Rukat—Chom Chikwashina Kusong Mabuj mu Mudimu
1 “Ezany kwen kudi am, . . . am nikuninkishany kwiswedish.” (Mat. 11:28) Mazu minam masangareshina mamekesha rukat ripandakena ra Yesu mulong wa antu. Etu atushalapol in Kristu, tusotin kumwimburij Yesu mu kumekesh rukat retu mulong wa antu aziyina mulong wa mangand makad rukat. Ov, mutapu ik tukutwisha kuyikat antu mu mudimu wetu wa kulejan rusangu ruwamp?
2 Mu Kwisamb Nau: Rukat mulong wa antu ramubachika Yesu asadila chisu chin chawonsu mulong wa kulejan rusangu ruwamp. (Yohan 4:7-14) Rukat rikez katukwash kwipuk kwidjidjek mu kupan uman wa kukashimwish. Changadim umwing wa mivu musamban wapana uman uwamp kudi mband umwing wadinga ushichay nend piswimp ku rupital mu kapalikany ka kuchingedin mon. Ov, chom ik chamubachika kusal mwamu? Changadim warumburila anch: “Mband winou wading umekeshin anch usotin kamu kwijik yom piur pa Yehova.”
3 Tukutwish kumekesh kusanger kwetu kudi antu nich kusip kwa kashinsh, kwa chirungil ni kulond nich dizu dia urund. Kutesh nawamp yikatau kulond antu akwau, kujingunin maswir mau, ni kumekesh kusanger kwakin mu mutapu winou kukat kumekesh rukat. (Jinsw. 15:23) Mu kumwimburij Yesu, tufanyidin kukasikeshin uruu wa Want upanina dikasikesh ni wa ranaken ra rukat ra Yehova mulong wa antu.—Mat. 24:14; Luka 4:18.
4 Mu Kuyisadin: Yesu wadinga ni kubangin swa maswir ma ku mujimbu ma antu akwau mu mitapu yimekena patok. (Mat. 15:32) Tukutwish niyetu kukimb mitapu ya kumekesh yisal ya rukat rudimukina pitudia mu mudimu wa kulejan. Nambaz umwing wamana mband umwing ukat kurish chakwel atesha yadingau ni kumulej ku telefon. Chawiy lel, nambaz wetu wipana chakwel amukwasha kukarumun yadingau ni kumulej ku telefon. Chisal chinech cha rukat chamwinkisha mutapu wa kwisamb piur pa Bibil ni chamukwasha mband itiya dilejan dia Bibil. Mukadivar umwing ni ndiy padingay ni kuyichirikin antu wamutana muntu umwing kol kwend wajimanang kal mulong chitwamu chilemp chilimina chading chashatinang kal ku chis. Kupwa kwa kumukwash mwin chikumbu kuchidiosh, mukadivar washakama mu chitwamu chamukwashay kudiosh, wasambisha dilejan dia Bibil ni muntu winou mwin kujikitish.
5 Pitukata kusal mudimu wa kulejan tumekeshin anch tumukatin Nzamb ni mutej netu. (Mat. 22:36-40) Kumekesh kwinoku kwa rukat mu kulond ni mu yisal kukat kuyikwash antu akweta michim yiwamp kwijik anch tukwet uyakin.