“Yinsangareshinap”
1 Mwamu mukatau kwakul antu avud ku uruu wetu mu jindond jimwing. Yom ik yikutukwasha kwipuk kwikal asudishinau ku muchim pitusankena antu akad kusanger mu teritwar? Mutapu ik tukutwisha kuvuvurish kusanger mulong wa rusangu ruwamp?
2 Lam Musangar: Kwijik chilikidinau antu kusanger kukez kutukwash kulam musangar wetu. Antu afundishau malejan ma kwikarumun (évolution) ap alidinau mu chisak chilikininga kwikalaku kwa Nzamb akutwish kwikal antu akad kuman Bibil nich usey. Amwing akutwish kwikal antu adimbau nich rubabek ramanau mu relijon. Kudi akwau, kuburen kwau kusanger kukutwish kurumburik kusul kwau kwa muchim ni kuburen kwa ruchingej. (Efe. 2:12) Amwing ‘kijap kwau’ mulong akwet milong yivud ya mwom yiyilimidina.—Mat. 24:37-39.
3 Kwikalap nchik kwakul kuyimp kwa antu amwing, tukutwish kwikal ni musangar mu mudimu wa kulejan, chitwija anch usu wetu umutumbishin Yehova. (1 Pi. 4:11) Chikwau kand, kwisambin uyakin, ap nau antu akad kuman usey wa uyakin, kukat kukasikesh ritiy retu ayinetu. Tusalany usu wa kuyiman antu a mu teritwar wetu mudi muyimenay Yehova. Ndiy wayovina antu a mu Ninive riy, antu ‘akad kwijik kushalijan pakach pa chikas chau cha katatuku ni chikas chau cha kamaku.’ (Yona 4:11) Antu ashicha mu teritwar wetu akwet kuswir kwa rusangu ruwamp! Chawiy lel, tufanyidinap kuziy pakwez tufanyidin kukimb mitapu ya kuvuvurish kusanger kwau mulong wa uruu wa Bibil.
4 Isambina Yom Yisutina Pol Pen: Pamwing ap ukutwish kujimbul mulong umwing usutina pol pen mu mazu mey ma kusambish nich ni kumwipul mwin chikumbu kulond yitonginay. Mutesha palondinay, kupwa muleja uruu ukasikeshina wa Bibil chakwel kupan chakul ku yimusumina ku muchim. Kupwa kwa mar mashikena, Kaman umwing wamekesha kunenganan kwend kwakin ku chis ni chis. Ndiy walonda anch: “Kapamp kamwing kamu, antu asambisha kulond. Twambamba nawamp nau antu avud mulong namekesha anch nibangidin mwom wau.”
5 Milong yawonsu yirishinau nich antu akez kuyipwish kudi Want wa Nzamb. Pakish kujingunin milong yirishinay nich muntu wisambina nend. Ukutwish kukwit kumurumburil uruu ukweta ruchingej wa Bibil. Anch bwat, ukutwish kusot ‘kukutesh kapamp kakwau.’—Midimu 17:32.