Kumwijik Nzamb Kukwet Usey Ik Kudi ey?

Mu mitu ya milong yasambelang ey, twaman kal yom yatukwasha kal kwakul ku chipul chilondina anch: Ov, umwij chakin kamu Nzamb? Twaman kal kusutil Bibil anch dijin dia Nzamb ndiy Yehova ni mwikadil wend wa pakampwil udi rukat. Twaman kal kand yom yasalay ni yom yikusalay mulong wa kutaninamu kwa antu end atangay. Mulong kudi yom yivud tufanyidina kwilej piur pa Nzamb, ukutwish kwiyipul anch kwilej kumwijik Nzamb kukwet usey ik kudi ey.

Yehova ukanin ang, “anch [wamukimb] ndiy, ey ukumutan.” (1 Jinsangu 28:9) Tongin pa chipan chiwamp ukwikala nich anch wamukimb ni washiken ku kumwijik Nzamb​—‘urund wa piswimp ni Yehova’! (Kuseng 25:14) Ukutaninamu ik mu urund winou wa piswimp?

Musangar wakin. Yehova udi ‘Nzamb wa musangar.’ (1 Timote 1:11) Kwikal nend mu urund wa piswimp ni kwimburij mikadil yend kukukukwash wikala ni musangar wakin, yawiy yikutwisha kukukwash wikala kand ni mashakamin ni manangu mawamp. (Kuseng 33:12) Ukutwish kand kwikal ni mashakamin masangareshina​—kusutil ku kwipuk yom yikutwisha kuyipish mashakamin mey ni kwikal ni yaku yiwamp ni kwikal kand mu urund uwamp pamwing ni antu akwau. Chawiy ukushiken ku kwitiy mazu malonday nfund a kuseng anch: “Kudi am chidi chiwamp kamu kusej piswimp kudi Nzamb.”​—Kuseng 73:28.

Kubangin ni ukwash wa pakampwil. Yehova wayikana atushalapol end anch: “Nikukulej ey ni kukwijikish njil yiufanyidina kulondul. Nikukutal ni kukuyul.” (Kuseng 32:8) Chinech chimekeshin anch Yehova ukat kuyibangin kamu atushalapol end ni kuwanyish maswir ma muntu ni muntu panrend. (Kuseng 139:1, 2) Anch wakudish chakusambish urund wey uwamp pamwing ni Yehova, ukuman anch Yehova udiaku chisu chawonsu mulong weyey.

Machuku ma kurutu masangareshina. Chikwau kand, Yehova ukukwashin kwikal ni mwom uwamp ni usangareshina nlel, ni ukwinkishin kand ruchingej ra kwikal ni mwom uwamp mu machuku ma kurutu. (Isay 48:17, 18) Bibil ulondin anch: “Antu akwikal nich mwom wa chikupu anch akwijik ey Nzamb wakin, ni kumwijik Yesu Kristu watuma ey.” (Yohan 17:3) Mu yisu yiney yikash, ruchingej ripaninay Nzamb ridi mudi nkal utukwashina kudandamen kwikal nich ‘kashinsh ni kwiman dang.’​—Hebereu 6:19.

Yiney yawiy yom yimwing pakach pa yom yivud ukutwisha kutaninamu anch washiken ku kumwijik Nzamb nawamp ni kukudish urund wa pakampwil ni ndiy. Mulong wa jinsangu jikwau, tukwitin chakwel wambamba ni umwing wa Atuman a Yehova ap yang pa kapend ka jw.org.