Ikalany ni Musangar mu Mudimu Wen Utumbila
1 Achirika “nich musangar.” Rusangu ra Baibel rilejen mutapu wiyovau in kwilej 70 pa chisu chapanau rapor wau kud Yesu, kupwa kwa mudimu umwing ujim wa kulejan. Amana musangar ujim udiokila ku kusal rusot ra Nzamb. (Luka 10:17) Ov yom ik yikutwisha kutukwash kuman musangar wa chilik chimwing mu mudimu utumbila?
2 Chitongijok Chiwamp: Yehova utwinkishin chisend chimwing chipandakena kuwap cha kuyijikish antu rutong rend rujim. Kusutin mudimu wetu wa kulejan, tukutwish kumukwash muntu kulik yisalijok yijondila ya mangand ni kudiokal ku uswik wa difukwil dia makasu. Tukutwish kuyinkish antu ruchingej ra mwom mu mangand makad matend matunyingumukina nlel unou. Tutonginap bil musangar ukwetingay Yehova pitukata kutwish kukun mbut ya uyakin mu muchim umwing witiyidina. Twikalany ni chitongijok chiwamp mu kulembil chakwel spiritu wa Nzamb abudisha mudi etu mabuj ma musangar pitujijamena kusal mudimu nich muchim wetu wawonsu.
3 Kufundish Kumekena: Chikumangan chatakelay Yesu mulong wa kupan yany kud in kwilej 70, tukutwish kuchisikej ni Chikumangan cha Mudimu chitukata kusal katat. Wayifundisha chakwel atwisha kusal mudimu wau nawamp. (Luka 10:1-16) Nlel unou Chikumangan cha Mudimu chikat kutufundish mutapu wa kwisamb nau antu, mutapu wa kusambish misamb, ni mutapu wa kusambish ni kutakel malejan ma Baibel. Anch tukakusadil ni kurijek mutapu wetu wa kulejan, tukez kuman anch yitongijok yawonsu ya kuburen kufanyin ap mabuj mawamp yitwadinga nich pasak yikukep ni akuyiswinkan nich ruchingej ni musangar.
4 Tushinshikinany Yidia Kurutu: Yesu wamana musangar mu mudimu wend utumbila mikalap nchik mar mikonkinay. Mulong wak? Mulong wadandamena kuchingejin mu yiyukish ni yisend yamutekinau kurutu. (Heb. 12:2) Tukutwish kusal chilik chimwing nich kutek manangu metu ni muchim wetu mu dijin dia Yehova ni mu yiyukish yikwikalaku mu mangand masu ma Nzamb. Chinech chikuwejin musangar ni dirumburik ku mudimu wetu.
5 Kumusadin Yehova mudimu utumbila chidi chisend chijim nakash tukutwisha kwikal nich nlel unou. Chad lel, tukutwish kulond anch: “Nasangara kusal rusot rey, A Nzamb wam.”—Kus. 40:8.