Ov, Uzwendj Ukash Chom ik?
UZWENDJ ukash uding chak chikash mu mwom. Chinech chirumburikin kuburen yakudia, mem, ni mazut, kuburen kand chikumbu chiwamp, kwiyokish mulong wa ukash wa mujimbu ni kwilej. Ukat kuyishiken ma miliyon ma antu, piswimp ni uvud wa antu awonsu adia mu Amerik. Chikwau kand, antu avud adia mu jindond mudi Kwingangel kwa Mwimputu ni Kwindum kwa Amerik kandikal amanap muntu udia mu uzwendj ukash. Chawiy lel talany amboku antu amwing katat.
Mbarushimana udia mu Rwanda, mu Afrik, pamwing ni mukajend ni anend atan. Mwanend wa musamban wafil nich malariya. Ndiy ulondin anch: “Tatukwam watwangena etu awonsu musamban divu diend. Chikunku cham chading chikemp nakash chawiy chasala anch dijuku diam didiokala mulong wa kuya mu musumb. Am ni mukajam twading tusadin mudimu wa kusend mifuku ya mayal ni usukuril. Chikumbu chetu chadingap nich madidish. Twading tukat kuvit mem mu dijiy dia kwindond kwadingau ampurish. Twading tudil yakudia kapamp kamwing pa dichuku, pakwez anch kwikil mudimu, twading tukat kushakam ni nzal dichuku diakabuj. Nading nikat kubudik anch chinech chashiken—Nadingap ni kutwish kuyitesh an padingau ni kudil mulong wa yakudia.”
Victor ni Carmen akat kuchimang yilat. Ashich mu musumb umwing wa mu Bolivie ni anau atan. Awiy ading akat kufutin kapalikany kamwing kayimp ka matafad makad kwosh kakweta malat mayimp mabarokina ni mwakad kasu ka nzembu. Kushikol kwading an avud chawiy lel Victor wasala nkwas ya mwanend mband chakwel ni ndiy ashakama. Ambay a uruw inay afanyidina kwend mu a kilometre dikum mulong wa kukatul nkuny mulong wa kwisuk yakudia ni kuyidish men ma kuna. Carmen ulondin anch: “Twadingap ni musalany, chawiy lel twading tuyil ku kawit, twadinga ni kusadil mulong wa kowal ni mudi musalany. An asambisha kuyel.”
Francisco ni Ilídia ashich mu ul umwing wa mu Mozambik. An anying pakach pa anend akemp apanda; mukwau wafil ni malariya kupwa kwa kumutek mu rupital pakad kumwok. Ambay inay a uruw adima muchel ni ntamb jivud mu ka chir kau kakemp mulong wa kwikal nich yakudia ya angond asatu. Francisco ulondin anch: “Yisu yimwing twashadishin yom twadima mulong wa kupandakan kwa ruval ap wij, chawiy lel nasambisha kukimb nfalang jikemp mu kukatul ni kulandish midid ya kutung nich. Twasambisha kand kusend nkuny mu masuku, twasalanga asaa aad mu kwend. Am ni mukajam twading tukat kuwanyish muntu ni muntu chisend chend, umwing wading ukat kwisuk pa rubing ni mukwau wading ukat kulandish.”
Antu avud amening anch kudi chom chimwing chiyimp nakash ni chakad kutentam mu mangand mulong muntu umwing pakach pa antu 7 ushich mudi Mbarushimana, Victor, ni Francisco, pakwez ma miliyon ma antu akwau makwet mapit mavud. Antu amwing apakisha kusal chom chimwing piur pa mulong winou. Mutu wa mulong wambakedinap ukez kushinshikin pa usu ni ruchingej rau.
[Chipich chidia pa paj wa 3]
Carmen ni an aad pakach pa anend, ukat kuvit mem mu kawit