MUTU WA MULONG WA PA CHIBUR | OV, UFANYIDIN KWILEJ BIBLE?

Program Wa Kwilej Bibil Mulong Wa Antu Awonsu

Atuman a Yehova ayij kamu nawamp kudi antu awonsu mulong wa kulejan kwau kwa patok. Pakwez, ov, wij kand anch tukat kutakel program wa kwilej Bibil pa mangand mawonsu?

Ikundj umwing wilejidin Bibil pa ndond yend ya mudimu

Mu muvu wa 2014, Atuman piswimp ni 8 000 000 mu jingand 240 atakela malejan ma Bibil piswimp ni 9 500 000 ni kusut ngond mwawonsu.a Pakwez, uvud wa antu ilejina Bibil niyetwetu uvudin kupandakanamu antu a mu jingand piswimp ni 140!

Mulong wa kuwanyish mudimu winou, Atuman a Yehova akat kupalangesh piswimp ni miliyar umwing ni chikunku wa ma Bibil, mikand, ma gazet, ni yom yikwau yikwashina kwilej nich Bibil muvu ni muvu—mu jindim piswimp ni 700! Kupalangesh kwa mikand kwinoku kuyikwashining antu kwilej Bibil mu dizu dikatinay muntu amwinend.

“Nakatap kwilej ku shikol, pakwez kwilej kwinoku kwading kuwamp. Yom nileja yading kamu ya kwinkasikesh!”—Katlego, wa mu Afrik du Sud.

“Malejan minam makula ku yipul yam yawonsu.”—Bertha, wa mu Mexique.

“Dilejan dia Bibil diasadikinanga ku chikumbu cham pa chisu chinwanyidina. Chom ik kand chikwau nikutwisha kukimb”!—Eziquiel, wa mu Brezil.

“Malejan masalanga yisu yimwing aminit 15 kushik ku aminit 30—yisu yikwau malepanga—ap anch chading mwamu, am nasangaranga.”—Viniana, wa mu Australie.

“Malejan minam mading makad kufut nfalang—mading masangareshina!”—Aimé, wa mu Bénin.

“Mulej wafundishanga Bibil wading muntu muwamp ni ushimpishin muchim. Twata nend urund uwamp nakash.”—Karen, wa mu Irlande du Nord.

“Antu avud ilejining Bibil pakwez kakatap kushiken ku kwikal Atuman.”—Denton, wa mu Angleterre.

YAKUL KU YIPUL YIKATAU ANTU KWIPUL CHISU CHAWONSU PIUR PA PROGRAM WA DILEJAN DIA BIBIL

Ov, dilejan dia Bibil chom ik?

Tukat kusadil mitu ya milong ya mu Bibil mitapu kushalijan ni tukat kushinshikin maverse madia mu mitu ya milong yiney. Chilakej, Bibil upanin yakul ku yipul mudi yiney: Ov, Nzamb udi nany? Udi mutapu ik? Ukweting dijin? Uding kwisu? Tukutwish kumusejin piswimp? Chikasikena chidi cha kwijik kwisu tukutwisha kutan yakul yiney mu Bibil.

Mulong wa kuyikwash antu kutan yakul, tukat kusadil nakash buku Chom ik Chakin Kamu Chifundishinay Bibil? ukweta ma paj 224.b Buku winou amubudisha mulong wa kuyikwash nich antu kwijik mafundish ma pa dishin ma mu Bibil. Mu buku winou mudi kand malejan piur pa Nzamb, Yesu Kristu, mar ma antu, kuvumbuk, malembil, ni yom yikwau yivud.

Ov, chisu ik ni ndond ik yifanyidina kwilej Bibil?

Dilejan dikutwish kusadik pa chisu ni ndond ukatina.

Ov, ma saa minch mafanyidina kusadik dilejan dined?

Antu avud akat kwitekinang saa pa rubing mulong wa kwilej Bibil. Pakwez chisu cha kwilej chifanyidin kwikal chiwanyidina. Tufanyidin kusadin chisu chinech kukwatijan nich program wetu. Antu amwing asadining dilejan dia Bibil mu aminit 10 ap 15 rubing ni rubing.

Ov, dilejan ditining ik?

Dilejan dia Bibil disadikining pakad kufut nfalang. Mwawiy mwayilejay Yesu in kwilejend anch: “En watambulanya ukash winou kudi am wakad difut, niyen panany kand wakad kufutishan.”—Mateu 10:8.

Ov, tupamp twinch tufanyidina kusadik dilejan dined?

Kulep kwa dilejan kukwatijadin ni chisu ukweta. Buku Chom ik Chakin Kamu Chifundishinay Bibil? ukwet mitu ya milong ya kwilej 19. Ukutwish kwilej mitu ya milong yawonsu mu mutapu usotina.

Ov, nilejin chakwel nikala Kaman wa Yehova?

Bwat kwau. Tulimishining nakash mbil ya muntu ni muntu piur pa kutond yom yikwitiyijay. Pakwez antu akata kwilej Bibil, akutwish kutond ayinau chifanyidinau kusal.

Ov, kwisu nikutwisha kwijikin jinsangu jivud?

Kapend ka Web ka jw.org kalondin yom yivud piur pa yitiyij ni midimu ya Atuman a Yehova.

Ov, mutapu ik nikutwisha kwit dilejan dia Bibil?

It pa kapend ka www.jw.org.
Fund adres umwing pa ma adres madia pa paj wakaad wa gazet winou.
Ambamb ni Kaman wa Yehova wa kwi ndond yiudia. Ukutwish kumutan Kaman anch wipul.

a Dilejan dia Bibil dikat kusadikang yisu yivud ni muntu umwing ap chisak chikemp cha antu.

b Buku winou amupalangesha kudi Atuman a Yehova. Amubudishin kal mu ma kopi ma miliyon 230 ni kusut mu jindim 260 ni kusut.

UKWASH MULONG WA MAJUKU

“Chisu chasambishay mukajam kwilej Bibil, Namana kuswimp ku mutambu wend. Mwom wa dijuku dietu wawapa. Mulong wa kukimb kwijik yadingay ni kwilej, niyam nasambisha kwilej. Yom nileja yangikadisha muntu muwamp. Kwilej Bibil kwashikija dijuku dietu ku kwikal mu uumwing.”—Eziquiel.

“Pinasambisha kwilej Bibil, nalika chaku cha kuna ruwand wa damb, nimika kand kuna maar ma kasu, ni nileja mutapu wa kuyikel ujim wam. Nasambisha kukomb mu chikumbu cham ni kulongij yom nawamp. Nikatin dijuku diam nakash ni nikat kusal yom mulong wa kuyisangaresh. Nikwet katat musangar nakash.”—Karen.

“Antu amwing answingisha mulong nileja Bibil. Pakwez nfumwam wakasikesha mupak wam, palonday anch: ‘Nikubangakup ku yom yikatau antu kulond. Nimen mutapu uswimpina mulong wa kusal yom yiwamp—chawiy chom cha usey kudi am. Dandamen kusal yiusadina.’ Mwom wa dijuku dietu wikadin kal uwamp nakash!”—Viniana.