Panany Yakupesh Kudi Yehova Ni Muchim Umwing

“Yawonsu yiukusalany, salany nich mushiku [muchim umwing] mudi muukata kumusadilany Nsalejetu [Yehova].”—KOL. 3:23.

1-3. (a) Ov, rufu ra Yesu ku mutond wa mar rirumburikin anch Yehova kaswiridinap kand chakupesh chin chawonsu chidiokila kudi etu? Rumburil. (b) Chipul ik chilankina piur pa yakupesh nlel unou?

MU CHITOT cha kusambish cha mivu C.C., Yehova wayijikija antu end anch chakupesh cha difut dia Yesu chajipa Chijil cha Moses. (Kol. 2:13, 14) Yakupesh yawonsu yadingau ni kulambul in Yuda mu yitot ya mivu yading yadingap kand yiswiridina ni yadingap kand ya usey. Chijil chading chawanyishin kal mudimu wach mudi “kalam djat ni pakushikay Kristu.”—Gal. 3:24.

² Chinech chisotilap kulond anch in Kristu kaswiridinap yakupesh. Chinyim ni chinech, kambuy Pita walonda piur pa maswir ma kupesh ‘yakupesh yiwamp ya muspiritu yatambulau kudi Nzamb mu Yesu Kristu.’ (1 Pita 2:5, TMK) Chikwau kand, kambuy Paul wamekesha patok anch mwom wa kwipan wa in Kristu—ku mitambu yawonsu wau—akutwish kuuman kamu mudi “yakupesh.”—Rom 12:1.

³ Chawiy lel, mwin Kristu ukat kupan yakupesh kudi Yehova, kusutil kand kupan yom kanang kudiay ap kusutil ku kulik yom kanang mulong wendend. Kulondulijan ni yom twija piur pa maswir madingau nich in Isarel, mutapu ik tukutwisha kwikal nich kashinsh anch yakupesh yetu yawonsu ayitiyijin kudi Yehova?

MU MWOM WA MACHUKU MAWONSU

4. Yom ik tufanyidina kuvurik piur pa mijikit ya mwom wa machiku mawonsu?

⁴ Mu mwom wetu wa machuku mawonsu, chikutwish kumekan chikasikena kunung midimu yetu nich kupan yakupesh kudi Yehova. Mudimu wa ku chikumbu, mudimu wa kushikol, mudimu wa ku mujimbu, kuland yom, ni yikwau, yikutwish kupandakan ni kukangesh yom ya muspiritu. Pakwez, anch wapanin kal mwom wey kudi Yehova ap uchingejin kusal mwamu mu machuku makemp madia kurutu, pa chinech chitongijok cha kusal mijikit ya dichuku ni dichuku chidi cha usey. Tudi in Kristu mu asaa 24 pa dichuku. Yany ya Bibil chiswiridin kuyisadil mu mitambu yawonsu ya mwom wetu. Chawiy lel, Paul utukasikeshin anch: “Yawonsu yiukusalany, salany nich mushiku [muchim umwing] mudi muukata kumusadilany Nsalejetu [Yehova].”—Tang Kolosay 3:18-24.

5, 6. Kushinshikin kwa mutapu ik kufanyidina kwikal nich usu pa kudjal ni yisal yetu ya pichiku ni pichuku?

⁵ Mijikit ya in Kristu ya dichuku ni dichuku yidiap chikunku cha mudimu wend utumbila. Pakwez, mulong Paul utukasikeshin kusal mudimu “nich mushiku [muchim umwing] mudi muukata kumusadilany Nsalejetu [Yehova]” chitusadil tutongina piur pa mulad wa mwom wetu wawonsu. Mutapu ik tukutwisha kusadil chinech kudi ayinetu? Ov, tukat kusal ni kudjal mu mutapu uwamp yisu yawonsu? Pitwipanina mu midimu ya pichuku pichuku, ov, twoviling usany wa kwiyijikish ayinetu mudi Atuman a Yehova, mulong kand wa yisal yetu ap mulong wa mutapu tukata kudjal? Chifanyidinap kwikal mwamu ap pakemp! Antu a Yehova kakatap kusot kusal chom ap chimwing chikutwisha kulet uyimp pa dijin dijim dia Nzamb.—Isay 43:10; 2 Kor. 6:3, 4, 9.

⁶ Tushinshikinay mutapu ukweta rusot retu ra kusal “nich mushiku [muchim umwing] mudi muukata kumusadilany Nsalejetu [Yehova]” usu pa mitambu yivud kushalijan ya mwom. Pitusadila mwamu, tulamany mu manangu anch yakupesh yawonsu yadingau ni kupan in Isarel kudi Yehova yading yifanyidina kwikal yom yipandakena kuwap yadingau nich.—Kub. 23:19.

MUTAPU UKWACHIKINA MWOM WEY

7. Kwipan kwa mwin Kristu kwitin ik?

⁷ Anch wipan amwiney kudi Yehova, ukwatin mupak winou pakad kwidjidjek, ov, kimwauyap? Chakin kamu, walondil anch mu mitambu yawonsu ya mwom wey, mu kutond kwawonsu utondina, ukumutek Yehova pa ndond ya kusambish. (Tang Hebereu 10:7.) Chinech chading chiyul chiwamp. Pakad kwidjidjek wamen kal anch ang wakimb rusot ra Yehova mu milong kanang ni kukasikesh kusal kulondulijan nich rusot rend, yibudikin yiding yiwamp nakash. (Isay 48:17, 18) Antu a Nzamb adi atumbila ni in musangar mulong akat kumekesh ngikadil ya Muntu uyifundishina.—Lev. 11:44; 1 Tim. 1:11.

8. Ov, usey ik chikweta kudi etu pa kwijik anch Yehova wading umen yakupesh ya pasak anch yitumbil?

⁸ Yakupesh yadingau ni kupan in Isarel kudi Yehova yading ayimen kwikal yitumbila. (Lev. 6:25; 7:1) Dizu dia Hebereu dikarumwinau “kutumb” diletin chitongijok cha kwaurik, cha pakampwil, ap chitumbishinau kudi Nzamb. Chakwel yakupesh yetu yikala yitiyikina kudi Yehova, yifanyidin kwikal yaurikina kudiokal ku kwijond kusutil ku yibachikin ya mangand. Tufanyidinap kukatish chom ap chimwing chikisinay Yehova. (Tang 1 Yohan 2:15-17.) Chakin kamu, chinech chirumburikin anch tufanyidin kwiyep nich urund win wawonsu ap kwiyandjik mu yom yikutwisha kutujondish ku mes kwa Nzamb. (Isay 2:4; Kuj. 18:4) Chirumburikin kand anch tukutwishap kulikidil mes metu kudandamena kutal yom yijondila ya masandj ap kulik manangu metu matongijokina piur pa yom mudi yiney.—Kol. 3:5, 6.

9. Ov, usey ik chikweta chisal cha mwin Kristu pantaliken ni antu akwau, ni mutapu ik?

⁹ Paul wayikasikesha ambay nend in ritiy anch: “Kangal wavuramenany kusal yom yiwamp ni kukwashijanany muntu ni mukwau, mulong yakupesh ya mitapu yiney, yawiy yikata kumusangarish Nzamb.” (Heb. 13:16) Chawiy lel kwikal muwamp ni kuyisadil antu akwau yom yiwamp chakin kamu chidi chom chimwing chimenay Yehova mudi chakupesh chitiyikina kudiay. Chisal mudi chinech chidi chijingidij cha in Kristu a kin.—Yoh. 13:34, 35; Kol. 1:10.

YAKUPESH MU DIFUKWIL

10, 11. Mutapu ik umenay Yehova mudimu wetu wa in Kristu ni difukwil dietu, ni chinech chikwikal nich usu ik pitudia?

¹⁰ Njil yimwing yijim yakin mutukata etu in Kristu kuyisadil antu akwau yom yiwamp yidi kusutil ku ‘kurumburil ruchingej retu.’ Ov, usadidil yisu yawonsu yimekena mulong wa kupan uman? Paul watazuka mudimu winou wa usey anch “yakupesh ya kushiman kudi Nzamb.” (Heb. 10:23; 13:15; Ozey 14:2) Tukutwish kulond yivud piur pa uvud ni kuwap kwa chisu tusutishina mu kulejan rusangu ruwamp ra Want, ni misamb yivud ya Chikumangan cha Mudimu yikwet rutong ra kuvuvurish yitongijok yetu pa mulong winou. Pakwez, tukutwish kulond mu wiswimp anch mulong mudimu wetu wa chingand ni wa kupan uman wa kukashimwish yidi “yakupesh ya kushiman,” chikunku cha kwifukwil kwetu, yakupesh yiney yifanyidin kwikal ya usey nakash tukutwisha kupan. Ap anch, chakin kamu mikadil yishalijadin, uvud wa chisu twipanina mu kulejan rusangu ruwamp chisu chivud ukat kumekesh kusanger kwetu mulong wa yom ya muspiritu.

¹¹ In Kristu akat pakad kujing kupan chisu mu kwifukwil kwa muntu ipend ap kwa mu chisak. Yehova utwitin kusal mwamu. Chidi chakin anch tukatap kand kulondul Sabat wa kwiswedish ap maweny ma kuya ku misambu mu Yerusalem. Pakwez, misambu yiney ya pasak yiwejidinaku ku mwom wa mwin Kristu. Nzamb ni katat ukat kutuchingejin kwimik midimu ya ku mujimbu mulong wa kwilej Dizu diend, kulembil, ni kukumangan ku yikumangen ya in Kristu. Ni mitu ya majuku ma in Kristu yikat kurijek mu kutakel difukwil dia dijuku pamwing ni yid ya dijuku diau. (1 Tes. 5:17; Heb. 10:24, 25) Piur pa mijikit yetu ya muspiritu, tusadil nawamp kwiyipul ayinetu anch, ‘Nikutwish kuwapish mutapu wam wa kwifukwil?’

12. (a) Ov, chitwishikin kwisikej kupan kwa mananash mu difukwil dia pasak nich yom ik nlel? (b) Mutapu ik ufanyidina kwisikej kwinoku kwikal nich usu pa yom twitina mu malembil metu?

¹² Mwant David wamuwangina Yehova anch: “Lik kulembil kwam kushik kudi Ey mudi mananash ma res ruwamp.” (Kus. 141:2) Tongijokin bil piur pa malembil mey—piur pa kudandamen pakad kujing ni kuwap kwa malembil minam. Mukand wa Kujingunik wisikejin “kulembil kwa antu a Nzamb” nich mananash mu kulond anch malembil mitiyikina mayiling kud Yehova mud malash ni res ruwamp risangareshina. (Kuj. 5:8) Mu Isarel wa pasak, mananash madingau ni kupan chisu ni chisu pa chintamb cha Yehova wading ufanyidina kwikal urijekinau nawamp nakash. Wading witiyikin kudiay Yehova ching kusu anch aupan kulondulijan nich yany yatekay. (Kub. 30:34-37; Lev. 10:1, 2) Anch malembil metu makin tumasadil chilik chimwing nich kalimish ni kubangin, tukutwish kwikal nich kashinsh anch mitiyikin kudi Yehova.

KUPAN NI KUTAMBUL

13, 14. (a) Ov, mudimu ik wasalay Epafrodit ni chikumangen cha Filip mulong wa Paul, ni mutapu ik wovay kambuy piur pa chinech? (b) Mutapu ik tukutwisha kulondul chilikej cha Epafrodit ni in Filip?

¹³ Milambu ya nfalang yiletinau mulong wa kukwash mudimu wa mangand mawonsu yikutwish kwikal chilik chimwing nich yakupesh, tupana jivud ap jikemp. (Mar. 12:41-44) Mu chitot chakusambish cha mivu C.C., chikumangen cha Filip chamutuma Epafrodit ku Rom chakwel kudimukin maswir ma ku mujimbu ma Paul. Ntimesh mwinou wa in Filip wasenda chakin kamu chipan cha nfalang chadiokala ku chikumangen. Kinak kadingap kapamp ka kusambish kudi in Filip kumekesh muchim wa kupan pantaliken ni Paul. Nich ranaken rau arijeka chakwel kupwish yakamish ya Paul piur pa nfalang chakwel ukutwish kwipan chisu chivud mu mudimu wa kulejan. Ov, mutapu ik wamanay Paul chipan chinech? Wachitazuka anch: “mulambu wa res ruwamp mudi yakupesh yiwanyidina kumusangarish Nzamb.” (Tang Filip 4:15-19.) Chakin kamu Paul wasangera chisal chinech cha rukat cha in Filip, ni chilik chimwing ni Yehova.

¹⁴ Chilik chimwing nlel, Yehova ukat kusanger nakash milambu yetu ku mudimu wa mangand mawonsu. Chikwau kand, wakana anch ang twadandamen kutek yisakin ya Want pa ndond ya kusambish mu mwom wetu, ndiy ukubangin maswir metu mawonsu, muspiritu ni ku mujimbu.—Mat. 6:33; Luka 6:38.

MEKESH KUJIKITISH KWEY

15. Yom ik yimwing yisadil umujikitish Yehova?

¹⁵ Chikwit chisu chilemp chakwel kuchind mayingishil mavud tukweta mulong wa kumujikitish Yehova. Ov, chidiap chakin anch dichuku ni dichuku tufanyidin kumujikitish mulong wa chipan cha mwom? Utwinkishin yawonsu tuswiridina chakwel twikwasha ayinetu—yakudia, ni masun, ni kuchidij kand rinkind tukata kupim. Chikwau kand, ritiy retu, rimedina pa ronganyin rakin, ritwinkishin ruchingej. Choviken anch tukat kumwifukwil Yehova ni kupan yakupesh ya kushiman kudiay ndiy, kusu mulong wa mutapu udiay ni yom yasalay kal mulong wetwetu.—Tang Kujingunik 4:11.

16. Mutapu ik tufanyidina kwakul ku chakupesh cha difut dia Kristu?

¹⁶ Mudi kamu mu twilejang mu mutu wa mulong wasambelang, chipan cha pakampwil cha Nzamb chayinkishay antu chidi chakupesh difut dia Kristu. Kwinoku kwawiy kumekesh kwa pakampwil kwa rukat ra Nzamb mulong wetwetu. (1 Yoh. 4:10) Ov, chisu chakul chifanyidina pa chinech? Paul walonda anch: “Rukat ra Kristu rawiy rituyikedila. . . . Ndiy wayifila antu awonsu chakwel awiy adia aom kakwikalap kand aom mulong wa ayinau kusu, pakwez mom yau yikwikal yendendiy wayifila, chad wavumbuk wikal kand mwom mulong wa kuyambat awiy.” (2 Kor. 5:14, 15) Chakin kamu, Paul wading ni kulond anch ang tujikitishin mulong wa rukat ridimukina ra Nzamb, chifanyidin kusu kusadil mwom wetu chakwel kumushiman Ndiy ni Mwanend. Rukat retu ni kumujikitish Nzamb ni Kristu yikumeken kusutil ku kuziyil kwetu ni ku maswir metu ma kulejan ni kwikadish in kwilej.—1 Tim. 2:3, 4; 1 Yoh. 5:3.

17, 18. Mu mutapu ik washikena amwing kuwejinaku ku chakupesh chau cha kushiman kudi Yehova? Pan chilikej.

¹⁷ Ov, Chitwishikin kudi ey kuwapish chakupesh cha kumushima chiukata kupan kudi Nzamb? Kupwa kwa kutongijokin piur pa uwamp wawonsu wasalay Yehova kudi awiy, antu avud ikala abachikinau kurijek chisu chau ni mijikit yau chakwel kuwejinaku ku kusal kwau mu mudimu wa kulejan wa Want ap mu mijikit yikwau ya uteokras. Amwing atwisha kusal mudimu wa uchibol nkwash angond avud ap umwing muvu ni muvu, ap anch akwau atwisha kusal mudimu wa uchibol wa rawonsu. Amwing ipana mu midimu ya Want ya rutung. Ov, yiney yidiap milad yiwamp ya muntu kumekesh kujikitish? Anch yisadikin nich chibachikin chiwamp—cha kumekesh kusanger ni kujikitish—yisal yiney ya mudimu utumbila yitiyikin kudi Nzamb.

¹⁸ In Kristu avud iyova kwikal nich chikal cha kujikitish kudi Yehova ni ikala abachikinau nich chinech. Umwing wa antu mudi inay ndiy Morena. Wakimba chakul ku chipul chend cha muspiritu mu Katolik, mu relijon mwapaminay ni mu filozofi wa in Aziy. Pakwez katanap chakul chimusangareshina mwawonsu mwaad. Ching kusu pasambishay kwilej Bibil ni Atuman a Yehova pawiy papwila impu yend ya muspiritu. Morena wamujikitisha Yehova mulong wa yakul yovikena nawamp ya Mifund ku yipul yend yawonsu ni mulong wa usu watambulay mu mwom wend kusutil ku yakul yiney ni wasota kumujikitish Yehova kusutil ku kusadil usu wend wawonsu mu mudimu wend. Wasambisha mudimu wa uchibol nkwash pakad kujing kapamp kamwing kupwa kwa dibatish diend, ni kupwa pachadinga chitwishikina kudiay, wasambish uchibol wa rawonsu. Kwinyim kwa mivu 30, Morena uchidi mu mudimu wa rawonsu.

19. Ov, mutapu chitwishikina kudi ey kuwejinaku ku chakupesh chey cha kushiman kudi Yehova?

¹⁹ Mwaning, kudi atushalapol avud ashinshamena a Yehova adia mu mwikadil wakad kuyitwishish kusal mudimu wa uchibol. Wikalap nchik mutapu tukutwisha kusal mu mudimu wa Yehova, etwawonsu tukutwish kupan yakupesh ya muspiritu yitiyikina kudiay. Mu yisal, tuswiridin kulondul yijil yitentamin nakash, kutongijokin anch tudi antimesh a Yehova chisu chawonsu. Mu ritiy, tukat kuchingejin sens mu kusadik kwa ntong ja Nzamb. Mu midimu yiwamp, tukat kukwash ku kupalangesh rusang ruwamp. Mulong wa kujikitish ni kusanger kwetu kukash mulong wa yawonsu yatusadidinay Yehova, tudandamenany kupan yakupesh kudi Yehova nich muchim wawonsu.

TAL ANCH UKUTWISH KWAKUL:

․․․․․

Mutapu ik ukutwisha kumushiman Yehova mu mijikit yey ya machuku mawonsu?

․․․․․

Yakupesh ik tukata kupan mu difukwil dietu kudi Nzamb?

․․․․․

Mutapu ik tukutwisha kupan yom yetu ya ku mujimbu kudi Yehova?

[Tablo wa jinsangu udia pa paj wa 27]

Ov, kuwap kwa Yehova kukubachikin kuwapish chakupesh chey cha kumushiman?

[Chipich chidia pa paj wa 25]

Ov, ukat kukwat yisu yawonsu yimekena chakwel kupan uman?