5 Nzamb Witiyijin Difukwil Diawonsu dia Kashinsh—Ov, Chidi Chakin?

Wateshap kal pamwing ap anch: “Mulong jinjil ni ma balibal mavud yiyil kwi ndond yimwing, kuding kand jinjil jivud jiyila kudi Nzamb. Muntu ni muntu ufanyidin kutan njil yend yiyila kudi Nzamb.”

Chifundishinay Bibil: Tufanyidin kwikal antu a kashinsh mu difukwil dietu, kwipuk kwimekesh ku mes kusu ni rubabek. Yesu wayileja antakel a relijon a pa chirung chend mulong wak Nzamb wayilika anch: “Isay, muruu wa Nzamb, wabwaka nawamp mulong wenen, in rubabek. Ndiy wafunda anch: Nzamb ulondil anch: ‘Antu inay akat kwinlimish nich mazu mamwamu, pakwez michim yau yidi kulemp ni yamam.’” (Marko 7:6) Chikwau kand, kwikal in kashinsh kusu kukutwishap kusal anch Nzamb itiyija difukwil dietu.

Yesu walejana chinech patok kusutil ku kumekesh chom chiyimp chadinga mu difukwil dia antakel a relijon ni in kuyilondul. Ndiy wasadila dizu dia Nzamb padi awiy, palonday anch: “Akat kwingifukwil kwau chamwamu, mulong awiy akat kulejan yijil yau antu.” (Marko 7:7) Kwifukwil kwau kwading kwau “chamwamu,” ap kwakad usey, mulong ateka yijil ya relijon wau kurutu kwa yijidik ya Nzamb.

Pa ndond pa kukasikesh chitongijok cha kwel anch kudi jinjil jivud jiwanyidina chakwel kumushejin Nzamb, Bibil ulejen anch kudi jinjil jimwing kusu. Mateu 7:13, 14, (TMK) ulejen anch: “Andamany mu kachis kiwongila; mulong chis chibwabumukina ni njil ya mukombil yiyil ku kujiy, akata kwandaminamu avudil. Mulong chis chiwongila ni kajil katentamina yitakedil ku kupand, akemp kusu akata kuyibudikin.”

Mutapu kukukwashina kwijik uyakin: Tongin bil mutapu ukutwisha kwiyov anch wiyijidisha mu angond avud mutapu wa kubambel, watwisha pamwing ap kwikal wa kusambish, pakwez akulika mulong wajirila chijil chimwing cha kubambel pakad kwijik. Ukutwish kwiyov anch washesha chamwamu usu wey. Ov, chom mudi chinech chikutwish kushiken pitukata kumwifukwil Nzamb?

Mu kwilikej difukwil dietu nich masengan ma kubambel, kambuy Paul wafunda anch: “Muntu mwin kubambil mu masengan ma mau ukutwish kutambul difut dia kupandakan ching anch walam yijil ya masengan minam.” (2 Timote 2:5) Tukutwish kutambul kwitiyik kwa Nzamb kusutil ku kumwifukwil ni ‘kulam yijil,’ wawiy mutapu witiyijinay ndiy. Tukutwishap kutond ayinetu mutapu wa kumwifukwil Nzamb chakwel itiyija difukwil dietu, mudi mukutwishay kukangany mwin kubambel anch kalondwilap yijil ya masengan ap anch amwinend usotin ap uchingejin kuwin mu masengan minam.

Chakwel tumusangaresha Nzamb, tufanyidin kudiosh makash piur pa Nzamb mu kwifukwil kwetu. Yesu walonda anch: “In kumwifukwil akin akez kamwifukwil Tatuku mu Spiritu ni uyakin.” (Yohan 4:23, TMK) Tukat kwilej jinjil jakin ja Nzamb mu Dizu diend, Bibil.—Yohan 17:17.a

[Dizu didia Kwishin kwa paj]

[Tablo wa jinsangu udia pa paj wa 8]

Ov, marelijon mawonsu ma yilejin antu kumwifukwil Nzamb mudi mwitiyijinay?