Ayuk Kwau Antu Amusadidina ‘Nzamb wa Musangar’

1. Mulong wak Atuman a Yehova akwet musangar? (Tal chipich cha kwinsambishin.)

ATUMAN A YEHOVA adi antu akwetinga musangar. Chisu chikatau kukumangan pamwing ku yikumangan, ku yitentam, ap chisu cha kwipuwangej, akat kwambamb ni kusipishijan umwing ni mukwau. Mulong wak akweting musangar mwamu? Chidi mulong amwij Yehova ‘Nzamb wa musangar.’ Akat kumusadin ni kusal usu wa kumwimburij ndiy. (1 Timote 1:11; Kuseng 16:11) Yehova udi musul wa musangar ni usotin anch niyetu twikala ni musangar, ni utwinkishin mayingishin mavud masadina anch twikala ni musangar.—Kuvurik Yijil 12:7; Mulej 3:12, 13.

2, 3. (a) Chirumburikin in kwikal ni musangar? (b) Mulong wak chikutwish kwikal chikasikena kwikal ni musangar?

² Chidi nchik ku mutambu wey? Ov, ukwet musangar? Kwikal ni musangar kurumburikin kwiyov nawamp, kusanger mwom wey ap kuzangijal kamu chipandakena. Bibil ulejen anch antu ayukishinau kudi Yehova akwikal kamu ni musangar. Pakwez, mulong wak chikutwish kwikal chikash kwikal ni musangar mu mangand ma nlel?

³ Chikutwish kwikal chikash kwikal ni musangar anch milong yikash yatushiken, anch twafish muntu tukatina ap amwopat mu chikumangen, anch uruw wetu wafa ap anch twashadish mudimu. Chikutwish kand kwikal chikash kwikal ni musangar anch ku chikumbu kwikil chisambu mulong wa kutendol chisu chawonsu, anch antu tusadina nau mudimu ap arund a ku shikol akat kutusip, ap atuzengodin ap atutek mu rukan mulong tumusadidin Yehova. Ap ukash wetu wa mujimbu uwapinap, pamwing ap tukwet mayej makad kuyerikang, ap tukutwish kuman mar madiokila ku mayej ma kuziy kwa mu manangu. Pakwez vurik anch Yesu Kristu, ‘Nyikel umwing kusu uyukila,’ ap Mwant, ukatin kuyongoj antu ni kuyiletin musangar. (1 Timote 6:15; Mateu 11:28-30) Mu malejan ma usey ma pa Mukandu, Yesu wajimbula mikadil yikutwisha kutukwash kwikal ni musangar ap chisu tukweta milong yivud mulong tushich mu mangand ma Satan.

TUKUTWISHAP KWIKAL NI MUSANGAR PAKAD YEHOVA

4, 5. Yom ik tufanyidina kusal mulong wa kwikal ni kushal ni musangar?

⁴ Chom cha kusambish chalonday Yesu chidi kamu cha usey nakash. Walonda anch: “Ayuk kwau antu ija anch: ‘Tukwet kuswir kwa yom ya Nzamb mu michim yetu.’ Inay awiy adia antu a mu Want wa Nzamb.” (Mateu 5:3) Anch twajingunin maswir metu ma mu spiritu, tukwijik anch tukwet kuswir kwa kumwijik Nzamb ni tukuswiriken ukwash ni umutakel wend. Mutapu ik tukutwisha kusal mwamu? Kusutin kwilej Bibil ni kumuziyin Nzamb, ni kusal anch difukwil diend dikala chom cha usey nakash mu mwom wetu. Kusal yom yiney kukutukwash kwikal ni musangar. Ritiy retu mu kushilamu kwa Nzamb rikwikal rakin ni rikash. Ni ‘ruchingej ra musangar’ ridia mu Bibil rikutukasikesh.—Titus 2:13.

⁵ Anch tukatin kwikal ni musangar chikalap nchik yom yishikedina mu mwom yetu, tufanyidin kudandamen kukasikesh urund wetu ni Yehova. Kambuy Paul wafunda anch: “Sangarany machuku mawonsu mwi Nsalejetu. Nilondil kand anch, Sangarany!” (Filip 4:4) Mulong wa kwikal murund wa piswimp wa Yehova, tufanyidin kwikal ni manangu ma Nzamb. Dizu dia Nzamb dilondin anch: “Wayuk kwend muntu ukata kutan manangu, ni muntu ukata kutambul ronganyin. Manangu udi mutond wa mwom kudi awiy akuukwata, ni awonsu akuukwata akuyitazuk anch ayukil.”—Jinswir 3:13, 18.

6. Yom ik yikwau tufanyidina kusal mulong wa kushal ni musangar?

⁶ Pakwez chakwel tushala ni musangar, chidi cha usey nakash anch tudandamena kusadin yom twilejina mu Bibil. Yesu wakasikeshina usey wa yom yiney palonday anch: “Anch en wijany yom yiney, wayukany kwen anch wayisadilany.” (Yohan 13:17, TMK; tang Jakobu 1:25.) Chinech chidi cha usey anch tukatin kuwanyish maswir metu ma mu spiritu ni kushal ni musangar. Pakwez mutapu ik tukutwisha kwikal ni musangar anch kudi yom yivud yikutwisha kutushadishin musangar wetu? El tumanany yom yalonday kand Yesu mu malejan mend ma usey ma pa Mukandu.

MIKADIL YIKATA KUTULETIN MUSANGAR

7. Mutapu ik ukutwishau antu adidina kwikal ni musangar?

⁷ “Ayuk kwau antu adidila, mulong akez kuyongoj.” (Mateu 5:4) Tukutwish kwiyipul anch: ‘Mutapu ik ukutwishau antu kwikal ni musangar anch adi mu chidil?’ Yesu kadingap kisambidina piur pa muntu win mwawonsu ukata kudil. Antu avud ayimp akat kudil ap kwov ushon, mulong akwet milong yikash mu “machuku ma kwinsudiel” madia “ma mar nakash.” (2 Timote 3:1) Pakwez akat kutong kwau ching piur pa ayinau kadiap piur pa Yehova, chawiy kakwetap urund ni Yehova ni kakutwishap kwikal ni musangar. Yesu walondina piur pa antu ija anch akwet kuswir kwa yom ya mu spiritu. Akat kudil mulong amen anch antu amulikin kal Nzamb ap kashichap mu mutapu ukatinay Nzamb. Akat kujingunin kand anch adi akayitil, ni akat kuman yom yiyimp nakash yisadikina mu mangand minam. Yehova uyimen antu adidina kamu chakin, ukat kuyongoj kusutil Dizu diend ni uyinkishin musangar ni mwom.—Tang Ezekiel 5:11; 9:4.

8. Mutapu ik kwikal muntu witudishina kukukwashin kwikal ni musangar?

⁸ “Ayuk kwau itudishila, mulong awiy akez kuswan ngand.” (Mateu 5:5, TMK) Mutapu ik kwikal muntu witudishina kukukwashin kwikal ni musangar? Antu avud adi in chibud ni in chisum, yom yikata kushikij ku milong yivud. Pakwez anch ilej uyakin, akat kuswimp ni kudjal ‘wuntu usu.’ Katat amekeshin “riy, ni kudimuk, ni kwishikumwish, ni kuwap, ni kushimpish kwa muchim.” (Kolosay 3:9-12) Mudi yibudikin, akwet chisambu, urund uwamp nau antu akwau ni akwet musangar. Chikwau kand, Dizu dia Nzamb dikanin anch akez “kaswan ngand.”—Kuseng 37:8-10, 29.

9. (a) Yom ik yakimbay Yesu kurumburil palonday anch antu itudishina akez “kuswan ngand”? (b) Mulong wak antu akweta “impu ni nzal ya kutentam” akutwish kwikal ni musangar?

⁹ Yom ik yakimbay Yesu kurumburil palonday anch antu itudishina akez “kuswan ngand”? Azizidilau many akez kuswan ngand pakuyikelau ngand mudi ant ni in kupesh. (Kujingunik 20:6) Mamiliyon ma antu akad kwikal ni ruchingej ra kuya mwiur akuswan ngand pakushakamau chikupu pa divu. Akwikal antu awanyidina ni akwikal ni chisambu ni musangar. Antu inay awiy kand alonday Yesu piur pau anch: “Ayuk kwau akweta impu ni nzal ya kutentam.” (Mateu 5:6, TMK) Maswir mau ma kutentam akumawanyish chisu chikudioshay Yehova uyimp wawonsu. (2 Pita 3:13) Mwi ngand yisu, antu atentamina akwikal ni musangar ni kakezap kand kudil mulong wa yom yiyimp yisadinau antu ayimp.—Kuseng 37:17.

10. Chom ik chirumburikina kwikal mwin riy?

¹⁰ “Ayuk kwau antu akata kuyovil akwau riy. Nzamb ukez kuyovil niyau riy.” (Mateu 5:7) Kwikal mwin riy kurumburikin kwikal ni chirungul, mwin kubangin ni mwin ranaken, charumburik anch kwov riy mulong wa antu amena mar. Pakwez, riy ritin yom yivud kusutamu kwau kwikal ni yovil. Bibil ufundishin anch kwikal mwin riy kurumburikin kand kusal chom kampand mulong wa kuyikwash antu akwau.

11. Yom ik yitufundishina chishimu cha mutej mwin Samariy?

¹¹ Tang Luka 10:30-37. Chishimu cha Yesu piur pa mutej mwin Samariy chilejen nawamp chirumburikina kwikal mwin riy. Mwin Samariy wova riy ni wamwanakena muntu wading umena mar, ni chinech chamubachika kumukwash muntu winou. Kupwa kwa Yesu kwisambin chishimu chinech, walonda anch: “Niyey, yang, ukasala kand mwamu.” Chawiy tukutwish kwiyipul anch: ‘Ov, nikat kusalang yom mudi yiney? Nisadining yom yasalay mutej mwin Samariy? Anch antu akwau akat kuman mar, ov, nikutwish kusal chom kanang mulong wa kuyikwash? Chilakej, ov, nikutwish kuyikwash antu apamina kal, adia afu, ap an akemp adia mu chikumangen akweta anvaj akad kumusadin Yehova? Ov, nikutwish ‘kulond mu mutapu wa kuyongoj antu aziyina’ mulong wa kuyikasikesh?’—1 Tesalonik 5:14; Jakobu 1:27.

12. Mulong wak tukweting musangar anch twov riy?

¹² Mulong wak tukweting musangar anch twikal in riy? Anch twayovil antu akwau riy, tupanin, ni Yesu walonda anch kupan kukat kutuletin musangar. Diyingishin dikwau didi anch tumusangareshin Yehova. (Midimu 20:35; tang Hebereu 13:16.) Mwant David walonda piur pa muntu ukata kumekesh riy anch: “[Yehova] ukamulam, ukamwikadish mwom, chad ukez kayuk pansh panap.” (Kuseng 41:2, 3) Anch twamekesh riy ni ranaken kudi antu akwau, Yehova niyend ukutwovil riy ni tukwikal ni musangar chikupu.—Jakobu 2:13.

ANTU ADIA “ZWANG MU MICHIM” AKWET MUSANGAR

13, 14. Mulong wak chidi cha usey kwikal “zwang mu michim”?

¹³ Yesu walonda anch: “Ayuk kwau antu adia zwang mu michim. Awiy akeza kumuman Nzamb.” (Mateu 5:8) Mulong wa kwikal zwang mu muchim, tufanyidin kulam yitongijok ni maku metu yishitwila. Chinech chidi cha usey nakash anch tusotin anch Yehova itiya difukwil dietu.—Tang 2 Korint 4:2; 1 Timote 1:5.

¹⁴ Antu adia zwang mu michim akutwish kwikal ni urund wa piswimp ni Yehova, ulondina anch: ‘Ayuk kwau in kutut ankandj au.’ (Kujingunik 22:14) Chirumburikin ik ‘kutut ankandj au’? Kudi in Kristu azizidilau many, chinech chirumburikin anch Yehova uyimen anch ishitwil, ni ukuyinkish mwom wakad kufa mwiur ni akusangar chikupu. Mulong wa chisak chijim, chikweta ruchingej ra kushakam pa divu, chirumburikin anch Yehova uyitiyijin kwikal arund nend mulong uyimen anch atentamin. Bibil ulondin anch “atutin kal ankandj au ni kuyitokish mu mash ma Mwan a Mukoku.”—Kujingunik 7:9, 13, 14.

15, 16. Antu adia zwang mu michim akutwish “kumuman Nzamb” mutapu ik?

¹⁵ Yehova walonda anch: “Kwikil muntu ukutwisha kwiman washal kand mwom.” (Kubudik 33:20) Chad mutapu ik ukutwishau antu adia zwang mu muchim “kumuman Nzamb”? Dizu dia Grek dikarumwinau anch “kuman” dikutwish kand kurumburik kutongijok, kutesh ap kwijik. Chawiy “kumuman Nzamb” kurumburikin kwijik anch udi Muntu wa mutapu ik ni kukat mikadil yend. (Efes 1:18) Yesu wimburija kamu nawamp mikadil ya Nzamb, chawiy chalonday anch: “Muntu mwawonsu wanmena kal am, wamumen kal Tatuku.”—Yohan 14:7-9.

¹⁶ Chikwau kand, tukat “kumuman Nzamb” chisu tukata kuman mutapu ukatay kutukwash mu mwom wetu. (Job 42:5) Tukutwish kand “kuman” ap kushinshikin pa yom yipandakena kuwap yikaninay Yehova kusal mulong wa antu adia zwang ni amusadidina nich kushinshaman. Ni azizidilau many akat kumuman kamu Yehova chisu chikatau kuvumbuk ni kuya mwiur.—1 Yohan 3:2.

TUKUTWISH KWIKAL NI MUSANGAR AP ANCH TUKWET MILONG

17. Mulong wak in kulet chisambu akwet musangar?

¹⁷ Yesu walonda kand anch: “Ayuk kwau in kulet chisambu.” (Mateu 5:9, TMK) Anch twakwat mupak wa kulet chisambu nau antu akwau, tukwikal ni musangar. Mwin kwilej Jakobu wafunda anch: “In kulet chisambu akat kukun chisambu mudi mbut, chad chisambu chikat kusong mabuj ma mwom utentamina.” (Jakobu 3:18) Chawiy anch wovijadinap ni muntu kanang mu chikumangen ap mu dijuku diey, mwita Yehova ukwash chakwel wikala mwin kulet chisambu. Mwamu, Yehova ukukwinkish spiritu wend utumbila, ukukukwasha kumekesh mikadil ya win Kristu ni ukwikal ni musangar. Yesu wakasikeshina pa usey wa kusal usu mulong wa kusal chisambu palonday anch: ‘Anch usotil kupan yakupesh yey pa chintamb, ni kwinikwa wavurik anch mukadivar ney ukwet mulong ni yeyey, shang yakupesh yey kurutu kwa chintamb ni yang swa. Chakusambish sal chisambu ni mukadivar ney, chad uchirik lel ni kupan yakupesh yey.’—Mateu 5:23, 24.

18, 19. Mulong wak in Kristu akweting musangar ap anch ayizengodin?

¹⁸ “Wayukany kwen pakat kukuswingishanyau, ni kukuzengolany, ni kukutwambilany makasu [ma mitapu yawonsu] kudi antu mulong wa kwingambat am.” Yom ik yafilay Yesu kurumburil? Wawejinaku anch: “Sangarany kwen ni kuzangijal, mulong akulamidinany difut dijim mwiur. Wawiy kand mutapu wayizengolau [aprofet] a Nzamb pakur.” (Mateu 5:11, 12) Chisu chayibulau atwimbuy ni kuyikangesh kusal mudimu wa kulejan, ‘adiokala ku dirumburish dijim, asangara nakash.’ Chakin kamu, kasangarap mulong wa yibul yayichintau. Pakwez asangar “mulong Nzamb witiya awiy kuman mar mulong wa kumwambat Yesu.”—Midimu 5:41.

¹⁹ Nlel unou, antu a Yehova niyawiy akat kujijaman nich musangar chisu chiyizengodinau mulong wa dijin dia Yesu. (Tang Jakobu 1:2-4.) Mudi atwimbuy, tukatap kusangar mulong wa mar ap mulong wa kutuzengol. Pakwez anch twashal ashinshamena kudi Yehova, ndiy ukutwinkish kutakaman tuswiridina mulong wa kujijaman. Tal yom yamushikena Henryk Dornik ni mwanamakwend. Mwi Ngond wa 8 muvu wa 1944, ayitwala mu kompony wa mar. In kuyizengol au alonda anch: “Chikasiken nakash kuyishindil kusal chom kanang. Kwijik anch akufa ashinshamena kuyiletidin musangar.” Henryk warumburila anch: “Ap anch nadingap nikweta kuswir kwa kwikal kafil, kuman mar nich kutakaman ni kalimish mulong wa kushinshaman kwam kudi Yehova kwanletina musangar. Walonda kand anch: “Malembil makurikina mansejisha piswimp ni Yehova, ni ndiy wikala mwin Kwinkwash wakin.”

20. Mulong wak tukweting musangar wa kumusadin ‘Nzamb wa musangar’?

²⁰ Anch Yehova, ‘Nzamb wa musangar,’ ukwet musangar mulong wetwetu, tukutwish kwikal ni musangar ap anch atuzengodin, atulik kudi dijuku dietu, tuyedin ap twananap. (1 Timote 1:11) Tukutwish kand kwikal ni musangar mulong Nzamb wetu, “wakad makasu,” watukanin kal yom yivud yiwamp. (Titus 1:2) Chisu chikuwanyishay Yehova kushilamu kwend, tukuvurikap kand milong tukweta nlel. Chakin kamu, tukutwishap kamu kutongin mutapu ukwikala mwom mu Paradis ni musangar tukwikala nich! Mwaning, tukez “kasangar nakash ni kuzangijal mu chisambu.”—Kuseng 37:11.