Mutapu Ukutwisha Yidi ya Dijuku Kusadil Pamwing—Mu Chingand
1 Chom ik chisangarishina nakash pa kuman amakundj ni akajau, anvaj ni aanau, pamwing mu mudimu wa Ukristu, end ashiman patok dijin dia Yehova? (Kus. 148:12, 13) Majuku mawonsu mafanyidin kwikal ni program umwing muwamp wa kubudikin mu chingand pakad kujing. Ov dijuku dien ditekinap kal dichuku dimwing ku rubing mulong wa kubudikin mu chingand? Anch mwawiy, komb lel muntu ni muntu wij nawamp yifanyidinay kurijek chakwel kwinunginiku sens.—Jnsw. 21:5a.
2 Kurutu kamu kwa dichuku dined, ov mulong wak ukutwishanyap kurijek milad ya kupan uman mu dijuku? Chakin anch milad yiney yidi ya ukwash, pakwez yisu yiney ya kwirijek yivuvurishining spiritu wa kashinsh wa dijuku wa kusadil pamwing. Mudimu wa chingand udia wa antu awonsu ni wirijekidinay nawamp muntu ni muntu upanining musangar ujim.
3 Kalam umwing mwin kwendangan wabachikija dijuku dia kabuj mu mujikit wa kwangan mamagazin. Padingay ni kulejan ku chikumbu ni chikumbu ni umwing wa aan amband, ndiy wamwipula anch: “Ov tukushal ney pamwing asaa inch?” Chad lel warumburila anch wela kuya kulejan pamwing ni tatukwend anch apwish. Chading patok anch ndiy ni tatukwend asangeranga chakin kulejan pamwing. Winou udi spiritu wa dijuku muwamp mud ik!
4 Yidi ya majuku mamwing, chitwishikin yikala mu chilik cha kwikal ayibol ankwash pamwing mu chirung cha ngond umwing ku muvu. Ap kand, chitwishikin muntu umwing ap avud pakach pau ikala chibol nkwash wa chisu chawonsu ap kusambish mudimu wa chibol wa rawonsu. Nich kwirijek kuwamp ni kusadil pamwing, chitwishikin awonsu akutwish kuwejin kwinungin kwau mu mudimu nich kukwatikesh umwing wa pakach pau udia chibol. Mujikit winou ujim ni milong yiwamp yabudikidina mu chingand yikuletil chakin dijuku diawonsu yiyukish.—Mal. 3:10, NW.
5 Majuku mudia yidi ya dijuku yisadila yawonsu yikutwishau mu mudimu wa kulejan makat kukasikesh kunungijan kwau, makweting mushiku, mabuj, ni musangar mu mudimu wa Yehova!—Tal Filipoi 2:1, 2.