Mangand Makad Kutentam

OV, WITIYIJIN anch tushich mu mangand makad kutentam? Chakin anch witiyijin. Uyakin udi anch, wikalap nchik ukaliweny wetu ap manangu metu tusadidila chakwel kutenchik mwom wetu, tukwetap kashinsh anch tukwikal ni dipit, kupandakan ap yakudia. Yisu yivud chikat kushiken mud mwalonday Mwant Salomon anch: “In chiyul akat kuburen yakudia, ni in manangu akat kuburen dipit, ni antu ija midimu nakash akat kukangany.” Ov, mulong wak? Salomon udandamedin kulond anch, chidi mulong, “chisu cha mar chikat kushik kudi antu awonsu.”—Mulej 9:11.

‘Piyikata Kushiken Yisu ya Mar kwa Kukashimuk’

Mwaning “chisu cha mar,” chikata kurumburik yisu yivud kwikal pa ndond yiyimp pa chisu chiyimp, yisu yivud chikat kushesh yitenchik yetu yiwamp ni ruchingej retu ripandakena kuwap. Kwambatan nend Salomon, tudi ‘mud ansh afila mu wand, mud kajil ukwatinau mu mupit, . . . pakata kwandam muntu mu mar pa chisu chiyimp anch milong ya kukashimuk yashiken.’ (Mulej 9:12) Chilakej, mamiliyon ma antu, adimina pakad kupim mulong wa kudish majuku mau, akat kukwachik kwa kukashimuk mu “chisu cha mar” anch ruval waburen kunak ni anch chang chashesh mbut jau.

Akwau akat kupakish kukwash, pakwez ap ukwash upanina chisak cha mangand mawonsu kud antu akwachikina nich “chisu cha mar,” chisu ni chisu ukwash winou umekening kwikal wakad kutentam. Chilakej, mu kurish nich kamungun, mu muvu umwing wa piswimp ap, dirijek dimwing dikata kupan ukwash dijikena nakash dialejen anch: “Ngand yawonsu [ya Afrik] yatambula mud ukwash, chikunku chimwing pa yitan cha uvud wa nfalang japanau mulong wa njit ja ku Golfe.” Ov, chadinga chitentamina anch jingand jikweta mapit mavud jipana tupamp tutan nfalang jivud mwamu mulong wa kurish njit mwi ngand yimwing kusu pa ndond pa kujipan mulong wa kukepish kusansan ni mar ma kamungun mwi ngand yawonsu ya kabuj? Ov, chitentamin anch mu chisu chipitinau antu avud, muntu 1 pa antu 4 ashicha pa divu uchidi ni katat mu uzwendj umwing ukash ap kuman mamiliyon ma an afil muvu ni muvu nich mayej makutwishau kwok? Bwat kwau!

Mwawiy, kudi yivud kupandakanamu kusu ‘chisu chakad kuchingejin’ yisadila anch ‘kushikena yisu ya mar kwa kukashimuk.’ Mausu matupandakenamu mayikedil kand mwom wetu ni makat kusadish yikata kutushiken. Mwamu chadinga ku Beslan, mu Ossétie, pa chirung cha musaj wa ruval mu muvu wa 2004, chisu chajipau yitot ya antu mu matend ma chisum pakach pa in chisum cha kujipan ni ampurish akata kuyilam antu, avud pakach pau adinga anikanch adinga ni kuya kapamp kau ka kusambish ku shikol. Chakin kamu, antu afa ni apanda mu ubaj winou chadinga kusu mulong wa kuyuk—pakwez musul win wa kusambish wa ‘yisu yiney ya mar’ wadinga matend ma antu.

Ov, Mwamu Chikwikala Chisu Chawonsu?

Antu amwing alondining anch: “Pakwez mwamu muding kwau mwom,” pakatau kwisambin kuburen kutentam. “Mwamu chiding kwau, ni mwamu chikudandamena kwau kwikal.” Ku mutambu wau, mwin usu ukudandamen kwend kumuzengol wakad usu, ni mpich ukudandamen kwend kumufeng kazwendj mash. Awiy alondil anch yom yiney pamwing nich “chisu cha mar,” yikez kutukwat chirung chin chawonsu chidiaku muchid wa muntu.

Ov, mwamu chifanyidina kwikal chakin kamu? Ov, chikez kutwishik anch dichuku dimwing antu inay asadila ukaliweny wau ni manangu mau chakwel kwangul difut ditentamina ku mudimu wau wawonsu ukash? Ov, kudi muntu kanang ukutwisha kulet kuswimp kwa rawonsu, mu mangand minam makad kutentam? Shinshikin yisambidina mutu wa mulong wambakedina pa mulong winou.

[Chipich chidia pa paj wa 3]

MAXIM MARMUR/AFP/Getty Images