DILEJAN DIA 12

Yom ik Yikukukwasha Kudandamen Kwilej Bibil?

Dichap

Chid cha usey nakash kwilej Bibil, pakwez chiswapelingap kusal mwamu chisu chawonsu. Yisu yimwing ukutwish kwiyipul anch ukutwish kamu kudandamen kwilej Bibil. Mulong wak chid cha usey kusal usu wa kudandamen? Yom ik yikutwisha kukukwash kudandamen chikalap nchik yikokujol?

1. Mulong wak kwilej Bibil kud kwa usey?

“Dizu dialonday Nzamb dikwet mwom, dikwet kand ukash.” (Hebereu 4:12) Bibil ud wa usey nakash mulong ulejen mutapu wiyovilay Nzamb ni mutapu utonginay piur pey. Ukukwashin kwikal ni ronganyin, kwikal ni manangu makin ni kwikal ni ruchingej. Cha usey nakash, Bibil ukukwashin kwikal murund wa Yehova. Chisu wilejina Bibil, witiyin anch usu wend uwapisha mwom wey.

2. Mulong wak chid cha usey kwijik usey wa uyakin udia mu Bibil?

Uyakin udia mu Bibil ud mud mapit ma usey. Chawiy chikukasikeshinay Bibil anch: “Land uyakin, kangal waulandish.” (Jinswir 23:23) Anch twijik usey wa uyakin wa Bibil, tukusal usu wa kudandamen kwilej ap anch turishin ni yikokujol.—Tang Jinswir 2:4, 5.

3. Mutapu ik ukutwishay Yehova kukukwash kudandamen kwilej?

Mulong ud Sakatang mwin dikand diawonsu ni Murund ney, Yehova ukatin kukukwash chakwel wileja piur pend. Ukutwish kukwinkish ‘impu ni usu wa kusal yom.’ (Tang Filip 2:13.) Chawiy, anch yisu yimwing ukwet kand kuswir kwa usu mulong wa kwilej ap mulong wa kusadin yom wilejina, ukutwish kukukwash. Anch ukwet kand kuswir kwa usu mulong wa kupandikan yikangesh ap rupompat, ndiy ukutwish kukwinkish. Mulembila Yehova chisu chawonsu chakwel akukwasha kudandamen kwilej Bibil.—1 Tesalonik 5:17.

ILEJA CHIKURIKINA

Jingunin mutapu ukutwisha kudandamen kwilej Bibil ap anch ukwatiken nakash ni ap anch akupompatin kud antu akwau. Kupwa shinshikin mutapu ukutwishay Yehova kukukwash kudandamen.

4. Tek dilejan diey dia Bibil pa ndond yakusambish

Yisu yimwing tukutwish kwiyov anch tukwatiken nakash ni kutong anch tukwetap chisu cha kwilej Bibil. Yom ik yikutwisha kukukwash? Tang Filip 1:10, kupwa isambinany yipul ey:

Ey utongin anch ‘yom ya usey nakash’ mu mwom yom ik?
Mutapu ik ukutwisha kutek dilejan diey dia Bibil pa ndond yakusambish?

A. Tuyipich: Yipich yimekeshina mutapu wa kwizwish mbekech nich mayal ni winsukuril. 1. Chirund cha winsukuril ni cha mayal. 2. Mbekech mud winsukuril ushikina pakach. 3. Mayal majim mad piur pa winsukuril ni makwau mad pansh.

B. Tuyipich: 1. Chirund chawiy chimwing cha winsukuril ni mayal majim. 2. Mbekech ndiy umwing mud mayal piswimp ni kwizul. 3. Winsukuril wandam kal mwi mbekech mudia mayal majim ni wizwish kal mbekech ni pa milamu. Ka chirund ka winsukuril kad pansh.

Anch wizwish mbekech nich winsukuril, kupwa wawejamu mayal, mayal makuwaninapamu
Anch wasambel kutek mayal, kukwikal ndond ya kutek winsukuril uvud. Chilik chimwing, anch watek ‘yom ya usey nakash’ pa ndond yakusambish mu mwom wey, ukutwish kuyiwanyish ni ukushal kand ni chisu cha kusal yom yikwau

Kwilej Bibil kukat kuwanyish maswir metu ma kumwijik Nzamb ni kumwifukwil. Tang Mateu 5:3, kupwa isambinany chipul ech:

Mutapu ik tukutaninamu anch twatek dilejan dia Bibil pa ndond yakusambish?

5. Dandamen ap anch akupompatin

Yisu yimwing antu akukimb kukuziyish chakwel wimik kwilej Bibil. Shinshikin chilakej cha Francesco. Talany VIDEO, kupwa isambinany yipul yidia kwinshin oku:

VIDEO: Kudandamen Kwaleta Yiyukish (5:22)

Yipich ya mu video ‘Kudandamen Kwaleta Yiyukish.’ Francesco waurik kal ni arund nend kupwa kwa kuyilej anch kakwibombap kand nau.

Mu video winou, yom ik yasalau arund nend a Francesco ni anamakwend pasambishay kuyilej yom yading yilejinay?
Kudandamen kwamuletina yiyukish ik?

Tang 2 Timote 2:24, 25, kupwa isambinany yipul ey:

Mutapu ik utonginau anamakwey ni arund ney piur pa yom wilejina?
Kukwatijan ni maverse minam, yom ik ufanyidina kusal anch muntu kanang kakatinap anch udandamen kwilej Bibil? Mulong wak?

6. Muchingejina Yehova chakwel akukwash

Piusejina piswimp ni Yehova, maswir mey ma kumusangaresh makudandamen nimawiy kukul. Pakwez, chikutwish kutukasiken kuswimp yom yimwing mu mwom wetu chakwel tushakam kukwatijan ni mbil ja Nzamb. Anch wawiy mutapu wiyovila, kangal waziy. Yehova ukukukwash. Talany VIDEO kupwa isambinany yipul yidia kwinshin oku:

VIDEO: Yehova Utukwashining Kuswimp (3:56)

Mu video winou, kuswimp ik kwasalay Jim mulong wa kumusangaresh Yehova?
Yom ik yikushimokishina mu chilakej chend?

Tang Hebereu 11:6, kupwa isambinany yipul ey:

Yom ik yikusalay Yehova mulong wa antu akata “kumusurab”—charumburik anch asadina usu wa kumwijik ni kumusangaresh?
Yom yiney yikufundishin ik piur pa mutapu ukatay kwiyov Yehova anch waman usu usadina mulong wa kwilej Bibil?

ANCH MUNTU WAKWIPUL ANCH: “Mulong wak wilejina Bibil?”

Ukumwakul nchik?

YOM TWILEJA KAL

Ap anch chiswapelingap, pakwez kwilej Bibil kukutwish kukukwash kusanger mwom chikupu. Dandamen kumuchingejin Yehova, ni ndiy ukukuyukish.

Ov, uvurikin?

Mulong wak uyakin wa Bibil ud wa usey kud ey?
Mutapu ik ukutwisha ‘kushinshikin pa yom ya usey nakash’?
Mulong wak ufanyidin kumwit Yehova chakwel akukwash kudandamen kwilej Bibil?

Dichuku diapwa kal Chikunku cha 1

Cha kusal

Dandamen kwilej ni mulej wey ap kusu kwau kapamp kamwing pa rubing. Anch program wey waswimp, kimb chisu chikwau cha kwilej.

Yikwau:

Your other goal

JINGUNIN KAND

Tal yom yinying yayikwashina kal antu avud kusadin nich manangu chisu chau.

“Mutapu wa Kusadin Nawamp Chisu Chey” (Lankany!, wa Ngond wa 2, 2014)

Tal mutapu Yehova wamukwashay mband umwing wading ukweta ikundj wakad kuman usu wading usadinay mulong wa kumusangaresh Nzamb.

Yehova Ukat Kutwinkish Usu wa Kusend Yisend Yetu (5:05)

Tal mutapu kujijaman kwa mband umwing kwamukwasha nfumwend.

Napaka Uyakin (6:30)

Yisu yimwing Atuman a Yehova akat kuyifund anch akat kwauril majuku. Pakwez ov, chid chakin?

“Ov, Atuman a Yehova Akat Kwaurilang Majuku Bil Anch Akat Kumakasikesh?” (Mutu wa mulong udia pa jw.org)