Tushinshikinany Dizu dia Yehova dichuku ni dichuku
1 Dichuku ni dichuku chidi choziu chisu ku ritiy retu. Mbayey a midimu ukutazukin kuya nend ni kwipwish usweral mwaad wen urel; mulej ukukasikeshin kukimb mudimu umwing wa katumb; mukurump wey wa mudimu usotin anch usala asaa avud a mudimu, ap kand mayej makutongishin nakash. Ap anch yipimik yiney yikutwish kutubudikin chisu chin chawonsu, tudap ayinetu bwat. Yehova usotin kutwinkish manangu mafanyidina mulong wa kuyipwish. Kushinshikin mufund wa dichuku ni yirumburil yidia mu broshir Examinons les Écritures chaque jour udi mutapu uwamp wa kwidish pichuku pichuku Dizu dia Yehova. Ov ukakwisakinang ditenchik dined?
2 Ukwash udaku: Isay 30:20 (NW) umutazukin Yehova anch “Mulej Mujim” kukutwishau kukarumukin atushalapol end mulong wa kutambul ukwash. Ukat kutwinkish kamu yitukweta nich kuswir mulong wa kurish ni yoziu. Mutapu ik? Verse ulondwilaku ulondil anch: “Matu mey makutesh dizu dilondila kwinyim anch: ‘Yiney yawiy njil. Endilanyamu.’ “ Nlel, Yehova ulejen “dizu” diend kusutin Mifund ni mikand ya ‘kashalapol wakin.’ (Mat. 24:45) Mu ma Tour de Garde makur mudi dipit divud dia manangu, disambidina mutambu ni mutambu wa mwom wa Ukristu. Anch twachirikin yimwing yijimbwilau mu Examinons, tukwikal ni ronganyin ripandakena usey mu yisu yitusankena yoziu ya mitapu yawonsu.—Isa. 48:17, NW.
3 Twitekinany chisu: Ap anch dichuku ni dichuku pamanch kadingap ni chisu, maku umwing wikwatina chiyul cha kutang ni kwisambin mufund wa dichuku ni yirumburil ni mwanend ikundj pa chisu cha yakudia ya pamanch. Mazu minam pamwing ni malembil madinga mazu ma nsudel madingay ni kutesh dichuku ni dichuku pamanch kurutu kwa kuya ku shikol. Mamukwasha kurish nich masandj, kulik kwitek mu yisu yimwing yikutwisha kumuwish pantaliken nich dibazin ngand, ni mamukasikesha kupan uman wa ritiy rend nich kujijaman kud ambayend a shikol ni amwadimu. Ap anch wadinga kusu amwinend Kaman ku shikol, kiyovap anch wadinga amwinend.
4 Tukimbany umutakel ni chiyul cha Yehova ni cha Dizu diend. Anch twasal mwamu, Yehova ukwikal kud etu muntu umwing wa kashinsh mu mwom wetu, mud kamu murund umwing wa kashinsh. Tumukimbany dichuku ni dichuku! Pamwing ni tunan twa antu akwau mu mangand akata kutang Dizu dia Nzamb, twijidishany mes metu kuman ‘Mulej wetu Mujim.’