Dandamen Kumekesh Rukat Rikata Kukasikesh

1. Yom ik ya usey yisambinay Yesu pamwing nau in kwilejend uchuku wend wa nsudien?

UCHUKU wa nsudien wasutishay pamwing nau in kwilejend kurutu afa, Yesu wajimbula rukat piswimp tupamp 30. Wayileja in kwilejend anch afanyidin ‘kukatijan muntu ni mukwau.’ (Yohan 15:12, 17) Rukat rau rafanyina kwikal chijingidij cha kuyijingunin kudi antu akwau ni kuyijik anch ading in kwilej akin a Kristu. (Yohan 13:34, 35) Rukat ralonday Yesu yidiap kwau kusu yovil bwat; udi mwikadil wa usu nakash ni wa kwipan. Yesu walonda anch: “Kwikil rukat rupandakena kujimb mudi muntu kufa mulong wa arund nend. En udiany arund nam anch ukat kusalany mudi nikulejinany.”—Yohan 15:13, 14.

2. (a) Atushalapol a Nzamb ayijikidin kusutin ik nlel? (b) Yipul ik tukwakula mu mutu wa mulong winou?

² Atushalapol a Yehova nlel ijiken mulong wa rukat rau rakin, ra kwipan ni uumwing ukasikena. (1 Yohan 3:10, 11) Chikwetap kwau mulong chikalap nchik ngand ap kabil tudiokila, dizu tulondina, ndond tudiokila ap mutapu watulilau. Kunyingumuk pa mangand mawonsu, atushalapol a Yehova akatijadin chakin kamu umwing ni mukwau. Mulong wak rukat ridi ra usey nakash nlel? Mutapu ik ukatay Yehova ni Yesu kutukudish nich rukat? Ni mutapu ik tukutwisha kumekesh rukat riner mu kongoj ni kuyikasikesh antu akwau?—1 Korint 8:1.

MULONG WAK RUKAT RIDI RA USEY NAKASH NLEL

3. ‘Yisu yikash’ yikwet usu mutapu ik padi antu?

³ Tushich pa yisu ya “mar nakash,” ni mwom wizwil nich “mar ni ushon.” (2 Timote 3:1-5; Kuseng 90:10) Antu avud amen mar nakash ni mar mayikumin kal. Antu 800 000 ni kusut, charumburik anch muvu ni muvu muntu umwing ukat kwijip kupwa kwa masekond 40. Cha ushon, ap akadivar netu ikala ni yovil yiney ni ijipa ayinau.

4. Antu ik a mu Bibil akata chisu chimwing kufa?

⁴ Mu chisu cha pakur, atushalapol ashinshamena amwing a Nzamb iyova nayimp mulong wa milong yayishikena ni akata kufa. Chilakej, Job wova kusansan nakash ni walonda anch: “Nafa kal kwam, kinikupandap kand chikupu.” (Job 7:16; 14:13) Yona waziya nakash ni walonda anch: “Pakwez katat, [Yehova], lik nifa kwam. Chifanyidin am kufa kupandikan am kwikal mwom.” (Yona 4:3) Muprofet Elija wiyova anch kakwetap ruchingej ni walonda anch: ‘Katat kwawanyin kal! Yehova tambul mwom wam.’ (1 Ant 19:4) Pakwez Yehova wayikata atushalapol end ashinshamena ni wasota anch ikala aom. Kayifishap nich mulong wa mutapu wading wiyovilau. Chawiy wayikwasha kwikal kand nich maswir ma kwikal mwom chakwel atwisha kudandamen kumusadin ndiy nich kushinshaman.

5. Mulong wak akadivar nau anambaz netu aswirikedin nakash rukat retu nlel?

⁵ Nlel, akadivar nau anambaz netu avud arishin ni milong yikash ni aswirikedin rukat retu. Amwing akat kuyiswingish ap kuyizengol. Akwau akat kujijaman chikalap nchik kuyovish wom ap kuyisaal masaal ku jindond kusadidinau mudimu. Ap kand aziyin nakash mulong asadin asaa avud ku mudimu ap akwet midimu yiziyishena. Akwau kand akwet milong yikash mu majuku. Pamwing ap atijana ni antu akad kumusadin Yehova ni akat kuyilond chisu chawonsu nayimp kudi ambay nau a uruw. Mulong wa milong yiney ni yikwau kand, antu avud akat kwiyov anch kakwetap kand usu ni akutwish chad kusambish kwidjidjek mulong wa yitiyij yau. Nany ukutwisha kuyikwash?

RUKAT RA YEHOVA RIKAT KUTUKASIKESH

6. Rukat ra Yehova riyikasikeshin mutapu ik atushalapol end?

⁶ Yehova uyinkishin atushalapol end kashinsh anch uyikatin nlel ni ukuyikat chikupu. Tong mutapu wiyovau in Isarel chisu chayilejau kudi Yehova anch: “Ukwetany usey ujim nakash kudi am. En udiany akarukat nam nilimishina,” ni anch “kangal wovany wom am nidi ni yenen.” (Isay 43:4, 5) Twij anch muntu ni muntu pakach petu ukwet usey kudi Yehova.a (Tal mazu ma kwinshin.) Bibil ushidinamu anch: ‘Mulong udi mwin Dikand, ukukupandishany. Ukez kakusangerany en.’—Sofoniy 3:16, 17.

7. Mutapu ik ufanikena rukat ra Yehova ni ra maku ulamina mwan? (Tal chipich cha kwinsambishin.)

⁷ Yehova ukanin kuyikasikesh ni kuyongoj antu end chikalap nchik milong yikwetau. Ulondin anch: “Ukez kikalany, mudi mwan wamwishilau kudi makwend, usendilau mwi nkond nich rukat. Nikez kakwongojany . . . mudi mwan ukat kwogonjau kudi makwend.” (Isay 66:12, 13) Tong mutapu ukatay mwan kwiyov nawamp chisu chimulaminau nawamp ni kumusengesh kudi makwend! Yehova ukukatin nakash ni usotin wiyova anch udi mu diking. Kangal wavuramen anch udi wa usey nakash kudi Yehova—Jeremiy 31:3.

8, 9. Rukat ra Yesu Kristu ritukasikeshin mutapu ik?

⁸ Dined diawiy diyingishin dimekeshina anch Yehova utukatin: “Nzamb wakata ngand nakash, ndiy wamupana Mwanend kapwokal chakwel muntu mwawonsu ukumwitiyija ndiy kakujiyap, pakwez ukez kwikal nich mwom wa chikupu.” (Yohan 3:16) Yakupesh ya Yesu yimekeshin anch niyend utukatin ni rukat riner ritukasikeshin. Bibil ulondin anch ap “mar, ap runeng” yikutwishap “kutwauril ku rukat [ra Kristu].”—Rom 8:35, 38, 39.

⁹ Yisu yimwing tukweting milong yituziyishina ku mujimbu ap mu manangu ni yitukangeshina kwikal ni musangar mu kumusadin Yehova. Pakwez kuvurik mutapu utukatinay Kristu kukutwish kutwinkish usu wa kujijaman. (Tang 2 Korint 5:14, 15.) Rukat ra Yesu rikat kutwinkish impu ya kudandamen kwikal aom ni kumusadin Yehova. Rikutwish kutukwash kulik kuziy, ap anch tumen mar mulong wa yinship kanang, kuzengol, kuturumbukin ap yakamish.

AKADIVAR NETU AKWET KUSWIR KWA RUKAT RETU

10, 11. Nany ukweta chisend cha kuyikasikesh akadivar aziyila? Rumburil.

¹⁰ Yehova usadidin kand chikumangen mulong wa kutukudish mu rukat rend. Anch twayikat akadivar nau anambaz netu, tumekeshin rukat retu mulong wa Yehova. Tukat kusal chom chin chawonsu tukutwish kusal mulong wa kuyikwash akadivar netu kwijik anch akwet usey ni Yehova uyikatin. (1 Yohan 4:19-21) Kambuy Paul wafunda anch: ‘Chawiy ongojijanany pamwing umwing ni mukwau, ni kukudishijan mudi chiukat kusalany kand.’ (1 Tesalonik 5:11) Kadiap kwau ching amakurump a chikumangen afanyidina kusal mwamu. Muntu ni muntu pakach petu ukutwish kumwimburij Yehova ni Yesu kusutin ku kuyikasikesh akadivar nau anambaz netu.—Tang Rom 15:1, 2.

¹¹ Antu amwing a mu chikumangen amena mar ma kuziy kwa mu manangu ap yakamish akutwish kwikal ni kuswir kwa ukwash wa chimwingang. (Luka 5:31) Ap anch amakurump nau antu akwau mu chikumangen kayifumbinap mulong wa kwikal adokiter, ij anch ukwash ni rongoj yipaninau yikutwish kwikal ya usey nakash. Antu awonsu mu chikumangen akutwish ‘kulond mu mutapu wa kuyongoj akweta wom, kuyikwash aziyila, kushimpish muchim kudi antu awonsu.’ (1 Tesalonik 5:14) Tufanyidin kusal usu wa kutesh mutapu wiyovilau akadivar netu. Tukwet kuswir kwa kuyishimpishin muchim ni kwisamb nau mu mutapu wa kuyongoj chisu chiziyinau. Ov, usadining usu mulong wa kuyikasikesh antu akwau? Yom ik ufanyidina kusal mulong wa kwikal mwin kukasikeshan ni mwin kwongoj muwamp?

12. Let chilakej cha muntu wakasikeshau kusutin rukat mu chikumangen chend.

¹² Nambaz umwing wa mu Europe ulondin anch: “Yisu yimwing nikat kwikal ni yitongijok ya kwijip, pakwez nikwet ukwash uwamp. Chikumangen cham chikat kupandish mwom wam. Akadivar nau anambaz akat kwinkasikesh chisu chawonsu ni ankatin. Ap anch antu akemp awiy ija anch nikwet mayej ma kuziy mu manangu, chikumangen chidiaku chisu chawonsu mulong wamam. Ambay a uruw adi mudi anvajam a mu spiritu. Ambangidin nakash ni dichuku diawonsu adiaku mulong wamam.” Chakin kamu, kadiap muntu win mwawonsu ukutwisha kukwash mu chilik chinech. Pakwez etu awonsu tukutwish kusal usu nakash mulong wa kuyikwash akadivar nau anambaz netu.b (Tal mazu ma kwinshin.)

MUTAPU WA KUYIKASIKESH ANTU AKWAU NICH RUKAT

13. Yom ik ufanyidina kusal mulong wa kuyongoj antu akwau?

¹³ Ikal mwin kutesh muwamp. (Jakobu 1:19) Tukat kumekesh rukat anch twamutesh muntu nich ranaken. Ipul yipul yiwamp yikutwisha kukukwash kutesh nawamp mutapu wiyovilay mukadivar ney. Ndiy ukuman anch umubangidin, ap kusutin mutapu udia chifu chey. Chisu ulondina, shimpish muchim ni mulika akuleja pakad kumukaturij. Kusutin kwikal mwin kutesh muwamp, ukutwish kumutesh nawamp nakash ni chinech chikumukwash akuchingejin. Mwamu chikumuswapel chad ndiy kutesh yom ulondina piusadina usu wa kumukwash. Anch wayibangin antu akwau nakash, ukutwish kwikal mwin kuyongoj muwamp.

14. Mulong wak tufanyidinap kwikal in kulondan nayimp?

¹⁴ Kangal wikal mwin mboj. Muntu uziyina mu manangu ukutwish kwiyov nayimp nakash anch wijik anch tukat kumulond nayimp ap kumunyinyit. Ni chikutukasiken nakash kumukwash. “Kudi amwing akata kulond mazu makash mudi kutap kwa mpak ya musamun, pakwez jindim ja in manangu jikat kwokan.” (Jinswir 12:18) Ap anch tusotinap kumwovish nayimp muntu uziyina mu manangu nich mazu metu, tukutwish kumwovish nayimp nakash anch twalond pakad kutong. Mulong wa kumwinkish mukadivar netu kashinsh, tufanyidin kusal iyova anch tusadin usu wa kutesh milong yend.—Mateu 7:12.

15. Yom ik tukweta tukutwisha kusadin mulong a kuyikasikesh antu akwau?

¹⁵ Sadin Dizu dia Nzamb mulong wa kuyongoj nich antu akwau. (Tang Rom 15:4, 5.) Bibil udiokil kudi ‘Nzamb ukata kupan kujijaman ni kwongoj,’ chawiy chishimokishinap anch tukutwish kutan rongoj mu mazu madia mu Bibil. Tukwet kand Index des Publications des Témoins de Jéhovah ni Ukwash wa Kukimbijol nich wa Atuman a Yehova. Anch twasadin yom yiney, tukutwish kutan mifund ni mikand tukutwisha kusadin mulong wa kuyongoj ni kuyikasikesh akadivar nau anambaz netu.

16. Mikadil ik yikutukwasha kumukasikesh muntu uziyina mu manangu?

¹⁶ Ikal muntu udimukina ni muwamp. Yehova udi “kamu mwin riy, ndiy Nzamb ukata kupan kwongoj kwawonsu,” ni ukwet ‘ranaken nakash’ mulong wa atushalapol end. (Tang 2 Korint 1:3-6; Luka 1:78; Rom 15:13) Paul washa chilakej chiwamp cha mutapu winou mulong wamwimburija Yehova. Wafunda anch: “Twading twitudishin nakash mukach mwen mudi maku ulamina anend nawamp ku mayel. Mulong twakukatanya nakash, twading tukwet musangar wa kukurumburilany rusangu ruwamp ridiokila kudi Nzamb. Twasangara kand kwipan ayinetu kudi en, mulong wadingany akarukat netu nakash.” (1 Tesalonik 2:7, 8) Anch tudi antu adimukina mudi Yehova, tukutwish kupan rongoj ritinau akadivar netu mu malembil!

17. Chitongijok ik chisikena piur pa akadivar netu chikutukwasha kuyikasikesh?

¹⁷ Kangal wachingejin anch akadivar ney ikala antu awanyidina. Ikal muntu wisikena. Anch wayichingejin akadivar ney kwikal antu awanyidina, ukushiken ku kuziy. (Mulej 7:21, 22) Vurik anch Yehova, uding wisikena mu yom yichingejinay anch tusala. Chawiy, tufanyidin kwikal in kushimpishijadin muchim umwing ni mukwau. (Efes 4:2, 32) Tukatinap kuyisal akadivar netu iyova anch kasadinap yom yivud ap kuyisikesh ni antu akwau. Pakwez, tukat kuyikasikesh ni kushinshikin pa yom yiwamp yisadinau. Chinech chikutwish kuyikwash kwikal ni musangar pamusadidinau Yehova.—Galatia 6:4.

18. Mulong wak tusotina kukasikeshijan umwing ni mukwau nich rukat?

¹⁸ Kashalapol mwawonsu wa Yehova ukwet usey kudi ndiy ni kudi Yesu. (Galatia 2:20) Tuyikatin nakash akadivar nau anambaz netu, chawiy tufanyidin kuyisadin nawamp. Tukat “kukimb yisu yawonsu mutapu wa kulet chisambu ni kukasikeshijan muntu ni mukwau.” (Rom 14:19) Tuchingedin nakash mwom mu Paradis, mulong mwinimwa kwikil muntu ukulonda kand anch uziyin! Kukwikalap kand mayej ap njit. Antu kakufap kand mulong wa chitil chaswanau, ni kukwikalap kand rupompat, milong ya dijuku, ap kumurumbukin muntu. Ni kwinsudien kwa mivu kanan, antu awonsu akwikal awanyidina. Antu akushala ashinshamena ku kupak kwa nsudien akwikal an a Yehova a pa divu ni ‘kukolik kwa uyaj wa an a Nzamb.’ (Rom 8:21) Chawiy el etu awonsu tumekesha rukat rikata kutukasikesh ni tukwashijan umwing ni mukwau mulong wa kwandam mwi ngand yisu yipandakena kuwap ya Nzamb.