Pornografi​—Ov, UwapinBil Anch Uyipin?

Nlel unou mangand mizwil sens nich pornografi.a Chitwishikin kumutan mu kwipuwangesh, mu milad ya kudjal, mu mafilim, mu miminy, mu magazet, ni ku televizion, ku masengan ma video, ku telefon, ku Internet, ni ku yipich yidia pa Internet. Chimeken anch, pornografi ukwet usey nakash mu mashakamin ma antu avud. Antu avud adia mu jindond jishalijadina akat kutal nakash pornografi kupandakanamu pa chirung chikwau mu rusangu ra muntu.​—Tal muchet “Uyakin Piur pa Pornografi.”

Mulad wa pornografi ukat kukarumukang kand. Mulej Gail Dines ufundin anch: “Nlel unou yipich yapandiken kal kuyip, chawiy lel, yadinga yiyipina nakash pasak yikadil kal nel pornografi muwamp.”

Mutapu ik umena mwikadil winou? Ov, pornografi udi kwiswedish kuwamp, ap ulemb ukash? Yesu walonda anch: “Mutond uwamp ukat kusong mabuj mawamp, pakwez mutond uyimp ukat kusong mabuj mayimp.” (Mateu 7:17) Ov, mabuj ik makatay pornografi kubudish? Chakwel utana chakul, shinshikin amboku yipul yimwing ya usey piur pa pornografi.

Ov, usu ik ukwetay pornografi padi antu?

YILONDINAU ANKALIWENY: Pornografi upwitining nakash manangu ma muntu, akat kumufanikesh nich damb ditazukiningau anch cocaine kudi in kukimbijol in kwokan amwing.

Brian,b watala pornografi pa Internet ulejen anch: “Kwikil chom chankangesha. Nakanganya kuyikel manangu mam. Nazala ni nova kusansan nakash mu mutu wam. Narisha chakwel nilika kutal, pakwez nawila kand mu mupit winou.”

Antu akata kwipan mu pornografi ajindjikining yisu yivud yaku yau. Akat kujingam ni kudimban. Chishimokishinap anch antu avud amening mar ma kwikal ayinau, usany, wom, ushon, ni ujim. Yisu yimwing, akat kukudish ap yibachikin ya kusot kwijip. Serge wateka yipich yivud dichuku ni dichuku pa telefon wend, ulejen anch: “Nikala muntu wa choy ni wakad ruchingej. Niyova kwikal wakad usey, nificha nich, nakanganya wakushakam nend, ni nawila mu mupit. Nova usany ni wom wa kukimb ukwash.”

Kutalaku pakemp ap pakad kuchingejin pa yipich ya pornografi kukutwish kwikal ni yibudikin yiyimp. Papanay uman ku komite wa Sénat mu États-Unis, Dokter Judith Reisman, mwin kutakel kukimbijol pa milong ya pornografi, walonda anch: “Yipich ya pornografi yimeningau yikat kushalang mu manangu ni kumakarumun, ap anch ayitadin kwau kapamp kamwing, ap pakad kwisotil, pakwez yilabining mu manangu ni chitwishikinap ap chikasiken kuyidioshamu.” Susan, ukweta mivu 19, watala pornografi pa Internet, ulejen anch: “Yipich yiney yashala mu manangu mam. Nikat kuyivurik pakad kuchingejin. Nikat kwiyov anch nikutwishap kuyidiosh mu manangu dichuku ap dimwing.”

CHIFANYIDINA KWIJIK: Pornografi uyisheshining ni kuyitek mu uswik antu amutadininga.​—2 Pita 2:19.

Ov, usu ik ukwetay pornografi pa majuku?

YILONDINAU ANKALIWENY: “Ambay a uruw akat kulikijan ni majuku makat kusheshik mulong wa pornografi.”​—Buku The Porn Trap, wafundau kudi Wendy nenday Larry Maltz.

Pornografi ukat kujip ma uruw ni kwauril majuku kusutil ku

• Kuyipish ruchingej ra uruw, urund, ni rukat.​—Jinswir 2:12-17.

• Kukasikesh choy, kulik kwikal ni murund, ni kulik kumusanger mbay wa uruw.​—Efes 5:28, 29.

• Kulet yitongijok yiyimp ni maku ma masandj.​—2 Pita 2:14.

• Kuyibachik antu amutadina ayishindila ambay nau a uruw chakwel asala nau yisal yiyimp ya kumanijan kwa ikundj ni mband.​—Efes 5:3, 4.

• Kukasikesh kulik kushinshaman mu yovil ni ku mujimbu.​—Mateu 5:28.

Bibil ulejen anch ambay a uruw kafanyidinap ‘kusadil rubabek’ kudi umwing ni mukwau. (Malaki 2:16) Kuburen kushinshaman udi mutapu ukwau wa kusadil rubabek ukutwisha kushesh uruw ni kusal anch kwikala kwiyauril ap kujip uruw. Chawiy lel, kwaurik kwinoku kukat kulet mar kudi an avadikina mu uruw winou.

Pornografi ukutwish kand kuyisal an nayimp nakash kapamp kamwing. Brian, twisambinanga kwinsambishil, warumburila anch: “Pinadinga piswimp ni mivu dikum, Natana pakad kuchingejin magazet ma pornografi ma tatukwam pinadinga mu kusengan masengan ma kubatamijan. Nasambisha kumatal mu ujindj, pakad kwijik chakin kamu mulong wak yipich yiney yapwita manangu mam. Pawiy pasambisha chirung cha chaku chiyimp chadandamena rawonsu ni pinapama.” Yilejinau yimekeshin anch pornografi ukutwish kuyibachik an akemp ku yisal ya masandj ku usand wau ni ku kwikal kand ijondila, in yisal ya masandj ya chisum, ni kwikal nich yovil ni manangu mayimp.

CHIFANYIDINA KWIJIK: Pornografi ukat kuyipish urund wa rukat wa ambay a uruw ni kulet kusansan ku muchim.—Jinswir 6:27.

Ov, chom ik chilejenay Bibil piur pa pornografi?

CHILEJENA DIZU DIA NZAMB: “Chifanyidin kujip rusot ren ruyimp . . . mudi usund, ni kusotijan, ni upwepu, ni maku mayimp ma mujimbu, ni ris, mulong ris ridi mutapu wa kwifukwil akish.”​—Kolosay 3:5.

Mulong, Yehovac Nzamb ukisining pornografi. Chidap anch mulong kumanijan kwa ikundj ni mband kumwovishin usany. Ndiy watanga usu wetu wa kumanijan kwa ikundj ni mband ni wasota anch ambay a uruw asadila usu winou mulong wa kwisangaresh umwing ni mukwau, kwikal piswimp nakash mu yovil, kusanger kuval an.​—Jakobu 1:17.

Ov, mulong wak lel tukutwish kulond anch Yehova ukisining nakash pornografi? Shinshikinany bil mayingish makemp minam:

• Ndiy wij anch pornografi ukutwish kuyipish mwom.​—Efes 4:17-19.

• Utukatin ni usotin kutulam ku uyimp.​—Isay 48:17, 18.

• Yehova usotin kulam ma uruw ni majuku metu.​—Mateu 19:4-6.

• Ndiy usotin anch twikala ishitwila ni alimishina mbil ya antu akwau.​—1 Tesalonik 4:3-6.

• Ndiy usotin anch tulimisha usu wetu wa kuvalijan ni tuusadila mu mutapu uwamp.​—Hebereu 13:4.

• Yehova wij anch pornografi ukat kumekesh chitongijok cha makasu, cha choy, ni cha satan piur pa kumanijan kwa ikundj ni mband.​—Disambishil 6:2; Jud 6, 7.

CHIFANYIDINA KWIJIK: Pornografi ukat kushesh urund wa muntu ni Nzamb.​—Rom 1:24.

Pakwez, Yehova ukat kuyovil riy nakash antu asotina kudiokal mu uswik wa pornografi. Bibil ulejen anch: “[Yehova] udi mwin riy ni ranaken, ukat kulab pa kwov ujim, wizwil sens ni rukat rudimunikina. Ndiy wij mwatutangilay, ukat kuvurik anch tudi kwetu rufunfut.” (Kuseng 103:8, 14) Ndiy uyitin antu itudishina anch achirika kudiay ndiy chakwel ‘ayovila riy ni kuyanaken mulong wa kuyikwash pa chisu chikwetau kuswir.’​—Hebereu 4:16; tal mushet “Kukamunik mu Uswik wa Pornografi.”

Antu avud itiyija ukwash wa Nzamb. Ov, ndiy wayikwasha kamu? Tal yilejenay Bibil piur pa antu amwing alika yaku yiyimp: “Akutokishinany kal kwikal antu ishitwila a Nzamb adia zwang, akuyingishinany kal kudi Nzamb mu dijin dia Nsalejetu Yesu Kristu ni ku [M]wiku [U]tumbila wa Nzamb wetu.” (1 Korint 6:11) Antu inay akutwish kulond mudi mwalonday kambuy Paul anch: “Kristu ukat kwinginkish ukash uwanyidina wa kusal yom yawonsu.”​—Filip 4:13.

Susan, wakamunika mu uswik wa pornografi, ulejen anch: “Yehova ndiy kusu amwinend ukutwisha kukukwash chakwel ukamunika mu uswik wa pornografi. Anch wamwit ukwash ni umutakel, ukutwish kwikal nich mwikadil wishitwila kurutu kwend. Ndiy kakezap kukulik chakwel uwa.”