Anvaj—dikez Ik Uyisotidinany Anen?

“Ansangarum nau ayangadim . . . Ashimana dijin dia [Yehova].”—Kuseng 148:12, 13.

1. Yom ik yikatau kubangin anvaj mulong wa anau?

ANVAJ ik akad kubangin nakash piur pa machuku ma kurutu ma anau? Kudiosh kamu pakatay kuvadikin mwan—ap kurutu kwa kuvadik—anvaj akat kusambish kwiyakamish piur pa ukash wend. Ov, ukwikal mukash? Ov, ukupam nawamp? Chisu chipaminay mwan, kuding kand yakamish yikwau. Mu kulond kwa kapamp kamwing, anvaj asotining ching kusu yom yiwamp mulong wa anau.—1 Samwel 1:11, 27, 28; Kuseng 127:3-5.

2. Ov, mulong wak usotiningau anvaj avud anch anau eza asangera mwom uwamp pakupamau?

² Pakwez, mu mangand ma katat, chiyikasikedin anvaj kuyinkish anau yom yiwamp. Anvaj avud asuta kal mu yisu yikash—jinjit, kanvundangesh ka chipolitik, mar ma kuman nfalang, yakamish ya ku mujimbu ap ya mu manangu, ni yom yikwau kand. Chakin kamu, asotining anch anau kangal niyawiy eza asuta mu yom mud yiney. Mu jingand ja mapit, anvaj akutwish kuyiman ansangarum ni ayangadim a arund nau ap a anamakwau ayil kurutu mu midimu ya ku mujimbu ni kusanger chimekena kwikal mwom uwamp. Chawiy, akutwish kwiyov mud abachikinau kusal yawonsu yikutwishau chakwel anch anau niyawiy eza atwisha kusanger ngikadil yiwamp ni mwom ukweta diking—mwom usangareshina—pakupamau.—Mulej 3:13.

Kutond Mwom Uwamp

3. Kutond ik kwatondau kal in Kristu?

³ Mud in kwilej a Yesu Kristu, in Kristu atonda kal kupan mwom wau kud Yehova. Alama kal mu michim mazu ma Yesu: “Anch muntu wel anch alondul panyim pam, ilika bil amwinend, asendang [mutond wend ma mar] pichuku pichuku, ni kwinlondul am.” (Luka 9:23; 14:27) Chakin kamu, mwom wa mwin Kristu witining kwipan. Pakwez, udiap mwom wa uzweny ni mar. Chinyim ni chinech, udi mwom wa mazang ni usangareshina—mwom uwamp—mulong witin kupan, ni mud mwalonday Yesu, “chiyukish chijim kudi mwin kupan chamupandakan mwin kutambul.”—Midimu 20:35.

4. Yesu wayikasikesha in kwilejend kukimb ik?

⁴ Pa machuku ma Yesu antu adinga mu mikadil yikash. Kuwejin pa kukimbijol kwa mwom, chayitanga kujijaman ku umutakel wa mar wa in Rom ni mar makash madingau ni kuyimesh kud in kufa mu kan anch adi in kwifukwil a pa chirung chinicha. (Mateu 23:2-4) Chikalap nchik mwamu, antu avud atesha piur pa Yesu asangera kutek kuns yisakin yau ayinau—ap midimu ya rawonsu—ni kwikal in kwilejend. (Mateu 4:18-22; 9:9; Kolosay 4:14) Ov, in kwilej inay iteka mu chak ni kutek dikez diau mu ubaj? Tal mazu ma Yesu: “Ni awonsu ashila kal yikumbu yau, ap anamakwau amakundj, ap anamakwau amband, ap tatuku, ap maku, ap an, ap ngand, mulong wa dijin diam, akez katambul yanzukesh chitot, akez kaswan kupand kwa chikupu.” (Mateu 19:29) Yesu wayinkisha in kwilejend kashinsh anch Tatuku wa mwiur wij maswir mau. Chawiy chayikasikeshay anch: “Pakwez sambilany bil kusurib want wend ni kutentam kwend, chawiy lel yom yawonsu akez kananzukeshilip.”—Mateu 6:31-33.

5. Ov, mutapu ik ukatau kutong anvaj amwing piur pa kashinsh ka Yesu anch Nzamb ukez kuyibangin atushalapol end?

⁵ Mwikadil udi chilik chimwing kand ilel. Yehova wij maswir metu, ni antu atekina yisakin ya Want pa ndond ya kusambish mu mwom wau, pakampwil antu asadila mudimu wa chisu chawonsu, akwet kashinsh mud kinak anch ukez kuyibangin. (Malakiy 3:6, 16; 1 Pita 5:7) Pakwez, anvaj amwing, akweting michim yaad pa mulong winou. Ku mutambu umwing, asotil kuyiman anau aya kurutu mu mudimu wa Yehova, pamwing ap kushiken ku kusambish mudimu wa chisu chawonsu. Ku mutambu ukwau, anch ashinshikin mwikadil wa kuman nfalang ni mudimu mu mangand m’ilel, akat kutong anch chidi cha usey anch ansand ileja bil shikol nawamp chakwel eza ikala awanyishinau nawamp mulong wa mudimu usangareshina ap kutwish kutan chom kanang cha kuchingejin anch chiswiridikin. Chisu chivud, anvaj mud inay, atongining anch chidi cha usey kud anau kwilej iniversite.

Kwirijek Mulong wa Machuku ma Kurutu

6. Mutapu ik usadidilau dizu “iniversite” mu rusangu riner?

⁶ Ditenchik dia kwilej shikol dishalijadin mwi ngand yimwing ni yikwau. Chilakej, mu États-Unis, mashikol ma antu awonsu mading ma mivu 12 ya kwilej yom ya pa dishin. Kupwa, ansand a shikol akutwish kutond kuya ku iniversite ap ku kolej chakwel kwilej mivu yinying ap yivud, mulong wa kutambul diplom dia mivu yinying dia iniversite, diplom dia kolej ap dia shikol ya mudimu wa makas ap kuwejinaku iniversite mulong wa kusal mudimu wa chimwingang (udokiter), ukalansambu, winswil (ingénieur), ni yikwau-yikwau. Kwilej mud kwinoku kwa iniversite kwawiy kurumburilau nich dizu “iniversite” disadidilau mu rusangu riner. Ku mutambu ukwau, kudi mashikol ma winchij ni ma diyiy dia ukaliweny, makata kupan malejan makemp chakwel kutambul sertifika ap diplom dia winsak ap mudimu.

7. Mpwich ik jirishinau nich ansand adia ku mashikol ma sekonder?

⁷ Rutong ra katat ra mashikol ma sekonder ridi ra kuyitenchik ansand mulong wa kuya ku iniversite. Chakwel kushiken rutong riner, mashikol mavud ma sekonder masidin pa milong yitina kusadil manangu, yikata kuyikwash ansand kukwat mapweng mawamp ku kusopiwu kurutu kwa kwandam ku iniversite, pa ndond pa kwasin pa malejan makeza kuyiwanyish nawamp ansand kuman midimu. Ilel ansand adia ku shikol ya sekonder akat kuyishindin nakash kud alej au, in kuyiyul, ni kud ambay nau ansand a shikol mulong wa kwandam ku mainiversite mawamp, kukezau chakin kamu kutambwil madiplom makutwisha kuyanzuril yis ya kuman midimu yiwamp ni kuyifutinau nawamp.

8. Kutond ik kurishinau nich anvaj in Kristu?

⁸ Chom ik lel, chifanyidinau kusal anvaj in Kristu? Chakin kamu, asotil anch anau ayinga mu shikol ni ileja ukaliweny wa usey mulong wa kwez kwichidij ku machuku madia kurutu. (Jinswir 22:29) Ov, chiyifanyidin kwau kuyilikil kusu anau kwikal abachikinau nich spiritu wa kufil kuya kurutu mu yom ya ku mujimbu ni kupandakan? Ntong ik jiyikasikeshinau anau kwikal nich, chikala kusutil ku kulond ap ku chilakej chau ayinau? Anvaj amwing asadining mudimu ukash ni kuruzuk nfalang jivud chakwel atwisha kuyitum anau ku iniversite pichikushikena chisu. Akwau niyawiy akat kwiyandjik mu mabaz pa mulong winou. Pakwez, usey wa mupak winou, chitwishikinap kuwisikesh nich usey wa uvud wa nfalang jiyilaku. Ov, wisu usey wa kulondul shikol ya piur nakash?—Luka 14:28-33.

Usey wa Kulondul Shikol ya Iniversite

9. Chom ik tukutwisha kulond piur pa kufutin iniversite ilel?

⁹ Anch twatongin pa usey, tukat kutongin chisu chawonsu uvud wa nfalang ja kusadil. Mu jingand jimwing, guvernema ndiy ukata kuyifutin ansand iniversite ni ansand awanyishina yitinau kakatap kufut nfalang ja shikol. Pakwez, mu jindond jivud, iniversite witin nfalang jivud ni jikat kwiwejinaku nakash. Rusangu rimwing ra New York Times Op-Ed rilondil anch: “Iniversite amumening mud chom chimwing chikata kufungul njil. Katat umekeshin ruwengil ridia pakach pa ampich ni atuzweny.” Mu kulond kukwau, iniversite wikadil kal wa ampich ni antu a katumb, akat kuyitwalaku anau chakwel niyawiy ikal ampich ni antu a katumb mu mangand minam. Ov, anvaj in Kristu afanyidin kuyitondil anau rutong mud riner?—Filip 3:7, 8; Jakobu 4:4.

10. Mutapu ik wambateshinau iniversite nich kuya kurutu kwa ditenchik dia katat?

¹⁰ Ap ndond kukatau kwilej pakad kufut ku iniversite, kukutwish kwikal kand yom yikwau yakad kusangaresh. Chilakej, The Wall Street Journal ulondil anch mwi ngand yimwing yidia Kwinkaj ni Kwingangel ya Aziy, guvernema wasala “ditenchik dia shikol ya mulad wa Piramid uyitwadila ansand a shikol akweta manangu nakash pa musong.” Chakin kamu “musong” winou urumburikin kwikal nich ndond mu mainiversite majim ma mu mangand —Oxford ni Cambridge mu Angleterre, mainiversite majim ma mu États-Unis, ni mu jingand jikwau. Ov, mulong wak guvernema utenchikin program winou mulemp? Rapor ulondil anch chiding mulong wa, “kutwal kurutu ekonomi wa ngand.” Iniversite ukutwish kamu kwikal wakad kufut, pakwez usey ufutinau ansand a shikol udi mwom wa kwiyandjik jimu mu ditenchik dia yom dia katat. Ap anch mulad winou wa mwom aulondwil kamu nakash mu mangand, ov, chawiy chiyisotidinau anvaj in Kristu anau?—Yohan 15:19; 1 Yohan 2:15-17.

11. Marapor malondil nchik piur pa kusadil kuyimp kwa maar ni masandj mukach mwa ansand a shikol ya iniversite?

¹¹ Chom chikwau chifanyidina kushinshikin udi mwikadil wa ndond yishichau. Yikumbu ya kushakam ya iniversite ni kolej yijiken nakash mulong wa yaku yiyimp—kuna mwon ya kulewish (mud damb) ni maar, masandj, wij, kuyizengol ansand asu, ni yom yikwau yivud. Tushinshikinap bil kusadil kuyimp kwa maar. Chisambidinay kuna kwa kusutish chipim, charumburik, kuna pakad kupep pa chopu nich rutong ra kulewu, gazet New Scientist ulondil anch: “Piswimp antu 44 pa chitot [ansand a ku iniversite mu États-Unis] anining pakad kupep pa chopu piswimp kapamp kamwing mwi mbing jaad.” Mulong wawiy umwing upalangen pakach pa ansand mu Australie, mu Angleterre, mu Russie, ni ndond jikwau. Piur pa masandj, rapor wa Newsweek ulejen anch minsamb ya ansand ilel yiding ching piur pa “kulalijan ap kapamp kamwing kusu, kurumburil kusankanijan kwa amakundj ni amband—kudiosh ku kususujan djat kamu ku kulalijan—pakach pa antu ijikishadina akad ap kwikal nich chitongijok cha kwisamb kand anch apwish.” Yikimbijol yilejen anch ansand a shikol 60 kushik ku 80 pa chitot asadil kal yom ya mulad winou. Mband umwing mwin kukimbijol ulondil anch: “Anch udi nsand a shikol uwanyidina, mwamu ukata kusal.”—1 Korint 5:11; 6:9, 10.

12. Yishindin ik yikatau kurish nich ansand ku shikol?

¹² Kuwejin pa murumbul uyimp, kudi kushindin mulong wa mudimu wa shikol ni kusopiwu. Chakin kamu, ansand a shikol afanyidin kwilej ni kusal mudimu wa shikol uyinkishinau wa kusadil ku chikumbu chakwel kuying ku kusopiwu. Amwing akutwish kand kuswiriken kwikal nich chisu cha kusal mudimu wa ku mujimbu wa chisu chikemp pa chirung chiyilau ku shikol. Yawonsu yiney yiyisendining chisu chijim ni usu. Chawiy lel, chisu ik ni usu ik yikushalaku kand mulong wa mijikit ya muspiritu? Anch kushindin kwiwejinaku, chom ik chikudiburilau? Ov, yisakin ya Want yikwikal kand pa ndond ya kusambish, ap akuyitek kuns? (Mateu 6:33) Bibil uyikasikeshin in Kristu anch: “Babalany mudi muukata kwendany, kangal wendany mudi antu akad kubabal, pakwez ching mudi ababela; lamany chisu cha muten, mulong machuku mayimp madi kwaku.” (Efes 5:15, 16) Chidi cha ushon mud ik anch amwing alika ritiy awil mu yakamish ya pa chisu chau ni usu wau ap kuwil mu mupit wa mwikadil wakad kwambatan nich Bibil ku shikol!

13. Yipul ik yifanyidinau kushinshikin anvaj in Kristu?

¹³ Chakin, masandj, yaku yiyimp, ni yishindin yidiap kusu ching ku kolej ap ku iniversite. Pakwez, ansand avud mu mangand amen yom yiney mud chikunku cha mafundish, ni akat kuman yom yiney mud yifanyidina ni yitiyikina mu mwom. Ov, anvaj in Kristu akutwish kwau kuyitek cha kwikatin anau ku murumbul mud winou mu mivu yinying ap yivud? (Jinswir 22:3; 2 Timote 2:22) Ov, yisakin yikutwishau kutaninamu ansand yipandikenamu chakwel kupipej chak chikutwishau kutan? Ni chipandikenamu usey, yom ik yilejinau ansand piur pa yom yifanyidina kwikal pa ndond ya kusambish mu mwom wau?a (Filip 1:10; 1 Tesalonik 5:21) Anvaj afanyidin kuta muchim nakash ni kushinshikin mu malembil yipul yiney, pamwing ni ubaj wa kuyitum anau chakwel akilejina shikol mu musumb ukwau ap mwi ngand yikwau.

Yom ik Yifanyidina Kusal pa Ndond ya Iniversite?

14, 15. (a) Chikalap nchik chitongijok cha antu avud, chiyul ik cha Bibil chisadila ilel? (b) Yipul ik yikutwishau kwiyipul ansand?

¹⁴ Ilel, chitongijok cha antu avud chidi anch, chakwel ansand atwisha, chiyifanyidin ching kwikal nich diyiy dia iniversite. Pakwez, pa ndond pa kulondul chitongijok cha antu avud, in Kristu ateshin chiyul cha Bibil: “Kangal wilikejany mu chaku cha mangand minam, pakwez karumukany ku manangu masu, chakwel en wijikangany yiwapila ni yirijekina ni yiwanyidina ku rusot ra Nzamb.” (Rom 12:2) Risu rusot ra Nzamb mulong wa antwend, ansand ni amapal, mu chirung chinech cha nsudiel? Paul wamukasikesha Timote anch: “Pakwez ey ilama mu yom yawonsu, man kwey mar, sal mudimu wa kupalangesh dizu, wanyish mudimu wey.” Chakin kamu mazu minam masadil kud etu awonsu ilel.—2 Timote 4:5.

¹⁵ Pa ndond pa kukwachik nich spiritu wa mangand wa rukat ra mapit, etu awonsu tuswiridin ‘kwilam’—kwasin pa yom yetu ya muspiritu. Anch udi nsand, iyipula anch: ‘Ov, nikat kusal usu wam wawonsu chakwel “niwanyish mudimu wam,” kwiwanyish amwinam kwikal kashalapol wa Dizu dia Nzamb? Jisu ntong jam mulong wa kudandamen ‘kuwanyish’ mudimu wam? Ov, nashinshikidinap kal kusal mudimu wa chisu chawonsu wikal mudimu wa mwom wam?’ Yipul yiney yidi yikash, pakampwil anch uyimen ansand akwau ipanin mu kukimb yom ya ku mujimbu, “kukimb yom yijim-yijim” yitongijokidinau anch yikez kushikij ku mwom wa kurutu usangareshina. (Jeremiy 45:5, NW) Chawiy lel, anvaj in Kristu, nich manangu akat kuyirijekin anau kudiosh kamu mu wanikanch wau mwikadil uwamp wa muspiritu ni diyiy diwamp.—Jinswir 22:6; Mulej 12:1; 2 Timote 3:14, 15.

16. Mutapu ik ukutwishau anvaj in Kristu nich manangu kuyitenchikin anau mwikadil uwamp wa muspiritu?

¹⁶ “Maku wadinga ni kushinshikin urund wetu piswimp nakash,” mwamu muvurikinay kabuzivumu wa ansand asatu a dijuku dimwing mwadinga maku kashalapol wa chisu chawonsu mu mivu yivud. “Twatap urund nau ambay netu a shikol pakwez ching nau antu adia mu chikumangen adinga nich yaku yiwamp ya muspiritu. Wadinga kand ni kuyiladikij chisu ni chisu antu adinga mu mudimu wa chisu chawonsu—amishoner, atulam in kwendangan, in kusal mudimu wa Betel, ni ayibol—kwol kwetu mulong wa kusanger pamwing. Kutesh uman wau ni kuman musangar wau kwakwasha kukun mu michim yetu impu ya mudimu wa chisu chawonsu.” Chidi cha musangar mud ik ilel unou pa kuyiman an amakundj awonsu asatu mu mudimu wa chisu chawonsu—umwing usadidil ku Betel, mukwau wayil ku Shikol ya Diyiy dia Mudimu, ni umwing udi chibol!

17. Umutakel ik ukutwishau anvaj kuyinkish ansand mu kutond kwau milad ya shikol ni midimu ya makas? (Tal mushet udia pa paj wa 31.)

¹⁷ Kuwejin pa kutenchik mwikadil ukash wa muspiritu, anvaj afanyidin kand kuyinkish anau, kudiosh kamu pa wanikanch, umutakel ufanyidina mulong wa kutond mulad wa shikol ni mudimu wa makas. Nsand mukwau, usadidila katat ku Betel, ulondil anch: “Anvajam awonsu asala mudimu wa uchibol kurutu ni kwinyim kwa kwatijan ni asala usu wau wawonsu chakwel kuswanish spiritu wa uchibol ku dijuku diawonsu. Pitwadinga ni kutond ya kusal ku shikol ap kukwat mipak yikeza kwikal nich usu pa machuku metu ma kurutu, awiy adinga ni kutukasikesh chisu chin chawonsu kutond, kutond kukeza kututwishish kwitekin chisu cha kusal mudimu ni kusal uchibol.” Pa ndond pa kutond milad ya shikol yitwadila ching ku iniversite, anvaj ni an aswiridin kutongijokin nakash piur pa malejan madia ma ukwash mu kulondul mudimu wa chisu chawonsu.b

18. Midimu ya mitapu ik yifanyidinau ansand kushinshikin?

¹⁸ Yikimbijol yilejen anch mu jingand jivud, mudi maswir nakash, kimadiap ma antu atambwila kal madiplom ma iniversite, pakwez ma antu akutwisha kusal midimu ya makas. USA Today ulejen anch “antu 70 pa chitot akusala mudimu mu makum ma mivu yezina kurutu oku kakezap kuswiriken kand kwikal nich diplom dia mivu yinying ya kolej, pakwez, akez kuswiriken kusu kuwanyish mivu yaad ya kolej ap mulad kanang wa kutambul sertifika wa winchij.” Yitenchik yiney yivud yikat kupan malejan makemp mu winkaliweny wa kusadil mu biro, kurijek motak, kurijek ordinater, kurijek ampomp a mem, kukil ni kukas nswich, ni midimu yikwau yivud ya makas. Ov, midimu yiney yisangareshin? Inge! Pamwing ap yidingap yisangareshina mud mukutwishau kuyitongin kud antu amwing, pakwez yikat kulet yom yiswiridikina ni kuyitwishish antu ipanina chakin kamu mu mudimu wa Yehova.—2 Tesalonik 3:8.

19. Yisu njil ya kashinsh ya mwom wa musangar ni mazang?

¹⁹ Bibil ukasikeshin anch: “Ansangarum nau ayangadim, ashimana dijin dia [Yehova] mulong dijin diend kusu dizambwila; uyaj wend udi piur pa diur.” (Kuseng 148:12, 13) Kwisikesh nich jindond ni mapit maletina mangand, kumusadil Yehova mudimu wa chisu chawonsu yidi chakin kamu njil ya mwom wa musangar ni mazang. Lamany mu muchim chiyul cha Bibil chilondila anch: “Chiyukish cha [Yehova] chawiy chikata kulet dipit, ni Ndiy kakuwejangikup ushon.”—Jinswir 10:22.

[Mazu madia kwishin kwa paj]

Ov, Ukutwish Kurumburil?

• Pisu patekinau in Kristu ruchingej rau mulong wa machuku ma kurutu?

• Yikokujol ik yirishinau nich anvaj in Kristu piur pa machuku ma kurutu ma anau?

• Chom ik chifanyidina kushinshikin pituchindina usey wa kwilej ku iniversite?

• Ov, mutapu ik ukutwishau anvaj kuyikwash anau kusal mudimu wa chisu chawonsu mu mudimu wa Yehova?

[Kamushet kadia pa paj wa 29]

Kwilej ku Iniversite Kukwet Usey Ik?

Antu avud adia ku iniversite achingejidin kwilej mu chilik cha piur chikeza kuyanzuril yis ya kuzembul difut diwamp ni diking. Pakwez, marapor ma guvernema malejen anch ching kusu antu 25 pa chitot pakach pa antu akata kuya ku kolej awiy akata kutambul diplom mu mivu musamban—chidi chibudikin cha ushon. Ap mwamu, ov, diplom dined diayishikijin ku kwikal nich mudimu uwamp? Tal yilondila yikimbijol ni malejan ma katat.

“Kuya ku iniversite wa Harvard ap wa Duke, kukatap kulet kapamp kamwing mudimu uwamp ni kuzembul difut dijim. . . . Yapu yijap yivud piur pa ansand asotila kusal mudimu. Diplom dia ku iniversite mujim dikutwish kupwit manangu ma antu avud. Pakwez, yikutwishau antu kusal ap kukangany yawiy yikweta usey ujim.”—Newsweek, Kalang 1, 1999.

“Ap anch ilel mudimu kanang witin ukaliweny wa piur nakash kupandakan muchadinga ku mivu ya kwinyim . . . , ukaliweny witinau mulong wa midimu yiney udi ukaliweny utambwilau ku shikol ya piur nakash—kapampish, kutang, ni kufund kwa chilik cha mivu chidivu ya shikol . . . , udiap ukaliweny ukutwishau kutambul ku kolej. . . . Ansand a shikol kaswiridinap kuya ku kolej chakwel kutan mudimu uwamp, pakwez aswiridin kwak ukaliweny wa shikol ya piur nakash.”—American Educator, wa pa Musaj a nvul 2004.

“Makolej mavud kimijap kwau chakin kamu chidia mangand chakwel kuyitenchik nawamp ansand a shikol ikal in kusal mudimu anch apwish shikol yau. Mashikol ma midimu ya makas . . . mayil ni kuvulijan. Kuvulijan kwa mashikol minam kwashikin pa mashikol 48 pa chitot kudiosh muvu wa 1996 djat mu muvu wa 2000. . . . Pa chisu chawiy chimwing, kufutin nfalang jivud, mulong wa kutambul madiplom ma kolej mitina kusutish chisu chivud kwikadil kal kwakad usey kupandakanamu muchadinanga pakur.”—Time, Chiwong 24, 2005.

“Kwisikesh kwa yisend ya machuku ma kurutu kwa departema wa mudimu wa mu États-Unis mulong wa muvu wawonsu wa 2005 kulejen mwikadil unenganeshina anch piswimp muntu umwing pa antu asatu mu mivu yawonsu yinying ukweta diplom dia kolej, kakezap kutan mudimu uwanyidina nich yilik ya madiplom mau.”—The Futurist, Kafunfut/Kafumpul 2000.

Pa kuman yom yiney yawonsu, in kupan yiyul avud akat kwidjidjek nakash ilel unou pa usey wa kwilej ku iniversite. “Tukat kuyiyiy antu mulong wa machuku ma kurutu mayimp,” mwamu mwinaninau mu rapor wa Futurist. Pakwez, shinshikin yilondilay Bibil piur pa Nzamb: “Yam [Yehova] Nzamb wen, nikata kukukwashany, ni kukulejany njil yiufanyidinanya kuya. ‘Anch en wadiany ni kutesh malejan mam, ing yiyukish yam yelang kwikal kudi en mudi wit wakad kuumang mem! Kupandakan [chisambu, NW] kwelang kwikal kudi en mudi mambek makata kwezang ku chikum cha karung.’”—Isay 48:17, 18.

[Chipich chidia pa paj wa 28]

Ateka kuns kulondul yisakin yau ni amulondula Yesu