Ov, Mulong Wak Kukatul Milamu Kudandamedin Kwikalaku?

“Antu amwing akwet usu, pakwez akwau akat kuman mar mu makas mau.”—MULEJ 8:9.

DIZU dined dilejen nawamp piur pa rusangu ra winyikel wa muntu. Winyikel wa muntu uletin mar mavud pa mangand. Mu yirung yawonsu, antu awamp apakisha kutenchik chisak chitentamina adandamena kuyikangesh kudi ris ni kukatul milamu. Ov, mulong wak chidi mwamu? Ov, mulong wak kukatul milamu kudandamedin kwikalaku? Chimeken anch, chidi mulong wa yibachikin yiney yiyimp yisatu yilondwilaku.

1. Chibachikin cha chitil.

Bibil ulejen kamu anch “etu awonsu atuyikedil kudi yitil.” (Rom 3:9) Mudi mayej mamwing ma chivadik makad kupwa, chitil ‘chidi mu michim’ yetu. Mu tunan twa mivu, yitil “yayikela” padi antu mudi mwant. “Yijil” ya chitil yidandamedin kusal mudi etu. Yibachikin ya chitil yiyitwadil antu avud ku kutek yisakin yau kurutu ni kutek mwom wau mu kukimbijol yom ya ku mujimbu ap kusot mapit ma antu akwau.—Rom 5:21; 7:17, 20, 23, 25.

2. Chibachikin cha mangand mayimp mutudia.

Mangand metu mizwil ris ni choy. Mu mashakamin ma mutapu winou, antu amwing amen anch chikasiken kushalijan ni antu akwau. Mulong wa yibachikin ya chom, ikadil kal ni ris ra uyaj. Akudishin kand rusot rikash ra nfalang ni ra yom ya ku mujimbu—kupandakanamu yom yiswiridinau chakin kamu. Cha ushon, asotin kutambul yom mu mutapu uyimp chakwel awanyisha ntong jinej. Pa ndond pa kurish nich yibachikin yiyimp, antu inay akat “kulondul chisak cha antu avud chakwel [asala] nau kuyip.”—Kubudik 23:2.

3. Chibachikin cha Satan Djabul.

Satan, chitang cha muspiritu chabwambwila, chikat “kuyipumbol antu a mangand mawonsu.” (Kujingunik 12:9) Ndiy ukat kuyisadil antu. Ukutwish kusadil maku ma muntu ma kwikal nich yom yiwamp ya ku mujimbu ni kwikal ni nfalang jivud ni kushiken ku kumubachik muntu chakwel asala uyimp.

Ov, chinech chirumburikin anch tudi mudi apopi mu makas ma Satan—anch tufanyidin kumuziyil ndiy pakatay kutubachik mudi musotilay? Tukez kwilej chakul mu mutu wa mulong ulondwilaku.