“Anch en Wijany Yom Yiney, Wayukany Kwen Anch Wayisadilany”

1. Mutapu ik ukutwisha mwikadil wa choy wa mangand minam kuyipish mwikadil wetu wa kwikepish?

MULONG wak chikasiken kusadin yom twilejina mu Dizu dia Nzamb? Diyingishin dimwing didi anch mulong wa kusal yom yiwamp, tufanyidin kwikal ikepishina. Mu “machuku ma kwisudiel,” chidi chikash kushal ikepishina, mulong antu avud atunyingumukina adi “in kwikat ayinau, in kukat nfalang, in kwibaz, in kwishimek,” ni “akad kwikand ayinau.” (2 Timote 3:1-3) Chitudia atushalapol a Nzamb, twij anch mikadil mudi yiney yidi yiyimp, pakwez chikutwish kumekan anch antu akweta mikadil yiney atwishin mu mwom ni asangaredin mwom yau nawamp. (Kuseng 37:1; 73:3) Tukutwish kwiyipul anch: ‘Ov, chidi kamu cha usey kusal usu wa kutek maswir ma antu akwau pa ndond ya kusambish? Ov, antu akudandamen kwinlimish anch nikal mwin kwikepish?’ (Luka 9:48) Anch twitiyij anch mwikadil wa choy wa mangand utupumbula, tukutwish kuyipish urund wetu uwamp nau akadivar netu ni kusal anch chiyikasikena antu akwau kujingunin anch tudi in Kristu. Pakwez anch twilej yilakej ya atushalapol a Nzamb ading ikepishina ni kuyimburij, tukwikal ni yibudikin yiwamp.

2. Yom ik tukutwisha kwilejin ku yilakej ya atushalapol ashinshamena a pakur a Nzamb?

² Yom ik yayikwasha atushalapol ashinshamena a pakur a Nzamb kwikal arund nend? Mutapu ik wamusangareshau? Kwisu kwatanau usu wa kusal yom yidia yiwamp? Anch twatang piur pa yilakej yau mu Bibil ni kutongijokin pa yom tutangina, ritiy retu rikukasikan.

YOM YIKASIKESHINA RITIY RETU

3, 4. (a) Mutapu ik utufundishinay Yehova? (b) Mulong wak tuswiridinap kwetu ching ronganyin mulong wa kulam ritiy rikash?

³ Yehova utwinkishin yom tukweta nich kuswir mulong wa kulam ritiy retu rikash. Tukat kutambul yiyul yiwamp ni kufumb kudiokila mu Bibil, yichap yetu ya win Kristu, kapend ketu ka web, JW Télédiffusion, yikumangan ni yitentam yetu. Pakwez Yesu warumburila anch tukwet kuswir kwa chom chikweta usey nakash kusutamu ronganyin. Walonda anch: “Yakudia yam yidi kusal rusot rendendiy wantuma am, ni kupwish mudimu wend.”—Yohan 4:34.

⁴ Kusal rusot ra Nzamb kwading mudi yakudia ya Yesu. Kudia yakudia yiwamp kukat kusal anch twiyova nawamp ni twikala ni mijimbu yiwamp. Chilik chimwing, kusal rusot ra Nzamb kukat kutwovish nawamp ni kukasikesh ritiy retu. Chilakej, wayilap kal ku chikumangan cha mudimu wa kulejan chisu wovila kuziy pakwez anch wachirik ku chikumbu kupwa kwa kulejan wiyov anch ukwet musangar ni udi ukasikeshinau?

5. Mutapu ik tutanidinamu mu kwikal in manangu?

⁵ Anch twasal yom yitinay Yehova kusal, tudi in manangu. (Kuseng 107:43) Ni yom yivud yiwamp yikat kushiken kudi antu akweta manangu. “Kwikil chom cha rusot rey chiukumwilikeja nich. . . . Manangu udi mutond wa mwom kudi awiy akuukwata, ni awonsu akuukwata akuyitazuk anch ayukil.” (Jinswir 3:13-18) Yesu walonda anch: “Anch en wijany yom yiney, wayukany kwen anch wayisadilany.” (Yohan 13:17) In kwilej a Yesu afanyina kwikal ni musangar padandamenau kusal yom yayilejau kusal kudi Yesu. Kulondul mafundish mend ni chilakej chend yikala yom yisadidinau mu mwom wau wawonsu.

6. Mulong wak tukwet kuswir kwa kudandamen kusadin yom twilejina?

⁶ Nlel unou, niyetu tukwet kuswir kwa kudandamen kusadin yom twilejina. Tong piur mwin kurijek ma moto ukweta yom ya mudimu ni ronganyin. Yom yiney yikumukwash kwikal mwin kurijek muwamp ching anch wayisadin. Ukutwish kwikal ni mivu yivud yasalay kal mudimu, pakwez ukwet kuswir kwa kudandamen kusadin yom yilejay anch usotin kwikal mwin kurijek muwamp. Chidi mutapu umwing, chisu twileja uyakin kapamp ka kusambish, twikala ni musangar mulong twasadina yom twading kutang mu Bibil. Pakwez mulong wa kwikal ni musangar wa machuku mavud, tufanyidin kudandamen kusadin dichuku diawonsu yom yitufundishinay Yehova.

7. Yom ik tufanyidina kusal mulong wa kwilej yilakej ya mu Bibil?

⁷ Mu mutu wa mulong winou, tukwisambin mitapu yimwing yikutwisha kusal anch chitukasikena kwikal ikepishina. Tukwilej mutapu washalau atushalapol a pakur ikepishina. Pakwez tufanyidin kusal yom yivud kusutamu kwau kutang jinsangu jinej. Tufanyidin kutongin piur pa jinsangu jinej ni kujisadin mu mwom wetu.

YIMANA ANTU AWONSU ANCH ADI ISIKENA

8, 9. Yom ik twilejina piur pa kwikepish kwa Paul mu Midimu 14:8-15? (Tal chipich cha kwinsambishin.)

⁸ Nzamb ukatin anch antu a mitapu yawonsu ‘apanda ni kushiken kwikal ni ronganyin rakin ra uyakin.’ (1 Timote 2:4) Mutapu ik ukata kuyiman antu awonsu akad kal kwilej uyakin? Kambuy Paul walejana kudi in Yuda ading ija kal yom kanang piur pa Yehova. Pakwez walejana kand kudi antu ading kwifukwilang anzamb a makasu. Kuyilej antu inay kwapaka kwikepish kwa Paul. Mutapu ik?

⁹ Mu weny wa kusambish wa umishoner wa Paul, ndiy ni Barnabas aya ku musumb wa Listre. Antu a mu Likawoniy ading ashicha kwinakwa amumana Paul ni Barnabas mudi antu a ulabu nakash ni ayipila majin ma anzamb au amakasu Zeus ni Herimes. Ov, Paul ni Barnabas asangera ntumb yiney? Ov, amana anch kwinoku kudi kuswimp kusangareshina mulong ayimesha mar mu misumb yaad ya nsudien yendinau? Ov, atonga anch kuyibangin kwinoku kwafanyina kuyikwash antu avud kutesh rusangu ruwamp? Bwat! Ajimana nakash ni kuswej anch: “Ov, mulong wak usadilanya chom chinech? Etu tudi kamu antu mudi en [akweta kuziy mudi kwenen]!”—Midimu 14:8-15.

10. Mulong wak Paul nend Barnabas kiyovap anch adi a piur nakash kuyisutamu antu a ku Likawoniy?

¹⁰ Chisu chalonday Paul nend Barnabas anch ading kwau niyau antu, asota kurumburil anch ading akad kuwanyin. Chadingap chirumburikina anch mutapu wau wa difukwil wading wa mutapu umwing ni wa antu a ku Likawoniy. Paul ni Barnabas ayituma kudi Nzamb mudi amishoner. (Midimu 13:2) Ayizizila many kudi spiritu utumbila ni ading ni ruchingej ruwamp nakash. Pakwez diadingap diyingishin kudi awiy dia kwiyov anch adi a piur nakash. Ajingunina anch antu inay niyau akutwish kutambul ruchingej ra mwiur anch itiy rusangu ruwamp.

11. Mutapu ik tukutwisha kwikal ikepishina mudi Paul chisu tulejena?

¹¹ Winou wawiy mutapu umwing umekeshina anch tudi ikepishina mudi Paul. Tukatap kwiyov anch chisend chetu cha mudimu wa kulejan ap yom yikwau yitukwashinay Yehova kuwanyish yitusadin kwikal antu a pakampwil. Tukutwish kwiyipul anch: ‘Mutapu ik nikata kwiyov piur pa antu adia mu teritwar wam? Nikwet kasolikany pantaliken ni yisak yikwau ya antu?’ Pa mangand mawonsu, Atuman a Yehova akat kusal usu wa kukimb antu akutesha rusangu ruwamp. Amwing pakach pau akat kusal usu wa kwilej dizu ni yaku ya antu amenau kudi antu akwau anch adi a mwinshin. Pakwez kakatap kwiyov anch adi awamp nakash kusutamu antu alejinau rusangu ruwamp. Pa ndond pa kusal mwamu, akat kwikasikesh kumutesh muntu ni muntu mulong wa kuyikwash antu avud kwitiy uruu wa Want.

JIMBUL MAJIN MA ANTU AKWAU MU MALEMBIL MEY

12. Mutapu ik wamekeshay Epaferas anch wading uyibangidin chakin kamu antu akwau?

¹² Mutapu ukwau tumekeshina anch tudi ikepishina udi kusutin kuyilembil akadivar nau anambaz, “atambula kal ritiy ra usey ukash mudi retwetu.” (2 Pita 1:1) Mwamu mwasalay Epaferas. Bibil umujimbwil kwend tupamp tusatu. Chisu chadingay Paul mu Rom ku chikumbu chamukasau, wayifundina in Kristu a ku Kolosay, palonday piur pa Epaferas anch: ‘Yisu yawonsu ukat kusal usu wa kulembil mulong wenen.’ (Kolosay 4:12) Epaferas wading uyij akadivar nawamp ni wayibangina nakash. Paul wamutazuka anch ‘mbay wa rukan,’ chawiy Epaferas wading niyend ni milong yend. (Filemon 23) Pakwez wadandamena kubangin maswir ma antu akwau ni wasala chom kampand mulong wa kuyikwash. Epaferas walembila mulong wa akadivar nau anambaz nend, niyetu tukutwish kusal mwamu, kujimbul majin mau. Malembil mudi minam makweting usu nakash.—2 Korint 1:11; Jakobu 5:16.

13. Mutapu ik ukutwisha kumwimburij Epaferas chisu ulembila?

¹³ Tong piur pa muntu ukutwisha kujimbul pa dijin diend mu malembil mey. Ukutwish kwijik arund ney a mu chikumangen ap majuku wija anch arishin nich yakamish. Pamwing ap afanyidin kukwat mipak yikash nakash ap kurish ni yoziu. Ukutwish kand kulembil mulong wa akadivar ajimbwilau majin pa jw.org pafundinau anch “Témoins de Jéhovah emprisonnés en raison de leur foi.” (Tal pafundinau anch SALLE DE PRESSE > VEILLE JURIDIQUE.) Ukutwish kand kulembil mulong wa antu afishina akatish nau, antu apandina ku yinship yikash yasadikina katat ap kwi njit, ap antu arishina ni milong ya nfalang. Kudi akadivar nau anambaz avud nakash akweta kuswir kwa malembil metu! Anch wayilembil, tumekeshin anch tutongidinap kwetu ching pa maswir metu pakwez tutongidin kand pa maswir ma antu akwau. (Filip 2:4) Yehova ukat kutesh malembil mudi minam.

“UFANYIDIN KUSWAKAL KUTESH”

14. Mutapu ik udiay Yehova mwin kutesh muwamp?

¹⁴ Mutapu ukwau tumekeshina anch tudi ikepishina udi kwikal mwin kutesh muwamp. Jakobu 1:19 utulejin anch tufanyidin “kuswakal kutesh.” Yehova udi mwin kutesh muwamp. (Disambishil 18:32; Joshua 10:14) Chilakej, tang mambamb madia mu Kubudik 32:11-14. (Tang.) Ap anch kadingap kakweta kuswir kwa chitongijok cha Moses, Yehova witiya anch Moses alonda mutapu wiyovilay. Ov, ukutwish kumutesh muntu warumbuka pakur ni kwitiyij chitongijok chend nich kushimpish muchim? Chakin, Yehova ukat kutesh nich kushimpish muchim antu awonsu akata kumulembil nich ritiy.

15. Mutapu ik tukutwisha kumwimburij Yehova kusutil kuyilimish antu akwau?

¹⁵ Iyipula anch: ‘Anch Yehova udi wikepishina mu chilik cha kutwish kuyitesh antu mudi mwamuteshay Aburaham, Rachel, Moses, Joshua, Manowa, Elija ni Ezekias, ov, niyam nikutwishap kusal usu wa kumwimburij? Nikutwish kuyilimish akadivar nam awonsu mu kutesh ni kusadin yitongijok yau anch chiswapel? Ov, kudi muntu mu chikumangen cham ap mu dijuku diam nikutwisha kubangin nakash? Yom ik nifanyidina kusal pa mulong winou?’—Disambishil 30:6; Ankalansambu 13:9; 1 Ant 17:22; 2 Jinsangu 30:20.

‘PAMWING AP YEHOVA UKUTAL PA MAR MAM’

16. Mutapu ik wasalay Mwant David pamusadinau nayimp kudiay Shimey?

¹⁶ Kwikepish kukat kutukwash kand kwilam anch antu akwau atusadin nayimp. (Efes 4:2) Tutangin chilakej chiwamp cha yom yiney mu 2 Samwel 16:5-13. (Tang.) Shimey, mwanamakwend a Mwant Saul, wamusaala ni kumurishikish David nau antu end. David wafanyina kumukangesh Shimey, pakwez nich kushimpish muchim, wajijamena masaal mamusaalau. Mutapu ik wasalay David chakwel ilama? Tukutwish kujingunin mu kwilej Kuseng wa kasatu.

17. Yom ik yamukwasha David kwikal mwin kwilam, ni mutapu ik tukutwisha kumwimburij?

¹⁷ David wafunda Kuseng wa kasatu chisu chading chisadinay mwanend Abisalom usu wa kumujip. Pa chisu chinech pawiy pamurishikishau David kudiay Shimey, pakwez David watana usu wa kushal uninetina. Mutapu ik? Mu Kuseng 3:4, tutangin mazu ma David anch: “Nikat kumudidil [Yehova] kwinkwash, ndiy ukat kwingakul ku mukandu wend utumbila.” Anch atusadin nayimp, tufanyidin kulembil mudi mwasalay David. Mwamu Yehova ukutwinkish spiritu wend utumbila chakwel tutwish kujijaman. Ov, ukutwish kwikal mwin kwilam nakash ap mwin kulikishin anch muntu wakusadin nayimp? Ov, ukwet kashinsh anch Yehova ubangidin mar mey ni ukukukwash ni kukuyukish?

‘MANANGU CHIDI CHOM CHA USEY NAKASH’

18. Mutapu ik tukutaninamu anch twasadin mbil ja Yehova?

¹⁸ Anch twasal yom twija anch yidi yiwamp, tukwikal in manangu ni Yehova ukutuyukish. Mu Jinswir 4:7, Bibil ulondin anch: ‘Manangu chidi chom cha usey nakash.’ Ap anch manangu mimedin pa ronganyin, marumburikin yom yivud kusutamu kwau kwijik uman kampand. Manangu mitin kand anch tukwata mipak yiwamp. Ap atupwapu akat kumekesh manangu ma kukumangej yakudia ya machuku ma kurutu. (Jinswir 30:24, 25) Kristu, utazukinau anch “manangu ma Nzamb,” ukat kusalang chisu chawonsu yom yimusangareshina Tatukwend. (1 Korint 1:24; Yohan 8:29) Nzamb ukutufut anch niyetu twamekesh manangu kusutil kutond kusal yom twija anch yiwapin ni kushal ikepishina. (Tang Mateu 7:21-23.) Chawiy dandamen kusal usu chakwel chikumangen chikala ndond yikutwishau antu awonsu kumusadin Yehova nich kwikepish. Chitin chisu ni kushimpish muchim mulong wa kusal yom twija anch yidi yiwamp. Pakwez kusal mwamu kumekeshin kwikepish, ni kwikepish kukutuletin musangar katat ni chikupu.