Yaku Yen Yifanakana ni ya An a Ngand a Want!

‘Yaku yen yifanakana ni ya an a ngand.’—FIL. 1:27.

MUTAPU IK UKUTWISHA KWAKUL?

Ov, nany ukutwisha kwikal mwan a ngand a Want?

Chom ik tufanyidina kusal piur pa rudim, rusangu ni yijil ya Want?

Ov, mutapu ik umekeshinau an a ngand a Want anch akatin yijil ya Nzamb?

1, 2. Ov, mulong wak chiyul cha Paul ku chikumangen cha in Filip chadinga nich usey wa pakampwil?

KAMBUY Paul wakasikesha chikumangen cha in Filip anch ‘yaku yau yifanakana mudi mudia Rusangu Ruwamp.’ (Tang Filip 1:27.) Dizu dia grek diasadilay Paul mulong wa kufund dizu “yaku” akutwish kudikarumun kand anch ‘yaku yen yifanakana ni ya an a ngand.’ Mazu minam mading ni usey wa pakampwil ku chikumangen cha in Filip. Mulong wak? Mulong chamekana anch Filip wading pakach pa misumb yadinga ni antu adinga asendin kal wan a ngand wa in Rom. An a ngand a in Rom adinga mu Filip ni mu Want wa in Rom ading ni chibud mulong wa mwikadil wau ni ading akat kuyiking kudi chijil cha in Rom.

² Yid ya chikumangen cha in Filip yading nich diyingish dikash dia kwikal nich chibud. Paul wayivurisha in Kristu azizidilau many anch wan a ngand wau wadinga “mwiur.” (Fil. 3:20) Awiy kadingap an a ngand, a want wa ukauntu kusu, pakwez an a ngand a Want wa Nzamb. Chawiy lel, awiy asangera diking ni yiyukish yakad kwilikej.—Efes 2:19-22.

3. (a) Ov, anany akutwisha kwikal an a ngand a Want? (b) Ov, chom ik tukeza kushinshikin mu mutu wa mulong winou?

³ Chiyul cha Paul cha kwel anch ‘yaku yen yifanakana ni an a ngand’ chisambidin pakampwil piur pa antu akeza kuyikel pamwing ni Kristu mwiur. (Fil. 3:20) Pakwez, chikutwish kwisambin kand piur pa antu akeza kwikal yid ya pa divu ya Want wa Nzamb. Ov, mulong wak? Mulong in Kristu awonsu ipanina kal akat kumusadil Mwant umwing, Yehova, ni afanyidin kushakam kwambatan ni yijil yimwing. (Efes 4:4-6) Nlel unou, antu akat kusal usu wa kuwanyish yitiyijinau chakwel ikala an a ngand mwi ngand yikweta mapit mavud. Chifanyidin kusal usu mud ik chakwel twikal an a ngand a Want! Chakwel tukasikesha kusanger kwetu kwa chisend chinech, shinshikinany amboku yom yimwing yidia chilik chimwing pakach pa yom yitinau mulong wa kwikal mwan a ngand wa winyikel wa antu ni mwan a ngand wa Want wa Nzamb. Katat tukez kushinshikin yom yisatu yitufanyidina kusal anch tusotin kulam kalimish ka kwikal an a ngand a Want.

YITIYIJINAU MULONG WA KWIKAL MWAN A NGAND

4. Ov, rudim rishitwila chom ik, ni mutapu ik tukutwisha ‘kulond’ ridim riner?

⁴ Kwilej rudim. Winyikel umwing wa antu witining anch antu asotina kwikal an a ngand ileja rudim rilondinau mwi ngand yau. Ap kupwa kwa kutambul wan a ngand, antu asadiling mivu yivu mu kwilej rudim risu. Akutwish kwilej swaa yijil ya mutapu wa kulond rudim, akutwish kusutil kand yisu yimwing mu kwilej mutapu wa kulond nawamp mazu ma rudim riner. Chilik chimwing, Want wa Nzamb witin anch an a ngand end ileja yitazukinau mu Bibil anch ‘rudim rishitwila.’ (Tang Sofoniy 3:9.) Ov, rudim riner chom ik? Udi uyakin piur pa Yehova ni ntong jend jilejenau mu Bibil. Tukat ‘kulond’ rudim rishitwila anch chaku chetu chambaten ni yijil ni yany ya Nzamb. An a ngand a Want wa Nzamb akutwish kwilej swaa malejan ma pa dishin madia mu Bibil ni kutambul dibabatish. Pakwez, ap kupwa kwa kutambul dibatish, afanyidin kusal usu wa ‘kulond’ nawamp rudim rishitwila. Ov, mu mutapu ik? Muntu ni muntu pakach petu ufanyidin kwambatanish yitwija piur pa yany ya Bibil ni yisal yetu.

5. Ov, mulong wak tufanyidin kwilej yom yawonsu piur pa rusangu ra dirijek dia Yehova?

⁵ Kwilej rusangu ra ngand. Muntu usotina kwikal mwan a ngand wa winyikel wa antu ufanyidin kwilej piur pa rusangu ra pasak ra winyikel. Chilik chimwing, antu asotina kwikal an a ngand a Want afanyidin kusal usu wa kwilej yom yawonsu piur pa Want wa Nzamb. Shinshikin bil chilakej chapanau kudi an a Kore, asala mu Isarel wa pasak. Awiy asangera nakash piur pa Yerusalem, ndond ya difukwil ni kulejan rusangu ra musumb winou. Mayal ni pot-pot yayakamishap pakwez, chayakamisha chading kurumburik kwa musumb ni ndond ya difukwil. Yerusalem wading “musumb wa Mwant mujim,” Yehova, mulong yading ndond ya difukwil diakin. Kwawiy kwinikwa kwadingau ni kwilej Chijil cha Yehova. Yehova wamekesha rukat rend ridimukina kudi antu ayikelau kudi Mwant wa Yerusalem. (Tang Kuseng 48:1, 2, 9, 12, 13.) Ov, usotin mudi awiy kwilej ni kulejan rusangu ra chikunku cha dirijek dia Yehova didia pa divu? Anch wilej nakash piur pa dirijek dia Nzamb ni mutapu uyilaminay Yehova antwend, Want wa Nzamb ukez kwikal wakin kamu kudi ey. Rusot rey ra kulejan rusangu ruwamp rikez kwikal rikash kamu.—Jer. 9:24; Luka 4:43.

6. Mulong wak choviken anch Yehova atwita chakwel twileja ni kuziyil ku yijil ni yany ya Want?

⁶ Kwijik Yijil. Winyikel wa antu witining anch an a ngand au ileja ni kuziyil ku yijil ya ngand. Choviken, anch Yehova witin chakwel twileja ni kuziyil ku yijil ni yany yikata kuyitakel an a ngand a Want awonsu. (Isay 2:3; Yoh. 15:10; 1 Yoh. 5:3) Yijil ya antu yiding yiyimp yisu yivud ni yakad kutentam. Pakwez, “yijil ya [Yehova] yiwanyidin.” (Kus. 19:7) Ov, tusangaredin mu chijil cha Nzamb ni kutang Dizu diend dichuku ni dichuku? (Kus. 1:1, 2) Mutapu umwing tukutwisha kwilej chijil cha Nzamb udi kusutil ku kwilej ayinetu. Kwikil muntu mukwau ukutwisha kusal mwamu mulong wetwetu.

AN A NGAND A WANT AKATIN YIJIL YA NZAMB

7. Ov, yijil ik ya piur nakash yilondwilau kudi an a ngand a Want?

⁷ Chakwel tudandamena kwikal an a ngand, tufanyidinap kwimen kusu pa kwijik yany ya Nzamb pakwez tufanyidin kand kuyikat. An a ngand avud a ma winyikel wa antu alondining anch akat kwitiyij yany ni yijil ya mu jingand mudiau. Pakwez, anch aman anch chijil chiwapinap ni kwikil muntu uyitadila, akat kujipang chijil. Yisu yivud, antu inay akat ‘kuyisangaresh antu.’ (Kol. 3:22) An a ngand a Want akat kulondulang yany yidia piur nakash. Tukat kumuziyil Nzamb nich musangar, ap anch kwikil muntu ututadila. Mulong wak? Mulong tumukatin Mwin kutek chijil.—Isay 33:22; tang Luka 10:27.

8, 9. Mutapu ik ukutwisha kwijik anch ukatin chakin kamu yijil ya Nzamb?

⁸ Ov, mutapu ik ukutwisha kwijik anch ukatin chakin kamu yijil ya Nzamb? Shinshikin mutapu wakwila piutambwila chiyul piur pa yom umena anch yikusangareshin amwiney—chilakej, piur pa milong ya kudjal, kwikil ni kwileng. Kurutu kwa kwikal mwan a ngand wa Want, wading ukatin pamwing ap kudjal nayimp. Pasambisha kujimb rukat rey pantaliken ni Nzamb, wileja mutapu wa kudjal mu mutapu umulimishina ndiy. (1 Tim. 2:9, 10; 1 Pita 3:3, 4) Ukutwish kuman anch katat wasambish kal kudjal nawamp. Pakwez chikwikal nchik anch mukurump wa kulej anch yom ukatina yikat kuyovish kuyip in kulejan avud adia mu chikumangen? Ov, mutapu ik ukutwisha kwakul? Ov, ukusambish kulet mayingish mey, kwov ujim, ap chibud? Mufulandal wa chijil cha Want wa Nzamb udi anch an a ngand awonsu a Want amwimburija Kristu. (1 Pita 2:21) Piur pa chilakej cha Yesu, kambuy Paul wafunda anch: “Pakwez etu awonsu tufanyidin muntu ni muntu kumusangarish mwanamakwend mwin Kristu mu yom yiwamp, mulong wa kumukasikesh kukul mu ritiy. Mulong Kristu kisangarishap amwinend.” (Rom 15:2, 3) Mulong wa kulet chisambu mu chikumangen, mwin Kristu uswila ufanyidin kulimish kom ka antu akwau pakad kwov ujim.—Rom 14:19-21.

⁹ Tal mitu ya milong yaad ya usey nakash: mutapu tumena antu a mujimbu ukwau ni mutapu tumena uruw. Antu akad kwikal an a ngand a Want wa Nzamb akutwish kulikidil utum wa amakundj ni amakundj, mafilm ma masandj mudi yom yisangareshina, ni kutong anch masandj ni kulikijan yidi yom yimutadina muntu amwinend. An a ngand a Want alikin kal makasu minam, ni yaku yiney ya choy. Ap anch in Kristu avud a pasak ading ni mashakamin ma masandj, katat amen mujimbu wa ikundj ni wa mband ni uruw kwikal yipan ya Nzamb. Awiy akat kusanger yijil ya piur ya Yehova ni itiyijin nich muchim umwing anch antu adandamedina kwipan mu yaku ya masandj kakutwishap kwikal an a ngand a Want. (1 Kor. 6:9-11) Pakwez, itiyijin kand anch muchim ukat kudimban. (Jer. 17:9) Chawiy lel, asangaredin kutambul yany ya pakampwil yikata kuyikwash kulam yany ya mashakamin ma piur.

AN A NGAND A WANT ATESHIN KUBABESH

10, 11. Ov, kubabesh ik kuletinau kudi Want wa Nzamb pa chisu chiwanyidina, ni wiyovil nchik piur pa kubabesh kwinoku?

¹⁰ Winyikel wa antu ukutwish kupan kubabesh kwa ukash wa ku mujimbu piur pa yakudia ni mon wa kwiyokish nich. Chawiy lel, yidiap yakudia ap mon win wawonsu uyipina. Pakwez anch yakudia ap mon kanang uyipin, winyikel ukutwish kuyibabesh antu mu mutapu wisikena chakwel ayikinga an a ngand end. Anch winyikel usadilap mwamu ukez kumekan anch ulaminap antwend nawamp. Chilik chimwing, Want wa Nzamb ukat kuyibabeshang antu pa chisu chiwanyidina piur pa ubaj wa mashakamin ni wa muspiritu. Chawiy lel, Internet wikadin kal mutapu uwamp wa kwisambin, kupan malejan, ni kwipuwangesh. Dirijek dia Nzamb dikat kusadil Internet ni kuwanyish yom yiwamp yivud. Pakwez, tupend tuvud twa Internet twading tuyimp nakash muspiritu ni mu mashakamin.Tupend twa Web twa pa Internet twalejena mafilim ma masandj mayipishin ukash wa muspiritu wa an a ngand a Want. Mu dikum dia mivu, chisak cha kashalapol ushinshamena watubabesha piur pa tupend twinetu. Tujikitishin mud ik mulong wa kubabesh kwinoku kwa ukash wa muspiritu!

¹¹ Nlel unou, kudi tupend tukwau twa Internet tukatau kusadil antu avud—ukutwisha kwikal wa ukwash anch amusadil nich manangu. Pakwez, tupend twinetu, atazukining anch jinjil ja kutumin jinsangu ku Internet, ni twawiy tukutwisha kwikal tuyimp. Tukutwish kusal anch muntu ikala ni arund ayimp. (1 Kor. 15:33) Chidiap cha kushimokish, anch dirijek dia Nzamb diapana kubabesh kwisikena piur pa kusadil kwa tupend twinetu. Ov, watangin mikand yawonsu ya katat yafundau kudi kashalapol ushinshamena piur pa kusadil kwa tupend twa Web twinetu twa kutumin jinsangu ku Internet? Chidi kuburen manangu mud ik anch twasadil tupend twinetu twa Internet pakad kutang mikand yiney!a Chikutwish kwikal mudi kuna mon ukash pakad kutang yiyul yifundinau pa mulond.

12. Ov, mulong wak chidi cha usup kuburen kwijik kubabesh?

¹² Antu akad kwijik kubabesh kwa kashalapol ushinshamena akat kwisadil ayinay uyimp ni kuyisadil uyimp antu akatishinau. Antu amwing asambisha kutal mafilim ma masandj ap asala masandj ni asambisha kutong anch Yehova kakutwishap kuman yom yisadinau. Chidi cha usup mud ik pa kutong anch tukutwish kujindjik yisal yetu ku mes kwa Yehova! (Jinsw. 15:3; tang Hebereu 4:13.) Nzamb usotin kuyikwash antu inay ni uyitumin antwend adia pa divu chakwel apakisha kuyikwash. (Gal. 6:1) Chawiy lel, mudi mukatau kuyitambul antu amwing an a ngand anch asal uyimp kanang, Yehova ukat kuyitambul wan a ngand ap kuyopat antu alikina kuziyil ku yijidik yend pakad kukarumuk.b (1 Kor. 5:11-13) Pakwez, ndiy ukwet riy. Antu akarumukina ni aswimpina yaku yau akutwish kand kwikal nich urund uwamp ni Yehova ni kwikal kand an a ngand a Want. (2 Kor. 2:5-8) Chidi chom chiwamp mud ik kumusadil Mwant winou wa rukat mwamu!

AN A NGAND A WANT AKWATIN KWILEJ NICH USEY

13. Mutapu ik ulejenau an a ngand a Want anch akwatin kwilej nich usey?

¹³ Winyikel uvud wa antu usadining mudimu ukash wa kuyilej an a ngand au. Akat kutenchik mashikol mulong wa kulejan kutang ni kufund ni kulejan kand mudimu wa ku makas. An a ngand a Want akat kusanger ma shikol minam ma kumujimbu ni ilejin nakash kutang, kufund, ni mutapu wa kukimb nfalang jau. Awiy atambwil ap kand nich usey wa piur nakash malejan milejinau mudi an a ngand a Want wa Nzamb. Kusutil ku chikumangen cha win Kristu, Yehova ufundishin kufund ni kutang. Ayikasikeshin anvaj anch afanyidin kuyitangin anau akemp. Ngond ni ngond, kashalapol ushinshamena wapalangesha mapaj ma mikand yengamidina mu Bibil mu Chinong cha Kalam ni mu Réveillez-vous ! Anch utangin mapaj maad dichuku ni dichuku pa ngond, akez kukulam kudi jinjil jinej ja usey ja malejan ma Want.

14. (a) Ov, malejan ik tufanyidina kutambul? (b) Ov, yiyul ik piur pa wel wa Kwifukwil mu Dijuku twasangera kusadil?

¹⁴ Mbing ni mbing, an a ngand a Want akat kutambul malejan ku yikumangan yau ya chikumangen. Chilakej, mu dikum dia mivu musamban yasutina, Shikol ya Mudimu wa Uteokras yayikwasha in kwilej chakwel ikala alej akash a Dizu dia Nzamb. Ov, wafundishin kal dijin diey ku shikol winou? Mu mivu ya katat kashalapol ushinshamena wakasikesha pakampwil urel wa Kwifukwil mu Dijuku pa rubing. Ditenchik dined diakasikesha umwing wa dijuku. Ov, watwishin kal kusadil yiyul yifundinau mu mikand yetu?c

15. Ov, chisend ik pakach pa yisend yimwing yijim nakash tukweta?

¹⁵ An a ngand a winyikel wa antu akutwish kulejan patok piur pa chisak cha chipolitik, ap kuya kuchis ni chis chakwel asala mwamu. Mu chilik chimwing chipandikena kujimb nakash, an a ngand a Want akat kukasikesh nakash Want wa Nzamb mu balibal ni ku chis ni chis. Chawiy lel, mudi mwalejanau mu mutu wa kwilej wasutina, Chinong cha Kalam, chilejena Want wa Yehova, nlel unou udi gazet upalangeshinau nakash pa divu! Chimwing cha chisend chijim tukweta chidi cha kuyilej antu akwau piur pa Want wa Nzamb. Ov, wipanin kal nich mushiku mu mudimu wa kulejan?—Mat. 28:19, 20.

16. Ov, mutapu ik ukutwisha kumekesh anch udi mwan a ngand muwamp wa Want wa Nzamb?

¹⁶ Piswimp ap Want wa Nzamb ukez kwikal winyikel umwing kusu ukeza kuyikel pa divu. Ukez kutakel milad yawonsu ya mwom wa dichuku ni dichuku, kangal kusu ya muspiritu pakwez kand ya ku mujimbu. Ov, ukez kwikal mwan a ngand muwamp wa Want wa Nzamb pa chisu chinicha? Katat chidi chisu cha kumekesh anch ukwikal chakin kamu. Mu mipak yawonsu ukwatina dichuku ni dichuku, sal yom yawonsu mulong wa uyaj wa Yehova ni mekesh anch yaku yey yifanaken ni ya an a ngand a Want wa Nzamb.—1 Kor. 10:31.

[Mazu madia kwishin kwa paj]

[Tablo wa jinsangu udia pa paj wa 21]

Ov, uteshin kubabesh kwa usey kwimedina pa Bibil piur pa Internet?

[Chipich chidia pa paj wa 19]

Ov, mudi an a Kore, ukutwish kusanger mu difukwil dishitwila ni mu rusangu rad?

[Chipich chidia pa paj wa 22]

Urel wa Kwifukwil mu Dijuku wey ukutwish kukusal nakash chakwel ey ni akatish ney wikalany an a ngand awamp a Want