Twikalany in kusadil akweta musangar
1 Yesu walonda anch pa chirung cha kwikalaku kwend, antu avud kakez ‘kijikap,’ mudi kamu chadinga pa chirung cha Noa. (Mat. 24:37-39) Chawiy lel, chidiap cha kushimok anch antu avud kateshinap kwau rusangu ruwamp ra Want. Ov chom ik chikutwisha kutukwash kulam musangar wetu pitusadila mudimu wetu wa kulejan?—Kus. 100:2.
2 Chakusambish, tufanyidin kulam mu manangu anch mwaad way, uruu wetu ni mudimu wetu wa kulejan yidiokil kud Nzamb. Anch muntu walik kututesh, wikalap nchik usu tusadila, chakin anch ukat kumudjibwil kulemp Yehova. Tuvurikany anch Yehova ukat kusangar patumenay tukakusal nich kushinshaman mudimu wetu wa kulejan; chikat kutukwash kulam musangar wa mukach mud in kusadil a dizu dia Nzamb.—Jak. 1:25.
3 Cha kaad, kuchidi antu akwitiya njil ya dipandish ya Yehova. Ap anch avud akutwish kwikal aburedina kusanger, kuchidi kand antu afanakena ni amikoku afanyidina kukumangej pamwing, ap katat, pitwashikena kal palemp mu chisu cha kwisudiel. Tufanyidin kudandamen kulejan, kuya “mu musumb ap mu ul” chakwel ‘kusot muntu wa kashinsh uwanyidina kutwak’—Mat. 10:11-13.
4 Tulamany Chitongijok Chiwamp: Rusangu ruyimp ra relijon wa makasu rayidimbin amwing. Akwau ikadil kal ‘aziyila ni in kujilijil’ mulong wa ditenchik dia yom dined. (Mat. 9:36) Avud adi asidinau nich ulofu, mayej, ni diking. Kutesh chinech kukutukwash kujijaman mu mudimu wetu. Tusalany usu wa kusambish misamb yisambidina milong yijim yikwatikenau nich antu katat mu mwab wetu (teritwar). Tuyikwashany kuman anch Want wa Nzamb wawiy kusu ukupwisha milong. Tusadilany Mifund ni milong yifanyidina yidia mu mikand yetu chakwel kuyishik ku michim nich rusangu ruwamp.—Heb. 4:12.
5 In kusadil dizu dia Nzamb akweta musangar akat kuvurikang chisu ni chisu anch: “Musangar wa Yehova udi mpwembu [yetu].” (Neh. 8:10, NW) Tufanyidinap kushadish musangar wetu. “Anch in chikumbu akwakany, chad kulangwish kwen kwa chisambu kukwikal kudi awiy. Pakwez anch kakwakinanyap nawamp, chad kulangwish kwen kwa chisambu kukuchirikinany ayinen.” (Mat. 10:13) Yehova ukwikadish musangar wetu usu ni kutukasikesh anch twajijaman ni kushimpish muchim mu mudimu wend utumbila, ni ukuyukish kushinshaman kwetu.