Aburaham Muntu Witudishina

Aburaham wiminy mu urel wa ntent wend, pa chisu cha marungul ma muten. Patadilay kurutu, Aburaham umen antu asatu iminy piswimp ni ndiy.a Pakad kwidjidjek, waya mau kudi angez end, kupwa wayilembil anch akutwish kupimaku bil pakemp ni kushakam kwol kwend. Wayilej mulong wa kuyinkish “chikunku cha dibot,” kupwa wasambisha kwisuk yakudia yasalay nich dibot, mantek, mayel, ni mbij jiwamp. Payinkishinay angez end yakudia yiney Aburaham kamekeshinap ching kusu muchim wa kwakan wa pakampwil pakwez, mudi mutukeza kwilej, umekeshin kwikepish kwa kashinsh.—Disambishil 18:1-8.

KWITUDISH CHOM IK? Kwitudish kudi kwipuk chibud ap kwitutul. Muntu witudishina ukat kusanger ap anch muntu mukwau wamupandakan mu mutapu umwing ap ukwau. (Filip 2:3) Uteshin yiyul ya antu akwau, ni ukat kwitiy kuyisadil midimu ya kwikepish.

OV, MUTAPU IK WAMEKESHAY ABURAHAM KWITUDISH? Aburaham wayisadila antu akwau nich musangar. Mudi mulejenau kwinsambishil, payimanay Aburaham angez inay asatu, wasala kapamp kamwing usu wa kuwanyish maswir mau. Mukajend Sara, wasambisha kwisuk swa yakudia. Tal, pakwez, ndiy wasala kand chom chikwau chikash: Aburaham amwinend wachina mau chakwel asankanijana ni angez inay, kupwa ndiy wayileja anch ukez kuyinkish chom cha kudia, ndiy waya mau kudia chisak cha amikoku chakwel atonda nam ufanyidinay kujip, ni wateka yakudia yawonsu kudi angez. Pa ndond pa kuyishil atushalapol end mudimu wawonsu, muntu winou witudishina wasala amwinend mudimu winou wa kwikepish. Ndiy kamanap anch kuyisadil antu akwau kukez kukepish kalimish kend.

Aburaham watesha yiyul ya antu adinga mwishin mwa umutakel wend. Bibil wisambidin ching kusu mambamb mamwing makemp pakach pa Aburaham nenday Sara. Chikwau kand, tutangin tupamp twaad anch Aburaham watesha yalonday Sara ni wasala kulondulijan nich mazu mend. (Disambishil 16:2; 21:8-14) Chisu chimwing, chiyul chend chamekana kwikal ‘chimukasikedina Aburaham nakash.’ Pakwez, Aburaham pamulejau kudi Yehova anch chiyul chend chading chiwamp, Aburaham witiyija nich kalimish ni wasala chamulejau kudi mukajend.

CHOM IK TWILEJINA PA MULONG WINOU? Anch tudi chakin kamu in kwitudish, tukez kwikal nich musangar wa kuyisadil antu akwau. Tukez kwikal nich musangar wa kusal yawonsu tukutwisha kusal mulong wa kuwapish nakash mwom wau.

Tukutwish kand kumekesh kwitudish mu mutapu tuteshina yiyul ya antu akwau. Pa ndond pa kulik chitongijok mulong tukatap kutong mwamu ayinetu, tukutwish kutesh nich manangu yakul ya antu akwau. (Jinswir 15:22) Chaku chinech cha kwikal tayad kuyitesh akwau chidi cha ukwash pakampwil kudi antu akata kuyitakel antu akwau. Mwin kutakel umwing wija nawamp mudimu wend utazukinau anch John walonda anch: “Twajingunin anch kalam muwamp ukat kusal antu ikala mu mwikadil umwing wa kuyitwishish kwikal nich want ipau wa kulond yom yikwetau mu muchim.” Ndiy wawejaku kand anch: “Chifanyidin kwitudish chakwel witiyija anch muntu udia mwishin mwey ukwet mutapu uwamp wa kusal yom kupandakanamu yiukutwisha kusal. Pakwez, kwikiling ap umwing—kwikil kalam ap umwing—ukutwisha kwikal ching kusu amwinend nich yitongijok yiwamp.”

Pitukata kumwimburij Aburaham kusutil ku kutesh yiyul ya antu akwau kusutil ku kuyisadil midimu ya kwikepish, tukez kutambul kwitiyik kwa Yehova. Mulong, “Nzamb uyipompatin in kwibaz, pakwez ukat kuyanaken in kwitudish.”—1 Pita 5:5.

[Dizu didia Kwishin kwa paj]