“Chom ik Nifanyidina Kusal?”

¹ Mud nsand uchipamina chakwel kushiken ku ukurump, ukutwish kwiyipul anch: ‘Chom ik nifanyidina kusal nich mwom wam?’ Ansand in Kristu asotining kutanduril mudimu wau umusadidinau Yehova. Pakwez mutapu ik ukutwisha kuchisal oku ukwet yisend ya ukurump, chawiy kulond kudimukin nswir jey ja mujimbu? Chiswapelap kuman chakul bwat.

² Amwing pakach pen akat kwinan patadilingau mwikadil wa mutapu wa kuman nfalang ni milong ya machuku ma kurutu, ni kakwetap chiyul bwat. Ov afanyidin kudandamen kwilej nakash ap kusal kapamp kamwing mudimu wa chisu chawonsu? Chakwel kukwat chiyul chiwamp, nsand ufanyidin kwakul nich kashinsh ku chipul chikwau anch: ‘Ov chom ik nikatininga nakash mu mwom?’ Chawiy kulond anch ufanyidin kushinshikin yitongijok yey.

³ Ov chitongijok ik chijim wadinga nich mu usand wey? Ov utongidin bil mwikadil wey wa mutapu wa kuman nfalang, ap usotin chakin kutul mwom wey mulong wa kukwatikesh yisakin ya Want? Diplom dia iniversite yidap nfungul ya kwandam pa mudimu. Chawiy lel chatondinau amwing maukaliweny makimbinau ku midimu kusutin kwilej midimu ya makas, kulondul mafundish ku shikol yimwing ya mudimu, ap mafundish ma shikol ya mivu yikemp, yakad kuyit chisu chivud ni kwipaniku.

⁴ Chingejin Dizu dia Yehova: Kangal wavuramen chom chinech chipandikena kujimb: Yehova Nzamb utulejin anch ukupan ukwash kud antu atekina yisakin ya Want pa ndond ya kusambish mu mwom wau. (Mat. 6:33) Kwinoku kudap kushilamu kwamwamu. Akadivar avud ilejina Shikol ya Mafundish ma Mudimu, atambula madiplom ma ku iniversite kurutu kwa kwilej uyakin. Pakwez mudimu ik usadilau? Akemp kusu awiy alondwila mudimu wilejau. Avud asadiling mudimu wa kutenchik, kurijek ap kusal midimu yikwau, chom chiyitwishishina kudimukin nswir jau ja mujimbu, oku adi ayibol. Chitandurilau mujikit wau, akat kutambul yiyukish yipandikena kulemp chisakin kanang cha nfalang.

⁵ Pakushika chisu cha kukwat chiyul piur pa yiufanyidina kusal anch wapwish shikol, chikufanyidin kutal nawamp milong yawonsu ni kushinshikin nakash yitongijok yey. Anch usotin kwikal ni chitongijok chimwing chisikena piur pa kutond kwey, tang Réveillez-vous! wa Rish 1998, paj 19-21. Isamba ni anvajey, amakurump, kalam’a sirkwit wen, ni ayibol asadila mudimu nawamp ndond yiushicha. Chinech chikez kakukwash kukwat chiyul cha manangu piur pa yiufanyidina kusal nich mwom wey.​—⁠Mul. 12:​1, 13, NW.