“Midimu yiukata kusalanya kiyidiap yamwamu bwat”
1 Chidi chitongijok chikasikeshina mud ik! Midimu yiukata kusalany mu mudimu wa Yehova kiyidiap yamwamu bwat. (1 Kor. 15:58) Pakwez, tonginap bil mutapu ukatau kudikit antu mudimu chisu chimwing chilemp nich usu chakwel kupakish kurijek mutapu wau wa kushakam, ap mwikadil wau wa mutapu wa kuman nfalang. Akutwish kudandamen kwilej mivu yivud, ap kusal mudimu mud kabindj chakwel ikala ampich. Pakwez, mulong wa “yisu ni yirung yakad kuchingejin,” kakutwishap ap pakemp kushiken katumb kakimbinau, ap akutwish kwikal ashindidilau kwitiy kamu yom yikemp kupandakan yisotinau mud dipit. Mud “kulondul rinkind,” usu wau ukat kuya mu mem. (Mul. 1:14; 9:11) Chad lel, chidi cha usey mud ik, anch twikala ni yivud ya kusal mu mudimu umwing wakad kwikal wamwamu mulong ukwet usey wa chikupu!
2 Mudimu ufanyidina chakin: Kulejan rusangu ruwamp ra Want wa Nzamb udi mudimu wa usey nakash pa divu. Udi mudimu ufanyidina kusal antu atesha ap bwat. Tusotin kulond, mud mwalonday Paul anch: “Am nitokish kal ku mash ma antu. Mulong kinovap wom wa kunilej en chiyul cha Nzamb chawonsu”—Mid. 20:26, 27.
3 Anch antu akat kutesh ni kwitiy uruu wa Want, chidi cha musangar mud ik! Changadim umwing wafisha mpanyend a tatukwend. Wadinga ni kwiyipul ndond yayay mpanyend a tatukwend—mwiur anch mu karung ka misiny? Wita ukwash mu kulembil kud Nzamb, nich kusadil dijin Yehova, mud kamu mwamufundishau kud yayend mband kusal. Kupwa wadinga ni kwilej Baibel ni kukumangan ku yikumangan ya Ukristu. Wikala ni chitongijok chisu piur pa mwom ni wakatula urund ni chisak cha ambwambol a mu balibal. Changadim mwinou walika kuna ruwand, kusadil damb, ni wij. Walonda anch: “Rukat mulong wa Yehova rawiy kusu rankwasha kulik mutapu uyimp winou wa kushakam. Ching kusu Yehova, ku riy rend rijim ndiy watwisha kwinginkish ruchingej ra mwom wa chikupu.” Kasotinap kand kusutish mwom wend mu kulondul yom yamwamu.
4 Ap anch antu alik kutesh, tusadil chom chimwing cha usey. Ij anch Atuman’a Yehova eza ni kuyital. Kujijaman kwetu, kushishaman kwetu, ni rukat retu yimeken patok. Chawiy lel, ov midimu yey mu mudimu wa Mwant yidi yamwamu? Bwat ap pakemp!