Ilejina ku Dizu dia Nzamb

Ov, Risu Rusangu Ruwamp Piur pa Relijon?

Mutu wa mulong winou ushinshikin pa yipul ukutwisha kwiyipul ni ulejen kwisu ukutwisha kutang chakul mu Bibil wey. Atuman a Yehova akez kusanger kwisambin ney pa yakul yiney.

1. Ov, marelijon mawonsu mawapin?

Mu yisak yivud ya marelijon muding antu a kashinsh asotina kumusangaresh Nzamb. Ndiy uyimen antu inay ni ukat kuyilam. Pakwez, chidi cha ushon mulong antu amwing asadila relijon mulong wa ntong jiyimp. Pasak, amakurump a relijon ayimesha mar ap akankuny nau. (2 Korint 4:3, 4; 11:13-15) Nlel unou, kulondulijan nich ma rapor masu, antakel amwing a ma relijon akasikesha kwovishan wom ap njit, ni iyandjika mu yisal ya kuyimesh an akemp mar.—Tang Mateu 24:3-5, 11, 12.

Bibil ulejen anch kudi mitapu yaad ya relijon—relijon wakin ni relijon wa makasu. Relijon wa makasu kakatap kulejan uyakin piur pa Nzamb. Pakwez, Yehova Nzamb usotin anch antu ijika uyakin piur pend.—Tang 1 Timote 2:3-5.

2. Ov, risu rusangu ruwamp piur pa relijon?

Nzamb kasotinap anch antu ayidimba kudi marelijon malejena anch mamukatin pakwez makat kumumekesh nayimp. Chakin kamu, antu adia mu marelijon minam akatin kwikal arund a mangand mayikedilau kudi Satan, Djabul. (Jakobu 4:4; 1 Yohan 5:19) Dizu dia Nzamb dilejen mutapu makata marelijon kuyiziyil ku winyikel wa antu pa ndond pa kumuziyil Nzamb ni adi mudi mband wa usund. Bibil umutazukin mband winou mwin kusochik pa dijin dia “Babilon Mujim,” dijin dia musumb wa pasak mwasambisha relijon wa makasu kupwa kwa chirung cha Mabeb cha Nowa. Piswimp ap, Nzamb ukez kulet disudiel dia ku kashimuk ku relijon uyidimbina ni uyimeshina antu mar.—Tang Kujingunik 17:1, 2, 5, 17; 18:8, 23, 24.

3. Ov, mutapu ik ukezay Nzamb kulet musangar pa mangand mawonsu?

Dirumburish diezina dia relijon wa makasu didi rusangu ruwamp. Dikez kudiosh mangand mawonsu mu mar ma kuzengol. Marelijon ma makasu makezap kand kuyidimb ap kuyauril antu. Muntu mwawonsu udia mwom ukez kushakam mu uumwing mu difukwil dia Nzamb umwing wakin.—Tang Isay 11:9; Kujingunik 18:20, 21; 21:3, 4.

4. Chom ik chifanyidinau antu a kashinsh kusal?

Yehova kayivuramenap antu a kashinsh adia mu marelijon ma makasu mu mangand mawonsu. Ndiy ukat kuyikumangej nlel unou antu inay mu uumwing kusutil ku kuyilej uyakin.—Tang Mika 4:2, 5.

Yehova ukat kuyak mu dijuku diend antu asotina kumusadil. Ap anch arund, ni anamakwetu ovil kuyip anch twasambish kumusadil Yehova, tukutambul yom yivud. Tukwikal nich urund ni Nzamb, “dijuku” disu ni dia rukat ni ruchingej ra kwikal nich mwom wa chikupu.—Tang Marko 10:29, 30; 2 Korint 6:17, 18.

Anch usotin kwijik yom yivud, tal shapitre wa 15 ni wa 16 wa mukand winou, Chom Ik Chakin Kamu Chifundishinay Bibil?, wapalangeshau kudi Atuman a Yehova.

[Dizu Dirumburila Chipich Chidia pa paj wa 26]

The Complete Encyclopedia of Illustration/J. G. Heck