wey. Ukwet diyingish dia ‘kumushiman Yehova, mukach mwa antu avud,’ mudi mwasalay nfund a kuseng.​—Kus. 35:18.

²⁰ Chakin kamu, mulong wa mayingishil mavud, in Kristu awonsu asutishining chisu chilemp pakatau kuman anch chiyikasikedil kushal ashinshamena. Akutwish aswiridin kusu muntu wa kuyilej njil yitentamina ya kulondul. Ov, ukusal nchik—ey ni antu akwau adia mu chikumangen—mulong wa kuyikwash ambay ney mu ritiy mu yisu mudi yiney? Mutu wa mulong wambakedinap ukez kwisambin piur pa mutapu ukutwisha ‘kuyikasikesh mu ritiy’ akadivar ney.​—1 Tes. 5:11.

Mutapu ik Ukutwisha Kwakul?

• Ov, chom ik twileja kal piur pa yom yamushikena nfund a Kuseng 73?

• Ov, chom chamushikena Dina chitufundishin ik?

• Mulong wak ukutwish kutan diking mu chikumangen cha in Kristu?

[Yipich yidia pa paj wa 9]

Tufanyidin kwisayin mwindond ya diking ni muwapila—mu chikumangen!