Uyakin Piur pa Machuku ma Kurutu
Ov, wiyipwilap kal piur pa yom yikusadika machuku ma kurutu? Bibil wisambidin piur pa yom ya usey yikusadika piswimp ap yikuyikwata antu awonsu pa divu.
Yesu walejana mutapu tukutwisha “[kwijik] anch, Want wa Nzamb udi piswimp ni kushik.” (Luka 21:31) Watakela kulond anch kukez kikal jinjit jijim, kuzal kwa divu kukash, kamungun ni yipupu—yom twimedinap ayinetu nlel unou.—Luka 21:10-17.
Kupwa Bibil ulejen anch “machuku ma kwisudiel” ma winyikel wa antu tukumajingunin kusutil mwikadil wa antu ap mu kwovikesh patok, akwikal ni yaku yiyimp. Ukutwish kutang mutapu uyilejenau antu inay mu 2 Timote 3:1-5. Piumena mikadil ni yisal yiney nlel, pakad kwidjidjek witiyin kamu anch uprofet winou wa Bibil ukwatijadin ni yom yisadikina nlel.
Chinech chirumburikin ik? Chisu chasej kal piswimp chakwel Want wa Nzamb uswimpa yom ni kuwapish mwom panap pa divu. (Luka 21:36) Mu Bibil, Nzamb ukanin anch ukusal yom yiwamp mulong wa divu ni mulong wa antu akushakamap. Shinshikinaku yilakej yikemp.
WINYIKEL UWAMP
“Amwinkisha [Yesu] usu wa kuyikel ni uyaj, ni want, chakwel antu a michid yawonsu, ni a mitapu yawonsu, ni a jindim jawonsu amusadil ndiy. Kuyikel kwend kikukez kupwap, ni want wend ukez kwikal wa mivu ni minang.”—DANIEL 7:14.
Chinech chirumburikin ik: Ukutwish kusanger mwom uwamp mwinshin mwa guvernema wa piur nakash watekinay kal Nzamb muyikedilay Mwanend mudi Mwant.
UKASH WA MUJIMBU UWAMP
‘Kwikil muntu ap umwing ukeza kulond anch: ‘Niyedil.’’—ISAY 33:24.
Chinech chirumburikin ik: Ukezap kuyel ap kwikal chilim; ukez kufap bwat.
CHISAMBU CHIPANDIKENA
“Ndiy ukat kukatwish njit ni kwisudiel ya mangand.”—KUSENG 46:9.
Chinech chirumburikin ik: Kukez kikalap kand njit, ni mar mawonsu madiokiling kwi njit makez kupwa.
DIVU DIKEZ KIZUL SENS NI ANTU AWAMP
“Antu ayimp kakwikalakup kand . . . Itudishina akez kaswan ngand.”—KUSENG 37:10, 11.
Chinech chirumburikin ik: Kukezap kwikal antu ayimp, ching kusu antu akatina kumuziyil Nzamb.
DIVU DIAWONSU DIKEZ KWIKAL PARADIS
“Awiy akez katung yikumbu ni kushakamamu ayinau. Akez kadim yir ya mitond ya nviny ni kudia mabuj mau.”—ISAY 65:21, 22.
Chinech chirumburikin ik: Divu diawonsu dikez kuwap nakash. Nzamb ukez kakul ku malembil metu chakwel rusot rend risadik “pansh.”—Mateu 6:10