Ov ukat kumenaku ukwash?
1 Mamiliyon ma antu asotin nlel kwijik mutapu wa kupwish milong ni kushakam ni musangar. Asotin nakash mikand ya yiyul piur pa kwikwash ap kuchingejin yirund ni yirijek kanang mulong wa yiyul piur pa mutapu wa kurijek mwom wau. Amwing akutwish ap kumekesh ukwash kanang watambwilau. Pakwez, anch twatal mutapu udia mwom nlel, ov antu ilejin kwikal ni chisambu, ni kuwapish nakash mwom kusutin maprogram ma muntu ma kwilej? Chikasiken chakin!—1 Kor. 3:18-20.
2 Ku mutambu ukwau, Sakatang wetu ukat kupan pakad kufutish mafundish ma ukwash kud awonsu akutesha. Yehova usotin anch muntu ni muntu atambula ukwash udiokila ku kufundish kwend. Wapana Dizu diend dipepidilau chakwel kuyitakel antu mu kutentam, ni wasadin mutapu wa kwel anch rusangu ruwamp ra Want arilejana pa divu pawonsu. (Kus. 19:7, 8; Mat. 24:14; 2 Tim. 3:16) Mwom wa musangar wakin wimedin kamu pa kuta muchim ku yijil ya Yehova.—Isa. 48:17, 18, NW.
3 Umutakel wa Yehova upandaken kulemp umutakel upanina mikand ya yiyul ap mitapu ya kusal yipanina mangand. Tukutwish kutambul ukwash wa kashinsh ni ukulaba anch twisakin sens yom yiturijekidinay Yehova mud kamu muyifundinau mu Dizu diend ni kuyifundish kud dirijek diend.—1 Pita 3:10-12.
4 Tambul ukwash ku yikumangan ya chikumangen: Nlel unou, Yehova umekeshin ukwash wa kashinsh mu kutufundish jinjil jend, ni tukakumenaku ukwash anch twata muchim ku mafundish mend. Yikumangan yetu yitan ya rubing ni rubing yimekeshin rukat ra Yehova mulong wetwetu. Pitukata kukumangan ku yikumangan ya chikumangen, ronganyin retu ra Nzamb rikat kwiwejinaku. Twilejin mutapu tukutwisha kwichidij ayinetu ku yom yiyimp pitumushejidina Yehova piswimp. Mu mutapu winou spiritu wetu ukukul.
5 Kuchidi yivud. Ku yikumangan ya chikumangen tukutwish “kujimb kand.” (2 Kor. 6:13, TMK) Chinech chitwitin kand kwijikijan nau akwetu mu chikumangen. Tutambwil ukwash udiokila ku kukasikeshijan kwa muntu ni mukwau, mud kamu mwafunday mupostol Paul mu mukand wend kud in Rom. (Rom 1:11, 12) Payifundinay in Hebereu, wayibabesha nakash antu asambisha kukudish chijidish cha kuburen urund wa Ukristu.—Heb. 10:24, 25.
6 Kushakam nich musangar kushindamedin kand kutongin kuwap kwa antu akwau. Atukasikeshin kukimb mitapu ya kuwejin ku musangar wa akwetu. Chawiy lel, yikumangan yetu ya Ukristu, yidi chakin mulong wa ukwash wetu ayinetu ni mulong wa ukwash wa antu tukudishina nau urund uwamp. Chom chitwitinau chidi kusadin pamwing nich muchim utok.
7 Mupostol Paul walondina mulong wa chilik chimwing mu chiyul chend kud Timote pafunday anch: “Dandamen kwilej yom ya mwom wa kumulondul Nzamb.” (1 Tim. 4:7) Tukutwish kwiyipul ayinetu: ‘Ov nikat kwilejang amwinam? Ov nikat kwilej chakwel kutambul ukwash udiokila ku yom nikata kutesh ku yikumangan ya chikumangen?’ Chakul chetu chikwikal mwaning anch tukat kuta matu ku yom tukata kutesh ku yikumangan ni kwikasikesh kusadin yitwilejina. Nich mes ma ritiy, tufanyidin kuman chilikej cha akadivar akata kufundish ni kumuman Yehova mud Mulej Mujim wa antwend.—Isa. 30:20, NW.
8 Shikol ya mudimu ya Uteokras ni chikumangan cha mudimu: Yikumangan yaad yiney ayitekin chakwel kutukwash kwikal ajikishina mu mudimu wa Ukristu. Rawiy rutong ra Shikol ya Mudimu ya Uteokras—shikol yikweta an a shikol akata kutambul mafundish ni yiyul chisu ni chisu. Ukwetany mutapu wa kumekesh kuya kwen kurutu mud in kulond kurutu kwa antu avud ni mud alej a Dizu dia Nzamb. Chakwel kutambul ukwash ujim udiokila ku shikol, ufanyidin kufundish dijin diey, kukumangan, ni kwakul pakad kujing ku yikumangan, ni kutek muchim wey ku midimu yikwinkinau. Kwitiy ni kusadin yiyul yipaninau kukez kukukwash kuya kurutu.
9 Chikumangan cha Mudimu chitufundishin usey wa mudimu wa Ukristu ni chitulejin mutapu tukutwisha kubudikin mu mudimu wa kwikadish in kwilej. Ov ey ni dijuku diey utambwilany sens ukwash udiokila ku yom yisambidinau ku yikumangen? Ambay a uruu in Kristu alondin anch: “Ku chikumangan chimwing cha Mudimu, twatesha anch tufanyidin kushinshikin mufund wa dichuku mu dijuku. Kitwadingap ni kuchisal, chad katat tukakusadil.” Ov mutapu ik watambulau ukwash? Alondin anch: “Tumen anch mambamb metu pa chisu cha kudia masangareshin nakash. Kwikil kand ntad pa chisu cha kudia.” Ov an akemp atambwil ukwash udiokila ku yikumangan? Mwaning. Maku ulondin anch: “Chiswapel kujijngunin anch yom yisutina ku yikumangan yiyandamin nakash anetu. Rubing rimwing twamana mwanetu wa mivu musamban ukat kudimban. Pakwez rubing rinira ku chikumangan, diskur dia mafundish diadinga ni kwisambin kudimban. Nich usany mwis, mwanetu wamutala tatukwend ni kwikuchik zong ndond yadiay ushich. Watambula difundish, ni kitwamanap kand matat kupwa kwa chinicha.”
10 Nambaz umwing chibol walonda anch ukweting musangar pakatau kupan yiyul ya kurijek mudimu wetu ku Chikumangan cha Mudimu. Mulong wak? Urumburil anch: “Nikakutambul chijidish. Yisu yimwing nitongining anch yiyul yipaninau mu Mudimu Wetu wa Want yikwikalap ni ukwash. Pakwez ku Chikumangan cha Mudimu, chisu chinikata kutesh anch tufanyidin kuyipakish, nikwet musangar wa kusadin yiyul (yiletinau). Yikat kusal anch mudimu wikala usangareshina!” Kwinyim kwa kusadin yiyul mu ambing avud chakwel kupakish kusambish dilejan dia Baibel kapamp ka kusambish kusankanijan ni muntu, wasambisha dilejan dia kapamp ka kusambish ni changadim umwing wadinga ni kwit ukwash.
11 Chisu uteshina diskur dikweta yiyul ya Baibel piur pa kutond kwa muntu ipend kuukata kusal, ov ukakwovang anch Yehova ndiy ulondina kamu kud ey? Mwamu mwiyovay mukadivar umwing. Walonda anch: “Katat kamu ak ku chikumangan chimwing, kwading diskur dimwing mwisambinay mukadivar umwing mitapu ya kwipuwangesh yadinga yifanyidina kud in Kristu ni yakad kufanyin. Nadinga ni kukat kutal masengan ma boks ku televizio. Pakwez kwinyim kwa chikumangan chinicha, nakwata chiyul cha kwel anch spor winou wadinga ku mutambu wa mitapu ya kwipuwangesh yakad kufanyidin kud in Kristu. Nikuyitalangap kand ap pakemp.” Mwaning, ap anch mukadivar winou wakudisha rukat rijim mulong wa yom yimwing ya ubaj, wakula nich kwikepish ku umutakel wa Yehova.—Kus. 11:5.
12 Diskur dia pibur, Tour de Garde, ni dilejan dia buku dia chikumangen: Madiskur ma pibur tukata kutesh rubing ni rubing makat kwisambin mitu ya milong kushalijan ya Baibel. Ov yom ik ukata kumen ku madiskur minam? Ikundj umwing Mukristu wisambina piur pa ukwash watambulay anch: “Diskur dia pibur dimwing disambina piur pa mabuj mawonsu ma spiritu. Mwin kulond walonda anch, ku mutambu wend, chakwel kukudish mabuj minam ma spiritu, watonda ngikadil yimwing kanang ni kuyisadil rubing rimwing. Kwisudiel kwa rubing, watongina mutapu wamekeshay dibuj diatonday mu mijikit yend ya dichuku ni dichuku. Kupwa wasadina kand ngikadil yikwau rubing rilondwilap. Chitongijok chinech chankatisha nakash, niyam nasambisha kuchisadin.” Kudi kusadin kuwamp mud ik kwa yom twilejina!
13 Dilejan dia Tour de Garde ditufundishing kusadin yijidik ya Baibel mu milong kushalijan ya mwom. Chinech chitukwashin kulam chisambu mu manangu ni mu muchim kwikalap nchik yakamish ya mwom. Dilejan dia Tour de Garde ditukwashining kand kudandamen pamwing nich uyakin uyila kurutu. Chilikej, ov twatambwilap ukwash udiokila ku dilejan dia Tour de Garde wa Ndol-Mem 1, 1999 mu mitu ya milong: “Yom Yiney Yifanyidin Kumekan,” “Chifanyidin Mwin Kutang Mazu Minam Atesha Yom Yiney Nawamp!” “Babalany ni Ikalany ni Mushiku!” Ov mutapu ik watesha mafundish minam? Ov umekeshin nich yisalijok yey anch utekin muchim ku kubabesh kwa Yesu piur pa machuku ma kurutu? Ov wirijekin mulong wa yoziu yidia kurutu chisu tukumana ‘chom chitakanena cha kusheshan . . . chimen mwi ndond yitumbila’? (Mat. 24:15-22) Ov rutong rey ni mwom wey yimekeshin anch, kudap kuvudish kwa mapit ma mujimbu, pakwez kutumbish dijin dia Yehova chidia chom cha usey kud ey? Ov twilejinap chakwel kutambul ukwash katat wa dilejan dia Tour de Garde?
14 Tongin bil yom yivud twilejina ku Dilejan dia Buku dia Chikumangen rubing ni rubing. Machuku am twilejin buku wa Baibel wa Daniel. Angond anying twilejina buku wa Baibel winou, ov tumen ritiy retu chiriwejidinaku rubing ni rubing? Mud kamu Daniel muprofet wakatay Yehova, tukasikeshin ritiy retu chakwel tutwisha kujijaman.
15 Yehova utufundishin kushakam nich musangar: Tukat kwipuk nakash runeng pitutekina muchim ku yijil ya Nzamb. Chikwau kand, tumen musangar wa kushakam kwambatan nich. Chitulondwila umutakel wa Yehova, twikadin in kukwatakan mu mudimu wend, kangal kusu in kutal. Ni awonsu asadina mudimu wa Nzamb adi antu a musangar.— 1 Kor. 3:9; Jak. 1:25.
16 Ku yikumangan ya chikumangen, tongin nakash mutapu ukutwisha kusadin yom uteshina. (Yohan 13:17) Musadila Nzamb nich musangar, nich muchim wey wawonsu. Musangar wey ukez kupandakan. Mwom wey ukwikal upitishinau, ni ukwikal ni dirumburik. Mwaning, ukez kumenaku ukwash.