Lamany Chitongijok Chiwamp cha Chikumangen

“Chifanyidin ranaken ra Nsalejetu Yesu Kristu rikala ni yenen awonsu [nich chitongijok umekeshinany].”—FIL. 4:23.

MUTAPU IK TUKUTWISHA KUKASIKESH CHITONGIJOK CHIWAMP MU CHIKUMANGEN . . .

․․․․․

pitudia pamwing ni akadivar netu?

․․․․․

kusutil ku mushiku wetu mu mudimu wa chingand?

․․․․․

kusutil ku kulejan chitil chijim?

1. Mulong wak achiyijikitisha chikumangen cha mu Filip ni cha mu Tiatir?

IN KRISTU a mu chitot chakusambish cha mivu a mu Filip ading atuzweny ku yom ya kumujimbu. Pakwez, adinga ni muchim wa kupan, ni amekesha chilakej cha rukat pantaliken ni ambay nau in ritiy. (Fil. 1:3-5, 9; 4:15, 16) Mu mukand wend wa nsudiel upepidilau wayifundinay, kambuy Paul wafunda anch: “Chifanyidin ranaken ra Nsalejetu Yesu Kristu rikala ni yenen awonsu [nich chitongijok umekeshinany].” (Fil. 4:23) Mulong chitongijok chinech chimwing achimekesha kand kudi in Kristu a mu Tiatir, chawiy lel, Yesu Kristu utumbishinau wayileja anch: “Nij yisalijok yey yawonsu, ni rukat rey, ni ritiy rey. Nij kand kuziyil kwey ku mudimu, ni kudandamen kwey, katat ey usadil yom yivud kupandakan ya kusambish.”—Kuj. 2:19.

2. Ov, chom ik tusadina chakwel tukudisha chitongijok chimekeshinau mu chikumangen chetu?

² Nlel unou, chikumangen ni chikumangen cha Atuman a Yehova chikat kumekesh chitongijok kanang, ap mwikadil kanang uchitakedila. Yikumangen yimwing yijiken pakampwil mulong wa kumekesh chirungul ni rukat. Yikwau yijiken pakampwil ku mutapu ipanina nich mushiku ku mudimu wa kulejan Want ni alimishin nakash mudimu wa chisu chawonsu. Anch twakudish chitongijok chiwamp muntu ni muntu ipend, tukat kukwash ku uumwing wa chikumangen ni chikwau kand ku kuya kwach kurutu muspiritu. (1 Kor. 1:10) Ku mutambu ukwau, chitongijok chiyimp ku mutambu wetu chikutwish kulet tul twa muspiritu, mwikadil wa kuburen kusanger, ni ap kand kulikidil yisal yiyimp mu chikumangen. (1 Kor. 5:1; Kuj. 3:15, 16) Ov, chisu chitongijok cha chikumangen chey? Mutapu ik ukutwish amwiney kupan ukwash chakwel akasikesha chitongijok chiwamp mu chikumangen?

KASIKESHIN CHITONGIJOK CHIWAMP

3, 4. Mutapu ik tukutwisha ‘kumujikitishil [Yehova] mu kukumangan kujim’?

³ Nfund a kuseng wawanga anch: “Nikakujikitishil [Yehova] mu kukumangan kujim, nikakushiman mukach mwa antu avud.” (Kus. 35:18) Nfund a kuseng kaziyap mulong wa kumushiman Yehova padingay ni atushalapol akwau a Nzamb. Yikumangan ya rubing ni rubing, kuwejaku ni Dilejan dia Chinong cha Kalam, yidi yisu yiwamp kudi etu ya kumekesh mushiku pitwakwila ni pitulondina mazu ma ritiy. Etwawonsu tukutwish kwiyipul anch: ‘Ov, nisadil usu wa kwitapil sens dilau dia kwakul ku yikumangan? Ov, nikat kwirijek nawamp mulong wa kupan yakul ya usey? Pinidia mutu wa dijuku, ov, nikat kuyikwash an am chakwel arijeka yakul kurutu kwa chisu ni kuyilej mutapu wa kwakul mu mazu mau?’

⁴ Nfund a kuseng David wanunga ukash wa muchim wetu nich kuwang kwetu. Walonda anch: “Muchim wam udi ukash, A Nzamb, muchim wam udi ukash, nikukuwang muminy ni kupan kujikitish.” (Kus. 57:7, TMK) Miminy yisadidilau ku yikumangen ya in Kristu yitwinkishin yisu yiwamp chakwel “kumuwangil miminy ni kupan kujikitish” kudi Yehova nich muchim ukash. Anch twijap miminy yimwing, ov, mulong wak tukutwishap kwiyijidish kuyiwang pa chisu cha urel wa Kwifukwil mu Dijuku? Ov, tukutwish kukwat chiyul cha ‘kumuwangil Yehova mu mwom wam wawonsu ni kuwang kushiman kudi ndiy pinidiaku.’—Kus. 104:33.

5, 6. Mutapu ik tukutwisha kwikal nich muchim wa kupan ni kuyak akwau, ni kusal mwamu kuletin ik mu chikumangen?

⁵ Kumekesh muchim wa kupan kudi akadivar netu ni anambaz udi mutapu ukwau wa kukasikesh chitongijok chiwamp mu chikumangen. Mu shapitre wa nsudiel wa mukand wend wayifundilay in Hebereu, Paul wawejinamu kukasikesh kwinoku anch: “Dandamenany kukatijan muntu ni mukwau mudi akadivar mu Kristu. Vurikany kuyak aeny.” (Heb. 13:1, 2) Kuyinkish yakudia atulam in kwendangan ni akajau ap asadila mudimu wa chisu chawonsu mu chikumangen udi mutapu uwamp nakash wa kumekesh muchim wa kupan. Tongijokin kand pa adiaafu, majuku mudia anvaj umwing, ap antu akwau akutwisha kutambul ukwash wa kwibomb netu pachipatu mulong wa yakudia ap pa chisu cha difukwil dietu dia dijuku.

⁶ Paul wamuleja Timote chakwel ayibabesha akwau anch: “asala yom yiwamp, ni kwikal ampich mu midimu yiwamp. Ikala in makas monikina, in kuyikwashap akwau mapit mau. Mwamu akurijek yipau yau yikeza kwikal dishin diwamp ku chirung chikeza kwez. Chawiy mwamu akez kutambul mwom udia wakin.” (1 Tim. 6:17-19) Paul wapana chiyul anch ambay nend in kwifukwil afanyidin kukudish chitongijok cha kupan. Ap mu yisu ya yikokujol ya nfalang, tukutwish kukasikesh chitongijok cha kupan. Njil yiwap ya kusal mwamu chidi kukwash nich transport kudi antu akweta kuswir nich mulong wa kuya kulejan mu chingand ni kuya ku yikumangan. Ov, chidi nchik piur pa antu atambwila ukwash ku yisal mudi yiney ya rukat ridimukina? Akutwish kukasikesh chitongijok chiwamp mu chikumangen anch amekesh kujikitish, pamwingap kusutil ku kupan yom yitwishinau chakwel kufutin usey udandamedina ni upandikena wa mazut. Chikwau kand, ov, kutenchik kwetu mulong wa kusutish chisu ni akadivar ni anambaz a muspiritu kukutwishap kusal iyova kwikal aswiridinau ni akatinau? Anch twavudish yisal yiwamp “kudi anamakwetu in ritiy” ni kwikal tayad mulong wa kusadil chisu chetu pamwing nau ni kuyikwash nich mapit metu, tukatap kusu kukasikesh urund wetu ni awiy pakwez tukwashin kand kukudish chitongijok chiwamp cha chirungil mu chikumangen.—Gal. 6:10.

7. Mutapu ik kulam milong ya ujindj ya antu akwau kukutwish kukwash kulam chitongijok chiwamp mu chikumangen?

⁷ Pakwez tushinshikin yom yikwau yikata kukasikesh mwoj wa rukat ni ambay netu in ritiy: urund ni ujindj. (Tang Jinswir 18:24.) Arund akin akat kulamang mu ujindj milong yimutadila muntu amwinend. Anch akadivar netu atulej yitongijok yau yikash ni yovil yau ni akwet kashinsh anch yiney yikwijikanap kudi antu akwau, moj wa rukat udingaku kal ukudandamen kukasikan. Ov, tukutwishap kukasikesh rukat, mwikadil wa dijuku mu chikumangen kusutil ku kwikal murund wa kuchingejin ukutwisha kulam yom mu ujindj.—Jinsw. 20:19.

IKAL NICH MUSHIKU MU MUDIMU

8. Ov, chiyul ik chatambulau in Laodisey, ni mulong wak?

⁸ Pachilejay chikumangen cha mu Laodisey, Yesu walonda anch: “Nij yisalijok yey. Ey kiudiap utakela ap uswanyina. Am nikatil ing wadi utalela ap ing wadi uswanyina! Pakwez mulong ey udi kalengidij, kiutalelap, chad kand kiuswanyinap, am nikez kukuchil kamu mudi mat.” (Kuj. 3:15, 16) In Laodisey ading aburedin mushiku mu mudimu wa in Kristu. Mwikadil mudi winou wading chakin kamu nich usu pa urund wau. Chawiy lel, Yesu wayiyula nich rukat anch: “Am nikat kuyipup ni kuyikand antu awonsu inikatina. Chawiy ikal nich mushiku, ukarumuk kudiokal ku yitil yey.”—Kuj. 3:19.

9. Ov, mutapu ik mwikadil wetu pantaliken ni mudimu wa chingand ukwet usu pa chitongijok cha chikumangen?

⁹ Mulong wa kukasikesh chitongijok chikash ni chiwamp mu chikumangen, tufanyidin kuta muchim ku mushiku wetu mu mudimu wa chingand. Chikumangen chirijekin mulong wa rutong ra kuyikimb antu adia mudi amikoku mu teritwar ni kuyitung muspiritu. Chawiy lel, tuswiridin kusal pamwing mu mudimu wa kwikadish in kwilej nich mushiku, mudi kamu mwasalay Yesu. (Mat. 28:19, 20; Luka 4:43) Anch mushiku wetu wajimb nakash mu mudimu, tukwikal mu umwing nakash mudi “in mudimu nend Nzamb.” (1 Kor. 3:9, TMK) Pitumena mutapu akwetu akat kuchidij ritiy rau mu mudimu wa chingand ni kumekesh kujikitish kwau mulong yom ya muspiritu, chitubachikin kuyikatish ni kuyilimish nakash. Chikwau kand, kusal ‘chikij ku chikij’ mu mudimu kukat kulet chitongijok cha uumwing mu chikumangen.—Tang Sofoniy 3:9.

10. Ov, kuwapish mwikadil wa mudimu wetu wa chingand kukwet usu ik pa chitongijok cha antu akwau mu chikumangen?

¹⁰ Usu tusadila mulong wa kuwapish mwikadil wa mudimu wetu ukwet niwawiy chibachikin chiwamp pa antu akwau. Pitumekeshina kubangin kukash kudi antu tusankena, ni pitusadila usu wa kuwapish mutapu wetu wa kulejan mu kushik ku michim ya in kututesh, mushiku wetu mulong wa mudimu ukat kwiwejinaku. (Mat. 9:36, 37) Mushiku ukutwish kuyisamburikin ambay netu. Yesu wayituma in kwilej end kulejan aad aad pa ndond pa kuya muntu panrend. (Luka 10:1) Chinech chikatap ching kusu kupan dikasikesh ni kufumb pakwez chikasikeshin kand mushiku wau mu mudimu wa kulejan. Ov, tukatap kusanger kusal pamwing ni in kulejan a Want akweta mushiku? Chitongijok chau cha mushiku chitukasikeshin ni kutubachik kuya kurutu mu mudimu wa kulejan.—Rom 1:12.

ICHIDIJ PANTALIKEN NICH KUNUNGANIJAN NI CHITIL

11. Chitongijok cha mutapu ik chakudishau in Isarel amwing pa chirung cha Moses, ni chikala nich usu ik padiau?

¹¹ Mu jimbing kusu jikemp ja kwikal kwau mudi muchid usu, in Isarel akudisha chitongijok cha kulik kusanger ni kununganijan. Chinech chayishikija ku kumubwambwil Yehova ni antimesh end. (Kub. 16:1, 2) Ching kusu in Isarel akemp adiokala mu Idjibit awiy ikala nich mwom chakwel amana Ngand ya Kushilamu. Ap kand Moses amukangesha kwandam mwi ngand yiniya mulong wa mutapu wakulay pantaliken ni chitongijok chiyimp cha chikumangen cha Isarel! (Kuv. 32:48-52) Chom ik tukutwisha kusal nlel chakwel twipuka kuwa mu mupit wa chitongijok chiyimp?

12. Ov, mutapu ik tukutwisha kwipuk kukudish chitongijok chiyimp?

¹² Tufanyidin kwipuk kukudish chitongijok cha kununganijan. Ap anch kukudish kwikepish ni kalimish mulong wa in anyikel kukez kutukwash, tuswiridin kuyibangin antu adia pamwing netu. Kutond kuyimp kwa kwipuwangesh ap kusutish chisu chivud pamwing ni ambay a mudimu ap atwilejina nau shikol akad ni kalimish ap kakemp ka yany yitentamina kuletining yikokujol. Chidi cha manangu kudi etu kutek mipak ku urund wetu ni antu akweta chitongijok chiyimp ap akasikeshina chitongijok cha kulik kuziyil.—Jinsw. 13:20.

13. Ov, usu uyimp wa kununganijan ukutwish kushikij ku yisal yikwau ik yiyimp ya muspiritu mu chikumangen?

¹³ Usu uyimp wa kununganijan ukutwish kushikij ku yisal yikwau yiyimp ya muspiritu. Chilakej, kununganijan kukutwish kuyipish chisambu ni uumwing wa chikumangen. Pakwez, tukutwish kuyovish ambay netu akaritiy kusansan ku michim anch atesh anch tukat kununganijan piur pau, ni chisal cha mutapu winou chikutwish kutushikij ku kuyidimben ni ku kuyisaal. (Lev. 19:16; 1 Kor. 5:1) In kununganijan amwing a mu chikumangen cha mu chitot cha mivu ya kusambish “akat kudiul ulabu wa Nzamb ni kuyisaal masaal in uyaj a mwiur.” (Jud 8, 16, MM) Kununganijan mudi kwinok piur pa antu akweta yisend mu chikumangen kukwetap chakin kamu kwitiyik kwa Nzamb.

14, 15. (a) Kulikidil uyimp udandamena kukutwish kwikal nich chibudikin ik pa chikumangen cha kabuj? (b) Chom ik tufanyidina kusal anch twajingunin anch muntu kanang usadin chitil mu ujindj?

¹⁴ Chikwikal nchik anch twajingunin anch muntu kanang ukat wipanin mu chitil mu ujindj, pamwing ap ukat kuna pakad kupep pa chopu, ukat kutal mafilim ma masandj, ap usadil masandj? (Efes 5:11, 12) Kubwik kwetu mes pa chitil chijim kukutwish kukangesh kusal nawamp kwa mwiku utumbila wa Yehova ni kuyipish chisambu cha chikumangen chakabuj. (Gal. 5:19-23) Mudi kamu mwafanyidinau in Kristu a kusambish a ku Korint kudiosh kuyip, nlel unou chibachikin chin chawonsu chiyimp chifanyidinap kuchilikidil mu chikumangen mulong wa kulam chitongijok chend chikash, ni chiwamp. Ov, chom ik ukutwisha kusal chakwel ukasikesha chisambu mu chikumangen?

¹⁵ Mudi kamu mutwasambelang kulond, chidi cha usey kulam ujindj mu milong kanang, pakampwil anch akwetu atulejin yovil ni yitongijok yau. Chiyipin mudi ik kupalangesh rusangu ra ujindj piur pa muntu kanang! Ap mwamu, anch kwasadikin chitil chijim, antu akweta mbil ya Muspiritu ya kupwish mulong winou—amakurump mu chikumangen—chifanyidin kuyijikish. (Tang In Levi 5:1.) Chawiy lel, anch twij anch mukadivar ap nambaz wasalang chitil, tufanyidin kumukasikesh muntu winou chakwel ayishejina amakurump ni kukimb ukwash wau. (Jak. 5:13-15) Pakwez, anch walik kusal mwamu mu chisu kanang chovikena, tufanyidin kulejan chitil chinech.

16. Mutapu ik kulejan kwetu chitil chijim kudi kwa ukwash mulong wa kulam chitongijok chiwamp mu chikumangen?

¹⁶ Chikumangen cha in Kristu didi dipat dia muspiritu, ni tufanyidin kupan ukwash chakwel tuchilama kusutil ku kulejan yitil yijim. Anch amakurump amushikij mwin kusal chitil ku yitongijok yiwamp, wikal nich muchim wa kwit dilikishin ni wa kukarumuk witiyij yimulejinau ni kupup, kakezap kutek mu ubaj chitongijok chiwamp cha chikumangen. Pakwez chikwikal nchik anch mwin kusal chitil chijim walik kwit dilikishin ni kukarumuk ni kulik chiyul cha rukat cha amakurump? Kumwopat kwend mu chikumangen kukwikal nich chibudikin cha ‘kusheshik,’ ap kudiosh, kwa yom yijondila pakach petu, ni kulam chitongijok chiwamp cha chikumangen. (Tang 1 Korint 5:5.) Mwaning, kulam chitongijok chiwamp cha chikumangen kwitin anch etwawonsu tusala yom yiwamp, kwovijan nich chisak cha amakurump, ni kuking uwamp wa ambay in ritiy.

KASIKESHIN PIUR PA “KWINUNG KWA CHISAMBU”

17, 18. Chom ik chikutukwasha kukasikesh ‘michim mu spiritu mu kwinung kwa chisambu’?

¹⁷ Kusutil ku kwipan mulong wa “kutesh malejan malejanau atwimbuy,” in kumulondul Yesu akusambish akwasha ku kukudish chitongijok cha uumwing mu chikumangen. (Mid. 2:42) Akwata nich usey chiyul cha Mukand wa Nzamb ni umutakel wa amakurump. Mulong nlel unou amakurump akat kusadil pamwing ni chisak cha kashalapol, antu awonsu mu chikumangen ayikasikeshin ni kuyikwash chakwel ashala inungina. (1 Kor. 1:10) Pitukata kuziyil ku yany yimedina pa Bibil ya dirijek dia Yehova ni kulondul umutakel wa amakurump, tukat kumekesh anch tudi ‘akasikeshina michim mu spiritu mu kwinung kwa chisambu.’—Efes 4:3.

¹⁸ Pa chinech, chakin kamu tusalany chakwel kulam chitongijok chikash, chiwamp mu chikumangen. Anch twasal mwamu, tudi nich kashinsh anch ‘ranaken ra Nsalejetu Yesu Kristu rikwikal ni yetwetu awonsu.’—Fil. 4:23.

[Chipich chidia pa paj wa 24]

Ov, ukat kupan ukwash ku chitongijok chiwamp kusutil ku kurijek yakul yovikena?

[Chipich chidia pa paj wa 25]

Pan ukwash ku chitongijok chiwamp kusutil ku kwijik miminy yetu