‘Twikalany in kupan, ni kuyikwashap akwau’
1 Yitot ya mivu kwinyim, mupostol Paul wamuleja Timote kuyikasikesh ambay in Kristu ‘kusal yom yiwamp, ni kwikal ampich mu midimu yiwamp. Ikala in kupan, ni kuyikwashap akwau.’ (1 Tim. 6:18) Paul wayivurisha kand in Kristu in Hebereu anch kangal avuramen ‘kusal yom yiwamp ni kukwashijan muntu ni mukwau.’ (Heb. 13:16) Ov mulong wak wafunday yany yiney? Mulong wading wij anch kukutwish kwikal “uyaj, ni katumb, ni chisambu kudi antu awonsu akata kusal yom yiwamp.”—Rom 2:10.
2 Chidiay Sakatang, Yehova Nzamb ndiy Mwin yom yawonsu. (Kuj. 4:11) Tusangeridin chakin yikatay kusal mulong wetwetu nich yom yikwetay. Ikalap nchik mwikadil wa kuburen kujikitish wa antu avud, Upandakena Piur udandamedin kuyink awonsu ukwash udiokila ku yitenchik yend ya kupan mulong wa kulam mwom. (Mat. 5:45) Wapana kand Mwanend mukatish mud chakupesh chakwel tukutwish kwikal ni mwom wa chikupu. Ov rukat riner ratumekeshinay rifanyidinap kutubachik kumekesh kujikitish kwetu nich kwikal in kupan kud akwetu antu?—2 Kor. 5:14, 15.
3 Ov yom ik tukutwisha kupan? Chidi chifanyidina kwau anch tusadila yom yawonsu tukweta mwi njil yimwing yisangarishina ku mes ma Nzamb. Chakin kamu tusotin kupan ukwash ku mudimu wa Want wa mangand mawonsu ku mujimbu ni muspiritu. Mwaning, rusangu ruwamp chidi chipau chipandakena usey chikutwishay kwikal ni muntu , mulong ridi ‘ukash wa Nzamb wa kupandish.’ (Rom 1:16) Anch twasadil nich muchim wa kupan chisu chetu ni yom yitukweta ngond ni ngond chakwel kusal mudimu wa kulejan ni kufundish, tukutwish kwikal ni usu wa kuyikwash akwau nich chipau chinech cha muspiritu, chipau chitwadila ku kutambul kwau mwom wa chikupu.
4 Yehova ukat kusangar nakash pitukata kuyikwash atuzweny. Ukat kushilamu yiyukish, ni utuvurishin kand anch: “Pa dichuku dia ujim wa [Yehova NW], dipit dikez kakwaship, pakwez kutentam kukez kadiosh rufu.” (Jnsw. 11:4; 19:17) Kupan ukwash ku mudimu wa Want nich yitukweta ni kubudikin pakad kujing mu kulejan rusangu ruwamp yidi mitapu yipandakena kuwap tukutwisha kumekesh anch tudi chakin in kupan, ni kuyikwashap akwau.