Ov Chinech Chinkangeshin Kulejan?
Antu avud akwet midimu yivud ya kusal mu mwom wau. Atuman’a Yehova adi mukach mwa antu akweta midimu yivud ya kusal—kwilej Dizu dia Nzamb, kukumangan ku yikumangan ya chikumangen ni kubudikin mu mudimu wa chingand. Chikwau kand, tukwet midimu yivud ya ku mujimbu, midimu ya ku chikumbu ap ya ku shikol, ni yisend yikwau yivud, yawonsu yiney yikat kusend chisu. Chinech chidi kamu chikash kud mitu ya majuku.
2 Mulong wa mikadil yiyimp ya ekonomi mu jindond jivud, mitu ya majuku yifanyidin kusal midimu ya asaa avud ni kurish nakash chakwel kutwishish mwom wa majuku mau. Anch midimu yau ya ku mujimbu yitin chisu chau chawonsu ni usu wau, akat kushal kusu ni chisu chikemp mulong wa mudimu wa kulejan. Chakwel akwet chisend cha kulet (kudimukin) yom ya ku mujimbu ku majuku mau, amwing akutwish kutong anch kakutwishap kusal nakash mudimu wa kulejan. (1 Tim. 5:8) Chidi chakin anch nlel unou kudi yipwichik yikash chakwel muntu amana nswir ja mwom. Pakwez, mudimu wetu wa ku mujimbu ufanyidinap kutukangesh kulejan rusangu ruwamp. (Marko 13:10) Chawiy lel, chidi cha ukwash kud etu kushinshikin mwikadil wetu wa katat.
3 Mulong yom ya mangand yikat kukarumukang chisu chin chawonsu, mutu wa dijuku ukutwish kusot kusutish chisu chimwing chilemp ku mudimu, chakwel kwitekinaku nfalang jikutwisha kumukwash anch kwabudikin mulong wakad kuchingejin. (1 Kor. 7:31) Chakin, anch tukat kusal mudimu nakash, tukutwish kwikal ni yom ya ku mujimbu yivud ap kwiswedish nakash, chawiy lel, ov dijuku dietu dikwikal ni musangar nakash anch chisadikin mu mutapu wa kushesh chisu chifanyidina mulong wa yom ya muspiritu ni kukumangan ku yikumangan? Tusotin chakin kamu kwipuk chom chawonsu chikutwisha kutek mu chak mwom wetu wa muspiritu. Chidi cha manangu kusadil chiyul cha Yesu cha ‘kukumangejin mapit mwiur’ ni kwikal nich “mapit ku mes ma Nzamb”.—Mat. 6:19-21; Luka 12:15-21.
4 Kimbany Bil Yisakin ya Want: Yesu wayifundisha in kwilej end kutek milong ya muspiritu pa ndond ya kusambish kurutu kwa yom yikwau yawonsu. Wayikasikesha anch: “Kangal wiyakamishany anch: ‘Ov, tukudia yom ik?’ ap anch: ‘Ov, tukuna yom ik?’ ap anch: ‘Ov, tukudjal yom ik?’ ” Ov mulong wak walonday mwamu? Warumburila anch: “Pakwez en, Tatukwen udia mwiur wij kal anch, ukwetany kuswir kwa yom yiney yawonsu.” Anch twitiyijin chakin kamu chinech, kukezap kwikal chikangesh ap kusu chimwing chikutwisha kutukangesh kusal yalonday Yesu anch: ‘Dandamenany, kukimb bil Want nich kutentam kwau, ni yom yiney [yikwau] yawonsu ukukuwejinanyaku.’ Nzamb ukez kushinshikin nawamp anch twikala ni yom yiney ya ukwash! (Mat. 6:31-33) Chakin kamu chinech chidiap chisu cha kuchirikin kwinyim nich kwiyakamish nakash mulong wa mwom wetu ap kusot kwikal ni mashakamin mawamp mu ditenchik dia yom dikusuta katat kamu ak.—1 Pita 5:7; 1Yohan 2:15-17.
5 Rutong ra kusambish ra mudimu wa ku mujimbu ridi ra kudimukin maswir ma muntu ma yom ya ku mujimbu. Pakwez yom ik tukweta nich kuswir? Mupostol Paul wafunda anch: “Chifanyidin etu kusangar anch tukwet yakudia ni yidjal.” Ov tukimbining kwikal ni yom yivud nakash? Anch mwawiy, chitwishikin ap tukat kwangul yibudikin yiyimp yisambinay Paul anch: “Antu asotina kwikal ampich akat kuwa mu yoziu, ni kufa mu mupit wa maku mayimp ma usup, makata kuyishikij antu ku kujiy ni ku kushadik.” (1 Tim. 6:8, 9; Mat. 6:24; Luka 14:33) Ov mutapu ik tukutwisha kwijik anch maku mapandakena ma ku mujimbu makat kutuchirish kwinyim?
6 Anch mulong wa mudimu wetu wa ku mujimbu, tukwet kusu kachisu kakemp ka kubudikin mu mudimu wa chingand ap kand anch tumenap usey wa kwipan nakash mulong wa rusangu ruwamp, chifanyidin kushinshikin nawamp yom tutekina pa ndond ya kusambish. (Heb. 13:15, 16) Anch twikal ni mwom umwing wa kwikepish, tukudiosh chikunku chijim cha yom yitukangeshina kulejan. Tufanyidin chisu chawonsu kusadil bil chisu chetu ni usu wetu mulong wa yisakin ya Want.
7 Mudimu Kiudiap Wamwamu: Mazu ma Paul matukasikeshin chisu chin chawonsu kwikal ni ‘ya kusal yivud mu mudimu wa Mwant, kwijik anch, mudimu wetu kiudiap wamwamu mu Mwant.’ (1Kor. 15:58) “Mudimu wa Mwant” wa upandakena usey nakash udi mudimu wa kulejan Want ni kwikadish in kwilej. (Mat. 24:14; 28:19, 20) Anch tusotin kwinungin mu mudimu wa kulejan mud kamu chitwishikina, tufanyidin kwitekinaku chisu mulong wa mudimu wa chingand rubing ni rubing ni kwipuk kusadil chisu chinech mulong wa mijikit yikwau. (Efe. 5:15-17) Chawiy lel, wikalap nchik mudimu wetu wa ku mujimbu ap chom chikwau chikwikalap chikangesh ku mudimu wetu.
8 Pitukata kusal yawonsu tukutwisha mulong wa kulejan uyakin wa Baibel kud antu akwau, tukweting musangar umwing ujim nakash wa kupan. (Midimu 20:35) Anch twadandamen kulejan Want, tukutwish kuchingejin machuku ma kurutu, mulong ‘Nzamb utentamin, ndiy kakutwishap kuvuramen yisalijok yetu ap rukat ritumekeshina mulong wa dijin diend.’—Heb. 6:10.