Ov Tukwet Komand wa Chisu Chawonsu?

¹ Ov kand kal chitushikenap kwikal ku chikumangan cha kulejan ni kujingunin anch tukwetap mamagazin mu sakosh wetu? Chawiy lel, ov mutapu ik tukutwisha kwipuk chinech ni kushiken kusadil mutapu uwamp mamagazin metu? Atuyudil kwikal ni komand ufanyidina wa mamagazin. Tutulany komand ufanyina kud mukadivar utadila mamagazin chakwel kutambul uvud kanang wa nimero ni nimero. Mwi njil yiney, dijuku dietu ni ayinetu tukwikal ni mamagazin mafanyidina.

² Ov mulong wak tukutwishap kusal komand wa chisu chawonsu wa mamagazin? Mwi njil yiney tukwiyov anch tukwet chisend cha kupan rubing ni rubing mamagazin ni chinech chikutuletin musangar ujim. Anch tukwet kal komand wa chisu chawonsu, tutalany anch komand winou uwanyidin mulong wa mamagazin ma kusadil ngond umwing mu chingand. Mwaning, chitufanyidin kwikal in kashinsh ni kuya ni kusend komand wetu rubing ni rubing. Tufanyidin kuchiman mud mbil. Anch tukwikalap mu chikumangen chisu chimwing chilemp, tumwijikishany mukadivar utadila mamagazin anch ufanyidin kumapan kud muntu mukwau djat kamu ni pitukuchirikina.

³ Tukutwish kand kwitinaku dichuku mulong wa mamagazin. Ov tukwatikeshining dichuku dia mamagazin dirijekinau rubing ni rubing? Mud chilejenau pa kalandrie wa Atuman’a Yehova wa 1999, dichuku dined diding dimwing Diampos ni Diampos! Kangal twapipej usey wa kwangan Tour de Garde ni Réveillez-vous! Mulong pitusadila usu wa kwinungin mu mujikit wa kwangan mamagazin, “tukat kulet rusangu ruwamp ra chom chimwing chipandikena kuwap” kud antunetu.​—⁠Is. 52:​7, NW.