Rukat ra Mutapu ik Rikata Kulet Musangar Wakin?

1. Mulong wak chisu tushicha chishalijadin ni yisu ya kwinyim?

TUSHICH kamu pa chisu chishalijadina ni chisu cha kwinyim mu rusangu ra an a antu. Yehova ukat kukumangej chisak chijim cha antu adiokila ku “mangand mawonsu, ni ku michid yawonsu, ni ku antu awonsu, ni ku jindim jawonsu,” mudi mwatakelay kulond Bibil. Kudi “muchid wa usu” wa antu mamiliyon chinan ni kusut akweta musangar mulong akat “kumusadil [Nzamb] muten ni uchuku.” (Kujingunik 7:9, 15; Isay 60:22) Kand kal kwikalangap antu avud mwamu ilejina kumukat Nzamb ni antu akwau.

2. Mutapu ik uyimp wa rukat tumena kudi antu akad kwikal arund a Nzamb? (Tal chipich cha kwinsambishin.)

² Chawiy, Bibil watakela kulond anch machuku minam antu akad kwikal arund a Nzamb akumekesh mutapu uyimp wa rukat udia wa kwitongin. Kambuy Paul wafunda anch mu machuku ma nsudiel antu akwikal “in kwikat ayinau, in kukat nfalang,” ni “in kukat yom ya kwisangarish ayinau [pa ndond pa] kumukat Nzamb.” (2 Timote 3:1-4) Mutapu wa kwitongin wa rukat riner rovijadinap ni rukat mulong wa Nzamb. Kulondul mipak ya kwitongin kukatap kumuletin muntu musangar, ap anch ukutwish kutong anch ukwet musangar. Pakwez, rukat mudi riner risadin anch antu ikala in kwitongin ni kusal anch mwom wikala ukash kudi muntu mwawonsu.

3. Yom ik tukwisambina mu mutu wa mulong winou? Ni mulong wak?

³ Kambuy Paul wading wij anch rukat ra kwitongin rikumekan nakash ni rikutwish kuletish ubaj kudi in Kristu. Chawiy wayibabesha anch “yichina”, ap yiyepa antu amekeshina rukat ra kwitongin. (2 Timote 3:5) Pakwez tukutwishap kamu kwiyep kubombakan nau antu mudi inay. Chawiy, yom ik tukutwisha kusal chakwel twichidija ayinetu ku yisal ya antu atunyingumukina ni tumusangaresha Yehova, Nzamb wa rukat? El tumana kushalijan pakach pa rukat rikatinay Nzamb anch twikala nich ni rukat rirumburilau mu 2 Timote 3:2-4. Kupwa tukutwish kwishinshikin ayinetu ni kuman mutapu tukutwisha kumekesh mutapu wa rukat rikutwisha kamu kutuletin musangar wakin.

RUKAT MULONG WA NZAMB ANCH MULONG WEYEY AMWINEY?

4. Mulong wak chidiap chiyimp kwikal ni rukat ruwanyidina mulong weyey amwiney?

⁴ Paul wafunda anch: “Antu akez kwikal in kwikat ayinau.” Ov, chinech chirumburikin anch chidi chiyimp kwikat ayinetu? Bwat, chidi chiwamp kwikat ayinetu ni chidi cha usey. Yehova watutanga mutapu winou. Yesu walonda anch: “Chifanyidin uyikatany akwen mudi muwikatilanya en ayinen.” (Marko 12:31) Pa chinech, tukutwishap kuyikat antu akwau anch twikatinap etu ayinetu. Bibil utulejin anch: “Chifanyidin ngatan kumukat mukajend mudi muukatilay mujimbu wend amwinend. Muntu mwawonsu umukatila mukajend wikatil amwinend. Mulong kwikil muntu ukisina mujimbu wend amwinend, pakwez ukat kuudish ni kuulam nawamp.” (Efes 5:28, 29) Komb choviken kamu anch tufanyidin kwikal ni rukat ruwanyidina mulong wa ayinetu.

5. Mutapu ik udingau antu ikatina ayinau nakash?

⁵ Rukat ra kwitongin tutangina mu 2 Timote 3:2 ridiap riwamp. Ridi ra kwitongin ap ra choy. Anch muntu wikat amwinend nakash, ukat kwitongin amwinend kusutamu muchifanyidina. (Tang Rom 12:3.) Ukat kwibangin nakash piur pa amwinend kusutamu kuyibangin antu akwau. Anch yom yayip, ukat kuyifish nich antu akwau pa ndond pa kwifish nich amwinend. Mwin kufund umwing wa nsangu ja Bibil umufanikeshin muntu winou ni kanam katazukinau anch kasak kadia mudi kakat kunyingumuku pa ndundu, kashicha mulong wa kupat chirungul ni kuyilej antu akwau chikit chend cha miy. Muntu mudi winou kakwetingap kamu musangar.

6. Yibudikin ik yiwamp yimekening anch twamukat Nzamb?

⁶ Antu amwing a manangu ilejina Bibil itiyijin anch Paul wajimbula chakusambish rukat ra kwitongin mulong rikat kuletishang mikadil yiyimp yajimbulay kwinsudiel. Pakwez, mutapu wa rukat ukatinay Nzamb anch twikala nich ukat kulet mikadil yiwamp. Rikat kulet musangar, chisambu, kushimpish muchim, kudimuk, kuwap, ritiy, kwitudish ni kwilam. (Galatia 5:22, 23) Nfund a kuseng wafunda anch: “Ayuk kwau antu amukweta [Yehova] kwikal Nzamb wau!” (Kuseng 144:15) Yehova udi Nzamb wa musangar, ni antu end adi niyau ni musangar. Chikwau kand, mu kushalijan nau antu ikatina ayinau nakash ni atongining ching yom yikutwishau kutambul, atushalapol a Yehova akwet musangar mulong akat kupan kudi akwau.—Midimu 20:35.

7. Yipul ik yikutukwasha kushinshikin rukat retu mulong wa Nzamb?

⁷ Mutapu ik tukutwisha kwijik anch rukat mulong wa ayinetu ridi rikash kusutamu rukat mulong wa Nzamb? Tong piur pa chiyul cha manangu chilondina anch: “Kangal wasalany yom mulong wa kwitong ayinen ap mulong wa kwibaz, pakwez ikepishany, muntu ni muntu amumana mukwau mudi udi muwamp kumupandakanamu.” (Filip 2:3, 4) Tukutwish kwiyipul ayinetu anch: ‘Ov, nikat kutesh chiyul chinech? Nikat kusal usu wa kusal yom yikatinay Nzamb anch nisala? Nikat kukimb mitapu ya kuyikwash antu akwau mu chikumangen ni mu mudimu wa kulejan?’ Chidingap chiswapela chisu chawonsu kupan usu wetu ni chisu chetu. Chikutwish kurumburik anch tufanyidin kusal usu nakash ni kupan yom yimwing tukata kusanger. Pakwez kwikil chom chikutwisha kutusangaresh kusutamu kwijik anch Mukaleng wa mangand mawonsu utusangaredin!

8. Yom ik yasalau in Kristu amwing mulong amukatin Nzamb?

⁸ Mulong amukatin Nzamb ni akatin kumusadin nakash, in Kristu amwing alikin kusal midimu yau yadia kuyiletinang nfalang jivud. Ericka, udia dokiter, watonda kusal mudimu wa uchibol pa ndond pa kwimen pa mudimu wend wa chimwingang. Ndiy ni nfumwend atwisha kusadin mu jingand kushalijan. Ulondin anch: “Yom yivud twadinga twija yatukwasha kusadin mu teritwar wa dizu dia wingendj, pamwing nau arund twikala nau, chinech chawiy kamu chatupitisha nakash mu mwom wetu.” Ericka udandamedin kusal mudi dokiter, pakwez usadidin chisu chend chivud ni usu wend mulong wa kufundish antu piur pa Yehova ni kukwash akadivar nau anambaz nend. Ulondin anch chinech chamuletina “musangar ku muchim ni chisambu cha mukach.”

MPICH MWIUR ANCH MPICH PA DIVU?

9. Mulong wak muntu ukatininga nfalang kakwetingap musangar?

⁹ Paul wafunda anch antu akwikal “in kukat nfalang.” Mivu yasutina ey, chibol umwing wa mwi ngand ya Irlande wamuleja muntu yom piur pa Nzamb. Muntu wafungula mu kasakosh kend, wanonamu nfalang jimwing, kupwa walond anch: “Winou ndiy nzamb wam!” Ap anch kakatap kwitiy, antu avud atongining kamu mutapu winou. Akatining nfalang ni yom yikutwishau kuland. Pakwez Bibil utubabeshin anch: “Ukatila nfalang, [jikumukumangap], ni ukatila mapit mavud kakumawanyishap.” (Mulej 5:10) Muntu ukatining nfalang kakwiyovangap anch jamuwanyin kal. Udandamedining kwend kujikat chisu chawonsu ni wipanining nakash mu kujikimb. Chinech chikat kumuletinang “yakamish yivud.”—1 Timote 6:9, 10.

10. Yom ik yilondinay Bibil piur pa wimpich ni uzwendj?

¹⁰ Chakin kamu, etu awonsu tukwet kuswir kwa nfalang. Mulong jikutwish kutuking. (Mulej 7:12) Pakwez, ov, tukutwish kwikal ni musangar anch tukwet nfalang jiwanyidina mulong wa maswir metu? Mwaning! (Tang Mulej 5:12.) Agur mwan wa Jake wafunda anch: “Kangal wanginkish uzwendj ap wimpich. Ndisha nich yakudia niswiridina.” Komb chiswapel kwijik mulong wak muntu winou kakatap kwikal kazwendj nakash. Walonda anch mulong kakatap anch amwoza chakwel iya, mulong kwiy kwafanyina kumuletin Yehova kapipej. Pakwez mulong wak kakatap anch ikala mpich? Wafunda anch: “Ap chamwamu nez nakutun pinikwikuta ni kulond anch: “Ov, [Yehova] udi nany?”” (Jinswir 30:8, 9) Niyey pamwing ap wij muntu uchingejidina mapit pa ndond pa kumuchingejin Nzamb.

11. Yom ik yalonday Yesu piur pa nfalang?

¹¹ Muntu ukatina nfalang kakumusangareshangap Nzamb. Yesu walonda anch: “Kwikil muntu ukutwisha kuyisadil ansalejend aad nawamp. Ukumukis umwing, chad wamukat mukwau, ap ukumulimish umwing, chad wamudiul mukwau. Kiukutwishanyap kusadil kapamp kamwing Nzamb ni mapit ma pa mangand.” Walonda kand anch: “Kangal wikumangejinany mapit ma pansh pa mangand, padia musu, ni ankal akat kushesh, ni ij akata kwandam ni kwiy. Pakwez kumangejinany mapit men mwiur mwakad musu ni ankal akata kushesh, ap ij akata kwandam ni kwiy.”—Mateu 6:19, 20, 24.

12. Mutapu ik kwikal nich mwom upipela kukutwisha kutukwash kumusadin Nzamb? Let chilakej.

¹² Atushalapol avud a Yehova asadin usu wa kupipej mwom wau. Atanin anch kusal mwamu kuyinkishin chisu chivud cha kumusadin Yehova ni kuyiletidin musangar. Jack, ushicha mu États-Unis, walandisha chikumbu chend chijim ni yom yend yadingay nich ya kwisak chakwel asala mudimu wa uchibol ni mukajend. Urumburil anch: “Chadingap chiswapela kulandish chikumbu chetu chiwamp ni yom yetu twadinga nich mwi ngand.” Pakwez mu mivu yivud wachirikang ku chikumbu waziyang kal mulong wa milong ya mudimu. Ulondin anch: “Mukajam chibol wa rawonsu, wading chisu chawonsu nich musangar. Mukajend walonda anch, ‘nimukwet kamu mukurump wa mudimu upandakena kujimb!’ Katat niyam nisadin mudimu wa uchibol, etu awonsu aad tumusadidin Muntu umwing, Yehova.”

13. Chom ik chikutwisha kutukwash kushinshikin chitongijok chetu piur pa nfalang?

¹³ Anch twashinshikin chitongijok chetu piur pa nfalang, tufanyidin kwikal ni kashinsh ni kwiyipul anch: ‘Ov, mwom wam umekeshin anch nitiyijin kamu yilondinay Bibil piur pa nfalang? Kukimb nfalang chawiy chom cha usey nakash kudi am? Nimpanin nakash piur pa kukimb yom ya kumujimbu kusutamu urund wam ni Yehova ni akwetu? Nitiyijin kamu anch Yehova ukuwanyish yom niswirikedina?’ Tufanyidin kwikal nich kashinsh anch ndiy kakezap kuyidiul antu amuchingejidina!—Mateu 6:33.

TUMUKATIN YEHOVA BIL ANCH MISANGAR?

14. Chisu chitongijok chiwanyidina piur pa misangar?

¹⁴ Bibil watakela kand kulond anch mu machuku ma nsudien, antu akez kwikal “in kukat yom ya kwisangarish ayinau.” Mudi mutapu twijika kal anch chidiap chiyimp kwikal ni chitongijok chiwanyidina piur pa ayinetu ni piur pa nfalang, twij kand anch chidiap chiyimp kusanger mwom mu mutapu uwamp. Antu amwing itiyijin anch chifanyidinap kwisangaresh ap pakemp, pakwez kimwauyap mukatinay Yehova mulong wetwetu. Bibil uyikasikeshin atushalapol a Nzamb ashinshamena anch: “Yang, ukadia yakudia yey nich musangar ni kuna maar mey ma nviny nawamp.”—Mulej 9:7.

15. Chom ik chirumburikina kwikal “in kukat yom ya kwisangarish ayinau”?

¹⁵ 2 Timote 3:4 ulondin piur pa antu akatina misangar ni amulikining Nzamb mulong wa mashakamin mau. Ijik anch verse winou kalondinap anch antu akukat misangar nakash kusutamu kumukat Nzamb. Chinech chikutwish kurumburik anch akutwish kumukat Nzamb pakemp. Pakwez verse ulondin anch ‘pa ndond pa’ Nzamb. Mwin manangu umwing wafunda anch verse winou “karumburilap kamu anch akez kumukat Nzamb mu chilik kampand. Pakwez urumburikin kamu anch kakez kamukatap kamu Nzamb ap pakemp.” Kwinoku kudi kamu kubabesh kwa usey mulong wa antu akatina misangar. Bibil urumburil antu akatina misangar anch adi mudi antu “apwepodinau” mulong wa misangar ya mwom.—Luka 8:14.

16, 17. Chilakej ik chatushilay Yesu piur pa milong ya kwisangaresh?

¹⁶ Yesu watuleja chirumburikina kwikal wisikena piur pa kwisangaresh. Waya ku “musambu wa uruw” ni “ku musambu ujim.” (Yohan 2:1-10; Luka 5:29) Ku musambu wa uruw, kwadingap maar mavud, chawiy Yesu wasala chilay ni wakarumuna mem kwikal maar. Chisu chikwau, pamuswingishau mulong wa kudia ni kuna, wayileja antu inay patok anch ading ni chitongijok chiyimp piur pend.—Luka 7:33-36.

¹⁷ Chawiy, Yesu kakatap anch kwisangaresh kwikal chom cha usey nakash mu mwom wend. Wamuteka Yehova pa ndond ya kusambish ni wasalang usu wa kuyikwash antu akwau. Witiyina kufa rufu risansena pa mutond mulong wa kuyipandish antu. Yesu wayileja antu akata kumulondul anch: “Wayukany kwen pakat kukuswingishanyau, ni kukuzengolany, ni kukutwambilany makasu kudi antu mulong wa kwingambat am. Sangarany kwen ni kuzangijal, mulong akulamidinany difut dijim mwiur. Wawiy kand mutapu wayizengolau [aprofet] a Nzamb pakur.”—Mateu 5:11, 12.

18. Yipul ik yikutukwasha kushinshikin mutapu tukatina kwisangaresh?

¹⁸ Yom ik yikutwisha kutukwash chakwel tushinshikina mutapu tukatina kwisangaresh? Tufanyidin kwiyipul anch: ‘Ov, kwipuwangesh kukwet usey nakash kudi am kusutamu yikumangan ni mudimu wa kulejan? Nikutwish kulik yom yimwing nisangaredining nakash mulong nikata kumusadin Nzamb? Pinikata kutond mutapu wa kwipuwangej, nikat kutong mutapu umenay Yehova kutond kwam?’ Mulong tumukatin Nzamb ni tukatin kumusangaresh, tufanyidin kamu kwiyep kadiap ching yom twija anch yidi yiyimp pakwez yom tutongina kand anch yikutwishap kumusangaresh Nzamb.—Tang Mateu 22:37, 38.

MUTAPU WA KWIKAL NI MUSANGAR

19. Anany akukanganya kamu kwikal ni musangar?

¹⁹ Mangand ma Satan madandamedin kuyimesh antu mar mu mivu 6000 ni kusut. Katat, mu machuku manam ma nsudien ma ditenchik dined dia yom, mangand mizwil nau antu itongidina ayinau, akatina nfalang ni in kwisangaresh. Akat kutong piur pa yom yikutwishau kwikal nich ni akat kutek maswir mau ma kwisangaresh pa ndond ya kusambish mu mwom yau. Pakwez antu mudi inay kakwetingap kamu musangar! Pakwez, Bibil ulondin anch: “Wayuku muntu umukweta Nzamb wa Jakob kwikal mwin kumukwash wend, ukata kumuchingejin [Yehova] Nzamb wend.”— Kuseng 146:5.

20. Rukat rey mulong wa Nzamb rikusangareshin mutapu ik?

²⁰ Atushalapol a Yehova amukatining kamu nakash ni muvu ni muvu antu akwau avud akat kumwijik ni kumukat kand. Chinech chimekeshin anch Want wa Nzamb uyikedin, ni piswimp ap ukutuletin yiyukish yitwakad kutongin! Anch twasal yom yikatinay Yehova anch tusal, tukumusangaresh ni chikutuletin musangar wakin. Antu amukatina Yehova akwikal ni musangar chikupu! Mu mutu wa mulong ulondwilaku ou, tukushinshikin mikadil yimwing yiyimp yidiokila ku rukat ra kwitongin. Kupwa tukuman mutapu wakad kwovijan mikadil yiney ni mikadil yiwamp ya atushalapol a Yehova.