Anvaj—Andjikany yaku yiwamp mu anen
1 Yaku yiwamp yidingap ya chivadik bwat, ni yikatap kwiyezin mwamu wakad kuchingejin. Chikwau kand, kwandjik yaku yiwamp mu an, kwitining chisu. “Kwandjik” kurumburikin “kutek, kwandjik pakemp pakemp” ap “kwandjik dinans ku dinans.” Chitining anvaj kujijaman chakwel ‘kuyilil [anau] ni kuyibabesh nich malejan ma Yehova.’—Efe. 6:4.
2 Sambishany Kudiosh Kamu pa Wanikanch: An akemp akweting ukaliweny nakash wa kwilej ni wa kusal yom yisu. Ap anch chiyikasikedining amakurump chisu chimwing kwilej rudim rikwau risu, pakwez an akad kal kwandam ku shikol akutwish kwilej jindim jaad ap jisatu kapamp kamwing. Kangal watongany anch mwanen uchidi mwanikanch nakash chakwel kukudish yaku yiwamp. Anch amufundish uyakin wa Baibel kurutu kwa chisu ni kudandamen, pachidiay mwan ni mivu yikemp ya kuvadik, manangu mend makez kwizul nich ronganyin rikeza kumwinkish ‘manangu chakwel kupand.’—2 Tim. 3: 15.
3 Mudimu wa Chingand Wikala Chaku: Chaku chiwamp chifanyidina kufundish pa chirung cha mivu ya kumulil mwan chidi chaku cha kulejan rusangu ruwamp ra Want wa Nzamb chisu ni chisu. Anvaj avud akat kusambishang chinech nich kubudikin pamwing ni anau pachidiau akemp mu mudimu wa kulejan ku chikumbu ni chikumbu. Mushiku wa anvaj mu mudimu wa kupan uman pakad kujing uyikwashining anau kukudish kusanger ni mushiku mulong wa mudimu. Anvaj akutwish kuyilej an mutapu wa kwisamb mu kupan uman mu mulad ni mulad wa mudimu wa chingand.
4 Kuyifundish ku Shikol ya Mudimu ya Uteokras kuyikwashining kand an. Shikol yikat kuyifundish yaku yiwamp ya kwilej ni mutapu wa kutang ni kutesh. Akat kwilejang kand kwisambin piur pa Baibel, kusal kuchirikinamu kusu, ni kutakel malejan ma Baibel. Kuyifundish mud kwinoku kukutwish kuyibachikin ku mudimu wa uchibol ni kwit yisend ya mudimu wa pakampwil. Yid ya Betel yivud ni amishoner avud akat kuvurikang dichuku diau dia kusambish kusut ku Shikol ya Mudimu ya Uteokras ni amen anch shikol yiney yayikwashin kukudish yaku yiwamp.
5 Etu awonsu tudi mud kam mu makas mwa Muumb Mujim, Yehova. (Isa. 64:8, NW) Kam utalela uswapel kuumb nich. Mu kusut kwa chisu anch wawum, chikukasikan kuumb nich. Chilik chimwing ni antu. Pachidiau ansand, aswapel nakash kuyifumb—ni kwikal, ansand awamp. Mivu ya wanikanch wau yidi mivu ya kuyifundish, anch ez ikal ni chimbu cha kwijik kuwap ap kuyip. Mud nvaj mwin rukat, sambish kurutu kwa muten kuyifundish aney yaku yiwamp mu mudimu wa Ukristu.