Ilejina ku Dizu dia Nzamb

Ov, Mutapu ik Yikweta Yitangil ya Muspiritu Usu Padi Etu?

Mutu wa mulong winou wisambidin yipul wiyipulap kal pamwing ap ni ulejen kwisu ukutwisha kutan yakul mu Bibil wey. Atuman a Yehova akez kusanger kwisamb ney piur pa yakul yiney.

1. Ov, angel adi anany?

Angel adi yitangil ya muspiritu yishicha mwiur. Awiy akwet mulad wa mwom udia piur nakash kupandakanamu mwom wa antu. Nzamb wakin, udia amwinend spiritu, wayitanga angel kurutu kwa kutang divu. (Job 38:4, 7; Mateu 18:10) Yehova ukwet mamiliyon ma angel ashinshamena.—Tang Kuseng 103:20, 21; Daniel 7:9, 10.

2. Ov, angel akat kuyikwash antu?

Angel amukwasha Lot muntu utentamina. Ndiy wading mu musumb wasotay Nzamb kushesh mulong wa uyimp wa antu adinga mwinimwa. Angel aad amubabesha Lot ni dijuku diend chakwel achina. Antu amwing amana yom yiney mudi maswimbu ni alika kutesh. Pakwez Lot ni anend amband apanda mulong aziyila ku kubabesh kwa Nzamb kusutil kudi angel atumay.—Tang Disambishil 19:1, 13-17, 26.

Kwambatan nich Bibil, angel akat kuyikwash antu nlel unou kusutil ku kutakel mudimu wa antu akata kulejan mu mutapu ushinshamena rusangu ruwamp ra Want wa Nzamb. (Mateu 24:14) Mu rusangu ruwamp mudi kand kubabesh. Mudi mwadinga kubabesh kwapanay Lot, rusangu riner ridiap maswimbu bwat. Ridiokil kudi Nzamb kusutil angel.—Tang Kujingunik 1:1; 14:6, 7.

Nzamb ukutwish kusadil angel mulong wa kutukasikesh piturishina nich yoziu. Ndiy wasadila mwangel mulong wa kumukasikesh Yesu.—Tang Luka 22:41-43.

Piswimp ap, Nzamb ukez kuyisadil angel mu mutapu windjing—mulong wa kuyishesh antu ayimp aletina mar. Ni ukez kupwish milong ya antu.—Tang 2 Tesalonik 1:6-8.

3. Ov, mutapu ik ukwetau ayilembil usu padi etu?

Mudi mwasalau antu avud adinga pa divu uyimp mu kulik kumuziyil Nzamb, chawiy lel mwiur angel avud amubwambwila Nzamb. (2 Pita 2:4) Angel amubwambwila ayitazuka anch ayilembil. Mukurump wau udi Satan, Djabul. Satan ni ayilembil end akat kuyidimb antu.—Tang Kujingunik 12:9.

Satan wasadila yisakin yijondila, winyikel wa antu, ni relijon wa makasu mulong wa kuyibachik antu ni kuyitek kulemp ni Nzamb. Chawiy lel, Satan ndiy usadila anch kwikala kuburen kwa kutentam, chisum, ni mar makata kuyishiken antu.—Tang 1 Yohan 5:19.

4. Ov, ayilembil akat kuyidimb antu mutapu ik?

Satan wayidimba antu avud mu kuyilej anch afu akat kukarumuk ni kwikal aspiritu akutwisha kwambamb nau. Pakwez, Bibil ulejen anch afu kakutwishap kusal chom ap chimwing. (Mulej 9:5) Chawiy lel, ayilembil ayidimbining antu pakatau kwimburij dizu dia akatish afila kal. (Isay 8:19) Ayilembil akat kuyidimb antu akwau kusutil kudi in yipong, in kulejan milong ya kurutu, ni in kusadil wimbuk, ni astroloji. Dizu dia Nzamb ditubabeshin anch twipuka yisal yiney yawonsu. Chawiy lel, tufanyidin kwipuk yom yawonsu tukweta yimedina piur pa ayilembil ni yisal yau.—Tang Kuvurik Yijil 18:10, 11; Midimu 19:19.

Anch tumukatin Yehova, tukutwishap kwov wom wa ayilembil. Pitwilejina Dizu dia Nzamb ni kusal yom yilejenay, tukat kurish ni Djabul ni kushakam piswimp nenday Nzamb. Yehova ukwet usu nakash kuyipandakanamu ayilembil. Angel end ashinshamena akutwish kutukasikesh mu chisu cha mar.—Tang Kuseng 34:7; Jakob 4:7, 8.

Anch usotil jinsangu jikwau, tal shapitre wa 10 wa buku winou, Chom Ik Chakin Kamu Chifundishinay Bibil?, wapalangeshau kudi Atuman a Yehova.