Tanany Kwiswedish Mu Yom Ya Muspiritu

‘Itwikany mutond wam, chad mwamu mipim yen yikwiswedish.’​—MAT. 11:29.

1. Ov, chom ik chatenchikay Nzamb ku Mukandu wa Sinai, ni mulong wak?

PATENCHIKAU Manswik ma chijil ku Mukandu wa Sinai, atenchika ni chijil cha Sabat wa rubing ni rubing. Kusutil kudiay Moses, Yehova wayula muchid wa in Isarel anch: “Pa machuku musamban salany mijikit yen pakwez pa dichuku dia sambwad ukutwish kwiswedish ku midimu yey. Chifanyidin ngomb wey ikwal ni chimbur wey iswedisha, chifanyidin kand ni mwan ikundj wa mwilomb wey ni ngez iswedisha.” (Kub. 23:12) Mwawiy, mulong wa kuyibangin antu adinga ni kulondul Chiji, Yehova watenchika mu rukat dichuku dia kupim chakwel antwend “iswedisha.”

2. Ov, mutapu ik watambulau in Isarel yiyukish ya kulam dichuku dia Sabat?

² Ov, Sabat diadinga dichuku dia kusengan? Bwat, chadinga chisu cha usey cha in Isarel mulong wa kumwifukwil Yehova. Kulam dichuku dia Sabat kwasala anch mitu ya majuku yikala nich chisu cha kufundish majuku mau chakwel ‘adandamena kulam njil ya Yehova.’ (Dis. 18:19) Dialetanga kand kudi majuku ni arund chisu cha kushakam pamwing mulong wa kutongijikin pa yisal ya Yehova ni kulam urund usangareshina. (Isay 58:13, 14) Cha usey nakash chidi anch Sabat watakela kulejan mu uprofet chisu chikeza kwikalaku kwiswedish kwakin kusutil mivu Kanan ya Kutakel kwa Kristu. (Rom 8:21) Pakwez, chidi nchik nlel unou? Ov, kwisu ni mutapu ik ukutwishau kutan in Kristu akin, alondwila jinjil ja Yehova kwiswedish kwa mutapu winoku?

Tanany Kwiswedish Kusutil Urund wa in Kristu

3. Ov, in Kristu a mu mivu chitot ya kusambish ikasikesha umwing ni mukwau mutapu ik, ni yibudikin ik?

³ Kambuy Paul walejana anch chikumangen cha in Kristu chidi “dinguj ni kwikam kwa uyakin.” (1 Tim. 3:15) In Kristu a kusambish atambula ukwash ukash kusutil ku kukasikeshijan umwing ni mukwau ni kutungijan umwing ni mukwau mu rukat. (Efes 4:11, 12, 16) Padingau ku Efes, Paul watambula dikasikesh kusutil ku kumwendil kudi yid ya chikumangen cha Korint. Teshany yibudikin yamanay, Paul walonda anch: “Nikwet musangar mulong wa kushik kwa Stefanas ni Fortunatus ni Akayikus, mulong answedisha.” (1 Kor. 16:17, 18) Chilik chimwing, payayi Titus mu Korint kusal mudimu wa kulejan kudi akadivar adinga kwinikwa, Paul wafundina kand chikumangen anch: “Muchim wen aukasikesha kudi en awonsu.” (2 Kor. 7:13) Ni nlel unou, Atuman a Yehova atanin kwiswedish kwakin kusutil ku urund ukasikeshina wa in Kristu.

4. Ov, yikumangan ya chikumangen yituletidin diswedish mutapu ik?

⁴ Wij kusutil yiukata kuman anch yikumangan ya chikumangen yidi musul wa musangar ujim. Kwawiy tutanina ‘kongojijan mu ritiy retu.’ (Rom 1:12) Akadivar ni anambaz netu in Kristu kadiap arund a chisu chikemp kusu bwat, ap akad kwijik nawamp tukutwisha kutanijan nau pakad kuchingejin katat ap chisu ni chisu. Awiy adi arund akin, antu tukatina ni tulimishina. Tutanining musangar ni dikasikesh dikash kusutil ku kukumangan nau pakad kujing ku yikumangen yetu.​—Flm. 7.

5. Ov, mutapu ik tukutwisha kwiswedish umwing ni mukwau ku yitentam?

⁵ Musul ukwau wa kwiswedish udiokil ku yitentam yetu ya distrik ya pa muvu ni yitentam ya munyimuku ni ya pakambwil. Kuwejinaku ku kupan mem maletina mwom ma uyakin madiokila mu Bibil, Dizu dia Nzamb, yikumangan yiney yijim yitwinkishining chisu cha ‘kujimbish’ urund wetu. (2 Kor. 6:12, 13) Pakwez, chikwikal nchik anch ulondiningap nakash ni chikukasikedin kutanijan ni antu? Mutapu umwing wa kwijikijan nau akadivar ni anambaz netu kudi kwipan ayinetu ku chitentam. Kupwa kwa kuyikwash antu eza ku chitentam cha michid yawonsu, nambaz umwing walonda anch: “Kudioshaku dijuku diam ni arund akemp, nijikap antu avud kwinikwa. Pakwez, pinasambisha kukwash kudiosh yishoshot, nasankanijana ni akadivar ni anambaz avud! Chansangaresha nakash!”

6. Ov, mupatu ik umwing utukutwisha kutan kwiswedish pa chisu cha konje?

⁶ In Isarel adinga ni kukas weny wa kuya ku Yerusalem mulong wa kwifukwil ku misambu yisatu muvu ni muvu. (Kub. 34:23) Yisu yivud afanyina kusha yir ni kwisak ni kukas weny wa dichuku dimwing ra pansh mwi njil ya rufunfut. Kupwa, kwandam mu tempel kwaletanga “musangar ujim” kudi antu adingaku “ading ni kumushiman [Yehova].” (2 Jinsw. 30:21) Nlel unou, atushalapol avud a Yehova amening niyawiy anch kukas weny pamwing ni dijuku ni kuya kutal Betel, ap ma biro ma mutiy ma Atuman a Yehova madia piswimp ni kwol kwau, kuyiletidining musangar nakash. Ov, ukutwish kwendil ku jindond jinej pa chisu cha konje wa dijuku diey?

7. (a) Ov, yikumangan ya kwiswedish yikwikal ya ukwash mutapu ik? (b) Ov, chom ik chikeza kusal anch chikumangan cha kwiswedish chikala chiwamp ni chikasikeshina?

⁷ Kukumangan pamwing mu dijuku ni arund mulong wa yikumangan ya kwiswedish kukutwish kwikal ni kwawiy kukasikeshina. Salomon Mwant wa manangu walonda anch: “Chom chipandakena kuwamp kudi muntu chidi kudia, ni kuna, ni kusanger mu mapit ma midimu yen.” (Mul. 2:24) Yikumangan ya kwiswedish yidiap ching kusu mulong wa kwiswedish kwa muntu pakwez yikat kukasikesh rukat retu mulong yitukwashining kwijikijan nawamp ni ambay netu in Kristu. Chakwel yikala yiwamp ni yikasikeshina, chiwapidil kukumangej antu akemp ni kwikal nich kashinsh anch ayitakedil nawamp, nakash kamu anch apanin maar ma kulewish.

Mudimu wa Kulejan Uletining Kwiswedish

8, 9. (a) Rumburil kushalijan kwadinga pakach pa uruu wa Yesu ni uruu wa alej a yijil ni Afaris. (b) Ov, mutapu ik tukutwisha kwisakin mu kulejan uyakin wa Bibil?

⁸ Yesu wadinga ni mushiku mu mudimu wa kulejan, ni wayikasikesha in kwilej end chakwel asala chilik chimwing. Chinech chimeken patok mu yilondinay anch: “Yakwangul yidi yivud, pakwez in mudimu wa kwangul adi akemp. Mulembilany mwin chir chakwel atuma in mudimu wa kwangul avud.” (Mat. 9:37, 38) Uruu walejanay Yesu wading uletina diswedish diakin kamu; wadinga “rusangu ruwamp.” (Mat. 4:23; 24:14) Wading ushalijandina nakash ni yijil yilimina nakash yadingau ni kuyitekin antu kudi Afaris.​—Tang Mateu 23:4, 23, 24.

⁹ Pitulejena uruu wa Want kudi antu akwau, tuyinkishin diswedish dia muspiritu ni pa chisu chinicha tukat kuwejinaku kutesh ni kujikitish kwetu mulong wa uyakin wa usey wa Bibil. Nfund a kuseng walonda anch: “Mushimana Yehova, chidi chiwamp kumuwangin Nzamb wetu miminy ya kumushinan nich.” (Kus. 147:1) Ov, ukutwish kuvudish musangar utanina piukata kumushiman Yehova kudi amutej ney?

10. Ov, kutwish kwetu mu mudimu wa kulejan kwimedin pa kwitiyij uruu tulejena? Rumburil.

¹⁰ Chakin anch, mu jingand jimwing antu ateshining nakash rusangu ruwamp kuyipandakanamu antu akwau. (Tang Midimu 18:1, 5-8.) Anch udi mwingand mulikinau kutesh uruu wa Want, pakish kushinshikin pa uwamp usadina mu mudimu wa kulejan. Vurik anch usu udandamedina kusal mulong wa kulejan dijin dia Yehova udiap wa chamwamu. (1 Kor. 15:58) Chikwau kand, kutwish kwetu kwimedinap pa mutapu ukatau antu kutesh rusangu ruwamp. Tukutwish kwikal nich kashinsh anch Yehova ukez kusal anch antu akweta muchim uwamp itiyijija uruu wa Want.​—Yoh. 6:44.

Kwifukwil mu Dijuku Kuletining Kwiswedish

11. Ov, chisend ik chayinkishau anvaj kudi Yehova, ni mutapu ik ukutwishau kuwanyish chisend chinech?

¹¹ Anvaj amusadidila Nzamb akwet chisend cha kuyifundish anau piur pa Yehova ni yijil yend. (Kuv. 11:18, 19) Anch udi nvaj, ov, utenchikin program wa kuyifundish aney piur pa Tatukwetu wa mwiur mwin rukat? Mulong wa kukukwash kuwanyish chisend chinech ni kuwanyish maswir ma dijuku diey, Yehova waletin kal yakudia yivud ya muspiritu yikasikeshina kusutil ku ma Buku, magazet, maband video, ni maband kaset.

12, 13. (a) Ov, mutapu ik ukutwisha majuku kutaninamu mu Difukwil dia urel dia Dijuku? (b) Mutapu ik ukutwisha anvaj kujingunin anch difukwil dia dijuku diau didi musul wa kwiswedish?

¹² Chikwau kand, chisak cha kashalapol ushinshamena ni kubabal chatenchikin kal ma program ma Kwifukwil kwa urel kwa Dijuku. Winou udi urel ulaminau rumbing ni rumbing mulong wa dilejan dia Bibil dia dijuku. Antu avud amana anch program winou wayinunga mu rukat ni wakasikesha urund wau ni Yehova. Pakwez mutapu ik ukutwishau anvaj kujingunin anch difukwil dia dijuku didi musul wa kwisudiesh muspiritu?

¹³ Difukwil dia urel dia Dijuku difanyidinap kwikal ditalela ap diakad musangar. Mulong tukat kumwifukwil “Nzamb muwamp,” ni ukatin anch twikala ni musangar pitukata kumwifukwil. (1 Tim. 1:11; Fil. 4:4) Kwikal ni chisu chikwau urel cha kwisambin piur pa usey wa uyakin udia mu Bibil chidi chiyukish chakin kamu. Anvaj afanyidin kwikal ni nkeu mu mutapu wau wa kufundish, afanyidin kusadil yitongijok ni manangu. Chilakej, dijuku dimwing diamwinkisha mwanau wa mivu dikum dijin dia Bradon, chisu cha kusal rapor piur pa mutu wa mulong “Ov, mulong wak Yehova wamumekesha Satan mudi Nak?” Mutu wa mulong winou wamwovisha Brandon ushon mulong uyikatining anak, ni kasangarap pamufanikeshau ni Satan. Majuku mamwing masengening yisu yimwing ma dram ma Bibil pamwing ni chid ni chid cha dijuku ni chikunku chend, atangin yikunku yau mu Bibil, ap dijuku dikutwish kusengan kwambatan ni rusangu rasadika. Chidiap kusu ching mitapu yiney ya kufundish yikata kusangaresh pakwez yikutwish kuyikasikesh aney, ni kusal anch malejan ma Bibil mayishika ku michim yau.a

Ipuk Yom Yikutwisha Kukuziyish

14, 15. (a) Ov, mutapu ik wavulijadina kal mar ni chisum mu machuku mansudiel? (b) Ov, mar ik makwau matukutwisha kurish nich?

¹⁴ Mar ni chisum yavulijadin kal mu machuku minam mansudiel ya ditenchik diyimp dia yom. Mamiliyon ma antu mamen mar ma kuburen kwa mudimu ni nfalang. Ap antu asadina mudimu yisu yivud ni kutan nfalang achirikining ku yikumbu mu mabeng mwamwamu, mulong nfalang jiletinau ku majuku mau jikepin nakash. (Isikej nich Hagai 1:4-6.) Antu achipolitik ni antakel akwau katwishinap kulet ukwash pakatau kurish ni in kujipan akamishena (terroristes) ni misul yikwau ya uyimp. Antu avud akat kuziy mulong wa yilim yau ayinau.​—Kus. 38:4.

¹⁵ Mar ni yikokujol ya ditenchik dia yom dia Satan yiyishikedining ap in Kristu akin. (1 Yoh. 5:19) Pa chisu chikwau, in kwilej a Kristu akutwish kurish nich mar pakatau kwikasikesh chakwel adandamena mu kushinshaman kudi Yehova. Yesu walonda anch :“Anch awiy anzengola am, akez kakuzengolany kand niyen.” (Yoh. 15:20) Pakwez, ap anch “akat kutuzengol,” Nzamb “kakutulikap.” (2 Kor. 4:9) Mulong wak chidi mwamu?

16. Ov, chom ik chikutwisha kutukwash chakwel tushala ni musangar wetu?

¹⁶ Yesu walonda anch: “Ezany kudi am, en awonsu uziyilanya mulong wa yisend yikasikena ya mitapu ni mitapu chad am nikez kakwambulany.” (Mat. 11:28) Anch twatek ritiy retu mu difut dia Kristu, chirumburikin anch twitekin mu makas ma Yehova. Mu mutapu winou, tukutan “ukash upandakena.” (2 Kor. 4:7) Spiritu utumbila wa Nzamb udi “Mwin kukwash” ukasikeshin ritiy retu nakash chakwel tukutwish kujijaman mu yoziu ni mu mar matushikedila, utukwashin kand chakwel tushala ni musangar.​—Yoh. 14:26; Jak. 1:2-4.

17, 18. (a) Ov, tufanyidin kwilam pantaliken nich spiritu ik? (b) Ov, yibudikin ik yidiokila ku kutek pa ndond ya kusambish kwisangaresh kwa chamwamu?

¹⁷ Nlel unou, in Kristu akin afanyidin kwilam pantaliken nich chibachikin chikash cha spiritu wa kwisangaresh wa mangand minam. (Tang Efes 2:2-5.) Chikwau kand, tukutwish kuwil mu mupit wa “maku mayimp ma akayitil, ni ris ra yom yikat kamanau nich mes mau ni kwibaz kwa yom yikwetau.” (1 Yoh. 2:16) Ap tukutwish twidimb anch kuchingejin mu maku ma mujimbu kukez katuletin kwiswedish. (Rom 8:6) Chilakej, antu amwing asambisha kuna mwon wa kulewish, kupandikesh kuna mar ma kulewish, kutal mafilm ma masandj, masengan mayimp, ap mijikit yikwau yiyimp mulong wa kulangwish yovil ya maku mau. Yom “yitenchikinay” Satan yidi mulong wa kudimban kusutil ku kulet chitongijok cha makasu cha kwiswedish.​—Efes 6:11.

¹⁸ Chawiy lel, chiyipinap kudia, kuna, ap kwipan mu milad yiwamp ya kwiswedish anch yisadikin mu mutapu uwanyidina. Chikwau kand, tufanyidinap kulikidil yom yiney yikala pandond ya kusambish mu mwom wetu. Pakwez kwikal isikena ni kwilam yidi yom ya usey pakampwil pa chirung chitushicha. Kukimbijol yom ya kumujimbu kukutwish kutuziyish ni kusal anch twikala “in usweral ap akad kusong mabuj ku ronganyin ra Nsalejetu Yesu Kristu.”​—2 Pita 1:8.

19, 20. Ov, mutapu ik tukutwisha kutan kwiswedish kwakin?

¹⁹ Anch twatongijok kulondulijan ni yijil ya Yehova, twitiyijin anch kwisangaresh kwawonsu kwa mangand minam kudi kwa chisu chikemp. Moses witiya chitongijok chinech, ni chilik chimwing niyetu. (Heb. 11:25) Chidi chakin kamu anch, kwiswedish kwakin, kuletina musangar wakashinsh ukata kulab, kudiokiling ku kusal rusot ra Tatukwetu wa mwiur.​—Mat. 5:6.

²⁰ Tudandamenany amboku kutan kwiswedish mu yom ya muspiritu Anch twasal mwamu, tukez “kudjibul yom yiyimp ni kulik yom ya mu mangand . . . mudi tukat kutalang ruchingej ra chiyukish, kwawiy kwez kwa uyaj wa Nzamb mujim ni Mupandish wetu, Yesu Kristu.” (Tit. 2:12, 13) Chawiy lel, kwatany mupak wa kwitwik mutond wa Yesu kusutil ku kuziyil ku winyikel ni umutakel wend. Anch twasal mwamu, tukez kutan musangar ni kwiswedish kwakin!

[Dizu didia kwishin kwa paj]

Ov, Mutapu ik Ukutwisha Kwakul?

• Mutapu ik utaninau antu a Yehova kwiswedish nlel unou?

• Ov, mudimu wa kulejan utuletidil ni antu tulejena diswedish mu mutapu ik?

• Ov, chom ik chifanyidina mitu ya majuku kusal chakwel ikala nich kashinsh anch difukwil dia majuku mau diletin diswedish?

• Ov, yom ik yituziyishina mu spiritu?