Yehova Ukwatin Nich Usey “Amen” Wey
YEHOVA ukwatin nich usey difukwil dietu. Yehova ukat “kuta matu ni kutesh” yom yilondinau atushalapol end, ni ukat kukwat nich usey chom chawonsu tukata kusal mulong wa kumushiman ap anch chidiap nchik chikemp. (Mal. 3:16) Chilakej, shinshikin dizu diwalondina kal tupamp tuvud tuwakad kutwish kuchind. Dizu dined didi “amen.” Ov, Yehova ukat kukwat nich usey kadizu kinak kakemp? Mwaning! Mulong wa kwijik diyingishin, el twileja chirumburikina dizu dined ni mutapu udisadidinau mu Bibil.
“ANTU AWONSU AKEZ KWAKUL ANCH: ‘AMEN!’”
Dizu dia Uruund “amen” dirumburikin anch “chikal kamu mwamu,” ap anch “chakin kamu.” Dizu dined didiokil mu dizu dia Hebereu dirumburikina anch “kwikal ushinshamena,” “kwikal uwanyidina kuchingejin.” Yisu yimwing adisadinang pa chisu chirumburishinau milong. Kupwa kwa muntu kuchip, wafanyina kulond anch “amen” mulong wa kumekesh anch yom yilondinay yidi yakin ni kumekesh anch witiyidin yibudikin yawonsu yikudiokala ku yom yalonday kal. (Kuch. 5:22) Anch muntu winou walond anch “amen” pakach pa antu, wading ufanyidin kukwat mupak wa kuwanish kushilamu kwend.—Neh. 5:13.
Chilakej chiwamp piur pa kusadin dizu “amen” tuchitanin mu mukand wa Kuvurik Yijil shapitre wa 27. Kupwa kwa in Isarel kwandam mwi Ngand ya Kushilamu, akumangana pakach pa mukandu wa Ebal ni Mukandu wa Garizim mulong wa kutesh Yijil yading yitanginau. Kadingap kwinakwa mulong wa kutesh kusu pakwez ading afanyidin kand kulond chom kanang mulong wa kumekesh anch ading itiyin yijil yiney. Amekesha anch ading itiyin chijil kusutin kwakul anch “Amen!” pading palejenau yibudikin ya kubwambwil Yijil. (Kuv. 27:15-26) Tong mutapu wading wakwila tunan twa antu, amakundj, amband nau an nich dizu dia piur! (Jos. 8:30-35) Kafanyinap kuvuramen ap pakemp mazu malondau dichuku dinidia. Ni in Isarel inay alama dizu diau, mulong Bibil ulondin anch: “In Isarel amusadila [Yehova] mu mivu yawonsu ya mwom wa Joshua, ni mivu yawonsu ya amakurump amulondula Joshua, ni ading ij yisalijok yawonsu yiwamp yasalay [Yehova] kudi Isarel.”—Jos. 24:31.
Yesu niyend wasadina dizu “amen” mulong wa kumekesh uyakin wa yom yading yilondinay, pakwez wasalang mwamu mu mutapu wa pakampwil. Pa ndond pa kusadin dizu amen mulong wa kwakul kwau ku mazu malondinay muntu kanang, Yesu wasadinang “amen” (dizu dikarumwinau mu uruund anch “chakin kamu”) kurutu kwa kulond chom kanang mulong wa kumekesh anch chom chinech chading kamu chakin. Yisu yimwing, wachirikinang dizu dined kusutin kulond anch ‘amen amen.’ (Mat. 5:18; Yoh. 1:51) Kusutil kusal mwamu Yesu wayinkishang in kumutesh kashinsh anch mazu mend mading makin kamu. Yesu watwishang kulond nich kashinsh mulong wading muntu winkishau kal ulabu wawonsu wa kuwanyish kushilamu kwa Nzamb.—2 Kor. 1:20; Kuj. 3:14.
“ANTU AWONSU ALONDA ANCH: ‘AMEN!’ NI AMUSHIMANA [YEHOVA]”
In Isarel asadinang kand dizu “amen” chisu chamushimanangau Yehova ni kumulembil. (Neh. 8:6; Kus. 41:13) Kusutil kulond anch amen kupwa kwa malembil kwading kumekeshin anch antu ading ateshina malembil ading itiyin yom yading yilondinau mudi awiy ayilonda. Antu awonsu ading pinapa ading ni mutapu wa kwakul ni asangerang kumwifukwil Yehova mu mutapu winou. Yiney yawiy yom yasadika chisu chatwalay Mwant David Mushet wa Yehova ku Yerusalem. Pa chisu cha musambu, wasala malembil madiokila ku muchim mading mudi muminy mafundinau mu 1 Jinsangu 16:8-36. Mazu mend mayipukuna nakash antu ading pinipa ni “antu awonsu alonda anch: ‘Amen.’ Amushimana [Yehova].” Chakin kamu, ading akwet musangar wa kumwifukwil Yehova pamwing.
In Kristu a mu mivu chitot ya kusambish asadinang niyau dizu “amen” chisu chamushimanangau Yehova. In kufund a Bibil asadina dizu dined mu mikand yau. (Rom 1:25; 16:27; 1 Pita 4:11) Mukand wa Kujingunik ulejen piur pa yitang ya mu spiritu yidia mwiur anch yading yikat kumushiman Yehova kusutin kulond anch: “Amen! Mushimanany [Yah]!” (Kuj. 19:1, 4) In Kristu a kusambish ading ni chaku cha kulond anch “amen” kupwa kwa malembil masalangau ku yikumangan yau. (1 Kor. 14:16) Pakwez, dined diadingap kwau dizu dialondolangau kwau pakad kuditongin.
MULONG WAK DIZU “AMEN” DIKWET USEY
Kupwa kwa kwilej mutapu wasadinangau atushalapol a Yehova dizu “amen,” tukutwish kuman mulong wak dizu dined didi dia usey nakash mulong wa kupwish nich malembil. Anch twajimbul dizu dined kwinsudien kwa malembil metu, tumekeshin anch twovil kurumburik kwa yom twalonda kal. Ni chisu twakwila anch “amen,” mu muchim ap ni dizu dia piur ku malembil masadinau kurutu kwa antu avud, tumekeshin anch twitiyin yom yalondau kal. Shinshikin kand mulong wak dizu “amen” didi dia usey.
Tukat kuta matu palembilay muntu chisu cha difukwil. Tukat kumwifukwil Yehova chisu cha malembil, kadap kwau ching kusutil yom tulondila pakwez kusutil kand yom tusadina. Mulong tukatining kwikal nich kashinsh chisu tulondina anch “amen,” chinech chikutwish kutukwash kwikal nich chitongijok chiwamp ni kuta matu ku malembil.
Tudi mu umwing mudi in kwifukwil. Malembil masadinau kurutu kwa antu avud makat kupwit manangu metu pa yom yiteshinau antu akwau a mu chikumangen. (Mid. 1:14; 12:5) Chisu twakwila anch amen pamwing ni akadivar nau anambaz netu, chinech chimekeshin anch tudi kamu mu uumwing. Pitwakwila anch “amen” ni dizu dia piur ap mu muchim, malembil metu makutwish kumubachik Yehova kusal yom twitang.
“Amen” wetu ukat kukwash niyend kumushiman Yehova
Tukat kumushiman Yehova. Yehova ukat kuman tuyisal tukemp tukemp tukata kusal mulong wa difukwil diend. (Luka 21:2, 3) Ukat kuman yibachikin ni yom yidia mu muchim wetu. Ap chisu tuteshina malembil masadinau ku chikumangan kusutil telefon, tufanyidin kwikal nich kashinsh anch “amen” wetu twakwila nich kwikepish, Yehova umuteshin. Anch twalond anch amen, twabombakan kal pamwing ni antu akumanganang mulong wa kumutumbish Yehova.
“Amen” wetu ukutwish kumekan mudi kakwetap usey, pakwez ukwet usey nakash. Buku umwing (Bible encyclopedia) ulondin anch: “Kusutin dizu dined dimwing,” atushalapol a Nzamb akutwish kumekesh “kashinsh, dilau dikash, ni ruchingej rakin ridia mu michim yau.” El dizu dietu “amen” dimusangaresha Yehova.—Kus. 19:14.