Mutapu wa Kusal Anch Dilejan Diey dia Bibil Dikala Diwamp Nakash ni Disangareshina

JOSHUA wading ni chisend cha kutakel muchid wa Isarel djat mwi Ngand ya Kushilamu. Chinech chading chifanyidin kwikal chom chikash nakash. Pakwez, Yehova wamwinkisha usu ni wamukasikesha palonday anch: “Ikal kusu kwey mukash ni kwiman dang.” Wamuleja Joshua anch ang watang ni kuziyin Chijil, ukutwish kukwat mipak ya manangu ni kutwish yom yikusalay.—Joshua 1:7, 8.

Tushich ‘yisu ya mar yikasikena nakash’ kujijamen, chawiy mashakamin metu makutwish kwikal niyau makash. (2 Timote 3:1) Anch tukimbin kutwish mudi Joshua, tufanyidin kulondul chiyul chamwinkishau kudi Yehova. Tufanyidin kutang Bibil chisu chawonsu ni kusadin yom tutangina mulong wa kukwat mipak yiwamp.

Pakwez antu amwing pakach petu kijap mutapu wa kwilej ap kakatap kusanger kwilej. Chawiy, dilejan dia Bibil dia muntu panrend didi dia usey nakash. Paushinshikidina mushet ulondina anch “Sadin bil Yiyul ey,” ukutan manans makutwisha kukukwash kutaninamu mu kwilej kwey ni ukusanger nakash.

Nfund a kuseng wawanga anch: “Ntakela mu malejan mey, mulong nikatin kumalondul.” (Kuseng 119:35) Niyey ukutwish kusanger kwilej Dizu dia Nzamb. Ukujingunin yitongijok yiwamp paudandamedina kwilej Bibil.

Ap anch ukwetap muchid wa kutakel mudi mwasalay Joshua, niyey ukwet milong yey. Chawiy, mudi Joshua, ileja ni ziyin Dizu dia Nzamb. Anch wasal mwamu, ukukwat mipak ya manangu ni ukutwish mu yom usadina.

SADIN BIL YIYUL EY

Lembil kurutu kwa kwilej. Bibil ukwet yitongijok ya Yehova ni ayifunda mulong wa kutaninamu kweyey. Chawiy, chisu utangina Bibil, mwita Yehova akukwasha kutesh yom utangina, kuyivurik ni kuyisadin mulong wa kukwat mipak yiwamp mu mwom wey.—Esidera 7:10.
Iyipula yipul chisu utangina Bibil ap mikand yimedina pa Bibil. Chilakej: ‘Chikunku chinech chinlejin yom ik piur pa Yehova? Mutapu ik chikwatijadina nich mutu wa mulong wa Bibil? Mutapu ik nikutwisha kusadin yitongijok yiney mulong wa kuyikwash nich antu akwau?’
Tongijokin pa yom utangina. Imanaku mu chisu chikemp ni tongijokin pa yom watanga kal. Iyipula anch: ‘Yom yiney yingovishin nchik? Mulong wak yingovishin mutapu winou? Mutapu ik ukwatijadina yom yiney ni yom yanshikena pasak, yinshikedina katat ni yom yikutwisha kwinshiken mu machuku ma kurutu? Mutapu ik nikutwisha kusadin mbil jinej ja Bibil ap chiyul chinech mu mwom wam?’ (Job 23:5; Kuseng 49:3) Chisu utongijokina, tal anch ukutwish kurumburil mulong wak Yehova wayileja antu end kwipuk kusal yom yimwing. Ap tong piur pa yibudikin yifanyina kushiken anch rusangu ra muntu utangina mu Bibil wasala mu mutapu windj.—Kuvurik Yijil 32:28, 29.
Sal mudi umen yom chisu utangina. Chilakej, ukutwish kutongin mutapu wasadika yom chisu chamulandishau Josef kudi anamakwend kudiau in Isamayel? (Disambishil 37:18-28) Yom ik umena, uteshina ni wovil didjimb dia yom ik? Iteka pa ndond ya antu inaya. Yom ik yading yitonginau ni yovilau? Anch wasal mudi umen yom yasadika, dilejan diey dikutwish kwikal diwamp nakash.
Sadin yom ya kwilej nich yipaninay dirijek. Yom yiney yikutwish kusal anch kukimbijol kwey kwikal kusangareshina. Ileja mutapu wa kusadin yom ya kwilej nich yidiaku mu dizu diey, yidia pa kapend ni ya kuchap. Kangal widjidjek kwipul kudi antu akwau chakwel akukwasha kwilej mutapu wa kuyisadin nawamp. Chilakej, Index des publications des Témoins de Jéhovah ap Ukwash wa Kukimbijol Nich wa Atuman a Yehova yikukukwash kutan yom yafundau kal piur pa mitu ya milong yimwing ni kurumburil maverse mavud ma Bibil. Sadin malejan madia mu kabuku Ukwash Mulong wa Kwilej Dizu dia Nzamb anch kadiaku anch kadiaku mu dizu ukutwisha kutang. Malejan minam makwet jinsangu ja usey piur pa ndond, chisu, kulim ni kupim kwa yom ni yom yikwau kand.
Kungamej manans majim. Chinech chikukukwash kuvurik yom wileja kal. Cha usey nakash, isamba nau antu akwau piur pa yom wilejina. Ov, kudi chom kanang ukutwisha kusadin mu mudimu wa kulejan? Kusutil kusadin yom yiney, ukuvurik manans majim ni antu akwau akutaninamu mu dilejan diey mudi ey.