Ov, Wij Chisu?

ANCH usotin kwijik anch chisu ik, yom ik ukata kusal? Pamwing ap ukat kutal pa saa wey ap pa orloj. Pamwing ap ukutwish kuman anch udi muten wa kusambish wa urel nau aminit 30. Chad ukwakul mutapu ik anch murund ney wakwipul anch: “Tudi chisu ik?”

Chakul chikwatijadin ni ndond ushicha. Chilakej, ukutwish kwakul anch: “Tudi 1:30” ap “tudi 13:30.” Mu jindond jikwau ukutwish kwakul anch: “Tudi aminit 30 a saa wa kusambish urel.”

Mutapu ik walejanangau chisu kudi antu a pakur? Niyau ading ni mitapu yivud ya kulejan chisu. Mifund ya Hebereu yisadidin mazu mudi “pamanch pafe,” “muten mukach,” “muten pakach” ni “urel.” (Disambishil 8:11; 19:27; 43:16; Kuvurik Yijil 28:29; 1 Ant 18:26) Pakwez yisu yimwing Bibil ukat kusadin mazu matetwila kamu chisu.

Mu Isarel wa pasak, kwading chaku cha kutek kalam mwin kuker, nakash chisu cha uchuku. In Isarel angana uchuku mu yikunku yisatu, yatazukau anch ‘yisu ya kuker.’ (Kuseng 63:6) Mu Ankalansambu 7:19, tutangin piur pa “mwidinding mwa uchuku.” Pa chisu chavadikay Yesu, in Yuda angana uchuku mu yikunku yinying ya kuker, mudi mwasalau in Grek nau in Rom.

Ma Evanjil majimbwil yisu yiney ya kuker tupamp tuvud. Chilakej, “uchuku, piwashika pa nkunku pa kucha,” Yesu wendina pa mem mulong wa kuya ku waat mwadingau in kwilejend. (Mateu 14:25) Ni Yesu walonda mu chishimu chimwing anch: “Anch mwin chikumbu wadi wij chisu [cha kuker] chikwezay mwij, ing ndiy wakera tul mulong wa kumukangesh mwij kubuz chikumbu ni kwandam.”—Mateu 24:43.

Yesu wajimbula yikunku yawonsu yinying ya kuker payilejay in kwilejend kwikal ababela mulong kadingap kija “chisu chikuchirikay mwin chikumbu. Ap ukushik chisu cha urel, ap mukach mwa uchuku, ap pa nkunku pa kucha, ap pa muten wa musas.” (Marko 13:35) Chisu cha kusambish cha yisu ya kuker yiney chading “chisu cha urel,” chasambishang pa kwandam kwa muten djat muten wa chidivu wa urel (21heures). Cha kaad chading “mukach mwa uchuku,” chasambishang muten wa chidivu wa urel djat muten wa 12 wa urel. Cha kasatu chading “pa nkunku pa kucha,” ap “chisu cha chikalambol kutend,” chasambishang muten wa 12 wa urel djat muten wa kasatu wa pamanch. Chimeken anch chawiy chinech chisu chatenday chikalambol uchuku wamukwatau Yesu. (Marko 14:72.) Chikunku cha kuker cha kanying chading “muten wa musas,” chasambishang pa muten wa kasatu wa pamanch djat pa kubudik kwa muten.

Chawiy ap anch pasak antu kadingap ni asaa ni ma orloj mudi mutukweta nlel, ading ni mutapu wa kulejan chisu chidiau.