Kukatul Milamu Kukez Kupwa!

“Muchingilany [Yehova], wilamany mwi njil yend . . . Pakuyijiyishau ayimp shutit ukez kachiman.”—KUSENG 37:34, TMK.

OV, UKAT kwakam, mudi mwakaminau antu avud anch chitwishikinap kwipuk kukatul milamu ni kukezap kupwa rawonsu? Anch chidi mwamu, wom winou woviken. Mu rusangu ra muntu, antu apakisha kutenchik milad yawonsu yiwanyidina ya winyikel. Pakwez, kandikal atwisha kudiosh chaku cha kukatulan milamu. Ov, chitwishikin kwikal nich ruchingej anch chisu chimwing antu awonsu akez kwikal in kashinsh umwing ni mukwau?

Chidi chom chisangareshina mulong Bibil wakwil anch mwaning! Utulejin anch piswimp ap Nzamb ukez kusal usu chakwel adiosha kukatul milamu pa divu. Mutapu ik ukezay kusal mwamu? Kusutil ku Want wend, winyikel wa mwiur ukez kukarumun divu diawonsu. Wawiy Want umwing wayifundishay Yesu in kumulondul end anch alembil. Mu matazukinau yisu yimwing anch Malembil ma Mwant ap Tatukwetu, Yesu walonda anch: “Want wey weza. Rusot rey arusala pansh.”—Mateu 6:10.

Piur pa Ntakel wa Want winou, Yesu Kristu, Bibil watakela kulejan anch: “Mulong ukumukamunin chimana mar pakudilay, ni kazwazu wakad mwin kumukwash. Ukwov riy kudi atuzwazu ni ayimana mar, ni kukamunin mupim wa ayimana mar. Ukukamunin mipim yau ku kupengam ni kubwambul.” (Kuseng 72:12-14, TMK) Chimeken anch Yesu wayolila riy antu amana mar mulong wa kukatul milamu, ni ukez kusal usu chakwel adiosha kumeshan mar! Ov, chidiap chom chikasikeshina?

Mu makas mwa Ntakel ukweta riy ni usu, Want wa Nzamb ukez kudiosh kukatul milamu pa divu dietu. Ov, mutapu ik? Mu kuyidiosh yom yisatu yiletina kukatul milamu.

Chibachikin cha Chitil

Nlel unou, tufanyidin etwawonsu kurish nich yibachikin ya chitil, yisadina anch twikala ni choy. (Rom 7:21-23) Chikwau kand, kudi antu awamp asotina kusal yom yitentamina. Atekin ritiy rau mu usey wa difut dia mash ma Yesu, ni akutwish kutambul dilikishin mulong wa yitil yau.a (1 Yohan 1:7, 9) Antu inay akutwish kutan yiyukish kusutil ku chisal chijim nakash cha Nzamb, mudi mulejenau mu Yohan 3:16 anch: “Nzamb wakata ngand nakash, ndiy wamupana Mwanend kapwokal chakwel muntu mwawonsu ukumwitiyija ndiy kakujiyap, pakwez ukez kwikal nich mwom wa chikupu.”

Mulong wa antu ashinshamena, Nzamb ukez kusal chom chimwing chamushena chakin kamu. Mu mangand masu mezina, ndiy ukez kudiosh yitil yawonsu, ni kuyishikij pakemp-pakemp antu ku kuwanyin ni ku mwikadil utentamina. (Isay 26:9; 2 Pita 3:13) Chibachikin cha chitil chikezap kand kusal anch muntu ap umwing ikala nich yisal ya kukatul milamu. Mwishin mwa winyikel wa Want wa Nzamb, antu ashinshamena akez “kudiokal kand iyinau mu uswik wa yom yivundila.”—Rom 8:20-22.

Chibachikin cha Mangand Mayimp Mutudia

Cha ushon, antu avud nlel unou akat kuyimesh antu akwau mar. Ayimeshin antu akemp mar ni atuzwendj, ni kuyibachik akwau ku kukatulan milamu niyawiy. Bibil ukat kuyiyul antu inay anch: “Chifanyidin antu ayimp akarumun yaku yau, akarumun kand yitongijok yau.” Antu inay ijondila afanyidin kukarumuk, Bibil ukat kushilamu anch Nzamb “ukuyilikishin swa.”—Isay 55:7.

Pakwez, Nzamb kakezap kwidjidjek bwat, ukez kuyishesh antu alikina nich chibud kuswimp mwikadil wau. Kusutil ku Want wa Nzamb, kushilamu kwa Bibil kukez kwikal kwakin: “Muchingilany [Yehova], wilamany mwi njil yend, . . . Pakuyijiyishau ayimp shutit ukez kachiman.”b (Kuseng 37:34, TMK) Nich kusheshik kwa antu ayimp ijondila, in kumwifukwila Nzamb ashinshamena kakezap kuman mar ma yisal ya kukatul milamu.

Chibachikin cha Satan Djabul

Wakusambish pakach pa akayitil akash udi Satan Djabul. Tukutwish kwikal ajikitishina nakash mudi ik mulong Yehova ukez piswimp ap kumukangesh Satan, ukez kusal anch kangal ayibachika kand antu ku uyimp. Kupwa, Nzamb ukez kumushesh Satan rawonsu. Chom chinech chiyimp nakash chikeza kand kuyibachik antu chakwel ikal ni yisal yijondila.

Pakwez, chitongijok chakwel anch Nzamb ukez kuyishesh antu awonsu akasikeshina kukatul milamu chikutwish kumekan mudi cha kutongin kusu. Ukutwish kushimok anch, ‘Ov, Nzamb ukwet chakin kamu mutapu wa kukarumun yom mwamu? Anch chidi mwamu, mulong wak kasadilap mwamu nlel unou?’ Yiney yidi yipul yiwamp, ni Bibil uletin yakul yiwanyidina.c Tukwitin chakwel ushinshikina amwiney pa chifundishinay Bibil piur pa machuku ma kurutu, pakeza kupwa chikupu yisal ya kukatul milamu.

[Mazu madia kwishin kwa paj]