Imburijany Chilakej cha Yesu cha Kucha ku mes
“Chishany ku mes, chad lembilany.”—MAT. 26:41.
MUTAPU IK UKUTWISHA KWAKUL?
․․․․․
Ov, mutapu ik umekeshina malembil metu anch tuchil ku mes?
․․․․․
Ov, mu mutapu ik tukutwisha kumekesh anch tuchil ku mes mu mudimu wetu wa kulejan?
․․․․․
Mulong wak chidi cha usey kucha ku mes anch tudi mu yoziu, ni mutapu ik tukutwisha kusal mwamu?
1, 2. (a) Ov, yipul ik yikutwisha antu kwiyipul piur pa chilakej cha Yesu cha kucha ku mes? (b) Ov, chilakej chiwanyidina cha Yesu chidi cha usey kudi antu akayitil? Let chilakej.
UKUTWISH kwiyipul anch: ‘Ov, chitwishikin chakin kamu kwimburij chilakej cha Yesu cha kucha ku mes? Mulong, Yesu wading uwanyidina! Chikwau kand, Yesu watwisha yisu yimwing kuman patok yom yikeza kushiken mu machuku ma kurutu—ap tunan twa mivu kurutu kwa chirung chend! Ov, ndiy wading chakin kamu nich kuswir kwa kucha kumes?’ (Mat. 24:37-39; Heb. 4:15) Akulany bil ku yipul yiney chakwel tukutwish kuman kusu mutapu udia mutu wa mulong winou wa usey.
2 Ov, chilakej cha muntu uwanyidina chikutwish kwikal cha ukwash kudi antu akayitil? Mwaning, mulong chitwishikin kwilej kudiay mulej muwamp ni kusutil ku chilakej chend. chilakej, tongin bil muntu ukata kwilej dilejan diend dia kusambish piur pa mutapu wa kwas nseu. Kakutwishap kwas nseu nawamp kapamp ka kusambish ni kwas pa diloz dimulejinau kwas, pakwez, ufanyidin kwilej yom yivud ni kudandamen kupakish. Chakwel atwisha kwas, ufanyidin kwilej nawamp chilakej cha mulej wend, wija nawamp kwas nseu. Mwin kwilej ufanyidin kushinshikin pa mutapu ukatay mulej wend kwiman, mutapu ukatay kukwat ut wend, ni mutapu ukatay kusadil miny yend pakwatinay pa mukuj wa ut wa nseu. Pakemp-pakemp, mwin kwilej musu ukat kwilej usu ik ukezay kupwit nich mukuj wa ut wa nseu; ufanyidin kutal kuyila rinkind, ni kudandamen kusal usu. Mu kwimburij yimenay kudi mulej wend, utekin nseu jend chakwel jishika pa diloz. Chilik chimwing, tufanyidin kusal usu wa kumekesh win Kristu wetu kusutil ku kulondul malejan ma Yesu ni mu kwimburij chilakej chend chiwanyidina.
3. (a) Ov, mutapu ik wamekeshay Yesu anch tufanyidin kucha ku mes? (b) Ov, chom ik tukeza kushinshikin mu mutu wa mulong winou?
3 Chidi nchik piur pa kucha ku mes? Ov, Yesu waswiridina kwikal nich ngikadil yiney? Mwaning. Chilakej, uchuku wend wa nsudiel wa mwom wend pa divu, Yesu wayileja atwimbuy end ashinshamena anch: “uchishangany ku mes pamwing ni yamam.” Wayileja kand anch: “Chishany ku mes, chad lembilany chakwel kangal wawany mu yoziu.” (Mat. 26:38, 41) Ap anch ndiy wading uchil ku mes mu mwom wend, pakampwil mu yisu yiney yikash Yesu wasota kucha ku mes ni kwikal piswimp nakash ni Tatukwend wa mwiur. Ndiy wading wij anch atushalapol end afanyidin niyawiy kucha ku mes—kangal kusu pinipa pakwez ni mu machuku ma kurutu. Chawiy lel, shinshikinany amboku mulong wak Yesu wasota anch tudandamena kucha ku mes. Kupwa, tukez kushinshikin mitapu yisatu mutukutwisha kwimburij kucha kumes kwa Yesu dichuku ni dichuku.
MULONG WAK USOTINAY YESU ANCH TUCHA KU MES
4. Ov, chom ik chikwatijadina pakach pa yom yakad etu kwijik mulong wa machuku ma kurutu ni kuswir kwetu kwa kucha ku mes?
4 Mu wiswimp, Yesu usotin anch tucha ku mes mulong wa yom yakad etu kwijik ni wa yom twija. Padingay Yesu pa divu, ov, ndiy wading wij yom yawonsu yela kushiken mu machuku ma kurutu? Bwat, mulong ndiy witiyija nich kwitudish anch: “Kwikil muntu wija kushik kwa dichuku dinidia ap kwa chisu chinicha. Aruu a mwiur kijap, ap Mwan, ching kusu Tatuku ndiy wija amwinend.” (Mat. 24:36) Pa chisu chinicha, Yesu, “Mwan,” kadingap wija nawamp chisu ik dikeza kwez disudiel dia mangand minam mayimp. Ov, chidi nchik kudi etu nlel unou? Ov, twijap nawamp yom yikeza kushiken mu machuku ma kurutu? Mwaning! Twijap chisu ik chikezay Yehova kutum Mwanend chakwel ateka disudiel ku ditenchik dined dia yom. Anch twading twija, ov twela chakin kamu kwikal nich kuswir kwa kudandamen kucha ku mes? Mudi mwalejanay Yesu, disudiel dikez kukashimwish, dikwez pakad kuchingejin; chawiy lel tufanyidin kudandamen kucha ku mes.—Tang Mateu 24:43.
5, 6. (a) Ov, mutapu ik ronganyin retu piur pa machuku ma kurutu ni pa rutong ra Nzamb rikwet usu pa kuswir kwetu kwa kucha ku mes? (b) Ov, mulong wak kwijik mutapu udiay Satan kutubachikin kusal usu wa kucha ku mes?
5 Ku mutambu ukwau, Yesu wading wija yom yivud yamushena yikeza kusadik mu machuku ma kurutu—uyakin wakad kwijik kudi antu avud adinga pa chirung chend. Ronganyin retu rikutwish kwikal mudi ra Yesu, pakwez tumujikitishin, mulong twij katat milong yijim piur pa Want wa Nzamb ni yikezay kusal mu machuku ma kurutu. Pitutadina antu mu jindond tudia, ku shikol, ku mudimu, ap mu chingand mutukata kulejan, ov tumenap anch antu avud adi mu mididim pantaliken nich uyakin winou wamushena? Chawiy lel, tukwet kand diyingish dikwau disadila anch tucha ku mes. Mudi Yesu, tufanyidin kucha ku mes chisu chawonsu, ni kukimb chisu ik tukutwisha kulejan yitwija piur pa Want wa Nzamb. Yisu yiney yawonsu yidi ya usey, ni tusotinap kuyishadish chamwamu. Mwom wa antu udi mu chak!—1 Tim. 4:16.
6 Yesu wading wij anch kudi chom chikwau chasala anch adandamena kucha ku mes. Wading wij anch Satan wading usotin kumwoz, kumuzengol, ni kushesh kushinshaman kwend. Mukankuny winou mukash wading usadil usu wa kucha ku mes chisu chawonsu mulong wa kuchirik kand “chisu chikwau” chakwel amwoza Yesu. (Luka 4:13) Yesu kaziyap bwat. Ndiy wasota kwikal tayad pantaliken ni yoziu, yikokujol, rupompat, ap mar mawonsu mela kumushiken. Ov, chitwishikinap kulond mwamu mulong wetwetu? Twij anch Satan udi “mudi ntambu wonyina ukata kukimb nany ukudiay.” Chawiy lel, Dizu dia Nzamb diyikasikeshin in Kristu awonsu anch: “Ilamany ayinen, babalany!” (1 Pita 5:8) Ov, mutapu ik tukutwisha kusal mwamu?
MUTAPU TUKUTWISHA KUCHA KU MES MU MALEMBIL
7, 8. Ov, chiyul ik chapanay Yesu piur pa malembil, ni chilakej ik chapanay?
7 Bibil ulejen kukwatijan kujim nakash pakach pa kucha ku mes muspiritu, ap kucha ku mes, ni malembil. (Kol. 4:2; 1 Pita 4:7) Kupwa kwa kuyilej in kumulondul end anch adandamena kucha nend pamwing ku mes, Yesu walonda anch: “Chishany ku mes, chad lembilany chakwel kangal wawany mu yoziu.” (Mat. 26:41) Ov, chinech chirumburikin anch chiyul chinech chifanyidin kwimen ching kusu pa mwikadil ukash ukutwishau kurish nich chisu kanang? Bwat, chiyul chinech chidi chany tufanyidina kulondul dichuku ni dichuku.
8 Yesu wapana chilakej chiwamp nakash piur pa kulembil. Ukutwish kuvurik anch ndiy wasutisha uchuku wawonsu mu kumulembil Tatukwend. Talany amboku mutapu washikena yom. (Tang Luka 6:12, 13.) Chading pa chisu cha ruvul, piswimp ni ul wa in kuta ansh wa Kapernaum, dijuku dia Yesu diading mu teritwar winou. Urel, Yesu wakandama ku mikandu yading yitadina ku Karung ka Galalia. Pamenay uchuku wasambish kal, umen kand pamwing ap chitokish cha mend ya kasu mu Kapernaum ni mu tumal tukwau tudia piswimp. Pakwez, pisambinay ni Yehova , ndiy ushinshikin nakash pa malembil mend. Minit—kupwa asaa—wasut. Kupwa wasambish kuman mutapu yimunyik ya kasu yadinga kulemp yikat kukep yimwing ni yikwau kupwa ngond wasambish kumekan mwiur ni annam a uchuku akat kwendol mwisuku. Malembil mend chakin kamu mimedin pa mupak wend ukash witekinay—wa kuyitond atwimbuy end 12. Tukutwish kutongin pa mutapu wipanay Yesu mu kumulej Tatukwend yitongijok ni yovil yend yawonsu piur pa mwin kwilej umwing ni mukwau pakatay kwit wintakel ni manangu nich muchim utok.
9. Ov, chom ik tukutwisha kwilejin ku chilakej cha Yesu cha kulembil uchuku wawonsu?
9 Ov, chom ik tukutwisha kwilej kusutil ku chilakej cha Yesu? Ov, chimekeshin anch tufanyidin kusutish chisu chilemp mu malembil? Bwat, mulong ndiy wayileja in kwilej end anch: “Muchim ukatil kwend, pakwez mujimbu uziyil.” (Mat. 26:41, TMK) Pakwez, tukutwish kumwimburij Yesu. Chilakej, ov, tukat kumwitang Tatukwetu wa mwiur kurutu kwa kukwat mupak win wawonsu ukutwisha kwikal nich yibudikin padi etu, pa dijuku dietu, ap pa ambay netu akaritiy mu spiritu? Ov, tukat kulembil mulong wa maswir ma akadivar ni anambaz etu mu ritiy? Ov, malembil metu madiokil mu muchim pa ndond pa kuchirikinamu ching kusu mazu mamwing? Tal kand anch Yesu wamana usey wa kwambamb ni Tatukwend kuns ni panrend. Nlel unou mu mangand makwatikena nakash, chiswapel kukwashik nich yom tusadila mu mwom ni kuvuramen yom ya usey nakash. Anch twasutish yisu yivud mu malembil makash, ma muntu panrend, tukez kucha ku mes muspiritu. (Mat. 6:6, 7) Tukez kumusejin Yehova piswimp, kwikal tayad chakwel kukasikesh urund wetu ni ndiy ni kwipuk kusal yom yawonsu yikutwisha kuyipish urund winou.—Kus. 25:14.
MUTAPU WA KUCHA KU MES MU MUDIMU WA KULEJAN
10. Ov, chilakej ik chitulejin mutapu wading Yesu mwin kucha ku mes mu kukimb mitapu ya kupan uman?
10 Yesu wading ukat kucha ku mes mu mudimu wamwinkishau kudi Yehova chakwel asala. Kukutwish kwikal midimu yimwing yitwishishina manangu ma mwin kusal kutwish kutongijokin pa chisu chawiy chimwing pa yom yikwau pakad yibudikin yikash. Pakwez, midimu yivud yitining kushinshikin nawamp ni kucha ku mes, ni mudimu wa kulejan wa in Kristu uding chakin kamu mwamu. Yesu wading mwin kucha ku mes mu mudimu wend, wading uchil ku mes mulong wa kusadil yisu yawonsu chakwel kulejan rusangu ruwamp. Chilakej, pashikay ni in kwilej end mu musumb wa Sikar kupwa kwa weny ulemp wasalay pamanch, in kwilej aya kukimb yakudia. Yesu washala piswimp ni dijiy dia ul mulong wa kupim, pakwez wading uchil ku mes, ni wamana chisu cha kupan uman. Mband umwing mwin Samaria weza mulong wa kuvit mem. Yesu wela kwend kulal ap pakemp. Wela kutongin pa mayingish ma kwipuk kwambamb nend. Pakwez, ndiy walonda, wasambisha kwisamb ni mband winou, kupwa wapana uman ukash wayikwasha antu avud adinga mu ul winiwa. (Yoh. 4:4-26, 39-42) Ov, tukutwish kwilikej nakash chilakej cha Yesu cha kucha ku mes, pamwing ap mu kwikasikesh kucha ku mes mu kukimb yisu ya kuyilej rusangu ruwamp antu tukata kutanijan nau mu mwom wetu pichuku-pichuku?
11, 12. (a) Ov, chom ik chasalay Yesu pantaliken ni antu asota kudiosh manangu mend ku mudimu wend? (b) Ov, kwisikesh ik kwamekeshay Yesu piur pa mudimu wend?
11 Pasuta machuku, antu adinga nich yitongijok yimekena mudi yiwamp asota kudiosh yitongijok ya Yesu ku mudimu wend. Mu Kapernaum, yisak ya antu yikala yibachikinau pamanau yilay ya Yesu ya kwokan ni awiy asota ashala nend kwinikwa. Pakwez chinech chelap kovikan. Mulong mudimu wa Yesu wading wa kulejan kudi “amikoku [awonsu] ashadikina, awiy kamu in Isarel,” kezap ching kusu mulong wa musumb umwing kusu winou. (Mat. 15:24) Chawiy chayilejay antu inay anch: “Chifanyidin am kurumburil Rusangu Ruwamp ra Want wa Nzamb mu mal makwau kand, wawiy mulong wantuminay Nzamb.” (Luka 4:40-44) Chimeken patok anch, mwom wa Yesu wading wimedin ching kusu pa mudimu wend wa kulejan. Ndiy kalikidinap chom ap chimwing chakwel chiteka manangu mend kwindjing.
12 Ov, kushinshikin kwa Yesu pa mudimu wend kwamekesha anch ndiy wading usadin yom mulong wa kuyisangaresh antu ap kwitek kuns? Ndiy wipana nakash mu mudimu wend wa kulejan ni kulik kuwanyish maswir ma usey ma majuku? Bwat, Yesu wapana chilakej chitentamina cha kwisikesh. Wasangera mwom, wisangaresha pamwing ni arund nend. Ndiy wakwata majuku nich usey nakash, wamekesha ranaken nakash pantaliken nich maswir mau ni milong yau, ni wamekesha rukat rend kudi an.—Tang Marko 10:13-16.
13. Ov, mutapu ik tukutwisha kwimburij chilakej cha Yesu cha kucha ku mes ni cha kwisikesh mu mudimu wetu wa kulejan wa Want?
13 Pitukata kwimburij chilakej cha Yesu cha kucha ku mes, ov, mutapu ik tukutwisha kusadil kwisikesh mudi ndiy? Tufanyidinap kulikidil mangand minam chakwel madiosha manangu metu ku mudimu wetu tusadina. Ap arund ni anamakwetu akweta yitongijok yiwamp akutwish kutukasikesh chakwel tulika mudimu wetu wa kulejan ap tukimba yom yimenau anch yiwanyidin mu mwom wa muntu. Anch twamwimburij Yesu, tukez kuman mudimu wetu wa kulejan mudi yakudia. (Yoh. 4:34) Mudimu wetu ukat kutudish muspiritu ni kutusangaresh. Mwaning, tukutwishap kwikal ambwambol, kumekan anch tudi atentamina nakash ap kwikal ni muchim wa kwitek kuns. Mudi Yesu, tusotin kwikal nich musangar, kwikal atushalapol isikena a “Nzamb muwamp.”—1 Tim. 1:11.
MUTAPU WA KUCHA KU MES MU YOZIU
14. Pitudia mu yoziu, ov chitongijok ik tufanyidina kwipuk ni mulong wak?
14 Mudi mutwamena, Yesu wapana kubabesh kumwing kwa usey piur pa kucha ku mes padingay mu yoziu yikash. (Tang Marko 14:37.) Piturishina nich yikokujol, tuswiridin kulondul nakash chilakej chend. Mu yoziu, antu avud akat kuvuramenang uyakin umwing wa usey nakash, udia mu buku wa Jinswir ulejena tupamp twaad anch: “Kudi njil yimwing yikatay kutongay muntu anch yitentamin, pakwez kwisudiel kway yidi njil ya rufu.” (Jinswir 14:12; 16:25) Anch twachingejin pa chitongijok chetu ayinetu, pakampwil piturishina nich milong yikash, tukutwish kwitek ayinetu ni antu tukatina mu chak.
15. Ov, choziu ik chikutwisha mutu wa dijuku kurish nich pa chisu cha kuburen nfalang?
15 Chilakej, mutu wa dijuku ukutwish kurish nich yikokujol yikash mu kupan yom ya ku mujimbu kudi “anamakwend.” (1 Tim. 5:8) Ukutwish kuwil mu yoziu ya kutond mudimu ukata kumukangesh kukumangan ku yikumangan ya win Kristu, kutakel difukwil dia dijuku, ap kwipan mu mudimu wa kulejan. Anch wachingejin ching kusu pa chitongijok cha muntu, kusal mwamu kukutwish kumekan kwikal kuwamp, ap kutentamina. Pakwez, kukutwish kushikij ku mayej ma muspiritu ap ku rufu. Chiwapin nakash mud ik kulondul chiyul chidia mu Jinswir 3:5, 6! Salomon walonda anch: “Mukungamena [Yehova] ni muchim wey wawonsu. Kangal wachingej ronganyin rey amwiney. Mu jinjil jey jawonsu itiyij kudi Ndiy, ni Ndiy ukez katenchik jinjil jey.”
16. (a) Ov, Yesu wapana chilakej ik piur pa kuchingejin pa manangu ma Yehova pa ndond pa kuchingejin pa manangu mend amwinend? (b) Ov, mutapu ik ukata mitu yivud ya majuku kwimburij chilakej cha Yesu cha kumuchingejin Yehova mu yisu yikash?
16 Padingay Yesu mu yoziu, ndiy walika nakash kwimen pa ronganyin rend amwinend. Tongin bil pa chinech! Muntu wa manangu nakash wadinga pa divu dined kasotap kwimen ching kusu pa manangu mend amwinend chakwel atambula yakul. Chilakej, pamwozau kudi Satan, Yesu wamwakula nich kuchirikin tupamp tuvud dizu dined: “Mukand wa Nzamb ulondil anch.” (Mat. 4:4, 7, 10) Chimeken anch ndiy wachingejina pa manangu ma Tatukwend mu yoziu, wamekesha kwitudish kwadiwolay Satan ni kuburen kwikal nich. Ov, tusadil chilik chimwing? Mutu wa dijuku ukata kwimburij kucha ku mes kwa Yesu ukat kulikidilang chakwel Dizu dia Nzamb dimutakela, pakampwil mu chirung cha mar. Mu mangand mawonsu, tunan twa mitu ya majuku tukat kusalang mwamu. Asadil usu wa kutek Want wa Nzamb ni difukwil diakin pa ndond ya kusambish mu mwom, ayitekin ap kurutu kwa yom ya kumujimbu. Chawiy lel, asadil usu wa kulam nawamp majuku mau. Yehova ukat kuyukish usu usadilau wa kuwanyish maswir ma kumujimbu, mudi mudikata Dizu diend kushilamu.—Mat. 6:33.
17. Ov, chom ik chikubachikina kwilikej kucha ku mes kwa Yesu?
17 Pakad ntad, Yesu wapana chilakej chiwamp nakash cha kucha ku mes. Chilakej chend chidi cha usey, cha ukwash ni chikat kuyikol antu. Vurik anch Satan usotin kukwandjik mu tul twa muspiritu—wikala nich ritiy riziyina, difukwil dia usweral, ni kuburen kushinshaman. (1 Tes. 5:6) Kangal wamushilany ndond akupandakanany! Mudi mwasalay Yesu ikal mwin kucha ku mes—mwin kucha ku mes mu malembil mey, mu mudimu wey wa kulejan, ni mu kurish nich yoziu. Anch wasal mwamu, ukez kwikal ni mwom wa usey, usangareshina, nlel unou mu kulondul mwikadil winou, kwinsudiel kwa ditenchik dined diyimp dia yom difila. Kucha ku mes kukez kand kusal anch pakezay Mwant wey kushesh ditenchik dined, ndiy ukez kukutan tayad ni mu mudimu, ukat kusal rusot ra Tatukwend. Yehova ukez kusangar mudi ik pakezay kukuyukish mulong wa mwom wey ushinshamena!—Kuj. 16:15.
[Chipich chidia pa paj wa 16]
Yesu wamuleja mband umwing ku dijiy. Ov, yisu ik ukimbina mulong wa kulejan dichuku ni dichuku?
[Chipich chidia pa paj wa 17]
Kuwanyish nawamp maswir ma muspiritu ma dijuku diey kumekeshin anch uchil ku mes