Yakul ku yipul yen

◼ Ov mutapu ik ukutwishau in kwakan kuyikwash anvaj chakwel anau ashakama nawamp ku yikumangan?

Mu mutapu wayitangau, an akweting usu, kijididinap kushakam ndond yimwing chisu chilemp. Kupwa kwa kukumangan, akweting chibachikin chikutwisha kuyibachikin ku kukadabijan mau ni kopatijan mau ni an akwau mu Chot cha Want ap mu jindond jikwau ja yikumangan, ndond ya kwimik miotak, ap mu tubway. Pakwez, ruswir riner ridi rakin anch, ‘pakwez anch wamulik mwan mwamu ndiy ukez kuyikwatish anvajend usany.’​—⁠Jnsw. 29:⁠15.

Cha ushon chidi anch, amwing pakach pa akadivar netu nau anambaz akudila kal ijipa yitat pa kuwa mulong wa kuyibachik kwayibachikau kud an akata kukadabijan mau. Chinech chaletin mar makad kusot ni kushesh kwa nfalang jakad kufanyidin kud anvaj ni ku chikumangen. Mulong wa diking diau ayinau ni dia antu akwau, an kafanyidinap kuyilik akat kukadabijan mau mukach ap pol pa Chot cha Want.

Baibel uyinkishin anvaj chisend cha kuyifundish anau kulimish ndond yetu ya difukwil. (Mul. 5:1a) Ku yikumangen yetu ya Ukristu, ni ku yikunguril, akadivar in kwakan afanyidin kutal anch “yom yawonsu ayisala mu kuwanyidin” ni “wakad kurumbangan.” (1 Kor. 14:40; Kol. 2:⁠5) Afanyidin kubabal kurutu kwa program, pa chisu chimusutishinau, ni pa kupwish kwa program, mukach mud kand pol. Anch mwan ukat kukadabijan mau ap wikal mwin ruzuwol, mukadivar umwing mwin kwakan ukutwish nich kwidutish kwawonsu kumwimik mwan, ni kumurumburil mwan mulong wak yisalijok mud yiney yifanyidinap. Chiwapidil kand kumwijikishamu nvaj a mwan nich rukat chakwel amulama mwanend. Nvaj ufanyidin kwakul mutapu uwamp.

Choviken anch mu yisu kanang an a mayel ni anikanch akutwish kudil ap kwikal in kuzuwol pa chisu cha yikumangan. Akadivar asadila mudimu wa kwakan, akata kushik aminit 20 kurutu kwa program kusambish, akutwish kusha milong yaad ya ndond ya kushakam kwinyim, mu chot mulong wa anvaj akusota kushakam kwinikwa nau anau akemp. Etu ishadilap tuwapidil kusadil pamwing nich kusha yitwamu yiney yiyishidilau.

Anch mwan ukat kulet masok, anvaj afanyidin kusal chom kanang. Anch anvaj kasadinap chom ni anch masok masambish kuyizuwol antu, mwin kwakan ufanyidin kwit umwing wa anvaj nich rukat anch ukutwish kubudik ni mwan pol pa chot. Pitukata kuyit antu achidia asu nau anau akemp kwez ku yikumangan, tufanyidin kushakam nau pamwing ni kuyikwash anch anau akat kusal masok ap kuzuwol.

Tukweting musangar pa kuman an a mivu yawonsu ku Chot cha Want ni kuman ngikadil yau yiwamp mukach mwa chikumbu cha Nzamb. (1 Tim. 3:15) Anch alimish ditenchik dia difukwil dia Yehova, akat kumuletin katumb ni akat kuyibazin kud awonsu mu chikumangen.