Yijikish Piur pa Dichap dia Inglish Diswapela
TUKWET musangar wa kukwijikishany anch, mu chirung cha muvu umwing cha kupakish, kusambishin pa nimero winou wa dichap dia kwilej dia Chinong cha Kalam, tukez kubudish pa chisu chawiy chimwing ngond ni ngond dichap dimwing dia Inglish uswapela. Dikez kwikal nich mitu ya milong ya kwilej, anch kudi ndond, akez kutekamu mitu yikwau ya milong. Tuchingejin anch nimero winou ukez kuwanyish maswir ma muspiritu ma Atuman a Yehova avud. Ov, mulong wak?
Inglish rid rudim rilondinau kudi akadivar netu adia mu jingand mudi jinej Fiji, Ghana, Kenya, Liberia, Nigeria, Papouasie-Nouvelle-Guinée, ni Îles Salomon. Ap anch akadivar netu adia mu jingand jinej akutwish kulond jindim jikwau ja ndond yidiau, ap jindim jau, asadidining yisu yivud Inglish mulong kwisamb dichuku ni dichuku ku yikumangan ya chikumangen ni mu mudimu wa chingand. Pakwez, Inglish jisadidinau jiswapel kupandakanamu jitufundidiningau mu mikand yetu. Chikwau kand kudi antu akwau pakach pa antu a Yehova ayila mu jingand jikwau mufanyidinau kusadil Inglish mulong wa kwisamb ap anch kijap Inglish nawamp. Chikwau kand, kakutwishap kukumangan ku yikumangen yisadidila rudim rau ra chivadik.
Mitu ya milong yitukata kwilej rubing ni rubing mu Dilejan dia Chinong cha Kalam yidi mitapu ya usey ya kudandamen kutwinkish yakudia ya muspiritu pa chisu chiwanyidina. Chawiy lel, chakwel tuyikwasha antu awonsu akumangan chakwel ataninamu sens mu malejan minam, dichap dia Inglish uswapela adifundin nich mazu maswapela kutesh, gramer ni mutapu wa kufund uswapela. Dichap dined disu dikwikal nich chibur cha mutapu windjing. Tu mitu twa milong, mapagraf, yipul ya kuchirikin, ni yipich yidia mu mitu ya kwilej yikez kwikal pamwing ni yipich yidia mu dichap dia chisu chawonsu. Chawiy lel, antu awonsu akutwish kulondul pamwing mu dichap dimwing ni dikwau ni kwakul ku Dilejan dia Chinong cha Kalam. Chakwel kumekesh kushalijan mu mazu ma yichap yiney yaad, tal chilakej chidia kwishin kwa paj winou.
Tuchingejin anch ditenchik dined disu dikez kwakul ku malembil ma antu avud amuleja Yehova anch: “Nginkishap manangu ma kwilej nich yijil yey.” (Kus. 119:73) Tuchingejin kand anch antu awonsu akad kwijik nawamp Inglish, ni an apakishina kulond pakemp Inglish, akez niyawiy kutwish kurijek nawamp Dilejan dia Chinong cha Kalam pa rubing ni rubing. Etwawonsu tumujikitishin Yehova mulong wa ‘rukat ra anamakwetu in Kristu,’ ukat kumusadil “kashalapol ushinshamena ni kubabal” mulong wa kupan yakudia yivud ya muspiritu.—1 Pita 2:17; Mat. 24:45, TMK.
Chisak Chitakedila cha Atuman a Yehova