Kushakam ni Mbay wa Uruw Wakad Kushinshaman

MARGARITA ni nfumwend Raúl, asala pamwing mudimu wa chisu chawonsu mu mivu yivud.a Pakwez pavalau mwanau wa kusambish, Raúl wasambisha kuyipish urund wend ni Yehova. Kupwa, Raúl wasambisha kusal yom yiyimp ni amwopata mu chikumangen cha in Kristu. Margarita ulondin anch: “Pashikena yom yiney, niyova mudi nidi piswimp ni kufa. Nova ushon, ni nakanganya chakusal.”

Kwinyim kwa machuku makemp pamwatau Jane, nfumwend wamurumbukina mu ruchingej ni yovil yend mu mitapu yivud. Ndiy wasambisha kumubul. Jane ulondin anch: “Pambulay kapamp ka kusambish, nashimoka, nova ushon, ni wangovisha usany. Chikala chaku chend, ndiy wanlembijeka chakwel nimulikishina. Natonga anch chisend cham cha win Kristu chading cha kumulikishin ni kuvuramen. Nasambisha kutong kand anch chikwikal kuburen kushinshaman kuyilejamu antu akwau milong yiney—ap amakurump mu chikumangen chetu. Chaku chinech cha kwimbul ni cha kumulikishin chadandamena kusadik mu mivu yivud. Pa chisu chinech chawonsu, natonga anch chawiy chom chinafanyina kusal chakwel nfumwam ankata. Panlikay wansha ni mwanam amband, niyova anch nakanganya, anch nadi nifanyidin kusal ap kulond nakash chakwel tushala pamwing mu uruw.”

Ni ey ukutwish kuman mar ma yovil, ma nfalang, ni ma muspiritu mudi Margarita nenday Jane mulong nfumwey wakurumbukina. Ap mwamu ukutwish kwikal ikundj wamana mar ni yikokujol mulong wa kuburen kushinshaman kwa mukajey. Mudi mwatakelau kulejan mu Bibil, chimeken patok anch tudi mu machuku ma “mar nakash.” Uprofet winou ulejen anch mu “machuku mansudiel” uumwing wa dijuku akez kaupompat, nich kuburen kwa rukat yisu yivud. Antu amwing akez kudimban anch akat kumusadil Nzamb. (2 Tim. 3:1-5) Milong yiney yikat kuyishikenang ap in Kristu akin; chawiy lel, chom ik chikutwisha kukukwash kurish nich anch akurumbukin?

Imana Amwiney Mudi Mukumenay Yehova

Pakusambish, chikutwish kukukasiken kwitiyij anch muntu ukatina ukutwish kukurumbukin mu mutapu uyimp mwamu. Ukutwish kusambish kwifish nich amwiney mulong wa mwikadil wa chitil ap yitil yend.

Vurik anch, ap Yesu muntu uwanyidina amurumbukina kudi muntu wachingejinay ni wakatay. Yesu wayitonda arunend a piswimp, atwimbuy, kupwa kwa kutongijokin nakash mu malembil. Awonsu 12 adinga atushalapol akashinsh a Yehova. Pakwez, Yesu wova chakin kamu ushon nakash pikalay Yuda “mwin matungu.” (Luka 6:12-16) Chawiy lel, Yehova kamufishap nich Yesu mulong wa yisal ya Yuda.

Chidi chakin anch, nlel unou kwikil mbay wa uruw udia mwin kuwanyin. Ambay awonsu aad akutwish kusal yom yiyimp. Nfund a Kuseng umwing wapepidilau wafunda mu uyakin anch: “Anch ey Yehova wading ni kuvurik yitiy yetu yawonsu ing kwikil muntu ukutwisha kupand wakad kufa nich.” (Kus. 130:3) Pakatau kumwimburij Yehova, ambay a uruw awonsu aad afanyidin kwitiy kulikishijan piur pa kuburen kuwanyin kwa umwing ni mukwau.​—1 Pita 4:8.

Pakwez, “muntu ni muntu ukez kirumburilap amwinend kudi Nzamb mulong wa yom yawonsu.” (Rom 14:12) Anch mbay umwing wa uruw ukwet chaku cha kumeshan mar kusutil masaal ap yisal yend akez kamufish nich kudi Yehova. Mulong Yehova uyikisin in chisum ni in kusalan, chawiy lel kwikil diyingishil dia pakampwil dia kushakam ni mbay wa uruw nich kuburen rukat ni kalimish. (Kus. 11:5; Efes 5:33; Kol. 3:6-8) Katat, ang mwin Kristu udandamedin pakad kukarumuk ni wipanin mu ujim ukash ni kaswimpinap, chifanyidin kumwopat mu chikumangen cha win Kristu. (Gal. 5:19-21; 2 Yoh. 9, 10) Mbay wa uruw kafanyidinap kwifish nich palejenay yisalijok yiney yakad ya in Kristu kurutu kwa amakurump. Chikwau kand, Yehova uyovidil riy antu amena mar ma yisal yiney yiyimp.

Anch mbay wa uruw umwing wasal masandj, ndiy kasadinap chitil ching kusu pantaliken ni mbay wa uruw wakad mulong, usadin kand chitil pantaliken ni Yehova. (Mat. 19:4-9; Heb. 13:4) Anch mbay wa uruw wakad mulong wapakish kushakam kwambatan nich yiyul yidia mu Bibil, kafanyidinap kwifish nich piur pa chitil cha mbay wasala masandj.

Vurik anch Yehova wij yovil yey. Ndiy wimekeshin amwinend mudi ikundj wata muchid wa in Isarel, ni Dizu diend dikwet ma verse mavud mashikina ku muchim misambidina piur pa ushon wovay mulong wa mwikadil wa yisal ya masandj ma muspiritu wa muchid winou. (Is. 54:5, 6; Jer. 3:1, 6-10) Ijik anch Yehova umening kamu mansoj mey anch akurumburikina chilik chimwing kudi mbay ney wa uruw. (Mal. 2:13, 14) Ndiy wij yiuswiridina chakwel ushakama nawamp ni utambula dikasikesh.

Mutapu Upaninay Yehova Dikasikesh

Mutapu umwing upaniningay Yehova dikasikesh chidi kusutil ku chikumangen cha in Kristu. Jane watambula ukwash winou. Ndiy uvurikin anch: “Kwez kwa kalam wa munyumuku kwashikena pa chisu chiwanyidina pinaziya nakash mu yovil yam. Ndiy wajingunina mutapu nadinga mu mar mulong nfumwam wajipa uruw. Ndiy wasadila chisu chiwanyidina mulong wa kwinkwash kutongijokin pa maverse mudi 1 Korint 7:15. Maverse minam ma Bibil ni yirumburil yend yiwamp yankwasha kupwish yovil yam ya kwifish nich ni yangikisha chisambu mu manangu.”b

Margarita, wajimbwilau kwinsambishil, wileja ni ndiy anch Yehova upanin ukwash wa usey kusutil ku chikumangen cha in Kristu. Margarita ulondin anch: “Pachamekana patok anch nfumwam kakarumukap, nayisenda an am ni kuya ku musumb ukwau. Pinashika kwinikwa, natana chikumbu cha kufutin cha tupalikany twaad. Dichuku dikwau, nova ushon nakash, nafungula masakosh metu kupwa natesha akat kukokal ku chis. Nading nitongin anch ufanyidin kwikal mwin chikumbu wadinga ushich mu chikumbu chilondwila. Chom cha kushimok, namana nambaz wamufundisha makwam Bibil ni wakwasha dijuku dietu kwilej uyakin. Ndiy kadingap ni kuchingejin anch ukez kantan pakwez wading wezin kwend ku chikumbu kwinoku mulong wa kwilej Bibil ni mwin chikumbu chinadinga ni kufutin. Niyova mudi upandishinau—Nakanganya kuyikel yovil yam. Namurumburila mwikadil wam, kupwa twasambisha kudil etu awonsu. Kapamp kamwing, ndiy watenchika yom chakwel tuya ku chikumangan dichuku dinidia. Chikumangen chatwaka, ni amakurump atenchika yom nawamp mulong wa kwinkwash niwanyisha maswir ma muspiritu ma dijuku diam.”

Mutapu Ukutwishau Antu Akwau Kukwash

Yid ya mu chikumangen cha in Kristu yikutwish kupan ukwash wa usey mu mitapu yivud. Chilakej, Margarita watanin katat mudimu wend. Mu chikumangen, dijuku dimwing diamukwasha kuyilam anend pakubudik ku shikol pachisu chadingau nich kuswir.

Margarita ulondin anch: “Chansangaresha chakin kamu chidi chisu chadingau ni kwintwalaku am ni mwanam mu mudimu wa chingand kudi akadivar ni anambaz.” Kusutil ku ukwash winou wa usey, yid ya chikumangen yikwashining ‘kwambulijan yisend muntu ni mukwau’ ni kusutil ku kusal mwamu akat kuwanyish “chijil cha Kristu.”​—Gal. 6:2.

Antu amena mar mulong wa yitil ya antu akwau asangaredin chakin kamu ukwash wa mutapu winou. Monique, walikau kudi nfumwend, ni kumusha ni shek wa 15000$ ni an anying chakwel kuyilil, ulondin anch: “Akadivar nam ni anambaz a muspiritu amekesha rukat rau. Kinatwishap kutongin pa mutapu nela kutwish kwikal ni mwom pakad ukwash wau. Niyova anch Yehova wankwasha kusutil kudi akadivar ashimokishina nakash, ipana ayinau mulong wa kuyilam anam. Nikala ni musangar wa kuyiman anam akat kuya kurutu mu spiritu kusutil ku ukwash winou. Pinadinga niswiridina yiyul, amakurump akwasha. Pinasotanga kwisamb ni muntu kanang, adinga ni kwintesh.”​—Mar. 10:29, 30.

Chakin kamu, murund mukatish ukez kujingunin chisu ik chifanyidina kulik kwisambin pa mulong wa ushon wamushikena muntu mukwau. (Mul. 3:7) Margarita ulondin anch: “Yisu yivud nasangara kwisamb nau anambaz mu chikumangen chisu piur pa mudimu wa kulejan, malejan metu ma Bibil, ni anetu​—yom yin yawonsu kudioshaku milong yam. Nasangera mulong ankwasha kuvuramen milong yansadikina pasak ni ankwasha kusambish yom yisu.”

Lik Rusot ra Kufundakeshin

Kupwa kwa machuku, pandond pa kwifish nich mulong wa yitil ya mbay ney wa uruw, ukutwish wiyov anch umen mar nakash mulong wa yibudikin ya uyimp wa mukajey ap wa nfumwey. Anch walikidil yovil yiney yavul mu muchim wey, yikutwish kukangesh mupak wey wa kudandamen kushinsham kudi Yehova. Pamwingap ukutwish kupakish kutal mutapu ukutwisha kumufundakeshin mbay ney wa uruw wakurumbukina.

Anch waman anch yovil yiney ya kufundakeshin yikat kukul mudi ey, ukutwish kutongin pa chilakej cha Yoshua nenday Kaleb. Amakundj inay ashinshamena ela kufa payau ni kutentish Ngand ya Kushilamu. In kutentish akwau aburena ritiy ni ayibachika antu chakwel amubwambwila Yehova. In Isarel amwing asota kand kuyas Yoshua ni Kaleb mayal papakishau kuukasikesh muchid chakwel udandamena kushinshaman. (Kuch. 13:25–14:10) Kusutil ku yibudikin ya yisal ya in Isarel, Yoshua nenday Kaleb afanyidina niyawiy kutambitamb mwimpay mu mivu 40, chidap mulong wa yitil yau ayinau, pakwez mulong wa kurumbuk kwa antu akwau.

Ap anch Yoshua nenday Kaleb aziya pamwingap, pakwez kalikidilap yitil ya akadivar nau yiyovisha kuyip ku muchim. Awiy ateka yitongijok yau pa kumusadil Yehova. Kwinsudiel kwa mivu 40 mwimpay, awiy pamwing ni in Levi, ayiyukisha mulong apanda pakach pa antu kutambitamb mwipay ni ashikena ku kwandam mwi Ngand ya Kushilamu.—Kuch. 14:28-30; Jos. 14:6-12.

Yisal ya mbay ney wa uruw wakad kushinshaman yikutwish kukumesh mar mu chisu chilemp. Uruw ukutwish kupwa, pakwez ukutwish kuman mar piur pa yovil ni yikokujol ya kuburen nfalang mu machuku ma karutu. Pakwez, pandond pa kulikidil yitongijok yiyimp mu manang mey, vurik anch Yehova wij nawamp yakusal pantaliken ni antu alikina kwa kwisotil kuziyil ku yijil yend, mudi chilakej yayishikena in Isarel akad kushinshaman mwimpay yimekeshin chinech.​—Heb. 10:30, 31; 13:4.

Ukutwish Kupandakan!

Pandond pa kulikidil yitongijok yiyimp yikuziyisha, izwish yitongijok ya Yehova mu manangu mey. Jane ulondin anch: “Namana anch kutesh ma band makwatinau ma Chinong Cha Kalam ni Reveillez-vous ! kwankwasha kupandakan. Yikumangen niyawiy yading musul wa dikasikesh. Kwipan nich mushiku mu yikumangen kwankwasha kuvuramen milong yam. Mudimu wa kulejan wankwasha mwinjil yikwau. Kusutil ku kuyikwash antu akwau chakwel akasikesha ritiy rau mudi Yehova, kwakasikesha ritiy ram amwinam. Ni kuyibangin in kwilej Bibil kwankwasha kulam yom ya usey nakash mu manangu.”

Monique, wisambidinau kwinsambishin, ulondin anch: “Kusutil ku kukumangan pakad kujing ni ku kwipan mu mudimu wa chingand chisu chawonsu nitwishina, natwisha kujijaman. Dijuku diam dikala piswimp umwin ni mukwau ni piswimp ni chikumangen. Mar mam mankwasha kwitiyij kuziy kwam amwinam. Angandjika mu yoziu, pakwez nich ukwash wa Yehova nitwishin kupandakan.”

Ukutwish kupandakan niyey yoziu ya mutapu winou. Chikalap nchik mar madiokila ku kuburen kushinshaman, ikasikesha kulondul chiyul cha Paul chapepidilau kud Nzamb anch: “Kangal twaziy kusal yom yiwamp, mulong pa chirung chiwanyidina tukez kwangul yom yiwamp.”​—Gal. 6:9.

[Mazu madia kwishin kwa paj]

[Chipich chidia pa paj wa 31]

Ambay a uruw alikau ayisangaredining antu ayikwashininga mu mudimu wa chingand