Yipul ya in Kutang

Anch ikundj ni mband akad kwatijan alal pamwing pakad mayingishin majim, ov, winou udi uman umekeshina anch asalang chitil ni chifanyidin kusal komite wa dirumburish?

Mwaning, kulal pamwing pakad mayingishin majim udi uman wakin anch asalang masandj. Chawiy, anch kudi mayingishin ma usey, chifanyidin kusal komite wa dirumburish.—1 Korint 6:18.

Chisak cha amakurump chikushinshikin nawamp mulong ni mulong chakwel ijika anch chidi cha usey kusal komite wa dirumburish. Chilakej: Ov, antu inay aad ading akat kwendijadin mulong wa kwatijan? Ov, amakurump ayiyulap kal piur pa mikadil yau? Mulong wak alalang pamwing? Ov, ading asambedin kal kurijek anch akusal mwamu? Ov, ading ni mutapu ukwau wa kusal, anch kwashikenang chom chasalang anch aburena chom cha kusal, mudi chinship chakad kuchingejin ap chom chimwing cha kukashimwish chasalang anch akanganya mutapu wa kwaurik pakwez ching kulal pamwing? (Mulej 9:11) Kwisu kwalalangau? Mulong ni mulong ushalijangen, chawiy kukutwish kwikal jinsangu jikwau jikutwisha kwikal nich chibachikin pa mupak ukukwatau amakurump a chikumangen.

Kupwa kwa chisak cha amakurump kushinshikin nsangu jawonsu, akutwish kukwat mupak anch chitin kusal komite wa dirumburish ap bwat.