Ilejina ku Dizu dia Nzamb

Ov, Bibil Utakedil Kulejan Piur pa Machuku ma Kurutu?

Mutu wa mulong winou ushinshikidin pa yipul ukutwisha kwiyipul ni ulejen kwisu ukutwisha kutan yakul mu Bibil wey. Atuman a Yehova akez kusanger kwisambin ney pa yakul yiney.

1. Ov, uprofet wa Bibil udi wa pakampwil?

Kudi ching kusu Nzamb wa Dikand Diawonsu ukutwisha kutakel kulejan yikeza kushiken mu machuku ma kurutu kachom pa kachom. (Amos 3:7) Chilakej, kudiosh pa kusambish ndiy watakela kulejan kwez kwa muntu watazukau anch Mesia ap Kristu. Mesia wafanyidina kwikal mu dijuku dia muntu ushinshamena Aburaham. Ndiy wela kwikal nyikel ukeza kusal anch antu aziyidila achirikina chiyukish cha kwikal nich mwom uwanyidina wakad mayej. (Disambishil 22:18; Isay 53:4, 5) Muntu winou Washilaumu wafanyidina kudiokal mu Betlehem.—Tang Mike 5:2.

Yesu wadinga Mesia. Kurutu kwa yitot ya mivu sambwad, Bibil wabwaka anch Mesia ukez kuvadik kudi mujik ni akez kumukis. Ukez kupan mwom wend mulong wa yitil ya antu avud, ni akez kumujik mukach mwa ampich. (Isay 7:14; 53:3, 9, 12) Bibil walejana kand anch, kurutu kwa yitot ya mivu yitan anch, ukez kwandam mu Yerusalem ukandamin pa chimbur ni akez kumupan kwi nfalang 30. Yawonsu yidi yakin kachom pa kachom.—Tang Zakariy 9:9; 11:12.

2. Ov, Nzamb ukat kutakel kulejan machuku?

Kurutu kwa yitot ya mivu yitan, Bibil wapan uprofet wakin piur pa muvu wafanyidina Mesia kumekan. Chisu djat ni pashikay achilejana mu uvud wa mbing ja mivu, chirumburikin anch “mbing” ni mbing jadinga ni kulep kwa mivu sambwad. Pafanyidina kusut ambing 7 kuwejaku ku ambing 62, ni kuwanyish ambing a mivu 69. Yawiy yiwanyishina mivu 483. Ov, chisu ik ela kusambish kuchind uvud wa mivu yiney? Kwambatan nich Bibil, afanyidina kusambish kuchind mivu yiney pashikay Nehemiy kashalapol wa Nzamb mu Yerusalem ni kusambish kutung musumb winou. Rusangu ra in Peris rilejen anch yiney yasadika mu muvu wa 455 K.C.C. (Nehemiy 2:1-5) Yesu watambula dibatish mudi Mesia pasuta mivu 483, mu muvu wa 29 C.C., pa chisu chatakelau kulejan.—Tang Daniel 9:25.

3. Ov, uprofet wa Bibil udi wakin nlel unou?

Yesu wabwaka piur pa yinship ya usey yela kushiken mu chirung chetu. Uprofet winou wisambin piur pa rusangu ruwamp ra Want wa Nzamb, ukeza kuyikwash antu amukatina Nzamb mu mangand mawonsu. Want winou ukez kushesh ditenchik diawonsu diyimp dia yom mutudia.—Tang Mateu 24:14, 21, 22.

Uprofet wa Bibil ulejen kachom pa kachom piur pa chirung cha disudiel dia ditenchik dia katat dia yom. Bibil walejana anch chinyim ni yadingau ni kuchingejin piur pa chirung cha kuya kurutu, antu akez kushesh divu. Mar makudiokil kwi njit, kamungun, kunyikek kwa divu, ni yipupu kwawonsu yikez kupandakan. (Luka 21:11; Kujingunik 11:18) Antu kakezap kand kuziyil ku yijil. Mu chirung chinech cha mar, in kumulondul Yesu akez kulejan rusangu ruwamp ra Want wa Nzamb ku michid yawonsu.—Tang Mateu 24:3, 7, 8; 2 Timote 3:1-5.

4. Ov, machuku ma kurutu ma antu makwez kwikal nchik?

Nzamb wa Dikand Diawonsu ukwet yom yiwamp yikezay kuyinkish antu ashinshamena. Mesia Yesu Kristu, ni antu atondau akez kuyikel mwiur pa divu diawonsu. Awiy akez kuyikel Want winou mu tunan twa mivu. Afu akez kuyisangul ni akez kwikal nich chisu cha kuyirumburish anch awanyidin kutambul mwom wa chikupu. Chikwau kand, Want ukez kuyok aom awonsu. Kukez kwikalap mayej ap rufu.—Tang Kujingunik 5:10; 20:6, 12; 21:4, 5.

Anch usotil jinsangu jikwau, tal ma paj 23-25 ni 197-201 ma buku Chom ik Chakin Kamu Chifundishinay Bibil?, ulejenau pinap.