Tusangerany Mwaz Wa Pakampwil Wa Yesu Mu Rutong Ra Nzamb
“Yam njil ni uyakin ni mwom; kwikil ukwiyezila kudi Tatuku ching kudi am.” —YOH. 14:6.
1, 2. Ov, mulong wak tufanyidina kukwatin nich kushinshikin mwaz wa pakampwil wa Yesu mu rutong ra Nzamb?
MU YIRUNG yin yawonsu, antu avud asadiling usu wa kwikal a pakampwil pantaliken ni antu ayombilamu, pakwez ching antu akemp atwishina. Ching antu akemp akutwisha kulond anch adi a pakampwil mu jinjil kanang. Pakwez, Yesu Kristu, Mwan a Nzamb, udi wa pakampwil mu jinjil jivud.
2 Ov, mulong wak mwaz wa pakampwil wa Yesu utukwatin nakash? Mulong urund wend win ni Tatukwetu wa mwiur, Yehova, niwawiy ukwachikinaku! Yesu walonda anch: “Yam njil ni uyakin ni mwom; kwikil ukwiyezila kudi Tatuku ching kudi am.” (Yoh. 14:6; 17:3) El tushinshikinany jinjil jimwing mudiay Yesu wa pakampwil. Kusal mwamu ku kukudish kusanger kwetu mwaz wend mu rutong ra Nzamb.
“Mwan Umwing”
3, 4. (a) Ov, mulong wak tukutwish twalond anch Yesu udi wa pakampwil mu mwaz wend mudi Mwan umwing wa Nzamb? (b) Mwaz wa Yesu mu kutang yom wadinga wa pakampwil mutapu ik?
3 Yesu kadiap kusu “mwan a Nzamb.” Wawiy mutapu wamujimbulau Yesu kudiay Satan padingay ni kumupak. (Mat. 4:3, 6) Chakin kamu Yesu amutazukin nawamp win kamu anch: “Mwan umwing wa Nzamb.” (Yoh. 3:16, 18) Dizu dia Grek dikarumwinau “mwan umwing” adirumburil anch “umwing wa muchid wend, kapokal,” “chid chimwing cha mutapu wach,” ap anch “wa pakampwil.” Yehova ukwet yitot ya mamiliyon ya anend a muspiritu. Ov, mwinjil ik mudiay Yesu, wa pakampwil “wa muchid wend”?
4 Yesu udi wa pakampwil mulong ndiy kusu watangau kamwing ku kamwing kudiay Tatukwend amwinend. Ndiy Mwan kabuzivumu. Chakin kamu, ndiy udi “mwanat wa yom yawonsu yatangau.” (Kol. 1:15) Ndiy “disambishish diatangay Nzamb.” (Kubur. 3:14) Mwaz wa mwan umwing wa Nzamb mu yom yatangau niwawiy udi wa pakampwil. Kindiyap wadinga Sakatang, ap anch Mwin kusambish, wa yom yatangau. Pakwez Yehova wamusadila mudi musadish, ap mudi muntu wa kusadil, mulong wa kutang yom yawonsu. (Tang Yohan 1:3.) Kambuy Paul wafunda anch: “Pakwez kudi etu kudi Nzamb umwing kusu, Tatuku, kwadiokila yom yawonsu, yetu tudi kudia ndiy; ni Mwant umwing, Yesu Kristu, yom yawonsu yidi kudiay ndiy, ni yetwetu kudia ndiy.”—1 Kor. 8:6.
5. Mifund yikasikeshidin mutapu ik upakampwil wa Yesu?
5 Pakwez, kudi yom yivud yidia mu upakampwil wa Yesu. Mifund yimupidil yijiken ap anch majin makwau mavud makasikeshidin mwaz wend wa pakampwil mu rutong ra Nzamb. El tushinshikinany yijiken yitan yisadidilau padiay Yesu mu Mifund ya Grek ya Ukristu.a
“Dizu”
6. Ov, mulong wak chimufanyidin kamu kumutazuk Yesu anch “Dizu”?
6 Tang Yohan 1:14. Ov, mulong wak umutazukiningau Yesu anch “Dizu,” ap anch Logos? Chijiken chilejen mwaz wadingay nich kurutu yitang yikwau yikweta manangu yikalaku. Yehova wamusadila Mwanend mulong wa kuyilej an akwau muspiritu yany yend, ni Nzamb wamusadila kand mulong wa kumukol muruu wend wayituminay antu adinga pansh. Uyakin ulondila anch Yesu udi Dizu, ap anch Katum wa Nzamb, umekedin mu mazu mayilejau in Yuda adinga amuteshina Kristu anch: “Dilejan diam kididip diamam, pakwez didi diendindiy wantuma; anch muntu ukat kusadil rusot rend ukez kijik ya dilejan, anch didi dia Nzamb, anch nikat kulond yam amwinam.” (Yoh. 7:16, 17) Yesu ukwet kamu ni katat dijin dia chijiken “Dizu dia Nzamb” ap ni kupwa kwa kuchirikin mu uyaj wend wa mwiur.—Kubur. 19:11, 13, 16.
7. Mutapu ik tukutwisha kwimburij kwikepish kwamekeshay Yesu mu mwaz wend mudi “Dizu”?
7 Tongin bil pa chirumburikina dijin dined dia chijiken. Ap Yesu ndiy uyipandakenamu manangu yitang yawonsu ya Yehova, kakatap kukungamen pa manangu mend amwinend. Ndiy ulondil kamu mudi mumulejinau kudiay Tatukwend. Ukat kupwitin chisu chawonsu manangu padiay Yehova, kadiap padi ndiy amwinend. (Yoh. 12:50) Chilakej chipandakenamu kuwap mudi ik chitufanyidina etu kwimburij! Niyetu twitapidil dilau diatwinkishau dia kulejan “rusangu ruwamp.” (Rome 10:15) Kusanger kwikepish kwa Yesu kufanyidin kwatubachik tulika kulond yom yetu ayinetu. Pa chisu cha kulejan uruu upandishina mwom udia mu Mifund, tukat “kulondul mazu mafundilau wakad kuwejuku.”—1 Kor. 4:6.
“Amen”
8, 9. (a) Dizu “amen” dirumburikin ik, ni mulong wak umutazukinau Yesu anch “Amen”? (b) Mutapu ik wawanyishay Yesu mwaz wend mudi “Amen”?
8 Tang Kuburik 3:14. Ov, mulong wak umutazukinau Yesu anch: “Amen”? Dizu diakarumunau “amen” didi kukopiril dizu dia Hebereu dirumburikina anch “chikala mwamu,” ap anch “inge.” Dizu dia pa dishin dia Hebereu ku didiokila dirumburikin “kwikal ushinshamena” ap anch “wa kuchingejin.” Diawiy dizu dimwing dikatau kusadil mulong wa kurumburil kushinshaman kwa Yehova. (Kuv. 7:9; Isay 49:7) Ov, mutapu ik udiay Yesu wa pakampwil pakatau kumwisambin mudi “Amen”? Talany chakul chidia mu 2 Korint 1:19, 20 chilondila anch: “Mwan a Nzamb, Yesu Kristu, walejanau pakach pen . . . , [kadingap] Inge ni Bwat, pakwez kudiay ndiy kuding ching Inge. Mulong kushilimu kwawonsu kwa Nzamb kwatana Inge kwau mwi ndiy. Chawiy kand tukata kulond Amen mwi ndiy ku uyaj wa Nzamb.”
9 Yesu udi “Amen” ku yakushilamu yawonsu ya Nzamb. Mwom wend wakad chitil wa pansh, pamwing nich rufu ra kwipan kwend, kwawanyisha ni kwatwishisha yakushilamu yawonsu ya Yehova Nzamb. Kusutil ku kushinshaman kwend, Yesu niyend wamekesha anch yom yalonday Satan, yifundilau mu buku Yob, yidi ya makasu, anch mu choziu, mu mar ni mu kupakiu, atushalapol a Nzamb akutwish Amwitun. (Yob 1:6-12; 2:2-7) Mu yitang yawonsu ya Nzamb, Mwan kabuzivumu, ndiy waleta chakul chimwing chikash ku kusarumun kwinoku. Chikwau, Yesu waleta uman upandakena kuwap wa kwikal ku mutambu wa Tatukwend pa mulong ujim nakash wa mbil ya ukaleng wa mangand wa Yehova.
10. Mutapu ik tukutwisha kumwimburij Yesu mu mwaz wend wa pakampwil mudi “Amen”?
10 Mutapu ik tukutwisha kumwimburij Yesu mu mwaz wend wa pakampwil mudi “Amen”? Chidi kusutil ku kushal ashinshamena kudiay Yehova ni ku kwikal ku mutambu wa ukaleng wend. Anch twasal mwamu, chakin kamu tukwakul muchifanyidina ku mazu mafundau mu Jinswir 27:11 anch: “Mwanam ikundj, ikal mwin manangu chakwel wez usangarish muchim wam, mwamu ni yam nikez katwish kumwakul muntu ukwinsala masal.”
“Chapakach wa Manswik Masu”
11, 12. Ov, mutapu ik udia mwaz wa Yesu mudi chapakach wa pakampwil?
11 Tang 1 Timote 2:5, 6. Yesu udi “chapakach umwing kand, udia pakach pa antu ni Nzamb.” Udi “chapakach wa manswik masu.” (Heb. 9:15; 12:24) Pakwez, amwisambidin Moses niyend mudi chapakach—chapakach wa manswik ma Chijil. (Gal. 3:19) Ov, mutapu ik udia mwaz wa Yesu mudi chapakach wa pakampwil?
12 Dizu dia rudim ra kusambish rakarumunau anch “chapakach” didi dizu dikatau kusadil mwi mbil ya ngand. Dimulejen Yesu anch ndiy ukweta mbil ya kwikal Chapakach (ap anch, mwin kuchakwish) wa manswik masu matwishishina kuvadik kwa muchid usu, wa “Isarel a Nzamb.” (Gal. 6:16) Muchid winou udi wa in Kristu azizidilau many, asadila “in kupesh a Mwant.” (1 Pita 2:9; Kub. 19:6) Chijil cha manswik,nich Moses mudi chapakach, katwishap kubudish muchid mudi winou.
13. Yom ik yikwau yikwatikena ku mwaz wa Yesu mudi chapakach?
13 Yom ik yikwau yikwatikena ku mwaz wa Yesu mudi chapakach? Mwaning, Yehova usadidil usey wa mash ma Yesu padi antu in awonsu andjikinau mu manswik masu. Mwinjil yiney, Yehova uyitiyijin anch inay awonsu kwikal atentamina. (Rome 3:24; Heb. 9:15) Nzamb wayandjika kand antu inay mu manswik masu nich ruchingej ra kwikal kwau in kupesh ni ant a mwiur! Mudi Chapakach chau, Yesu uyikwashin chakwel ashala ishitwila ku mes kwa Nzamb.—Heb. 2:16.
14. Ov, mulong wak ufanyidinau in Kristu awonsu, chikalap nchik ruchingej rau, nich kusanger nakash mwaz wa Yesu mudi Chapakach?
14 Chadi chidi nchik piur pa antu akad kwikal mu manswik masu, in achingejidina kushakam chikupu pa divu, kakuyap kwau mwiur? Ap anch kadiap mu manswik masu, pakwez atanyidinamu nakash. Awiy akat kuyilikishin yitil yau ni kuyilond anch atentamin ni adi arund a Nzamb. (Yak. 2:23; 1 Yoh. 2:1, 2) Chikalap ap anch tukwet ruchingej ra kuya mwiur ap ra kushakam pa divu, muntu ni muntu udia pakach petu ukwet diyingishin diwamp dia kusanger mwaz wa Yesu mudi Chapakach wa manswik masu.
“Mwin Kupesh wa pa Mutu”
15. Mwaz wa Yesu mudi Mwin Kupesh wa pa Mutu ushalijadin nchik ni antu akwau asala mudi in kupesh a pa mutu?
15 Pasak antu avud asala mudi in kupesh a pa muntu, chikalap nchik mwamu mwaz wa Yesu Mwin Kupesh wa pa Mutu chakin kamu udi wa pakampwil. Mutapu ik? Paul urumburil anch: “Ndiy kadingap mudi in kupesh a pa mutu inang ading ni kwel, ching asambish bil kupesh ya yitil yau ayinau, chad lel ya yitil ya awonsu; ndiy wasala yom yawonsu mu kapamp kamwing pipeshay amwinend. Mulong yijil yikat kuyitond antu kwikal in kupesh a pa mutu, antu ading aziyila; pakwez dizu dia manswik, dilondula panyim pa yijil, diamutonda Mwan, ndiy uwanyidina chikupu ni chikupu.”—Heb. 7:27, 28.b
16. Ov, mulong wak chakin kamu chakupesh cha Yesu chadinga cha pakampwil?
16 Yesu wadinga ikundj uwanyidina, muntu wadinga kamu chilik chimwing nenday Adam kurutu muntu winou asala chitil. (1 Kor. 15:45) Pa chinech, Yesu wadinga ndiy muntu umwing kusu ufanyidina kamu kupan chakupesh chiwanyidina—mulad wa chakupesh chimwing chakad kuswiriken kand kuchichirikin kapamp kakwau. Mwishin mwa Chijil cha Moses, adinga ni kupesh ya kupesh pichuku-pichuku. Yakupesh yiney yawonsu ni mijikit yawonsu yadingau ni kusal in kupesh yadinga kwau mwinzwizwimb, wa yom yadinga yifanyidinay Yesu kuwanyish. (Heb. 8:5; 10:1) Chawiy lel, pa usu wach ni kushal kwa chikupu, mujikit wa Yesu mudi Mwin Kupesh wa pa Mutu udi wa pakampwil.
17. Ov, mulong wak tufanyidina kusanger mwaz wa Yesu mudi Mwin Kupesh wa pa Mutu, ni mutapu ik tukutwisha kusal mwamu?
17 Tusotil mijikit ya Yesu mudi Mwin Kupesh wa pa Mutu chakwel atukwasha twikala nich mwikadil utentamina ku mes kwa Nzamb. Mwin Kupesh wa pa Mutu wamushena mudi ik utukweta! Paul wafunda anch: “Kitukwetip mwin kupesh wa pa mutu wakad kutwish kutwovil riy mu kuziy kwa michim yetu; mulong ndiy watondilau kumwoz mu yawonsu mudi mutudia etu, pakwez ndiy kakwetip chitil.” (Heb. 4:15) Chakin kamu, kusanger uyakin winou kutubachikin chakwel tulika ‘kushakam mulong wetwetu ayinetu, pakwez mulong wa muntu watufila.’—2 Kor. 5:14, 15; Luka 9:23.
“Mbut” Yabwakau
18. Uprofet ik walondau kupwa kwa Adam kusal chitil, ni chom ik chezau kujingunish piur pa uprofet winou?
18 Pasak mu Eden, pa chamekana anch antu ashadish kal yom yawonsu—kwikal ishitwila ku mes kwa Nzamb, mwom wa chikupu, musangar, ni Paradis—Yehova Nzamb wabwaka kwez kwa Mupandish. Mupandish winou amwisambina mudi “mbut.” (Dis. 3:15) Mbut yiney yamushena yikala mutu wa mulong wa mauprofet mavud madia mu Bibil mu yirung yivud. Wadinga ufanyidin kwikal mwan wa Abraham, Isak, ni Yakob. Wadinga ufanyidin kand kwikal mu dijuku dia Mwant David.—Dis. 21:12; 22:16-18; 28:14; 2 Sam. 7:12-16, NW.
19, 20. (a) Nany Mbut ya kushilamu? (b) Ov, mulong wak chitwishikin kulond mwi mbut ya kushilamu mudi kand antu akwau kuwejin padiay Yesu?
19 Nany wadinga Mbut ya kushilamu yiney? Chakul cha chipul chinech chidi mu Galatia 3:16. (Tang.) Pakwez, mu shapitre winou kand umwing, kambuy Paul wadandamena kuyilej in Kristu azizidilau many anch: “Anch udiany a Kristu, chawiy lel udiany a mbut ya Aburaham, answan a kushilimu.” (Gal. 3:29) Ov, chitwishikin nchik anch Kristu ikala Mbut ya kushilamu, pamwing kand ni antu akwau?
20 Antu avud alondil anch adi an a Abraham, amwing asadil yom mudi aprofet. Marelijon mamwing makasikeshidin nakash pa kulond anch aprofet au adi an a Abraham. Ov, antu inay awonsu adi Mbut ya kushilamu? Bwat kwau. Mudi mwalonday patok kambuy Paul nich usu wa spiritu, kadiap antu in awonsu adia an a Abraham akutwisha kulond anch adi Mbut ya kushilamu. An a an akwau a Abraham kelap kuyisadil mulong wa kuyiyukish antu awonsu. Mbut ya chiyukish yadinga yifanyidin kusutil kudiay Isak kusu. (Heb. 11:18) Chakin kamu, ching muntu umwing kusu, Yesu Kristu, ulejenau mu Bibil mutapu uvadikinay kudiokal kudiay Abraham, ndiy wa kusambish wa mbut yiney ya kushilamu.c Antu akwau awonsu eza kwikal chikunku cha kaad cha mbut ya Abraham ashikedina ku kwikal mwamu mulong ‘adi a Kristu.’ Inge, mwaz wa Yesu mu kuwanyish uprofet winou udi chakin kamu wa pakampwil.
21. Chom ik chikukwamushena pa kuman mutapu wawanyishay Yesu mwaz wend wa pakampwil mu rutong ra Yehova?
21 Ov, yom ik twileja kal mu kushinshikin kwinoku mu wiswimp mwaz wa pakampwil wa Yesu mu rutong ra Yehova? Kudiosh pamutanginau ni kuya kurutu, Mwan umwing wa Nzamb chakin kamu uding wa pakampwil, wa muchid wend amwinend. Pakwez, Mwan winou wa pakampwil wa Nzamb weza kwikal Yesu usadil nich kwikepish kulondulijan nich rusot ra Tatukwend, kandikal isotinap ntumb yend amwinend. (Yoh. 5:41; 8:50) Chilakej chipandakenamu kujimb kudi etu mudi ik nlel! Chawiy chimwing, tukutwish twitekin rutong ra kusal yawonsu “ku uyaj wa Nzamb.”—1 Kor. 10:31.
[Mazu madia kwishin kwa paj]
a Yijiken yiney yimwing ayifundin nich chijikish cha Grek, chilejena anch chijiken chinech chidi, mudi mwalonday mwin kwilej Bibil umwing anch: “Mwinjil yimwing dilejen anch, ‘mu wend wa pakampwil.’”
b Kukwatijan nich yalonday mwin kwilej Bibil umwing anch, dizu diakarumunau “kapamp kamwing” dirumburil chitong chimwing chijim chidia mu Bibil dilejena “kuwanyin kwawonsu, kwa ukampwil, ap mulong wa rufu ra pakampwil Kristu.”
c Ap anch in Yuda adinga mu mivu chitot ya kusambish C.C. adinga ni kutongin anch awiy, mudi mwadingau an a ku mujimbu a Abraham, akwikal antu itapidilau dilau, adinga awonsu ni kumuchingejin muntu umwing ukwezaku mudi Mesia, ap anch Kristu.—Yoh. 1:25; 7:41, 42; 8:39-41.
Ov, Uvurikin?
• Chom ik wileja kal piur pa mwaz wa pakampwil wa Yesu kusutil ku yijiken yend? (Tal mushet.)
• Ov, mutapu ik ukutwisha kwimburij chilakej cha Mwan umwing wa Yehova?
[Kamushet/Chipich chidia pa paj wa 15]
Majin Mamwing ma Mudimu Malejana Mwaz wa Pakampwil wa Yesu mu Rutong ra Nzamb
◼ Mwan Umwing wa Nzamb. (Yoh. 1:3) Yesu ndiy umwing watangau kamwing ni kamwing kudiay Tatukwend.
◼ Dizu. (Yoh. 1:14) Yehova ukat kumusadil Mwanend mudi Katum mulong wa kuyilej yitang yikwau jinsangu ni malejan.
◼ Amen. (Kubur. 3:14) Yesu wasutisha pa divu mwom wakad chitil, pamwing nich rufu rend ra kwipan, kwakasikesha ni kwatwishisha kuwanyin kwa yakushilamu ya Yehova Nzamb.
◼ Chapakach cha Manswik Masu. (1 Tim. 2:5, 6) Mudi Chapakach ukweta mbil, Yesu watwishisha kuvadik kwa muchid usu, “Isarel wa Nzamb,” mudia in Kristu akeza kwikal “in kupesh a Mwant” a mwiur.—Gal. 6:16; 1 Pita 2:9.
◼ Mwin Kupesh wa pa Mutu. (Heb. 7:27, 28) Yesu wadinga ndiy muntu umwing kusu wadinga ufanyidina kupan chakupesh chiwanyidina, chakad kuswiriken kuchipeshiril kand. Ndiy ukutwish watutokish ku yitil yetu ni kutudiosh ku yibudikin ya rufu ya chitil.
◼ Mbut ya Kushilamu. (Dis. 3:15) Ching muntu umwing kusu, Yesu Kristu, ndiy chikunku cha kusambish cha mbut yiney ya kushilamu. Antu akwau awonsu eza kwikal chikunku cha kaad cha mbut ya Abraham ‘adi a Kristu.’—Gal. 3:29.