Ov, Nany Ufanyidina Kuyilej An Piur pa Nzamb?

“Kwikil nsand udia mujim kumupandakanamu mulej wend. Pakwez nsand mwawonsu pakupwishay malejan mend, ukez kikal mudi mulej wend.”—LUKA 6:40.

ANVAJ amwing iyoviling anch kadiap awanyishinau chakwel kuyilej anau piur pa Nzamb. Avud akutwish kutong anch kilejap nakash ap kijap yom yivud piur pa relijon chakwel ikala alej awamp. Mudi chibudikin, akutwish kuyishil anamakwau ap antakel a relijon mudimu winou wa usey.

Pakwez, ov, nany chakin kamu uwanyishinau nawamp chakwel kuyilej an piur pa uyakin wa relijon ni yijil yiwamp ya mutapu wa kushakam? Shinshikin yilondilay Bibil piur pa mutu wa mulong winou, ni isikesh mazu minam nich yajinguninau in kukimbijol.

Ov, Tatuku Ukwet Mudimu Ik?

Chifundishinay Bibil: “Niyen atatuku, kangal wayisudishany anen ku michim. Pakwez yikandany ni kuyibabesh nich malejan ma win Kristu.”—Efes 6:4, “Mukand wa Nzamb.”

Yom yajinguninau in kukimbijol: Ov, mutapu ik chidia cha ukwash anch anvaj akudish yitiyij yikash ya chirelijon? Mutu wa mulong “ Engagement religieux du père et comportement du jeune enfant, ” wapalangeshau mu 2009, walonda anch: “Kwipan mu chisak cha relijon ukweta yitiyij ya chilik chimwing kukutwish kuyikwash amakundj kwikal atatuku awamp. Relijon upanin ukwash kudi muntu ni muntu ni kushinshikin pamwing ni kupan malejan ni umutakel pa mutapu wa kushakam mu mwom.”

Bibil ukasikeshidin nakash piur pa usey wa mudimu wa tatuku mu kuyilil ni kuyifundish an. (Jinswir 4:1; Kolosay 3:21; Hebereu 12:9) Pakwez, ov, chiyul chinech chidi cha kusadil nlel? Mu muvu wa 2009 Universite wa Floride wapalangesha mutu wa mulong umwing wadinga wisambidin pa usu ukwetau atatuku piur pa anau. In kukimbijol ajingunina anch an akweta atatuku ipanina nakash mu kuyilil pachidiau anikanch ading nakash in ranaken ni akweta yovil ya kwikal nich ngikadil yiwamp. Ansand kadingap ni kusal yom yiyimp nakash, ni ayangadim ading nich ukash wa manangu. Chakin kamu, chiyul cha Bibil chidi cha kusadil ni nlel unou.

Mudimu wa Maku Ukwet Usey Ik?

Chifundishinay Bibil: “Kangal walik malejan ma makwey.”—Jinswir 1:8.

Yom yajinguninau in kukimbijol: Mu 2006 buku wa psychologie infantile walonda anch: “Maku usutishining chisu chivud pakach pa 65 % ni 80 % kupandakanamu chisu chisadilay tatuku mu kwambamb ni anau akemp, ni uvud mudi winou udi chilik chimwing mu mangand mavud.” Mulong wa kwikal nakash pamwing kwinoku, kulond kwa maku, yisal, ni yaku yikwet usu ujim nakash mu kupam kwa mwan.

Anch maku ni tatuku asadil pamwing mulong wa kuyilej anau uyakin piur pa Nzamb, ayinkishin yipan yaad. Chakusambish, an akat kwikal ni mutapu wa kukudish urund ni Tatukwau wa mwiur, urund ukutwisha kuyikwash mu mwom wau wakabuj. Chakaad, an ilejin kusutil chilakej cha mutapu ufanyidinay ikundj ni mband kwovijan chakwel kuwanyish ntong ja usey. (Kolosay 3:18-20) Ap anch amwing akutwish kumukwash tatuku ni maku, anvaj awiy akweta chisend cha kuyilej anau piur pa Nzamb ni piur pa mutapu wa kushakam mu dijuku usotilay Nzamb.

Chawiy lel, mutapu ik ufanyidinau anvaj kuyilej anau? Milad ik ya kulejan yidia yiwamp?