Ov, Udi Mwin Kuyiswedish Akwen?

KU RIS ra kurul kwa Mikandu ya Anti-Liban kwawiy kudia Mukandu wa Hermon, ukweta musong wend ulemp nakash wa a metre 2814 piur pa pashikeninga mem. Chikunku chilemp cha muvu, pa musong wa Hermon pading nej, chom chinech chasalanga anch chirungul cha mish cha uchuku anch chasutinap chatalal kupwa chalet maum. Maum makusambish kushirikin pa mitond ya kanjadil ni pa ya mabuj yidia mwishin ni pa yir ya nviny yidia mwishin. Pa chirung chilemp cha chishipu mu Isarel wa pasak, maum minam maletanga chitalosh madinga musul wa kusambish wa kutalesh mitond, yifukis ni masuku.

Mu muminy wapepilau, uumwing utudishina udia mukach mwa in kumwifukwil Yehova aufanikesha nich “maum ma Hermon mawila pa divu diumina dia mikandu [ya Zion].” (Kuseng 133:1, 3) Mudi kamu Mukandu wa Hermon waleta maum ma kutalesh nich mitond, yifukis ni masuku, tukutwish niyetu kuyitudish antu tusankanijadina nau. Tukutwish kusal mwamu mutapu ik?

Chilakej cha Yesu cha Kutudish

Yesu Kristu wadinga nich usu ukash padi akwau. Ap kutanijan nend mu kachisu kakemp kusu kwading kutudishila nakash. Chilakej, Marko mwin kufund Evanjil ulondil anch: “Ndiy [Yesu] wayitambula, wayiyukish, wayanzwok makas mend.” (Marko 10:16) Chayitudisha an inay mudi ik?

Pa uchuku wend wa nsudiel wafay padingay muntu, Yesu wayowisha mend in kwilej end. Kwikepish kwend kwayikwata ku michim yau. Kupwa Yesu wayileja anch: “Nakwinkishany kal chilik, chakwel ni yen kand ukusalany mudi chinasala am kudi en.” (Yohan 13:1-17) Inge, niyawiy aswiridina kwikal ikepishina. Ap anch atwimbuy kateshap kwau kurumburik kapamp kamwing ni kwinyim kamu uchuku winiwa asambisha kutadikijan piur pa nany umwing pakach pau umekena kwikal mujim kuyipandakanamu akwau, Yesu kayijimenap bwat. Pakwez, watongijoka nawamp nich kushimpish muchim. (Luka 22:24-27) Ap “pamusalau, [Yesu] kachirishap masal.” Chakin, ni “pamumeshau mar, ndiy kalondap dizu; pakwez witeka amwinend kudiay ndiy mwin kwimikish utentamina.” Chilakej cha Yesu cha kutudishan tufanyidin kamu kuchimburij.—1 Pita 2:21, 23.

Yesu walonda anch: “Itwikany mpand yam, ungiyiyany am; mulong yam nitudishila ni kwikepishil mu muchim; ni en ukez kutanany kwipimish mipim yen.” (Mateu 11:29) Tongin bil anch akulejin kudi Yesu amwinend. Kupwa kwa kumutesh mu sinagog wau, antu akolikwau ashimoka ni alonda anch: “Muntu mwinou, chiyul chinech chamutan kwisu? Ni midimu yikash mwamu ey?” (Mateu 13:54) Kutang piur pa mwom ni mujikit wa Yesu kukutwish kutulej yom yikuleta kwipimish kudi antu akwau. El tushinshikinany mutapu washay Yesu chilakej chikash kusutil ku kulond kuwamp ni ku kwikal nich ngikadil ya kukwashan.

Kwikalang Nich Kulond Kuwamp

Chiswapeling nakash kuumbul chikumbu kupandakanamu kuchitung chisu. Chijil chinech cha kuumbul ni kutung chisadil pantaliken nich kulond kwetu. Chitudia akayitil, etu awonsu tukweting yilim ni tukat kurumbukang. Mwant Salomon walonda anch: “Pa mangand pikil muntu ap umwing utentamina wakad kusal yitil.” (Mulej 7:20) Chikasikeningap kujingunin kurumbuk kwa muntu mukwau ni kumwel yom yimwing yikash kutesh. (Kuseng 64:2-4) Ku mutambu ukwau, chitwitining kwikal nich nkeu chakwel twikala nich kulond kuwamp.

Yesu wasadila rudim rend mulong wa kuyikasikesh antu. Wayinkisha kwipimish kwa mu spiritu payilejay rusangu ruwamp ra Want. (Luka 8:1) Yesu wayipimisha kand antu ikala in kwilej end kusutil ku kuyijingunin Tatukwend wa mwiur. (Mateu 11:25-27) Chawiy chamwizwilau kudi antu milizimiliz!

Chinyim ni chinech, in kufund ni Afaris kabanginap kwau maswir ma antu akwau. Yesu walonda anch: “Awiy akatil kushakam pa yipwan yiwamp ya katumb mu yikumbu ya kulembil.” (Mateu 23:6) Chakin kamu, awiy ayipipesha antu akwau, nich kuyilond anch: “Chisak chinicha cha antu kijap kwau Yijil ya Moses, chawiy Nzamb ukez kuyiyindamish.” (Yohan 7:49) Chakin kamu kimwadingap chom ap chimwing chitudishina mu mwikadil winou!

Yitulondilinga yimekeshining chitudia kamu mu muchim wetu ni mutapu utuyimena antu akwau. Yesu walonda anch: “Muntu muwamp ukat kubudish mu chipau chend chiwamp cha muchim wend yom yiwamp; ni muntu muyimp ukat kubudish mu chipau chiyimp yom yiyimp; mulong kan kend kakat kulond kuvul kwa yom yidia mu muchim.” (Luka 6:45) Chom ik kand, chitukutwisha kusal chakwel tushinshikin anch yitulondina yikat kuyitudish antu akwau?

Chimwing cha yom yitukutwisha kusal chidi, kwikuchik ni kutong kurutu kwa kulond. Jinswir 15:28 ulondil anch: “Muchim wa mwin kutentam ukat kutong nawamp mutapu wa kwakul.” Kutong kwinoku kufanyidinap kwikal kwa chisu chilemp chamwamu. Nich kutongijokin kukemp pa ya kurutu, tukutwish swa kujingunin mutapu ukuteshau antu akwau yirumburil yetu. Tukutwish twiyipul ayinetu anch: ‘Ov, chinisotila kulond chidi cha rukat? Chidi chakin, ap anch nisotil kuyilej yinatesha? Ov, didi “dizu [dia] pa chisu chidiburedinau?” Ov, dikutudish ni kuyikwash antu inisambina nau?’ (Jinswir 15:23) Anch twajingunin anch chitongijok chidi chiyimp ap anch chidiap cha pa chisu chau, el tusalany usu nakash wa kuchibwit mu muchim. Pa ndond pa kuchin kwau chamwamu yitongijok yiyimp, ov, mulong wak ulikinany kuyiswinkesh nich chom kanang chiwamp ni chifanyidina? Mazu ma usup madi mudi “kutap kwa mpak ya musamun,” pakwez mazu mawamp madi “kwokan.”—Jinswir 12:18.

Ukwash ukwau udi wa kushinshikin pa chiyikadishina ambay netu akaritiy a usey ku mes kwa Nzamb. Yesu walonda anch: “Pikil muntu ukutwisha kwiyezil kudi am, ching Tatuku wantuma am wamukat.” (Yohan 6:44) Yehova umen ngikadil yiwamp mu umwing ni umwing wa atushalapol end—ap in itumena anch akwet untu ukash. Kusutil ku kusal usu wa kujingunin ngikadil yau yiwamp, tukez kuying kuyilondil yom yiwap piur pau.

Yikwashany Antu Akwau

Yesu watesha nawamp yikokujol yadingau nich ayimanamar. Chakin, “chamanay yisak ya antu wayovil riy, wayinanyin, mulong awiy ading ni kutambitamb ni kupalangan mudi amikoku akad kafung.” (Mateu 9:36) Pakwez Yesu watala kulemp kusutamu pa mwikadil wau waletishanga riy; ndiy wasalap chom kanang. Wapalangesha diladikij diend anch: “Ezany kwen kudi am en awonsu ukata kusalany mudimu ni ukwetany yisend yilimina, am nikuninkishany kwiswedish.” Wayinkisha kand kashinsh kanak: “mpand yam yiwanyidin, ni chisend cham chipipel.”—Mateu 11:28, 30.

Ilel, tudi mu “machuku ma kwisudiel . . . [ma] yom yikash.” (2 Timote 3:1) Antu avud akwet yisend yilimina ya “yitongijok ya mangand.” (Mateu 13:22) Akwau akwet yisend ya ngikadil yau ayinau yikash. (1 Tesalonik 5:14) Ov, mutapu ik tukutwisha kuyiswedish antu adia mu maswir? Mudi Kristu, tukutwish kuyikwash kupipesh yisend yau.

Antu amwing asotiling kutul yisend yau ayinau kusutil ku kwisambin milong yau yikwetau. Anch antu anenganena ez kudi etu chakwel tuyikwasha, ov, tukat kwitekin chisu cha kuyitesh nawamp? Kwikal mwin kutesh wa ranaken kutwitining anch twipupa ayinetu. Kwitining kushakam nich kwasin pa yilondilay muntu mukwau, pa ndond pa kutongin piur pa mutapu wa kumukwal kusu ap mutapu wa kupwish mulong wend. Kusutil ku kumutesh nawamp, talijanany pa kan-a-dis, ni sipany pichifanyidina kusip, chawiy tukumekesh anch tumubangidin.

Mu chikumangen cha Ukristu, tukwet mitapu yivud ya kuyikasikesh ambay netu akaritiy. Chilakej, pitukata kukumangan ku yikumangen ku Chot cha Want, tukutwish kuyikimb antu arishina nich milong ya ukash wa mujimbu. Yisu yimwing yawonsu yitining minit yikemp kurutu ap kupwa kwa chikumangan mulong wa kuyikasikesh kuyilondish nich mazu ma kuyikasikesh nich. Tukutwish kand kuyijingunin antu aburedina ku Dilejan dia Buku dia Chikumangen kutukata kukumangan. Pamwing ap tukutwish kuyitazuk ku telefon ni kuyimekeshin anch tubangidin ukash wau wa ku mujimbu ap kuyikwash.—Filip 2:4.

Amakurump in Kristu akwet chisend chilimina mu chikumangen. Tukutwish kusal yom yivud mulong wa kuyikwash apipesha chisend chau ku kusadil nau pamwing ni kwikepish tusalany mudimu win wawonsu utwitinau kusal. Dizu dia Nzamb ditukasikeshin anch: “Yiziyilany awiy adia in kutakel en ni kwitudish kudi awiy, mulong adi in kulam a mipim yen ni pakez kapanau kuchind; asala yom yiney nich musangar, kangal nich ushon, mulong mwamu kichikunikwashanyip en.” (Hebereu 13:17) Kusutil ku kumekesh spiritu wa kwipan, tukutwish kuyiswedish “Amakurump akata kuyul antu nawamp.”—1 Timote 5:17.

Pandakanany Kulond Mazu Mawamp ni Yisal ya Ukwash

Maum matudishina madiokil ku tumen tunyunyunyu tukata kuurumuk nawamp, madiokila kwawonsu-kwawonsu. Chilik chimwing, kuyiswedish antu akwau kudingap chibudikin cha chisal chimwing kusu chiwamp mudi muchidia kwiruzukin yibudikin ya kumekesh ngikadil yetu ya Ukristu pa yisu yin yawonsu.

Kambuy Paul wafunda anch: “Katijanany mudi divar, ulimishijanany muntu ni mukwau.” (Rom 12:10) El tusadilany chiyul chinech cha Paul. Ku kulond kwetu ni ku yisal yetu, el tuswedishany chakin kamu antu akwau.

[Chipich chidia pa paj wa 31]

Mwin kutesh wa ranaken uswedishining antu akwau

[Chipich chidia pa paj wa 32]

Maum ma pa Mukand Hermon —musul wa kutudishan mitond, yifukis ni masuku